1. ¿Kunatsa jaqejj parlirïtanjja?

 JEHOVÁ DIOSAJJ parlirwa lurtʼawayistu, ukajj jupan mä suma regalopawa. Niyakejjay Adán nayrïr chachajj parlir lurtʼatächïnjja, luratäkäna ukhajj alajjpachankir Awkipamp parlañwa qalltäna. Machaq arunak uñstayasaw arunakap waljaptayañapäna, ukaw taqe animalanakar suti uchañapatakejj yanaptʼpachäna (Gén. 2:19). Suma uñnaqtʼani Eva esposapamp nayrïr kuti parlkäna ukhajja, wal kusispachäna (Gén. 2:22, 23).

2. ¿Kunjamsa parlañajj nayra tiemponsa jichha tiempons jan cheqaparjam apnaqasiwayki?

² Parlañajj mä suma regalökchisa, janiw cheqaparjam apnaqasjjänti. Supayajj kʼarinakwa Evar parläna, ukham kʼarisitapatwa jaqenakajj juchararätanjja, pantjasirirakïtanjja (Gén. 3:1-4). Adanajj pantjasitanakapat Evampiru Jehová Diosampir juchañchasajja, jan cheqapar parlirïtapwa uñachtʼayäna (Gén. 3:12). Cainajj Abel jilapar jiwayasajj kʼarinakwa Jehová Diosar parläna (Gén. 4:9). Qhepatjja Caín chachat jutir Lamec chachajj poesía arunakwa arsüna, ukanjja jakkäna uka urunakan nuwasiñanak utjatapaw qhan amuyasi (Gén. 4:23, 24). ¿Kunsa jichhürunakan uñjaraktanjja? Politiconakajj janiw jaqenak nayraqatan jan walinak parlañ phenqʼasipkiti. Peliculanakansa jan wali arunakakiw istʼasjje. Escuelanakansa trabajonsa, ukham jan wali arunakakwa parljjapjjaraki. Taqe ukanakaw aka mundojj sinti jan walëjjatap uñachtʼayistu.

3. ¿Jan amuyasksna ukhajj kunas pasistaspa, ukat kuna toqenakatsa aka yatichäwin yatjjataskañäni?

³ Jan amuyasksna ukhajja, jan wali arunak istʼañarojj yatinoqtjjaksnawa, jiwasas ukhamwa parljjaraksna. Ukampis cristianonakjamajj Jehová Diosaruw kusisiyañ muntanjja, ukhamajj janiw jan wali arunak jan parlañ toqetak amuyasiñasäkiti, jan ukasti cheqapäki ukarjam parlañatakiw chʼamachasiñasa,  ukhamat Jehová Diosar jachʼañchañataki. Aka yatichäwinjja, kunjamsa predicacionansa, tantachäwinakansa, mayninakamp parlkasas sum parlsna ukwa yatjjataskañäni. Ukampis kunatsa kuntï parlktan ukajj Jehová Diosatakejj wali wakiskirïpacha uk nayraqat yatjjatañäni.

4. Malaquías 3:16 textorjamajja, ¿kunatsa kuntï parlktan ukajj Jehová Diosatakejj wali wakiskiri?

⁴ (Malaquías 3:16 liytʼäta). Parlatapan jupar ajjsarapjjatap uñachtʼayapki, sutipat lupʼipkaraki ukanakan sutinakapjja, ¿kunatsa Jehová Diosajj mä libror qellqantpacha? Kuna laykutejj kunas chuymasan utji ukwa parlatasajj uñachtʼayi. Jesusajj akham sänwa: “Mä jaqejj kunatï chuymapan phoqantatäki ukanak parlaraki” sasa (Mat. 12:34). Ukhamajj mayninakamp parlkasajj kunanaktï sisktan ukajj qhawqsa Jehová Diosar munastan ukwa uñachtʼayi. Jehová Diosasti khitinakatï jupar munasipki ukanakajj machaq mundon wiñayatak jakasipjjaspa ukwa muni.

5. 1) Parlatasampi Jehová Diosar adorañampejj niya pachpakiwa sasajj ¿kunatsa sistanjja? 2) Uñjktan uka fotonakarjamajja, ¿Jehová Diosajj parlatasamp kusisitäñapatakejj kunsa jan lurañasäki?

⁵ Jehová Diosajja, kunanaktï parlktan ukarjamaw adoracionas katoqasiniti janicha uk amti (Sant. 1:26). Jehová Diosar jan munasiri walja jaqenakajja, parlkasajj mayninakaruw usuchjapjje, janiw munasiñamp parlapkiti, jachʼa jachʼa tukupjjaraki (2 Tim. 3:1-5). Jiwasajj janipuniw kunäkipansa jupanakjamäñasäkiti, jan ukasti kunanaktï parlktan ukampejj Jehová Diosajj kusisitakïspa ukwa muntanjja. Ukampis maynitejj tantachäwinakansa predicacionans wali suma arunïspa, ukampis familiapampejj wali qhorüspa, janirak munasiñamp parlkaspa ukhajja, ¿jupampejj Jehová Diosajj kusisitakïspati? (1 Ped. 3:7).

6. ¿Kimberly kullakan suma parlirïtapat kunas pasäna?

⁶ Jiwasatï sum parlañatak chʼamachasiñäni ukhajja, mayninakajj “Diosar servir jaqempi Diosar jan servir jaqempejj jan igualä[pjjatapwa]” uñjapjjani (Mal. 3:18). Mä arunjja, jiwasajj Jehová Diosar servirïtaswa qhan  amuyapjjani. Kunas Kimberly b kullakarojj pasäna uk jichhajj uñjañäni. Escuelankir mä compañerapamp mä trabajo lurapjjäna ukhajja, jan mayninakjamätapwa compañerapajj amuyäna. Janiw mayninakar kʼumirïkänti, wali munasirirakïnwa, janirakiw jan wali arunaks parlkänti. Compañerapajj kunatsa jupajj ukhamäna ukwa yatiñ munäna. Tiempompejja Bibliat yateqañwa qalltäna. Kunjamsa parltan uk uñjasin jaqenakajj cheqa yatichäwinak yatiñ munapki ukhajja, ¡Jehová Diosajj wal kusisi!

7. ¿Kunjamtï parlkta ukajj kunatakis yanaptʼiristam?

⁷ Parlatasajj Jehová Diosar jachʼañchaspa, jilat kullakanakamp suma amigöñatak yanaptʼistaspa uk taqeniw muntanjja, ukatwa kunanakas parlatasan yateqaskayäskakiñatakejj yanaptʼistaspa uka toqet mä qhawqhanak uñjañäni.

8. Jesusajj predicacionan wali yateqaskayänwa, ¿kunjamsa jupat yateqassna?

⁸ Jan wal parlapkätam ukhajja, munasiñampi respetompi parlañamawa. Jesusajj aka oraqenkkäna ukhajja, “aka jaqejj jiljas manqʼeriwa, vino umiriwa”, Diablon serviripawa, sábado ursa janiw respetkiti, Dios contra jan wal parliriwa sasaw jaqenakajj kʼarintapjjäna (Mat. 11:19; 26:65; Luc. 11:15; Juan 9:16). Ukham satpachasa, Jesusajj janipuniw jan wali arunakamp kuttʼayirïkänti. Maynitï jan munasiñamp parlistani ukhajja, Jesusatwa yateqasiñasa, janiw ukhamat ukham kuttʼayañasäkiti (1 Ped. 2:21-23). Cheqas awisajj ukhamat ukham kuttʼayañjamäspawa (Sant. 3:2). ¿Kunas jan ukhamäñatakejj yanaptʼistaspa?

9. ¿Predicacionan colerat jan parlañatakejj kunas yanaptʼistaspa?

⁹ Maynitejj predicacionan jan wal parlätam ukhajja, jan colerasimti. Sam sat jilatajj akham siwa: “Uka jaqen cheqa yatichäwinak istʼañapajj wakisiwa, cambiarakispawa sasin amuyañatakiw chʼamachasta” sasa. Inas coleratäskäna ukhapun jupar visitstan, inas jiwasatak ukat coleraschïna. Colerat mä jaqempitï predicacionan jikisiñäni ukhajja, Lucía kullakjamaw lursna. Jupajj colerat mä jaqemp jikisisajj jan colerasiñataki, munasiñampi, respetompi parlañatak yanaptʼita sasaw Jehová Diosar mä rato orasi.

10. 1 Timoteo 4:13 textorjamajja, ¿kunatakis chʼamachasiñasa?

¹⁰ Suma yatichirïñatak chʼamachasiñamawa. Timoteojja predicañatakejj wali experiencianïnwa. Ukampis suma yatichirïñatakejj chʼamachasiskakiñapänwa (1 Timoteo 4:13 liytʼäta). ¿Kunjamsa jiwasajj jukʼamp suma yatichirïsna? Wali sumwa wakichtʼasiñasa. Ukatakejj wali suma herramientanakaw utjistu: Sum liytʼañataki yatichañataki chʼamachasiñäni  sat folleto, Cristianjam Jakañataki ukat Yatiyañataki: Tantachäwin yatjjatañataki siski ukanjja, “Sum yatichañatak chʼamachasiñäni” sat secciona. ¿Uka herramientanakamp yanaptʼayasisktati? Jumatï sum wakichtʼasïtajja, janiw sint ajjsarjjätati, jan payachasisaw parltʼarakïta.

11. ¿Suma yatichirïñatakejj kunsa yaqhep jilat kullakanakajj lurawayapjje?

¹¹ ¿Suma yatichirïñatakejj kunsa luraraksna? Congregacionankir mayni jilat kullakanakajj kunsa lurapjje uk uñjañasawa. Jupanakatwa yateqtʼasiñasaraki. Párrafo 9 ukan parlaniwayktan uka Sam jilatajja, suma yatichirïñatakejj kunsa yaqhep jilat kullakanakajj lurapjje ukwa uñji. Wali atencionampiw jupanakar ischʼuki, kunjamsa yatichapjje uk yateqasiñatakiw chʼamachasiraki. Talía sat mä kullakajja, suma discursantëpki uka jilatanakajj kunjamsa arstʼapjje, uk wali atencionampiw istʼi. Ukhamatwa predicacionan kunanaksa jaqenakajj jisktʼasipjje uka toqet parlañsa, amuytʼayañsa yateqawayi.

12. ¿Kunanak lurañas yaqhepatakejj chʼamakejja?

¹² Tantachäwinakanjja, taqeniw cantañatakisa sum wakichtʼasisin arstʼañatakis chʼamachassna (Sal. 22:22). Yaqhepatakejj tantachäwinakan cantañasa comentarionak arstʼañas chʼamakiwa. ¿Jumarojj ukham pasirïtamti? Ukhamächi ukhajja, kunas yaqha jilat kullakanakarojj jan ajjsaras cantañatakisa comentarionak arstʼañatakis yanaptʼawayi uk yatjjatañaw yanaptʼiristam.

13. ¿Kunas tantachäwinakan taqe chuyma cantañatakejj yanaptʼiristam?

¹³ Taqe chuyma cantañamawa. Tantachäwinakanjja, Jehová Diosar jachʼañchañatakiw canttanjja, uk janipun armamti. Sara kullakat parltʼañäni. Janis suma cantirïkaspa ukhamsa jupajj amuyaskchejja, cantasaw Jehová Diosar jachʼañchañ muni. Ukatwa tantachäwitak wakichtʼaskasajj cancionanak cantañatak wakichtʼasiraki. Cancionanak ensaykasajja, cancionanakan letrapampi, kuna toqetsa tantachäwin parlasini ukampejj kunansa niya kikpakïpjje uk amuytʼañatakiw chʼamachasi. Kullakajj akham siwa: “Cancionanakan letrapat lupʼkta ukhajja, sumti cantaskta janicha uka toqet janiw llakisjjti” sasa.

14. Jumatï ajjsarirïstajja, ¿kunas tantachäwinakan comentarionak arstʼañatakejj yanaptʼiristam?

¹⁴ Comentarionak arstʼañamapuniwa. Cheqpachansa comentarionak arstʼañajj walja jilat kullakanakatakejj chʼamakiwa. Párrafo 11 ukan parlaniwayktan uka Talía kullakajj akham siwa: “Janis arujan amuyaskchejja, jaqenak nayraqatan parlañ walpun ajjsarayasta. Ukhamajj comentarionak arstʼañajj nayatakejj wali chʼamawa” sasa. Ukampis janiw ukajj comentarionak arstʼañatakejj kullakarojj  jarkʼkiti. Tantachäwinakatak wakichtʼaski ukhajja, jisktʼanakar jukʼa arunakampi, puntopar jaysañatakiw chʼamachasi. Kullakajj akham sarakiwa: “Ukham puntoparu, mä qhawqha arunakampi qhan arstʼatajajj walikïskiwa, kuna laykutejj Yatiyañataki revista sarayir jilatajja, ukham comentarionakwa muni” sasa.

15. Comentarionak arstʼañ toqetjja, ¿kunsa amtañasa?

¹⁵ Yaqhep jilat kullakanakajj janis ajjsarirïpkchejja, janiw comentarionak arstʼapkiti. ¿Kunatsa? Julieta kullakajj akham siwa: “Comentarionakajajj janis suma wakichtʼatäkaspa, janis sumäkaspa ukhamwa awisajj amuyasta. Ukatwa awisajj comentarionak arstʼañajj nayatak chʼamakejja” sasa. ¿Jumarojj ukham pasaraktamti? Ukhamächi ukhajja, akwa amtañama: Jehová Diosajj qhawqtï puedkta ukarjam chʼamachasiñamwa muni. c Awisajj ajjsarayaskstansa, qhawqsa comentarionak arstʼañatak chʼamachastan uk wali valoranitwa Jehová Diosajj uñji.

16. ¿Kuna kasta arunaksa apanukuñasa?

¹⁶ Taqe kasta “usuchjir arunak” apanukuñamawa (Efes. 4:31). Kunjamtï uñjaniwayktanjja, mä cristianojj janipuniw jan wali arunak parlañapäkiti. Ukampis jan amuyasisaw usuchjir arunak parljjsna, ukatwa wal amuyasiñasa. Yaqha costumbren jaqenakatsa, yaqha markankir jaqenakatsa janiw jan wal parlañasäkiti, janirakiw kunanakatï mayninakar chuym ustʼaykaspa, jiskʼachkaspa ukanak parlañasäkiti. Mä jilatajj akham siwa: “Awisajja parlatajajj janis mayninakar kuns kamachkaspa, lartʼayañatakikis parlkirista ukhamwa amuyirïta, ukampis parlatajajj mayninakaruw chuym ustʼayirïna. Esposajan yanaptʼapampejja, marat maratjamaw cambiawayjjta. Kunapachatï jupatsa yaqha jaqenakats jan wal parlirïta, chuyma ustʼayir arunak parlirïta ukhajja, naya saparukiw ewjjtʼirïtu” sasa.

17. Efesios 4:29 textorjamajja, ¿kunjamsa mayninakar chʼamañchtʼsna?

¹⁷ Parlatamajj chʼamañchtʼkirïñapawa. Mayninakat jan wal parlaskañat sipansa, felicittʼañatak chʼamachasim (Efesios 4:29 liytʼäta). Janiw israelitanakjamäñ munktanti. Yuspärañatakejj walja razonanakapas utjkchïnjja, sapa kutiw quejasipjjäna. Cheqas ukham quejasirinakar uñjasinjja, mayninakajj quejasirëjjapjjarakispawa. Tunka uñaqerinakan jan wali yatiyäwinak apanipjjatap laykojja, “taqe israelitanakaw Moisés [...] contra parlañ qalltapjjäna” (Núm. 13:31-14:4). Ukampis mayninakar felicittʼañajja, wal jupanakar chʼamañchtʼi. Jefté chachan phuchapat amuytʼañäni. Juparojj amiganakapaw felicittʼapjjäna, chʼamañchtʼapjjarakïna, ukaw asignacionapan  serviskakiñapatakejj yanaptʼäna (Juec. 11:40). Párrafo 13 ukan parlaniwayktan uka Sara kullakajj akham siwa: “Mayninakar felicitʼtan ukhajja, Jehová Diosajj jupanakar wal munasitapa, markapans wali valoranïpjjatap amuyasipjjañapatakiw yanaptʼtanjja” sasa. Ukhamajj mayninakar felicittʼapunim.

18. Salmo 15:1, 2 qellqatarjamajja, ¿kunatsa kunatï cheqäki ukpun parlañasa, ukat kunjamsa uk lursna?

¹⁸ Kunatï cheqäki ukpunwa parlañama. Janitï cheq parlkañänejja, janiw Jehová Diosarojj kusisiykañäniti, jupajj taqe kasta kʼarisiñanakwa uñisi (Prov. 6:16, 17). Jaqenakatakejj kʼarisiñajj walikïskchisa, jiwasajj Jehová Diosjam amuyañwa muntanjja (Salmo 15:1, 2 liytʼäta). Cheqas jiwasajj janiw jan phenqʼan kʼarinak parlkañäniti, ukampis mayninakan mayj amuyapjjañapatak kunatï cheqäki uk imtʼañajj janiw walïkarakiti.

19. ¿Kuna toqetsa amuyasiñasaraki?

¹⁹ Janiw arunak apnaqerïñamäkiti (Prov. 25:23; 2 Tes. 3:11). Párrafo 15 ukan parlaniwayktan uka Julieta kullakajja, kunjamsa arunak apnaqerinakajj jupar jan waltʼayi uka toqetwa parli, jupajj akham siwa: “Maynir yaqhanakjjat parlir istʼañajja, aynachtʼayituwa, janirakiw juparojj confiyjjti. ¿Janit nayjjat ukham parlkarakpachäni?” sasa. Jumatï mayniru mayninakjjat parlir istʼäta ukhajja, ratukiw yaqha toqet parlañama, kunatï chʼamañchtʼkaspa ukwa parlañama (Col. 4:6).

20. ¿Kun lurañatakis jumajj chʼamachasïta?

²⁰ Akapachanjja jan walinak parlir jaqenak taypinwa jaktanjja. Ukatwa kunjamtï Jehová Diosajj parlañas munki ukham parlañatak chʼamachasiñasa. Parlañajja Jehová Diosan mä suma regalopawa, kunanaksa parlasktan ukajj jupatakejj wali importantewa, uk amtapjjapuniñäni. Jiwasatï predicacionansa, tantachäwinakansa, mayninakamp parlkasas Jehová Diosar parlatasamp jachʼañchañatak chʼamachasiñäni ukhajja, jupajj bendisistaniwa. Jan walinak parlir jaqenakajj jan utj-jjani ukhajja, Jehová Diosar parlatasamp jachʼañchañajj jukʼamp facilakëjjaniwa (Jud. 15). Ukañkamajj kuntï salmistajj siskäna uk lurañatak chʼamachasipjjañäni. Jupajj akham sänwa: “Lakajan arsutanakapasa, […] jumar kusisiypan, Jehová Dios Tata” sasa (Sal. 19:14).