RENEÉ sat kullakajja, 30 jila maraniwa, jupajj Jehová Diosar taqe chuyma servir mä familianwa Australia markan jilsuwayi. Jupajj akham siwa: “Kawkhantï Diosan Reinopat jukʼamp yatiyirinakajj munaski uka cheqanakaruw yatiyir sarapjjerïta. Tatajampi mamajampejj wali kusisita sum jikjjatasiñajj munapjjäna. Pä wawanëjjayät ukhajja, wawanakajajj ukham kusisit jakasipjjaspa ukwa munarakiyäta” sasa.

 Shane sat jilatajj niya 40 maraniwa, jupajj Reneé warmipjam amtanirakïnwa. Jupasti siwa: “Sullkïr phuchajajj nasïna ukhajja, kunjamsa mä familiajj barcopampi Tonga islar yatiyir sarapjjatayna ukwa Yatiyañataki revistan liytʼapjjta. * Ukaw Australia ukat Nueva Zelanda markanakan Jehová Diosan Testigonakapan sucursalapajj jikjjataski, ukaru kawkhansa jukʼamp yatiyirinakajj munasi sasin qellqañataki yanaptʼapjjetäna. * Jupanakajj Tonga islaruw sarapjjasma sapjjetänwa.

Jupanakajj niya mä maraw Tonga markan Jacob yoqapampi Skye phuchapampejj yatiyapjjäna. Ukatjja, Australia markaruw kutʼjjapjjäna, kunatejj jan walinakaw uka markan utjäna. Ukampis 2011 maranjja, Norfolk islaruw khaysa Pacífico toqen Diosan arunakap yatiyir sarjjapjjäna, ukajj Australia markat inti jalsu toqer 1.500 kilometronak sarañankiwa. ¿Kuna bendicionanaksa katoqawayapjje? Jacob yoqapajj 14 maranëjjewa, jupajj siwa: “Jehová Diosajj wali sum uñjawayapjjetu, arunakap kusisit yatiyañatakiw yanaptʼawayapjjetu” sasa.

Shane jilatan familiapjamarakiw walja jilat kullakanakajj Diosan arunakap taqe chuyma yatiyir sarañ amtawayapjje. ¿Kunas jupanakar ukham lurapjjañapatak yanaptʼawayi?

Burnett ukat Simone chacha warmejj 30 jila maranïpjjewa, Eston ukat Caleb wawanakapajj 12 ukat 9 maranïpjjewa. Jupanakajj Burketown sat markaruw sarapjjäna, ukajj Queensland, Australia marka jakʼankiwa. Jilatajj akham siwa: “Jehová Diosan Testigonakapajj kimsa mara jan ukajj pusi maratwa uka markar yatiyir sarapjjerïna. Ukan waljaniw Diosan suma yatiyäwinakap yateqañ munapjjäna, ukatwa jupanakar Bibliat yatichir sarapjjta” sasa.

Mark ukat Karen chacha warmejja, 50 jila maraniwa, jupanakajj Sydney, Australia marka jakʼanwa walja tamanakan yanaptʼapjjäna. Qhepatjja, Jessica, Jim ukat Jack sat wawanakapajj nasjjapjjäna ukhajja, Nhulunbuy markaruw sarjjapjjäna, ukajj Territorio del Norte uka jakʼankiwa. Mark jilatajj siwa: “Jaqenakar wal munasta, ukatwa kawkhantï yanaptʼajj wal munaski uka cheqar sarañ munayäta” sasa. Ukampis warmipajj pächasïnwa, jupajj akham siwa: “Chachajampi ukat yaqhanakampiw chʼamañchtʼapjjetäna, ukatwa sarañ amtawayta. Ukham luratajat ¡walpun kusista!” sasa.

Benjamin ukat Carolyn chacha warmejja, Jade ukat Bria phuchanakapampejj 2011 maranwa Queensland, Australia markar yatiyir sarapjjäna, ukajj Timor Oriental sat markankiwa. Jilatajj akham siwa: “Esposajampejj Timor Oriental markanjja, precursor especialjamaw nayrajj irnaqtʼapjjayäta. Ukan Diosan arunakap yatiyañajj wali sumänwa, jilat kullakanakas wali munasirïpjjänwa. Uka cheqat sarjjañajj wali chʼamänwa, ukampis kuttʼañ amtapjjayäta. Wawanakajajj nasjjapjjäna ukhajja, uka amtanak jittʼayañ amtapjjta, ukampis sarañ janiw jaytapkäyätti” sasa. Kullakajj akham siwa: “Wawanakajajj misioneronakampi betelitanakampi precursor especialanakamp chika Diosar taqe chuyma servipjjañap munayäta” sasa.

Jesusajj arkirinakapar akham sänwa: “Maynitejj jumanakat mä torre lurañ munaspajja, ¿janit nayraqatajj qontʼasisin qawqhas qollqejj [...] munasispa ukjj amuytʼaskaspajja?” sasa (Luc. 14:28). Mä familiatï yaqha cheqar sarañ amtchejja, janïräkipanwa aka toqenakat wakichtʼasiñapa.

AJAY TOQENA: Ben jilatajj siwa: “Mayninakaruw yanaptʼañ munapjjayäta, janiw mayninakatak mä llakiñ munapkäyätti. Ukhamajj janïr sarkasajja, Diosamp wali sum apasiñatakiw chʼamachasipjjayäta ukat yatiyirisa jan ukajj tamansa jukʼamp yanaptʼañatakiw chʼamachasipjjarakiyäta” sasa.

Jacobojj akham sarakiwa: “Norfolk islaru janïr sarkasajja, experiencianakwa Yatiyañataki ukat ¡Despertad! sat revistanakan liytʼapjjerïta. Yaqha  cheqar sarasajj kuna jan walinakansa uñjasipjjäna, kunjamsa Jehová Diosajj jarkʼaqäna ukanakwa yatjjatapjjerïta” sasa. 11 marani Skye sat sullkapajj akham sarakiwa: “Diosarojj papitojampisa mamajampis jan ukajj sapakisa walpun mayisirïta” sasa.

JAN SINTI LLAKISIÑATAKI: Reneé kullakajj siwa: “Jakapkayäta uka cheqajj wali sumänwa, amigonaka ukat familia jakʼanwa jakasipjjayäta, ukanak jaytañajj wali chʼamänwa. Ukampis ukanakat llakisiñat sipansa, kunjamsa familiajar yaqha cheqar sarañajj yanaptʼani ukwa amuyayäta” sasa.

COSTUMBRENAKA: Yaqhepanakajja, kunjamsa yaqha markan jakasipjje uk janïr sarkasaw yatjjatapjje. Mark jilatajj siwa: “Nhulunbuy markat wal yatjjatapjjta ukat jilatanakajj periodiconak apayanipjjetäna, ukaw kunjamsa ukan jakasipjje kunsa lurapjje ukanak yatiñatak yanaptʼawayapjjetu” sasa.

Norfolk islar sarir Shane jilatajj akham siwa: “Wali respetompi munasiñampi ukat amuyumpi sarnaqasiñatakiw chʼamachasiyäta. Cheqas ukham jaqenakarojj kawkhansa wali sum uñjapjje” sasa.

Yaqha cheqar sarir jilat kullakanakajj akham sapjjewa: ‘Mayjtʼayañajj wakisini ukhajj mayjtʼayasiñapawa ukat jan walinak utjani ukhajj jan aynachtʼasaw saykatañasa’ sasa. Ukanak jichhajj yatjjatañäni:

Reneé kullakajj siwa: “Maynejj janiw mä kikpak kuns lurkaspati. Sañäni, qotan uma mathapinakajj wal sartki ukhajja, barconakajj Norfolk sat islar janiw manqʼañanaka apanjjapjjeti, ukhamïpanjja, manqʼañanakajj wal irjjatti. Ukhamajj kunayman lurañanakwa yateqawayta” sasa. Chachapajj akham sarakiwa: “Semanan qollqejj alasiñatak utjapkitu ukjja, janiw kunäkipansa jukʼamp irtapkti” sasa.

Yoqapajj akham siwa: “Tamanjja, paqallqo jilat kullakanakakiw utjäna, jupanakajj chuyman jilat kullakanakäpjjänwa. Janiw nä mita wawanakajj utjkänti, ukampis jilïr jilat kullakanakampi yatiyir mistusajja, wali suma amigöjjapjjayätwa” sasa.

Jim jilatajj 21 maraniwa, jupajj “Nhulunbuy cheqan janiw yaqha tamajj utjkänti, yaqha tamajj 725 kilometronak sarañankänwa. Ukhamajj jachʼa  tantachäwinakwa jupanakampejj jikisipjjta, ukatwa uka tantachäwinakar wali alwat sarapjjta, ukhamat jilatanakampi parltʼasiñataki. Familiajampejj wali askitpun ukanak uñjapjjta” sasaw qhanañcharaki.

Bibliajj akham siwa: “[Jehová] Tatitun bendicionapawa qamiriptayi” sasa (Pro. 10:22). Walja jilat kullakanakaw kawkhantï jukʼamp yatiyirinakajj munaski uka markanakar sarapjje. Jupanakarojj Tatitun bendicionapaw qamiriptayaraki.

Mark jilatajj siwa: “Yaqha cheqar sarañajj wawanakajaruw wal yanaptʼawayi. Diosan Reinop nayrar uchapki ukanakarojj Jehová Diosajj jarkʼaqewa sasaw jilïr wawanakajajj confiyapjje. Ukajj janiw kunampis alaskaspati” sasa.

Shane jilatajj sarakiwa: “Esposajampisa wawanakajampis wali sum apasipjjta. Jupanakar kunjamsa Jehová Diosajj yanaptʼi ukanak istʼañajj wali kusiskañapuniwa” sasa. Yoqapajj akham siwa: “Akan wali kusisitaw jakasipjjta. ¡Walikpun jutapjjta!” sasa.