Jaqen cuerpopajj wali suma lurtʼatawa, Diosaw ukham lurawayistu. Amuytʼañataki, ampar kharintastan, jan ukajj kunampis usuchjastan ukhajja, cuerposajj jankʼakiw wila jan sint sarañapatak yanaptʼi, heridanakasas jankʼakiw jakthapiraki.

AK AMUYTʼAM: Cuerposajj sapak jakthapiri ukham luratawa, Diosatï ukham lurawaychistojja, ¿janit kuna llakinakatï chuymasan utjki ukanak qollarakispa? Salmonak qellqerejj akham sasaw jan pächasis säna: ‘Diosaw chuyma usuchjatanakarojj waliptayi, heridanakapsa qollaraki’ sasa (Salmo 147:3). Inas jumajj sinti jan walin uñjasitamat wali llakit uñjasta, ukatwa akham jisktʼasisma: “¿Cheqapunit Diosajj ‘chuymajan usuchjatanakap’ jichhasa jutïrinsa qollitaspa?” sasa.

Diosajj akham sistuwa: “Jan ajjsaramti, nayaw jumampïskta, jan ajjsaramti, nayäsktwa juman Diosamajja. Nayaw chʼamañchaskäma, nayarakiw yanapaskäma” sasa (Isaías 41:10). Jehová Diosajj wal munasistu, uk yatiñajj sumankañwa churistu, jan waltʼäwinakar saykatañatakiw chʼam churarakistu. Apóstol Pablojja, Diosajj churkistu uka sumankañajj ‘kuntï jaqenakajj amuyki ukat sipansa jukʼampiwa’ sasaw säna. Ukat akham sarakïnwa: “Khititejj nayar chʼam churkitu ukan chʼamapampejja taqe kunatakiw nayajj chʼamanïta” sasa (Filipenses 4:4-7, 9, 13).

Bibliajj Diosan promesanakapar jukʼamp confiyañatakiw yanaptʼistu. Kunsa Diosajj jaqenak layku jutïrin lurani, kunatsa uka promesanakapar confiyañasa ukaw Apocalipsis 21:4, 5 qellqatan qhanañchasi.

• ‘Diosajj taqe jachanakaswa nayranakasat picharani’. Llakinakasajj yaqhep jaqenakatakejj janis kunäkchejja, niyaw Jehová Diosajj taqe kunatï tʼaqesiykistu, llakisiykistu ukanak chhaqtayjjani.

• Alajjpachankir ‘tronon qontʼatäki’ uka Reyejja, taqe chʼamaniwa, Jupaw taqe kunsa lurawayi, ukhamajj janiw tʼaqesiñanak ukhamak uñjkaniti, chhaqtayaniwa, yanaptʼarakistaniwa.

• Promesanakajajj “confiykañawa, cheqaparakiwa” sasaw Diosajj arsuwayi. Jehová Diosakiw cheqpach Diosajja, ukhamajj kuntï arsuwayki ukjja phoqapuniniwa.

“Diosajj taqe jachanakapwa nayranakapat picharani, janiw jiwañajj jukʼamp utj-jjaniti, janirakiw llakisiñasa, jachañasa ni usuyasiñasa jukʼamp utj-jjaniti. Kunanakatï nayrajj utjkäna ukanakajj tukusjjewa. Tronon qontʼatäkäna uka Diosajj akham sänwa: ‘Taqe kunsa machaqatwa nayajj luraskta’ sasa. Ukatjja akham sarakïnwa: ‘Qellqantam, aka arunakajja confiykañawa, cheqaparakiwa’ sasa” (Apocalipsis 21:4, 5).

Diosan luratanakapasa Bibliasa, alajjpachankir Awkisar jukʼamp uñtʼañasatakiw yanaptʼistu. Mä toqetjja, Diosan luratanakapajj jan kun kamsasakiw Jupar jukʼamp jakʼachasiñatak yanaptʼistu. Maysa toqetjja, Bibliajj akham sasaw qhan ewjjtʼarakistu: “Diosar jakʼachasipjjam, jupajj jumanakar jakʼachasirakiniwa” sasa (Santiago 4:8). Hechos 17:27 textojj akham sarakiwa: “[Diosajj] janiw sapa mayni jiwasanakat jayankkiti” sasa.

Jumatï Diosar jukʼamp uñtʼañatak chʼamachasïta ukhajja, qhawqsa Jupajj jumat llakisi uk jukʼamp sumwa amuyäta (1 Pedro 5:7). Jehová Diosar ukham confiyañajj ¿kunjamsa yanaptʼistu?

Japón markankiri Toru sat chachat parltʼañäni. Taykapajj Diosar serviñapatakis jiskʼatpach yanaptʼkchïnjja, jan walinak luriri yakuza sat gruporuw mantäna. Toru sat chachajj akham siwa: “Diosajj uñispachïtuwa, munat familiaranakajana amigonakajan jiwatapas Jupan castigopäpachawa sasaw amuyayäta” sasa. Jan wali jaqenakamp sarnaqañajj jan sinttʼasiri, qala chuymaniruw tukuyäna, jupapachpaw uk säna. Kunanak lurañsa munäna uka toqet parlkasajja, jupajj akham siwa: “Janïr jilïr jaqëkasaw jiwañ munayäta, nayat sipansa jukʼamp uñtʼata chʼamani jaqer jiwayatajatwa uñtʼayasiñ munarakiyäta” sasa.

 Ukampis kunapachatï jupasa Hannah esposapas Bibliat yateqañ qalltjjapjjäna ukhajja, Toru sat chachajj janiw jan walinak lurjjänti, isisitapas sumäjjänwa. Esposapajj akham siwa: “Chachajajj jan walinak lurañ jaytkäna ukajj janiw cheqaw sañjamäkänti” sasa. Jichhajj Toru sat chachajj akham siwa: “Diosajj utjaskapuniwa, sapa maynitwa llakisiraki. Janiw khitin jiwañapsa munkiti, taqe chuyma arrepentisipki ukanakar perdonañatakis jankʼakiwa. Kuntï mayninakar jan sisksna ukanakwa Jupar yatiysna, jaqenakajj janiw kunjamäsktansa uk amuyapkaspati. Niyaw Diosajj jan waltʼäwinaksa, tʼaqesiñanaksa chhaqtayjjani. Jichhürunakansa, Jupajj wal yanaptʼistu. Diosajj wal jiwasat llakisi, wali llakit uñjastan ukhasa, munasiñampiw uñjistu” sasa (Salmo 136:23).

Kunjamtï Toru sat chachan sarnaqäwipan uñjawayktanjja, Diosajj kunjamsa tʼaqesiñanak niya chhaqtayjjani uk yatiñajj jutïr urunak suytʼañataki, kusisit jakasiñatakiw yanaptʼistu. Tʼaqesiñanakamp phoqantata jan wali pachansa jakstanjja, Diosan munasiñapajj kusisit jakasiñamatakiw yanaptʼiristam.