Maynir mä suma regalo churañajj janiw faciläkiti. Mä regalojj maynitakejj wali valoranïspawa, yaqhepatakisti janiraki. Ukhamajj khitirus churañäni ukarjamäniwa.

Amuytʼañataki, mä waynatakisa jan ukajj tawaqotakisa, jichhak uñsti uka aparatonakaw mä suma regalöspa. Maysa toqetjja, mä jilïr jaqetakejj kunanakatï awkinakapankkäna ukaw wali valoranïspa. Yaqhep cheqanakanjja, wayn tawaqonakasa jilïrinakasa qollqwa regalot katoqañ munapjje, ukhamat kuntï munapki uk alasiñataki.

Ukhamäkchisa, waljaniw mä suma regalo munat amigoparusa, mä familiaraparus churañ munapjje. Awisajj mä suma regalo jikjjatañajj chʼamakïspawa, ukampis sum amuytʼasin mä suma regalo thaqañäni ukhajj inas kuntï amigosasa jan ukajj familiarasas munki uk chursna. Jichhajj kunas ukatakejj yanaptʼistaspa uk pusi toqet yatjjatañäni.

Kuntï munki uk regalaña. Belfast (Irlanda del Norte) markan jakasir mä chachatakejja, 10 jan ukajj 11 maranïkän ukhajj mä bicicleta regalapkäna ukaw jukʼamp suma regalopänjja. Jupajj akham siwa: “Mä bicicleta walpun munayäta” sasa. Uka chachan arunakapajj akwa amuytʼayistu, maynirutï kuntï munki uk regalañäni ukhajja jupajj wal kusisini. Ukhamasti khitirus mä regalo churañ munta ukwa amuytʼañama. Kunas jupatakejj wali valorani uk yatiñatakiw chʼamachasiñama, ukhamatwa mä suma regalo churasma. Amuytʼañataki, chuymankipstatäjjapjje ukanakajja, familiampi qamartʼañ wali valoranitwa uñjapjje. Inas jupanakajj wawanakapampi allchhinakapamp qamartʼañ munapjjchi. Familiapajj jupanakamp chika vacacionat sarañatak invittʼapjje ukhajj wal kusisipjje, ukaw jupanakatakejj mä suma regalot sipansa jukʼamp askejja.

Kunsa maynejj muni uk yatiñatakejja, istʼañaw wakisi. Biblian akham siwa: “Sapa maynis istʼañatakejj jankʼakïñapawa, janiw jan amuytʼasisajj parlañapäkiti” sasa (Santiago 1:19). Mä  amigompi jan ukajj familiamampi parlkasajj kunsa muni uk amuytʼam. Ukhamatwa mä suma regalo jupanakar churäta.

Kunatï yanaptʼkaspa uk regalaña. Maynir kunatï yanaptʼkaspa uk regalapjje ukhajja, wali valoranitwa uñjañ yatipjje, uka regalojj jiskʼakïchisa jupatakejj wali valoraniwa. ¿Kunas maynirojj yanaptʼaspa uk kunjamatsa yatsna?

Ukatakejj ‘¿kunsa munasma?’ sasin jisktʼañaw wakisi. Ukampisa waljanitakejj ukham lurañajj janiw walïkiti. Jan ukasti kunsa regalani uk janiw maynin yatiñap munapkiti. Ukhamarusa, maynejj inas kunas jupar gusti uka toqet qhan parlchispa, ukampis janiw kunas jupar yanaptʼaspa jan ukajj kunsa necesiti uka toqet parlkaspati.

Ukhamasti kunas sapa maynir yanaptʼaspa ukwa amuytʼañama. Akham jisktʼasim: “¿Waynakïskiti, jilirëjjeti, solteroti, casadoti, divorciatati, jan ukajj viudocha? ¿Trabajaskiti, jan ukajj jubilatäjjecha?” sasa. Ukatjja kunas maynir yanaptʼaspa ukarjamaw mä suma regalo ajllisma.

Maynirutejj mä regalo churañ munstajja, kunas yanaptʼaspa, kunsa munaspa ukwa yatjjatañama. Ukatakejja khitinakatï ukham mä regalo katoqapkäna ukanakaruw jisktʼasma, kunas maynir yanaptʼaspa uk inas jupanakajj sapjjchïtam. Uk yatisajja, kunas maynirojj cheqpachapuni yanaptʼaspa uk yatita.

¿Kunapachas mä regalo churasma? Biblian akham siwa: ‘Horasapar arsut arunakajj wali askipuniwa’ sasa (Proverbios 15:23, NM). Uka arunakajja, horasapar maynir kunsa sañajj sum jikjjatasiñapatakiw yanaptʼaspa ukwa amuytʼayistu. Uka pachparakiw luratanakasampejj pasi. Jiwasatï horasapar mä suma regalo churañäni ukhajja, katoqerejj wal kusisini.

Mä amigojj casaraski, mä waynajj colegiot mistjje jan ukajj mä chacha warmejj wawanïpjje ukhaw jaqenakajj regalonak churañ yatipjje. Yaqhepajj mä papelaruw kunanakas uka marajj utjani uk qellqtʼasipjje. Ukhamatwa sapa maynir kun regalañas wakisispa uk faltkipan amtapjje. *

Cheqansa taqe horasanwa regalonak chursna, janiw mä fiesta utjipanak churañasäkiti. Ukampis wali amuytʼasirïñasawa. Mä waynatï mä tawaqor aleqatak mä regalo churaspa ukhajja, inas uka tawaqojj uñtʼañ munpachitu sasin amuychispa. Janitï ukhamäkchejja, jan waltʼayasiñanakaw utjaspa. Ukatwa akham jisktʼasiñama: “¿Kunatsa mä regalo churañ muntjja?” sasa.

¿Kunatsa mä regalo churañ munta? Kunjamtï yatjjataniwayktanjja, regalktan uka jaqejj kunsa regalosat amuyani uk sum amuytʼasiñasawa. Ukampisa kunatsa maynir mä regalo churañ muntan ukwa amuytʼañasaraki. Waljaniw munasiñat regalonak churañ muntanjja, ukampis walja jaqenakaw fiestanakan regalonak churañ wakisitap amuyasaki churapjje. Yaqhepasti regalasajj kuttʼayjjetaniw sasaw sapjje, jan ukajj sum uñjayasiñ laykukiw regalapjjaraki.

¿Kunas maynir munasiñat mä regalo churañatakejj yanaptʼistaspa? Bibliajj siwa: “Taqe kunsa munasiñampi lurapjjam” sasa (1 Corintios 16:14). Jumatï munasiñat mä regalo churäta ukhajja, katoqerejj walpun kusisini. Ukham luratamatjja, jumas ukhamarakiw wal kusisïta. Munasiñat mayninakar kuns regaltan ukhajja, alajjpachankir Awkisajj wal kusisiraki. Apóstol Pablojja, Corinto markankir cristianonakarojj Judeankir jilat kullakanakar yanaptʼapjjatapat akham sasaw mä cartapan säna: “Diosasti khititejj kusisit chuymamp churki ukaruw munasi” sasa (2 Corintios 9:7).

Kunanakattï yateqawaytan ukanakat sum amuytʼasïta ukhajja, maynir yanaptʼiri ukhamarak kusisiyir suma regalonak churäta. Diosajja jaqenakar mä suma regalo churañatakiw amtäna. Jutïr yatichäwinjja, kuna suma regalsa Diosajj jaqenakar churawayistu ukwa yatjjatañäni.