1, 2. Akapachanjja, ¿kunatsa pobrenakajj utjakipunini?

JICHHÜRUNAKANJJA kunayman jan walinakaw qollqe toqet utji. Walja wayn tawaqonakatakejj trabajonïñajj wali chʼamawa. Yaqhepajj qamir markanakar sarjjañ kunwa amtjjapjje. Uka qamir markanakansa pobre jaqenakajj utjarakiwa. Akapachanjja, qamirinakajj sapürutjamaw qamiriptapjje, pobrenakasti sapürutjamaw pobreptapjjaraki. Jichhak yatjjataski ukarjamajja, mä qhawqhanikiw oraqpachankir jaqenakajj qhawqha qollqenïpkitï ukha qollqenïpjje. Cheqas ukajj janiw sum yatiñjamapunïkiti. Ukampis waranq waranqa jaqenakajj wali pobrëpjjewa, yaqhepajj walja qollqenïpjjarakiwa, qollqepajj wawanakapan wawanakapatakis utjaskakispawa. Jesusajja, uka toqet parlkasajj akham sänwa: “Pobrenakajj jumanakamp chikäskapuniwa” sasa (Mar. 14:7). ¿Kunatsa uka jan walinakajj utjpacha?

² Qollqe toqet jan waltʼañanakajj janiw utj-jjaniti, Diosan Reinopaw ukanak chhaqtayjjani, Jesusajj uk sum yatïna. Apocalipsis 18:3 textonjja, ‘comerciantenakatwa’ parli, jupanakajja walja qollqe ganañ amtampi negocionak luririnakäpjjewa. Uka comerciantenakasa, politiconakasa, kʼari religionanakasa Supayan apnaqatäpjjewa. Ukatwa Diosan servirinakapajj politicarusa kʼari religionarus jan mitisipkiti. Ukampis jupanakat jilapartejj janiw walja qollqe  ganañ amtampi negocio luririnakat jitheqtapkapuniti.

3. ¿Kuna jisktʼanakarus qhanañchaskañäni?

³ Diosan servirinakapajja, walja qollqe ganañ amtampi negocionak lurañar kunjamsa uñjasktan uk amuytʼasiñasawa. Akham jisktʼasiñasawa: “Kunanakatï utjkitu ukampejj ¿kunjamsa Diosar taqe chuym servirista? Walja qollqe ganañ amtampi negocionak lurañar jan mitisiñatakejj ¿kunsa lurirista? Diosan servirinakapajja, ¿kunjamsa Jupar taqe chuyma confiyapjjatap uñachtʼayapjje?” sasa.

4, 5. 1) Jesusajj parlkäna uka mayordomorojj ¿kunas pasäna? 2) ¿Kamsasas Jesusajj discipulonakapar ewjjtʼäna?

⁴ (Lucas 16:1-9 liytʼañataki). Jesusajj jan wal lurir mayordomot parlkäna ukajj wal lupʼiyistu. Jaqenakajja, “janiw utjirinakam sum apnaqkiti” sasaw uka mayordomon uywiripar yatiyapjjäna, ukatwa trabajot jaqonukutäñapäna. * Ukhamïpansti, mayordomojj wal amuytʼasïna, jan trabajonëjjani ukhajj khitinakas yanaptʼapjjaspa ukanakan amigoparuw tuküna. Uka mayordomot parlkasajja, ¿aka jan wali pachan jakañatakejj jan walinak lurasipkasmawa sañti Jesusajj discipulonakapar munpachäna? Janiwa. Antisas ‘akapachankiri’ jaqenakawa, mä arunjja Diosar jan servirinakaw uka jan walinak lurapjje sasaw säna. Jesusajj mä wali wakiskir yatichäwi yateqapjjañapatakiw uka mayordomot parläna.

⁵ Jan trabajonïñajj mayordomotak chʼamakïnwa. Jesusan jilaparte discipulonakapatakejj ukhamarakiw akapachan jakañajj chʼamaspäna, Jesusajj uk sum yatïna. Ukatwa akham ewjjtʼäna: “Akapachan kunatï valoranïki ukanakamp amigonak jikjjatapjjam” sasa. Ukhamajj “akapachan kunatï valoranïki” ukanak tukusispa ukhajja, Jehová Diosampi Jesusampiw ‘wiñay qamasiñajj utjki uka cheqanakar katoqapjjaspäna’. ¿Kunsa Jesusan ewjjtʼapat yateqsna?

6. Negocionak lurañajj janiw Diosan amtapäkänti sasin ¿kunatsa sissna?

⁶ “Akapachan kunatï valoranïki” sasajj kamsañsa munäna uk Jesusajj janiw qhanañchkänti. Ukampis negocionak lurañajj janiw Diosan amtapäkänti, Bibliajj uk sum qhanañchi. ¿Kunatsa ukham sistanjja? Edén jardinanjja, Diosajj kunatï jakañatak munaskäna ukanakat jukʼampwa Adanampir Evampirojj churäna (Gén. 2:15, 16). Nayrïr patak maranakan jakiri ajllit cristianonakasa, espíritu santo katoqapkäna ukhajj “janiw maynis utjirinakapat nayankiw sirejj utjkänti, taqe kunanakapas taqenitakïnwa” (Hech. 4:32). Jutïr urunakanjja, jaqenakajj kunanakatï oraqen achoqki ukanakatwa manqʼasipjjani sasaw Isaías profetajj sarakïna (Isa. 25:6-9; 65:21, 22). Uka uru puriniñapkamajja, Jesusan discipulonakapajj “kunatï akapachan valoranïki” ukanakampi jakañatakisa Diosatakjam jakañatakis ‘yatiñampiw’ sarnaqapjjañapäna.

7. Lucas 16:10-13 texton ¿kuna ewjjtʼas utji?

⁷ (Lucas 16:10-13 liytʼañataki). Jesusajj parlkäna uka mayordomojja, munañap thaqasakiw amigonakanïñ munäna. Ukampis jan jupjam lurapjjañapatakiw Jesusajj discipulonakapar ewjjtʼäna. Antisas Jehová Diosampina Jesusampin amigopäpjjañapatakiw chʼamachasipjjañapäna. Lucas 16:10-13 textorjamajja, ‘kunatï akapachan valoranïki ukanakjja’, mä arunjja kunanakatï utjkistu ukanakjja amuyumpiw apnaqañasa. Diosarojj taqe chuymat servisktan janicha ukajj ukhamatwa amuyasini.

8, 9. ¿Kunjamsa yaqhep jilat kullakanakajj yatiñanïpjjatap uñachtʼayapjje?

⁸ Jesusajj siskäna ukarjam oraqpachan yatiyasiñapatakejja, kunjamsa kunatï utjkistu ukampejj  yanaptʼasktan ukanwa Diosar taqe chuymat servisktan janicha ukajj amuyasini (Mat. 24:14). Kunjamsa yaqhep jilat kullakanakajj uk lurapjje uk uñjañäni. India markanjja, mä jiskʼa imillitajj mä cajitaruw qollqep sapa kuti uchirïna. Janiw anatañanaksa alasirïkänti. Cajitajj phoqäjjäna ukhajja, Diosan arunakap yatiyasiñapatakiw churjjäna. Uka pachpa markanjja, mä jilatajj coco sat frutwa yapuchi. ¿Kunjamsa uka jilatajj yatiñanïtap uñachtʼayi? Jupajj, malayálam arur jaqokipaski uka oficina de traducción utaruw walja frutanak apayi. Jilatajj siwa: “Niyakejjay frutajj uka utan munaschejja, qollqe churañat sipansa coconak apayañaw nayatakejj wakiskirejja” sasa. Grecia markan jakasiri jilat kullakanakajj ukhamarakiw lurapjje. Jupanakajj aceite de oliva, queso yaqha ukhamanak sapa kutiw Betelar apayapjje.

⁹ Jichhajj Sri Lanka markat sarjjasin yaqha markan jakasir jilatat parltʼarakiñäni. Jupajj markapanjja, utani oraqeni ukhamawa. Jilat kullakanakajj utapanwa tantachasipjje, jachʼa tantachäwinaksa apapjjaraki, Diosar precursorat servir jilat kullakanakas ukanwa alojtʼasipjjaraki. Jilatajj qollqepsa gastkchejja, jukʼa qollqenïpki uka jilat kullakanakarojj ukhamatwa yanaptʼi. Diosan arunakap yatiyañajj jarkʼatäki uka markanakanjja, jilat kullakanakajj utanakapanwa tantachasipjje. Ukhamatwa jukʼa qollqen precursoranakasa jilat kullakanakas alquiler jan pagasaki tantachasipjje.

10. ¿Kunjamsa wajjtʼasirïñajj yanaptʼistaspa?

¹⁰ Kunjamtï uñjaniwayktanjja, Diosan servirinakapajj kunanakapatï utjki ukampi yanaptʼasajj ‘jiskʼa luräwinakansa sum phoqapjje’ (Luc. 16:10). Ukham lurasajj wali kusisitäpjjewa, kunatï cheqpachapun valoranïki ukanakwa jikjjatapjje (Luc. 16:11). Mä kullakajja, Diosan Reinopat yatiyasiñapatakejj walja maranakaw qollqemp yanaptʼi, ukham lurasajj walja bendicionanakwa katoqawayi. Jupajj akham siwa: “Jaqe masijar jukʼamp yanaptʼañatak chʼamachasta ukhajja, jukʼampiw perdonañ yateqta. Paciencianïñatakisa, chuym jan ustʼayasiñatakisa, ewjjanak katoqasiñatakis yanaptʼarakituwa” sasa. Mayninakar wajjtʼañajja, Diosar jukʼamp serviñatakiw yanaptʼitu sasaw yaqhep jilat kullakanakajj sapjjaraki (Sal. 112:5; Pro. 22:9).

11. 1) ¿Kunatsa wajjtʼasirïñajj ‘yatiñanïtaswa’ uñachtʼayi sasin sistanjja? 2) ¿Kunas Diosan markapan taqenis mä igualak katoqañasatakejj yanaptʼaski? (Página 7 ukankir foto uñjjattʼäta).

¹¹ ¿Kunjamsa yatiñanïtas uñachtʼayaraksna? Kunatï utjkistu ukanakampejj yaqhanakaruw Jehová Diosan arunakap yatiyasipkakiñapatak yanaptʼsna. Yaqhep jilat kullakanakajj qollqenïsipkiwa, ukampis janiw precursorat serviñsa, ni yaqha markanakar sarañsa puedipkiti. Ukhamäkchisa, yatiyasiñapatak qollqempi yanaptʼasajj wali kusisitäpjjewa (Pro. 19:17). Jiwasajj ukhamarakiw qollqempi yanaptʼasajj qellqatanak lurasiñapataki, jaqenakar churasiñapatakis yanaptʼtanjja. Pisinkir markanakan Diosan arunakap istʼañ munapki uka cheqanakan yatiyasiñapatakis yanaptʼaraktanwa. Congo, Madagascar, Ruanda uka markanakanjja, jilat kullakanakasajj manqʼti familiapatak alapjjani, jan ukajj Biblcha alapjjani ukwa nayra maranakajj ajllipjjañapäna. Uka markanakanjja mä semana, jan ukajj mä phajjsi trabajit qollqempiw Biblia  alapjjañapäna. Ukampis yaqha markankir jilat kullakanakan qollqempi yanaptʼapjjatap laykuw taqenis mä ‘igualak’ katoqjjtanjja. Ukhamatwa Diosan markapanjja Bibliajj yaqha arunakar jaqokipasi, taqenirus churasiraki. Diosar uñtʼañ munirinakas Biblianak katoqapjjarakiwa (2 Corintios 8:13-15 liytʼañataki). Ukhamatwa churirinakasa katoqerinakasa Diosan amigopäpjjaspa.

12. ¿Kunjamsa Abrahán chachajj Diosar confiyatap uñachtʼayäna?

¹² Walja qollqe ganañ amtampi negocio lurañanakat jitheqtasa, kunatï cheqapun valoranïki ukanak thaqasaw Diosan amigoparakïsna. Diosar taqe chuyma servir Abrahán chachajj ukwa luräna. Niyakejjay Jehová Diosan amigopäñ munchïnjja, Diosar taqe chuymaw istʼäna. Ur sat qamir markapsa jaytjjänwa, ukatjja carpanakanwa jakasjjäna (Heb. 11:8-10). Kunanakapatï utjkäna ukanakar confiyañat sipansa, Jehová Diosaruw taqe chuyma confiyäna. Ukatwa wali qamir markan jakkasas qamiriptañ jan thaqkänti. Ukampis thaqaspäna ukhajja, Diosar jan confiyatapwa uñachtʼayaspäna (Gén. 14:22, 23). Walja maranak qhepatjja, Jesusajj Diosar ukham confiyañapatakiw mä qamir waynar chʼamañchtʼäna, jupar akham sänwa: “Jumatejj perfectöñ munsta ukhajja, kunatejj utjktam ukanak aljir saram, pobrenakar churanjjam, ukhamatwa alajjpachanjja suma imatanakamajj utjani. Ukatjja jutam, nayar arkita” sasa (Mat. 19:21). Uka waynajj janiw Abrahán chachjamajj Diosar confiykänti, ukampis uka tiempon jakir yaqhep jaqenakajj Jehová Diosar taqe chuymaw confiyapjjäna.

13. 1) ¿Kunsa Pablojj Timoteor säna? 2) ¿Kunjamsa jiwasajj Pablon ewjjtʼaparjam sarnaqaraksna?

¹³ Timoteojj ukhamarakiw Diosar taqe chuyma confiyäna. Ukatwa Pablojj ‘Cristo Jesusan mä suma soldadopätawa’ sasin jupar säna. Ukatsti akham sarakïnwa: “Maynitejj soldadjam serviskchejja, janiw negocionak lurañar mitiskiti, jan ukasti khititejj soldadjam katoqki ukar kusisiyañatakiw chʼamachasi” sasa (2 Tim. 2:3, 4). Jichhürunakanjja, Jesusan arkirinakapajj uka ewjjarjam sarnaqañatakiw wal chʼamachasipjjaraki. Jupanak taypinjja mä millonatsa jukʼamp jilat kullakanakaw precursorat servisipki. Akapachajja, jukʼamp qollqenïñatakiw jaqenakar chʼamañchi, ukampis cristianonakajj jan manunïñatakiw chʼamachasipjje, ukhamatwa qollqe maytʼirin esclavopar jan tukupkiti (Pro. 22:7). Supayajja, akapachan walja qollqe ganañatak chʼamachassna, tiempsa ukar aptʼassna ukwa muni. Yaqhepajja, utanak utachañataki, auto alasiñataki, wali sum casarasiñataki, jan ukajj universidadan estudiañatakiw bancot walja qollqe maytʼasipjje. Jiwasatï jan amuytʼasis bancot qollqe maytʼassna ukhajja, phoqañajj chʼamäjjaspawa, walja maranakaw manuni uñjassna. Ukampis ‘amuytʼasisa’ kuns lurañäni ukhajja, kunatï utjkistu ukampejj kusisitakiw jakasiñäni, janirakiw manunakansa uñjaskañäniti. Ukhamatwa akapachan esclavopar jan tukkañäniti, jan ukasti taqe chuymaw Diosar serviñäni (1 Tim. 6:10).

14. ¿Kunas jakäwisan nayrankañapa? Kunsa yaqhep jilat kullakanakajj lurapjjäna uk qhanañchtʼma.

¹⁴ Kunatï utjkistu ukampejj kusisita jakasiñ munstanjja, Diosan Reinopaw jakäwisan nayrankañapa. Uka toqet amuytʼañatakejj mä chacha warmit parltʼañäni. Jupanakajja negociopan walja qollqwa ganapjjäna, ukampis wasitampiw precursorat serviñ munapjjäna. Ukatwa uka negociopsa, lanchapsa yaqha cosasanakapsa alj-jjapjjäna. Jupanakajj Warwick, Nueva York markan Betel utajj utachaskäna ukar yanaptʼir sarañwa amtapjjäna. Ukhamatwa phuchapampi tollqapamp chika ukan trabajipjjäna, ukajj jupanakatak wali kusiskañänwa. Jilatan awk taykapampis walja semananakaw ukan trabajipjjarakïna. Jichhajj Colorado (Estados Unidos) sat markan jakasiri mä precursorat  parltʼarakiñäni. Jupajj mä banconwa trabaji, ukampis janiw jornälpach trabajkiti. Sum trabajitapatjja jefenakapajj jornälpach trabajiñapwa munapjjäna, sueldopsa pä ukhampwa irjjatañ munapjjäna. Ukampis kullakajj janiw uk munkänti, iyawsaspäna ukhajj janiw precursorat sirvjjaspänti. Oraqpachanjja, waljaniw uka jilat kullakanakjamajj ukham lurapjjaraki. Jakäwisantï Diosan Reinopajj nayrankchejja, Diosampi sum apasiñasa, kunatï cheqapun valoranïki ukanakas jiwasatak wali wakiskirïniwa.

15. ¿Kunas taqe kunat sipansa jukʼamp kusisiyistaspa?

¹⁵ Qamirinakarojj Diosaw bendisi sasin janiw sisksnati, Jehová Diosajj khitinakatï ‘suma luräwinakan qamirïpki’ ukanakaruw bendisi (1 Timoteo 6:17-19 liytʼañataki). Italia markan jakasiri Lucia kullakat parltʼañäni. * ‘Albania markanwa Diosan arunakap yatiyirinakajj munasi’ sasin istʼasajja, uka markaruw 1993 maran saräna. Janis trabajonïkchïnjja Diosar taqe chuymaw confiyäna. Albanés aru parlañsa yateqarakïnwa, ukhamatwa sojjta tunkanirojj bautisasipjjañapatak yanaptʼäna. Yatiyktan uka cheqanakan inas jan ukhamäkchiti. Ukampis Diosar uñtʼapjjañapataki yaqhanakar yanaptʼañäni ukhajja, kunatï valoranïki ukanaksa wiñayatak imkatksna ukhamäniwa (Mat. 6:20).

16. 1) ¿Kunas walja qollqe ganañ amtampi negocio lurañanakampejj pasani? 2) Akapachan kunatï valoranïki ukanakajj jutïrin janiw valoranëjjaniti, ¿ukhamajj kunjamsa ukanakar uñjañasa?

¹⁶ Jesusajja, “akapachan kunatï valoranïki” ukanakajj tukusispawa sasin janiw siskänti, jan ukasti tukusiniwa sasaw säna (Luc. 16:9). Jichhürunakanjja walja banconakaw jan qollqenëjjasajj jistʼantasjjapjje, qollqet pistʼañas walja markanakanwa utjaraki. Ukampis jutïrinjja, ukanakat sipansa jukʼamp jan waltʼañanakaw utjani. Walja qollqe ganañ amtampi negocio lurañanakasa, politicasa, religionanakas Supayan apnaqatäpjjewa, ukanakajj jutïrin qʼalaw aynachtʼapjjani. Qorisa qollqes jichhürunakan wali valoraniwa, ukampis jutïrinjja janiw ukhamäjjaniti sasaw Ezequiel, Sofonías profetanakajj qellqapjjäna (Eze. 7:19; Sof. 1:18). Amuytʼañataki, jiwasatï Diosat armtʼasisa, “akapachan kunatï valoranïki” ukanak wal imkatsna, ukampis jiwañas yatissna ukhajja, ¿kunjamakis jikjjatassna? Kunjamtï mä jaqejj mara mara trabajit qollqep falsokamakïtap amuyasi ukhamäspawa (Pro. 18:11). Akapachan kunatï valoranïki ukanakajj tukusirikiwa. Ukhamajj kunanakatï utjkistu ukanakjja, Jehová Diosampina Jesusampin amigopäñatakiw apnaqañasa. Kunanaktï Diosan Reinopar yanaptʼañatak lurkañäni ukanakajja, Jehová Diosan amigopäñatakiw yanaptʼistani.

17, 18. ¿Kunsa Diosan amigonakapajj jutïrin katoqapjjani?

¹⁷ Diosan Reinopajj aka oraqjjar apnaqjjani ukhajja, janiw khitis alquiler pagjjaniti, qollqsa banconakat maytʼasjjaniti, janirakiw doctoranakas munasjjaniti, ni qollanak alañas munasjjaniti. Manqʼañas jilarkiriw taqenitak inaki utjani. Diosan servirinakapajja, kuntï oraqejj achoqkani ukwa manqʼasipjjani. Janiw qollqsa ni qorsa yaqha ukham suma qalanak imañas munasjjaniti. Janirakiw ukanak alasinsa qollqe imkañäniti, jan ukasti kʼachachtʼasiñatakiw ukanak apnaqañäni. Utanaksa wali suma maderanakampi, metalanakampi, suma qalanakampiw utachasiñäni. Amigonakasas jan qollqe mayisakiw taqe chuyma yanaptʼapjjestani. Oraqen achoqkani ukajj taqenitakïniwa.

¹⁸ Jehová Diosana Jesusan amigopäpktan ukanakajja, janiw ukanakak katoqkañäniti, jan ukasti jukʼampwa katoqañäni. Diosan servirinakapajj taqeniw Jesusan aka arunakap istʼasajj kusisipjjani, jupajj akham saniwa: “Jutapjjam, Awkijan bendisitanaka, akapachajj qalltkäna uka tiempotpach jumanakatak wakichatäki uka Reino katoqapjjam” sasa (Mat. 25:34).