IGLESIA Católica Romana ukasa, ortodoxa iglesianakasa, budistanakasa, yaqha religionanakasa, religión pʼeqtʼirinakajj janipuniw casarasipjjañapäkiti sasaw yatichapjje, ukajj celibato sasin uñtʼatawa. Maysa toqetsti, ukham casarasiñ jarkʼapjjatap laykuw religión pʼeqtʼirinakajj kunayman qʼañu juchanak lurapjje sasaw waljanejj sapjjaraki.

Ukatwa akham jisktʼasiñasäspa: “Biblian yatichäwinakaparjamajja, ¿janipunit religión pʼeqtʼirinakajj casarasipjjañapäki?” Uka jisktʼar sum qhanañchtʼañatakejja, kunjamatsa ukham amuyañajj qalltawayi ukat kunsa Diosajj uka toqet amuyi ukwa yatjjatañäni.

¿Celibato sasin uñtʼatäki ukajj kunasa? Encyclopædia Britannica qellqatajj akham siwa: “Jan casarasiña, chacha warmjam jan ikthapiña ukawa. Religión pʼeqtʼirinaka jan ukajj arkirinakapaw ukham jakañ amtapjje” sasa. “Apostolonakan tiempopatpachaw jan casarasiñajj qalltawayi” sasaw Benedicto XVI (dieciséis) sat Papajj Roma markan Católica Iglesia pʼeqtʼirinakarojj 2006 maran säna.

Ukampis nayrïr cristianonakajj janiw casarasiñ jarkʼapkänti. Apóstol Pablojja, ‘ñanqhanakat jutir yatichäwinak’ yatichirinakaw utjani sasaw cristianonakar säna. Ukanakajj “janiw casarasiñasäkiti” sasaw jaqenakar engañjapjjañapäna (1 Timoteo 4:1-3).

Khä 101-200 maranakanwa celibato yatichäwejj “cristiano” iglesianakan yatichasiñ qalltäna, qhepatjja uka iglesianakaw Iglesia Católica Romana sasin uñtʼatäjjäna. “Janipuniw chacha warmjam ikthapiñajj utjañapäkiti sasin amuyunakajj  Roma markan utjkäna ukamp chikaw celibato yatichäwejj qalltawayi” sasaw mä librojj qhanañchi (Celibacy and Religious Traditions).

Uka qhepatjja, concilios eclesiásticos ukanakansa Padres de la Iglesia ukanakasa, ‘sacerdotenakajj janipuniw casarasipjjañapäkitiʼ sasaw sapjjäna. Chacha warmjam ikthapiñajj jaqerojj qʼañuchiwa, iglesia pʼeqtʼirinakajj janipuniw ukanak lurapjjañapäkiti sasaw amuyapjjäna. Ukampis “901-1000 maranakanjja, yaqhep sacerdotenakasa obisponakas warminïpjjänwa” sasaw Encyclopædia Britannica qellqatajj qhanañchi.

Roma markan 1123, 1139 maranakan Concilios de Letrán ukajj utjkäna ukanwa ‘sacerdotenakajj janipuniw casarasipjjañapäkiti’ sasin amtasjjäna, jichhürkamas Iglesia Catolicajj ukhamwa amuyaskaki. Iglesia pʼeqtʼirinakat casaratäpkäna ukanakajja, wawanakaparuw Iglesian yänakapa jan ukajj cosasanakap jaytjjapjjäna, ukatwa Iglesiajj jan casarasipjjañapatak jarkʼjjäna, ukhamat wali munañanïskakiñataki ukat qollqenïskakiñataki.

Diosajj kunsa uka toqet amuyi ukjja Bibliaw qhan yatichistu. Ukanwa kuntï Jesusajj ‘Diosan Reinop layku’ solterok qheparapkäna ukanakat kamsänsa uk liytʼsna (Mateo 19:12). Uka pachparakiw apóstol Pablojj “Tatitun arunakap parlañ” layku solterok qheparapkäna ukanakat parläna (1 Corintios 7:37, 38; 9:23).

Ukampis janiw Jesusasa ni Pablos cristiano pʼeqtʼirinakajj janipuniw casarasipjjañapäkiti sasin sapkänti. Jesusajj ‘janiw taqenipunejj solterok qheparapkaspati’ sasaw säna. Jan casarasipkäna ukanakat parlkasajja, Pablojj akham sarakïnwa: “Jan casadöpki ukanakatakejj janiw kuna sañajjas Diosatjja utjkituti, ukampis nayajj ewjja arunakajjakwa churañ munarakta” sasa (Mateo 19:11; 1 Corintios 7:25).

Kunjamtï Biblian liytʼktanjja, nayrïr cristianonakatjja waljaniw casaratäpjjäna, ukanakat maynïrejj apóstol Pedrönwa (Mateo 8:14; Marcos 1:29-31; 1 Corintios 9:5). Roma markanjja jaqenakajj qʼañu juchanak lurasaw sarnaqapjjerïna, ukatwa cristiano congregacionan casado pʼeqtʼirinakajj ‘mä sapa warminikïpjjañapawa’ ukat ‘wawanakaparus istʼasirïñ yatichapjjañapa’ sasin Pablojj qellqäna (1 Timoteo 3:2, 4).

Uka cristianonakajj janiw chacha warmjam jan ikthapiri ukhamäpkänti. Bibliajj uka toqet qhanwa akham sas yatichi: ‘Chachasti warmipampejja chachjamajj phoqañapawa’ sasa. Ukat chacha warmjam ikthapiñ toqetjja, “jan maynis maynis ‘janiw’ sasipjjamti” sarakiwa (1 Corintios 7:3-5). Ukhamajja, Diosajj janiw servirinakapar jan casarasipjjañap maykiti, ni congregacionan pʼeqtʼapki ukanakan jan casarasipjjañapsa maykarakiti.

Ukhamajj casarasiñatï walikïskchejja, ¿kunatsa Jesusasa Pablos solteröskakiñatak chʼamañchapjjäna? Solteronakajj janiw casadonakar llakisiyki ukanakat llakisipkiti, ukatwa Diosan arunakap jukʼamp yatiyapjjaspa ukat jukʼamp lurañanakan servipjjarakispa (1 Corintios 7:32-35).

Davidat amuytʼañäni, jupajj México markanwa suma pagat trabajon trabajïna. Uka trabajo jaytawayjjasajja, Costa Rica markaruw sarjjäna, jaya cheqanakan jakasiri jaqenakar Bibliat yatichañataki. ¿Juparojj solteröñajj yanaptʼänti? Jupajj siwa: “Solteröñajj wal yanaptʼitu. Yaqha markan jakañajj janiw faciläkänti, ukanjja jaqenakajj mayj jakasipjjäna, ukampis sapakïtaj laykojj jichhunoqtañajj janiw chʼamäkänti” sasa.

Claudia kullakasti, kawkjantï Diosan arunakap yatiyirinakajj jukʼamp munaski uka cheqanakaruw sarjjäna. Jupajj siwa: “Diosan arunakap yatiyañajj wali kusiskañawa. Kunjamsa Diosajj sum uñjitu uk amuyasajj jukʼamp sumwa Jupamp apasta ukat jukʼamp confiyarakta” sasa.

Solterok qheparañajj janiw kuna jan walïkisa. Claudiajj akham saskakiwa: “Solteröskañänisa casadöskañänisa, Jehová Diosar taqe chuyma servisajj taqeniw kusisit jakassna” sasa (Salmo 119:1, 2).