CHEQA yatichäwinakjja, nayratpachaw wal yatiñ munayäta. Mamajaw Bibliat apstʼat qellqatanak apaniri, ukanak liytʼañ wal munirïta dibujonakapas wal gustitäna. Kunanaktï mamajajj yateqkäna uk nayar yatichañapjja, tatajajj janiw munirïkänti. Ukhamäkchïnsa Bibliat wal yatiñ munayäta, ukatwa mamajar jisktʼirïta, jupasti tatajajj jan utankkäna ukhaw Bibliat yatichitäna. Ukhamatwa Jehová Diosar jakäwij katuyasisajj 1943 maran bautisasiwayta, Blackpool, Inglaterra markana, ukhajj tunka maranïyätwa.

Mamajampiw yatiyir mistupjjerïta. Fonografompiw Bibliat yatiyapjjerïta. Fonógrafo apnaqañajj chʼamakïnwa, wali jathirakïnwa, 10 libraw pesäna. Jiskʼäkchiyätsa nayaw uka fonógrafo qʼepnaqerïta.

Precursoratwa 14 maranïsajj serviñ munayäta. Mamajajj siervo para los hermanos (tamanak tumptʼiri) jilatampiw parltʼañama sasaw sitäna. Jilatasti precursorjam serviñatakejja, qollqemp yanaptʼasiñatakejj kun lurañsa yateqañamawa sasaw sitäna.  Ukarjamaw lurayäta. Pä maranak trabajasajja, tamanak tumptʼiri yaqha jilataruw jisktʼarakiyäta, jupasti ‘precursorat servismawa’ sasaw sitäna.

Abril, 1949 maranjja, taqe mueblenakwa mamajampejj aljapjjta, ukatjja Middleton markaruw sarjjapta, uka markasti Manchester marka jakʼankiwa, ukanwa precursorjam serviñ qalltapta. Pusi phajjsinakatsti mä jilataruw nayamp chika precursoräñapataki ajlliyäta. Ukatjja uka markankir sucursalajja, Irlam cheqan utjki uka machaq tamaruw precursorjam servir sarapjjasma sasaw sapjjetäna. Mamajasti yaqha tamanwa mä kullakampi precursorat servirakïna.

Jilatampiru nayampirojja, tantachäwinak sarayañatakiw asigntʼapjjetäna, ukhajj 17 maranikïskayätwa. Tantachäwinak sarayañatak jilatanakajj janiw uka taman utjkänti. Mä tiempotjja, Buxton tamar yanaptʼir sarañatakiw invittʼapjjetäna. Uka tamanjja, yanaptʼajj wal munasïna yatiyirinakajj mä qawqhanikïpjjänwa. Ukham yanaptʼañajja, Diosar jukʼamp serviñatakiw yanaptʼitani sasaw amuyayäta.

Galaad Escuelar sarañatakiw 1951 maran solicitud phoqantayäta. Ukampisa 1952 maranwa cuartelar sarañataki jawsapjjetäna. Diosar sapür servitajat cuartelar janiw  sarkiristti sasaw sayäta, ukampis cortenkirinakajj janiw uk respetapkänti. Carcelaruw sojjta phajjsi llawintapjjetäna. Carcelankkayäta ukhaw Galaad Escuelar (clase 22) sarañatak invitapjjetäna. Ukatwa julio 1953 maran Georgic sutini barcot Nueva York markar sarjjayäta.

Purisajja, Sociedad del Nuevo Mundo pʼeqeñchäwini jachʼa tantachäwiruw sarawayta. Ukatjja, Lansing (Nueva York) markat aynach toqeruw trenat sarayäta, ukanwa escuelajj apasïna. Niyakejjay carcelat ukhak mistchiyätjja, janiw añcha qollqenïkayätti. Trenat saraqasajj Lansing markat aynach toqer sarañatakejja, mä autoruw sarjjatawayta, pasajetakejj yaqha pasajerotwa qollqe maytʼasiyäta.

Galaad Escuelajja, taqe kasta jaqenakar yanaptʼañatakiw wakichtʼapjjetu (1 Cor. 9:22). Nayampiru, Paul Bruun, Raymond Leach jilatanakampirojj Filipinas markaruw Galaad Escuelat khitapjjetäna. Uka markar sarañataki visa documento mistuñapkamajj walja phajjsiw suyapjjta. Ukatjja, mä barcotwa Filipinas markar sarapjjta. Rotterdam cheqa pasawayasajja, mar Mediterráneo, Suez sat jawira, océano Índico, Malasia ukat Hong Kong cheqanaknamwa 47 urunak sarawayapta, ukhamatwa Manila markarojj 1954 maran noviembre 19 urojj puripjjta.

Uka markanjja, costumbrenakaparuw yatinoqtapjjañajäna, ukan parlaski uka arsa yateqapjjañajänwa. Qalltanjja, kimspachaniruw Ciudad Quezón markankir tamar asignapjjetu. Uka tamanjja, niya taqeniw inglés aru parlapjjäna. Ukatwa sojjta phajjsin tagalo aru jan sum yateqapkayätti. Yaqha luräwi katoqañaw jan ukhamäñapatak yanaptʼapjjetu.

Mayo phajjsin 1955 maranjja, yatiyäwit utar kuttʼasajja, walja cartanakwa Leach jilatampejj cuarton uñjapta. Uka cartanakanjja, tamanak tumptʼirit serviñatakiw invittʼapjjetäna. Ukhajj 22 maranikïskayätwa, ukampis ukaw taqe kasta jaqenakaru yanaptʼañatakejj yanaptʼawayitu.

Amuytʼañataki, tamanak tumptʼirit servisajja, mä tienda nayraqatanwa arstʼirïta. Filipinas markan taqenitak arstʼäwejj taqenin uñjkataw arstʼasirïna. Tamanak tumptʼir sarasajja, plazanakana, qhatunakana, basquet anatañ cañchanakana, municipion tantachasiñ utajj utjki uka uñkatasinwa arstʼayäta, niya jila partejj esquin callenakanwa arstʼayäta. Mä kutejj mä qhatunwa arstʼañajäna, ukampis jalluw wal purintäna, ukatwa sarayir jilatanakarojj Tantachasiñ Utanwa arstʼirista sasin sayäta. Qhepatjja, akham jisktʼapjjetäna: “Niyakejjay taqenitak arstʼäwejj anqan jan arstʼaskchejja, ¿taqenitak arstʼäwejj apasiwa sasin yatiyapjjeristti?” sasa.

Jilat kullakanakan utapanwa qorpachasirïta. Utanakajj janis wali sumäkchïnjja, qʼomänwa. Niya jila partejj mä madera patar jantʼaku jantʼaktʼasisaw ikirïta. Bañonakapajj janiw jachʼa markanjamäkänti. Ukatwa anqan jarisirïta. Ukatsti, jeepney sasin uñtʼat autonakata, micronakatwa viajirïta. Islanakarusti awisajj botetwa sarirïta. Taqe aka maranakan janiw auto alasiwaykti.

Diosan arunakap yatiyir sarañasa, tamanakar visittʼañasa, tagalo aru yateqañatakiw yanaptʼawayitu. Uka aru yateqañatakejj janis mä curso paskchiyätjja, yatiyir sarkasina, tantachäwinkasinwa jilat kullakanakat yateqayäta. Jupanakaw uka aru pacienciampi yatichapjjetäna, pantjasiyäta ukhajj qhana  arunakampiw sapjjetäna ukat walpun yuspärta.

Tiempompejja, yaqha luräwinakwa katoqta. 1956 maranjja, Nathan Knorr jilataw visittʼapjjetäna. Markpachan mä jachʼa tantachäwi apaskäna ukanjja, relaciones públicas ukan yanaptʼañajatakiw mayipjjetäna. Kunas ukan lurasiñapäna uk janis yatkchiyätjja, mayni jilatanakaw yatichtʼapjjetäna. Janïraw ni mä maras paskänti ukhaw Frederick Franz jilatajj visittʼapjjarakitäna, jupajj Brooklyn markankir Betelatwa jutäna. Jachʼa tantachäwi sarayirjam irnaqtʼasajja, Franz jilatat wal yateqawayta. Arstʼañatakejja, Filipinas markan barong Tagalog isi uchasipki uka iswa uchasïna, uk uñjasajj jilat kullakanakajj wal kusisipjjäna.

Ukatjja tamanak tumptʼirinakan uñjiripat uttʼayapjjetu. Uka tiemponjja, La felicidad de la Sociedad del Nuevo Mundo película uñtayapjjayäta, niya jila partejj anqanakan uñtayapjjayäta. Niyakejjay proyector sat aparatojj wal qhantʼchïnjja, awisajj walja chhichhillankhanakaw uka aparator lipʼkattapjjeri. Uk qʼomachañajj chʼamakïnwa. Uka peliculanak uñtayañatak wakichtʼañas chʼamakirakïnwa, ukampis kunjamsa Jehová Diosan markapata waljanejj yateqapjjäna uk uñjañajj kusiskañänwa.

Sacerdotenakajja, jachʼa tantachäwinak apañataki permiso jan churapjjañapatakiw  autoridadanakar chʼamañchapjjäna. Awisajja, arstʼäwinak jan istʼasiñapatakiw iglesianakan campananak jachʼat tocayapjjerïna. Ukhamäkchïna ukasa, Diosan markapajj nayraruw sartawayi. Jichhajja, uka cheqanakan waljaniw Jehová Diosar servisipki.

Khä 1959 maranjja, mä carta toqew sucursalan serviñajatak invittʼapjjetäna. Ukanjja yateqaskakiyätwa. Tiempompejj sucursalanakar tumptʼiriw khitapjjetäna. Tailandia markanwa Janet Dumond kullakar uñtʼayäta, jupajj uka markanwa misionerat serviskäna. Mä qawqha tiempojj cartanakwa apayasipjjayäta, qhepat jupampiw casarasta. Paninpachaw 51 maranak Diosar wali kusisit servisipkta.

Nayajj 33 markanakaruw jilat kullakanakar visittʼir sarawayta. Diosan markapan nayrïr luräwinak katoqkayäta ukajja, taqe kasta jaqenakamp sum apasiñatakiw yanaptʼawayitu, ¡wal ukat yuspärta! Ukham visittʼañajja, Jehová Diosajj taqe kasta jaqenakar munasitap amuyañatakiw yanaptʼawayitu (Hech. 10:34, 35).

Diosaru jilat kullakanakampi Filipinas markan servisajj wal kusista. Filipinas markanjja, jilat kullakanakajj waliw jiljjattawayi, purkayäta ukat sipansa mä tunka ukhampiw jiltawayi. Janet esposajampejj Ciudad Quezón (Filipinas) markankir sucursalanwa servisipkta. 60 jila maranakas yaqha markan serviskstjja, kuntï Jehová Diosajj lurañajj munki uk lurañatak wakichtʼatätwa. Niya jichhanakakiw Diosan markapan walja mayjtʼäwinakajj utjawayi. Ukarjam phoqañatakejj jankʼakïpjjtwa.

Jehová Diosan munañap lurañatakiw chʼamachasiwayapjjta, ukaw kusisitäñatak yanaptʼawayapjjetu. Jilat kullakanakaru yanaptʼañatakejj kunatï wakiski ukwa lurawayapjjta. Jehová Diosan munañapächi ukhajja, taqe kasta jaqenakar yanaptʼasipkakïwa.