FAMILIAN JAN WALINAKA. Naciones Unidas sat organizacionajja, “sapa kimsa warmitjja, mä warmiw chachapana nuwjata toqjjata jan ukajj jan walinak lurata uñjasi” sasaw qhanañchawayi. “Aka oraqpachanjja, sapa phesqa warmitjja, mä warmiw jan wali lurata jan ukajj jan wali lurañ munata uñjasini” sasaw sapjjaraki, ukajj wali llakkañawa.

CALLENAKAN JAN WALI LURIR JAQENAKA. Estados Unidos markanjja, 30.000 jila jan wali lurir gruponakaw utji sasaw yatiyasiwayi. Aka Latinoamérica uksanjja, sapa kimsa jaqenakatjja mä jaqew lunthatata, nuwjata uñjasiwayi.

JAQE JIWAYIRINAKA. Aka qhepa maranakanjja, niya 500.000 jaqenakaw jiwayata aka oraqpachan uñjasiwayapjje, ukajj guerranakan jaqenakajj jiwawayapki ukats jukʼampiwa. Centroamérica ukat África aynach toqenkir markanakanjja, jukʼamp jaqenakaw jiwayata uñjasiwayapjje, ukajj oraqpachan jiwayat uñjasipki ukanakat pusi ukhampis jiwayatäpkaspa ukhamawa. Latinoamérica toqenjja, mä maranjj 100.000 jila jaqenakaw jiwayat uñjasipjjäna, Brasil markansti 50.000 jila jaqenakaw jiwayat uñjasipjjarakïna. Uka jan walinakajj ¿kunjamatsa chhaqtayasispa?

Jan walinakajj taqe cheqanwa utji ¿kunatsa? Jaqenakajj mayj mayja amuyunïpjjewa, qollqe toqet janiw taqenis mä pachpäpkiti, wawanakajj jan wali jaqenak taypinwa jilsuwayapjje, yaqhep jaqenakajj machirïpjjewa, droganakampiw qolljasipjje, janiw jaqe masipar munasipkiti ukat jan wali lurir jaqenakarojj janiw khitis kamskarakiti.

Ukampis yaqhep markanakanjja, jan walinakajj mä jukʼa chhaqtayasiwayiwa. Sañäni, São Paulo Brasil markanjja, walja markachirinakaw utji, aka qhepa tunka maranakanjja, jan walinakajj janiw nayrjamäjjeti. Ukhamäkchisa, 100.000 markachirinakatjja, tunkaniw jan walinak lurata uñjasipjje. Ukhamajj ¿kunjamatsa jan walinakajj mä pita chhaqtayasispa?

Jan walinak chhaqtayasiñapatakejja, jaqenakaw yanaptʼapjjañapa. Jupanakaw jan wali luräwinakap jaytapjjañapa ukhamarak suma jaqëñatak chʼamachasipjjañapa. Jachʼa jachʼa tukuñsa, maynitakik kuns munañsa, envidiasiñsa jaytjjapjjañapawa, ukhamatwa wali munasiri, respetasiri, mayninakat llakisiri jaqer tukupjjaspa.

¿Kunas jan wali luräwinak jaytañatakejj jaqenakar yanaptʼaspa? Bibliajj akham siwa:

• “Diosar munañajja mandamientonakar phoqhañawa” (1 Juan 5:3).

• “Tatitur ajjsarañajj, jan waliru uñisiñawa” (Proverbios 8:13).

Diosar munasiñasa ukat Jupar jan chuyma ustʼayañ munañasa, jan walinak jaytañatakiw jaqenakar yanaptʼaspa. Wali qhoru jaqenakasa jakäwip  mayjtʼayapjjaspawa, ukat wali munasiri, mayninakat llakisiri ukham jaqeruw tukjjapjjaspa. Cheqapunit ukajj ¿pasaspa?

Álex chachat parltʼañäni. * Jupajj 19 maranakaw jan walinak luratapat carcelan llawintata Brasil markan uñjasïna. Bibliat yatjjatasajja, 2000 maranwa Jehová Diosan Testigopjam bautisasjjäna. ¿Kunas jan walinak jaytañatak yanaptʼawayi? Álex chachajj jan wali luratanakapat walpun amtasi. Jupajj akham siwa: “Diosarojj walpun munasta, Jupajj jan wali luratanakajat perdonawayituwa. Diosar jan chuyma ustʼayañ munatajasa, Jupar munasitajasa, jan walinak jaytañatakiw yanaptʼawayitu” sasa.

Brasil markankir César chachajja, 15 maranakaw lunthatasisa jan walinak lurasa sarnaqäna. ¿Kunas ukanak jaytañatak yanaptʼäna? Carcelankäna ukhajja, Jehová Diosan Testigonakapaw visitapjjäna ukat jupanakampiw Bibliat yatjjatañ qalltarakïna. Jupajj akham siwa: “Jakäwejj mä suma amtampi luratätapjja ukhaw amuyayäta. Jehová Diosar munasiña ukat ajjsarañ yateqayäta, mä arunjja, janiw Diosan chuymap ustʼayañ munjjayätti. Jupajj kunaymanitwa khuyaptʼayitäna. Janiw Diosan chuymap ustʼayañ munjjayätti, Juparojj wal munasiyäta ukatwa jan wali lurañanak jaytawayta” sasa.

¿Kunsa uka sarnaqäwinakajj yatichistu? Bibliajj jaqenakan jakäwipsa, amuyunakap mayjtʼayañatakis chʼamaniwa, ukwa ukajj yatichistu (Efesios 4:23). Álex chachajj akham saskakiwa: “Janiw uka jan wali amuyunak armkäti sasaw amuyayäta. Ukampis Bibliajj qʼoma umar uñtasitaw amuyunakajj qʼomachitäna” sasa. Kunapachatï, Biblian suma yatichäwinakapampi amuyunakas phoqantan ukhajja, jan wali amuyunaka chhaqtayaspawa. Diosan Arupajj jan walinakat qʼomachañatakejj chʼamaniwa (Efesios 5:26). Ukhamajja, wali qhoru ukhamarak jupatakik kuns muniri jaqenakajj munasiri ukat khuyaptʼayasir jaqenakaruw tukjjapjjaspa (Romanos 12:18). Biblian ewjjtʼanakaparjam sarnaqasajja, uka jaqenakajj wali sum jakasjjapjjaraki (Isaías 48:18).

Jehová Diosan Testigonakapajja, 240 markanakanwa utji. Jupanakajj kimsaqallq millonats jiläpjjewa ukat kunas aka Oraqet jan walinak chhaqtayaspa uksa yatipjjarakiwa. Jupanakajj kunayman markanakatäpkchisa, Diosar munasiña ukhamarak ajjsarañwa yateqawayapjje. Ukat mä familjam munasiñsa, sumankañsa yateqawayapjjarakiwa (1 Pedro 4:8). Aka Oraqenjja, wali sumaw jakassna ukwa jupanakat yateqsna.

Diosajj ‘taripäwi urunwa, kunapachatï jan wali jaqenakajj tukjatäkani’ ukhaw jan walinak aka Oraqet chhaqtayjjani sasaw Bibliajj qhanañchi (2 Pedro 3:5-7). Janiw khitis jaqenakar tʼaqhesiyjjaniti. Ukampis ¿kunatsa Diosaw jan walinak chhaqtayani sasajj sissna?

Bibliajj akham siwa: “[Diosajj] ñanqha lurañ munirinakarusti walpun uñisi” sasa (Salmo 11:5). Taqe kun lurir Diosajja, sumankañaru ukat cheqap sarnaqañaruw wal munasi (Salmo 33:5; 37:28). Uka arunakaw Diosajj jan walinak uñisitap qhanañchistu ukat jan mayampitakiw tukjarakini.

Ukhamajj niyaw aka Oraqet jan walinakajj chhaqtayasjjani, janiw ukat pächasiñasäkiti (Salmo 37:11; 72:14). Janit uka toqet jukʼamp yatjjatañsa ukhamarak mä suma oraqen jakasiñsa ¿munkasma?