¿CHEQAPUNIT JUMAJJ KUNJAMAS JUTÏRIN JAKASÏTA UK AJLLISMA? Yaqhep jaqenakajja, destinatäpkaspas ukhamwa amuyapjje, yaqhepasti Diosaw kunjamas jakañäni uk amti sapjjarakiwa. Ukatwa amtanakap jan phoqasajj “destinojaw ukhamäpacha” sasin sapjje.

Yaqhepajj jan walinaka, tʼaqesiñanak utjatap uñjasaw wal chuym usuyasipjje. Sum jakasiñatakis chʼamachasipkchejja, guerranaka, lunthatanaka, jaqe jiwayirinaka, usunaka, terremotonaka, jan ukajj yaqha ukhamanak utjatapatwa inamayakis chʼamachasipkaspa ukham amuyapjje.

Cheqas kuna jan walinakatï utjki ukanakaw kuntï lurañ amtkayätan ukanak mayjtʼayaspa (Eclesiastés 9:11). Ukhamäkchisa, taqeniw kunjamsa jutïrin jakasiñäni uk amtsna. Bibliarjamajja, kunjamas jakasiñäni ukajj sapa maynitäjjewa. ¿Kunatsa ukham sistanjja?

Israelitanakajj Suma Oraqer janïr mantapkipanjja, Diosajj Moisés toqew jupanakar akham säna: “Jakañampita jiwañampita ajllisiñamatak churapjjsma; ukhamaraki bendicionampita, maldicionampita ajllisipjjañamataki. Ukampis jakaña ajllisipjjam, jumanakampi, wawanakamampi jakapjjañamataki. Tatitu Diosamarusti munapjjam, istʼapjjarakim, suma iyawsañampi arkapjjarakim” sasa (Deuteronomio 30:15, 19, 20).

“Jakañampita jiwañampita ajllisiñamatak churapjjsma; [...] bendicionampita, maldicionampita ajllisipjjañamataki. Ukampis jakaña ajllisipjjam” (Deuteronomio 30:19).

Israelitanakarojj Diosaw Egipto markan esclavöñat salväna, ukhamat Suma Oraqen kusisita jan esclavöjjasin jakasipjjañapataki. Ukampis ukham jakasiñatakejj jupanakaw ‘jakañ ajllipjjañapäna’. ¿Kunsa ukatakejj lurapjjañapäna? Jehová Diosaruw munasipjjañapäna, istʼapjjañapäna, Jupatsa janiw jitheqtapjjañapäkänti.

Jutïrin sum jakasiñatakejja, jumajj ukhamarakiw kunsa luräta uk ajlliñama. Jumatï Diosar munasiña, istʼaña, Jupat jan jitheqtañ ajllïtajja, wiñayatakiw aka oraqen mä paraison jakasïta. ¿Kunjamsa ukanak lurasma?

Diosan amuytʼayatajja, “Diosajj munasiñawa” sasaw apóstol Juanajj qellqäna, cheqas munasiñaw Jupatakejj nayranki (1 Juan 4:8). Jesusajj uk sum yatïna, ukatwa “¿mandamientonakat kawkïris jukʼamp jachʼajja?” sasin jisktʼatajj akham säna: “Jehová Diosamar taqe chuymamampi, taqe almamampi, taqe amuyumampi munasiñamawa” sasa (Mateo 22:37). Ukhamasti, Diosar munasitasatwa Jupan amigopäsna, janiw ajjsarañatsa, ni istʼañaw sasakis Jupan amigopäksnati. ¿Kunatsa Diosar munasiñasa?

Kunjamtï mä awkejj wawapar wal munaskejja, ukhamwa Diosajj jaqenakar wal munasiraki. Awk taykanakajj pantjasirïpkchisa, wawanakapan kusisita sum jakasipjjañapatakejj yatichañataki, chʼamañchtʼañataki, yanaptʼañataki, munasiñamp cheqañchañatakiw wal chʼamachasipjje. ¿Kunsa wawanakapat suyapjjaraki? Jupanakar munasipjjañapa, istʼasirïpjjañapa, kuntï sapki ukas jupanakar yanaptʼañatakïtap amuyapjjañapwa munapjje. ¿Janit alajjpachankir perfecto Dios Awkisajj jupar munasiñassa, kuntï jiwas laykojj lurki ukanakat yuspärañassa munkarakpacha?

Diosar istʼañatakejja, kunsa mayistu uk yatiñasawa, ukarjam lurañatakiw chʼamachasiñasaraki. Diosajj janiw nayra tiemponjam jaqenakamp parljjeti, ukatwa Jupar istʼañatakejj Biblia liyiñasa, kuntï yateqktan ukarjam sarnaqañasaraki (1 Juan 5:3).

Diosar istʼañajj kunja wakiskirisa uk amuyañasatakejja, Jesusajj akham sänwa: “Jaqejj janiw tʼantʼa sapampikejj jakañapäkiti, jan ukasti Jehová Diosan lakapat mistki taqe uka arunakampi jakañapaw” sasa (Mateo 4:4). Manqʼasiñajj wali wakiskiriwa, ukampis Diosan arunakap yatjjatañaw jukʼamp wakiskirejja. ¿Kunatsa? Wali yatiñani Salomón reyejj akham sänwa: “Yatiñajja jaqerojj arjjatiwa, kunjämatï qollqejj arjjatki ukhama, ukampis [yatiñanïñajj] jilankiwa yatiñaniru jakaña churatapata” sasa (Eclesiastés 7:12). Yatiñanïñasa, Diosar uñtʼañasa jan walinak jan lurañataki, suma amtanakar puriñatakiw yanaptʼistu. Ukajj wiñay jakañ katoqañatakiw yanaptʼarakistu.

Página 12 ukankir yatichäwinjja, Jesusan aka arunakapwa liytʼtanjja: “Jakañar apir punkojj wali kʼullkʼuwa, thakipas kʼullkʼurakiwa, jukʼanikiw uka thaki jikjjatapjje” sasa (Mateo 7:13, 14). Uka thaknäm sarañatakejja, khititï thak sum uñtʼki ukajj yanaptʼistaspa ukhajj walpun yuspärsna, uka thakejj wiñay jakañaruw irpistu. Ukatwa Diosat janipun jitheqtañasäkiti (Salmo 16:8). ¿Kunjamsa uk lursna?

Sapüruw kunayman lurañanakani sarnaqtanjja, janiw kuntï munktan ukanakampis phoqañ puedktanti. Kun lurañassa Diosajj muni uk amuytʼañatakis janiw tiemponïktanti. Ukatwa Biblian akham amtayistu: “Kunjamsa sarnaqasipkta uk sum amuyasipjjam, jan jumanakajj jan amuytʼasir jaqenakjam sarnaqapjjamti, antisas yatiñan jaqenakjam sarnaqapjjam. Jan wali urunakankatas laykojj jan tiempjja ina chʼusar aptʼapjjamti” sasa (Efesios 5:15, 16). Diosat jan jitheqtañajja, Jupamp sum apasiñ nayrar uchaña sañwa muni (Mateo 6:33).

Kunatï nayrajj pasktam ukjja janiw mayjtʼaykasmati, ukampis familiaman jutïrin sum jakasipjjañapatakejj jumaw yanaptʼasma. Bibliarjamajja, alajjpachankir Jehová Dios Awkisajj wal munasistu, kun lurañassa muni uksa sarakistuwa. Miqueas profetajj akham sänwa:

“Tatitojj sistamwa, kunatejj askïki ukjja, ukhamarak kuntejj jupajj jumatjja suyki uksa; jumajj cheqapäki uk luram, khuyapayasirirakïma, ukhamarak Tatit Diosamarus altʼat chuymamampirak jaysam” (Miqueas 6:8).

¿Jumajj Diosar istʼasapunit sarnaqäta? Jumatï ukham lurätajja, Diosajj amigonakapar churañ arsuwayki uka bendicionanakwa katoqäta. Ukhamasti, kunsa luräta uk jumaw amtañama.