Jesusajj Isaías qellqatanaka jan ukajj rollonaka liytʼañatak jistʼarasinjja, apthapjjarakïnwa sasaw Lucas librojj qhanañchi. Maysa toqetjja, kunanaktï Jesusajj lurawayki ukanakajj janiw rollorojj phoqatpach mantirjamäkiti sasaw apóstol Juanajj Juan libro qellqañ janïr tukuykasajj sarakïna (Lucas 4:16-20; Juan 20:30, NM; 21:25).

¿Kunjamsa rollonak lurapjjerïna? Lipʼichinaka, pergaminonaka jan ukajj papironakwa lipʼthapiyapjjerïna. Ukatjja, qellqatäkis uk manqha toqer uchasaw mä lawaru apthapisirïna. Ukat alayat aynacharuw qellqasirïna. Lipʼichitï jachʼächïna ukhajja, purap toqeruw lawajj uskusïna. Liytʼañatakejja, maynejj maysa amparapampejj janatatañapänwa, maysampisti apthapiñaparakïnwa kawkjtï liytʼañ munki uk katjañkama.

Mä qellqatajj akham siwa: “Rollonakajj wali jachʼanakänwa, niya 10 metronakani. Ukarojj mä libro qellqatpach mantirjamänwa, ukatjja llawthapitajj jiskʼarukirakiw tukjjerïna” sasa (The Anchor Bible Dictionary). Amuytʼañataki, Lucas libro qellqañatakejj niya llätunka metro chikataniw munasïna. Awisajj alay toqetsa, aynach toqetsa puntanakap khuchuqapjjerïnwa, ukatjja pómez sat chhankha qalampiw sumäñapatak khiturapjjerïna ukat ukarojj tiñsupjjarakirïnwa.

Israel markanjja, mä jilïr sacerdotekiw utjañapäna, ukat jiwañapkamaw sacerdotjam irnaqañapäna (Números 35:25).Nayrïr jilïr sacerdotejj Aarón chachänwa, ukjjarusti jilïr yoqapaw jilïr sacerdotjam uttayasjjañapäna (Éxodo 29:9). Aarón sacerdotet jutïr yoqall wawanakat jilapartejj sacerdotjamaw irnaqapjjäna, ukampis mä qawqhanikiw jilïr sacerdotepjjäna. Israel markajj yaqha markampi apnaqata uñjaskäna ukhajja, marka apnaqerinakajj jan Judea markatäkäna ukhajj munañaparjamaw sacerdotenak uttˊayapjjerïna jan ukajj apaqapjjerïna. Ukampis machaq jilïr sacerdotenakajj wali mintat familia taypitwa ajllisirïna, jilapartejj Aarón chachan familiapat ajllisirïna. ‘Jilïr sacerdotenaka’ sasinjja, khitinakatï wali uñtat familianakat jutkäna uka sacerdotenakatwa parlaski. Uka jilïr sacerdotanak taypinjja, inas pä tunka pusinir sacerdotenakajj jaljaskäna ukanak peqtʼiri taypitsa utjarakchïna, sañäni, Anás jilïr sacerdotjama (1 Crónicas 24:1- 19; Mateo 2:4; Marcos 8:31; Hechos 4:6).