UKA arunakajj cheqäskapunïtap ¿kunjamatsa yatsna? Bibliaw ukham qhanañchi, 1 Pedro 5:7 qellqatanjj akham siwa: “Taqe llakisiñanakamsti Diosar jaytapjjarakim, jupasti jumanakatjja llakisirakiwa” sasa. Jiwasanakat llakisitap ¿kunjamanakatsa Jehová Diosajj uñachtʼayi?

Jehová Diosajja, mä suma amigor uñtasitawa. Khitinakatï wajjtʼasirïpki ukat munasirïpki ukanakajja, wali suma amigoruw tukupjje. Jehová Diosajja mä suma amigor uñtasitarakiw wali munasiñampi ukat khuyapayasiñampi sapüru taqenir uñjistu. Bibliajj akham siwa: “Jupasti taqenitakiw intsa jalsuyani, ukhamarak aski jaqenakatakisa, jan aski jaqenakatakisa jallsa puriyaniraki” sasa (Mat. 5:45). Sapüru Intin mistunitapatsa, jallun puritapatsa ¿kuna askinakas jikjjatasi? Diosajja ukanak toqew ‘suma cosechanaksa ukat walja manqʼañanaksa jiwasanakan kusisiñasataki churistu’ (Hech. 14:17). Jïsa, Diosaw aka Oraqen walja manqʼañanak achuyaski, ukhamat kusisit jakasiñasataki.

Ukampis ¿kunatsa waljanejj manqʼatjam tʼaqhesipjje? Marka apnaqerinakajj jaqenakar yanaptʼañat sipansa, jupanakakiw qollqechasipjje ukat askinakapak thaqhapjje, ukatwa waljanejj manqʼatjam tʼaqhesipjje. Ukampis Diosajj niyaw uka jan walinak askichjjani, uka apnaqerinak lantejj alajjpachankir Reinopaw aka Oraqjjar apnaqjjani, uka Reinon apnaqeripajj Jesusawa, ukanjja janiw khitis manqʼatjam tʼaqhesjjaniti. Ukampis janïr uka uru purinkipanjja, Diosaw servirinakapar yanaptʼaskani (Sal. 37:25).  Janit ukajj Diosan ¿jiwasanakat llakisitap uñachtʼayki?

Mä suma amigojja, jiwasampi parltʼasiñatakejj tiempo apstʼasipuniwa. Kunanakattï jupasa, jiwasas parlañ munktan ukanakat wali jayaw parltʼastanjja. Ukat kunanakas llakisiyistu ukanak cuentʼktan ukhasa wali sum istʼarakistu. Jehová Diosajj ¿istʼarakistaspati? ¡Jïsa! Jupajj mayisitanakas istʼistuwa. Bibliajja, “janirak Diosat oracionan mayisiñjja armasipjjamti” ukhamarak “jan inaktʼas orapjjam” sasaw qhanañchistu (Rom. 12:12; 1 Tes. 5:17).

Qawqha tiempos Diosajj ¿oracionas istʼaspa? Bibliaw uka toqet sum amuytʼayistu. Apostolonakap ajlliñatakejja, Jesusajj “arum paqariw Diosat mayisïna” sasaw Bibliajj qhanañchi (Luc. 6:12). Jesusajj inas sapa mayni arkirinakapajj kunjam chuymanïpjjesa ukanakat sum amuyañataki mayischïna, ukhamat jupanak taypit apostolonakar sum ajlliñataki. Qhepürojja, Jesusajj apostolonakar sum ajllitapwa amuyäna. Ukhamasti ‘mayisitanakas istʼiri’ Diosajja, Jupar taqe chuyma mayisktan ukhajj wal kusisi (Sal. 65:2). Ukhamajj maynitï wali llakita uñjasisin Diosar walja horanak mayisini ukhajja, Jehová Diosajj istʼapuniniwa.

Awisajja, pä munat amigonakasa janiw perdonasipkiti, ukhamïpanjja jan mayampitakiw colerasipjje ukat janiw parljjapjjeti. Ukampis Jehová Diosajj janiw ukhamäkiti. Bibliajj jan imtʼasa Diosar juchanakas arsusiñatakiw chʼamañchistu, Diosajj “perdonañatakejj jankʼakiwa” sasaw sarakistu (Isa. 55:6, 7). ¿Kunatsa Diosajj perdonañatak jankʼakïpacha?

Wali munasirïtap laykuw Jehová Diosajj perdonistu. Bibliajja, Diosajj akapachar wal munatap laykuw Jesús Yoqapar churasiwayi, ukhamat jaqenakar juchat qhespiyañataki sasaw sistu (Juan 3:16). ¿Kuna askinakas Jesusan jiwatapampejj jikjjatasiwayi? Jesusan jiwäwip  laykuw Diosajj jaqenakar juchanakap perdoni. Apóstol Juanajj akham sänwa: “Jiwasatejj juchanakas arsusiñänejja, jupajj cheqawa, askirakiwa juchanakas perdonañataki, ukhamarak taqe jan walinakata qʼomachañatakisa” sasa (1 Juan 1:9). Niyakejjay Jehová Diosajj perdonasir Diosächejja, Jupampejj sum apasiskaksnawa. Uk yatiñajj wal chuymachistu.

Mä cheqpach amigojja, yanaptʼa munktan ukhajj yanaptʼañatak jankʼakiwa. ¿Jehová Diosajj yanaptʼistaspati? Bibliajj akham siwa: ‘Servirinakapat maynitï lanktʼasini ukhajja, janiw tinkkaniti, Tatituw amparapat wayjjasiski’ sasa (Sal. 37:24). Jehová Diosajj walja toqenakatwa servirinakapar yanaptʼi. Ukatakejj mä experienciat parltʼañäni, ukajj Santa Cruz (St. Croix) sat islanwa, khaysa Caribe toqen pasäna.

Mä qʼajjo tawaqetajja, banderar jan aruntañ munatap laykojj yateqer masinakapampi jiskʼachataw uñjasïna. Jehová Diosar yanaptʼa mayisisajja, uka toqet jupanakar parlañwa amtäna. Qhepürojj Bibliat apstʼata sarnaqäwinaka sat libron yanaptʼapampejja, kunjamsa Sadrac, Mesac ukhamarak Abednego waynanakan sarnaqäwipajj jupar yanaptʼatayna ukwa qhanañchäna. Jupajj akham sänwa: “Uka kimsa hebreonakajj janiw yaqha diosar yupaychañ munapkänti, ukatwa Jehová Diosajj jupanakar jarkʼaqäna” sasa. Ukjjarusti taqeniruw uka libro liytʼañ munapjjasmati sasin sarakïna, ukat 11 yateqer masinakapaw uka libro munapjjäna. Uka qʼajjo tawaqetajja, Diosan uka toqet parlañataki yanaptʼatapatsa ukat yatiña churatapatsa wali kusisitapuniw jikjjatasïna.

Janiw Diosajj jiwasanakat llakiskiti sasin amuysta ukhajja, Salmo 34:17-19; 55:22; ukat 145:18, 19 qellqatanakat lupʼiñaw yanaptʼätam. Ukat Jehová Diosar walja maranak servisipki uka jilat kullakanakaruw kunjamsa Diosajj yanaptʼawayapjjtam sasin jisktʼasma. Ukatjja Diosan yanaptʼap munkäta ukhajja, uka toqet Jupar mayisim. Ukhamtï luräta ukhajja, Diosajj ‘jumat llakisitap’ qhanwa amuyäta.