MAYNINAKAJJ jiwasat llakisipjjaspa khuyaptʼayapjjestaspa uk taqeniw muntanjja. Ukhamajj ¿kunsa mayninakar ukham uñjañatakejj lursna?

Biblian khuyaptʼayasirïña siski uka arojja, mayninakat cheqpachapuni llakisiña sañwa muni, ukajj parlatasana luratasanwa qhan amuyasiñapa. Khuyaptʼayasir jaqejja, janiw aleq suma jaqekïkiti, jan ukasti taqe chuymaw munasi, mayninakajj kunjamäsipkis uksa amuyarakiwa. Khuyaptʼayasirïñajj espíritu santon achupat maynïriwa, taqe cristianonakaw ukhamäpjjañaparaki (Gál. 5:22, 23). Jichhajj kunjamsa Jehová Diosampi Jesusampejj khuyaptʼayasirïpjjatap uñachtʼayapjjäna, kunjamsa jiwasajj jupanakat yateqassna uk yatjjatañäni.

Jehová Diosajj taqenitwa khuyaptʼayasi, ‘jan yuspärasir jaqetsa jan wali jaqetsa khuyaptʼayasirakiwa’ (Luc. 6:35). Sañäni, “Jupajj jan wali jaqetakisa suma jaqetakisa taqenitakiw intip jalsuyani, cheqapar sarnaqeritakisa jan cheqapar sarnaqeritakisa ukhamarakiw jallu puriyani” (Mat. 5:45). Ukhamajja, ‘janiw Diosan luratäktanti’ sapki uka jaqenakasa, kuntï Diosajj lurawayki ukanak katoqapjjewa, mä jukʼsa kusisitaw jakasipjjaraki.

Jichhajja Jehová Diosajj Adanampiru Evampir kunjamsa khuyaptʼayäna uk uñjañäni. Juchachasipjjäna uka qhepatjja, jupanakajj qʼalaläsipkatap amuyasisajj “higo qoqan laphinakapwa chʼukthapipjjäna, ukampirakiw imjjatasipjjäna”. Ukampis Edén jardinat jaqsutäsajj yaqha kasta isinakwa munapjjañapäna, kunattejj oraqejj maldicitänwa, ‘chʼaphinaka, ukhamarak jan walinakakiw achjjäna’ Diosajj uk yatïnwa. Ukatwa uk amuyasajj ‘animalanakan lipʼichipat isi lurarapïna’ (Gén. 3:7, 17, 18, 21).

Jehová Diosajj ‘jan wali jaqerusa suma jaqerus’ sumsa uñjkchejja, jupat jan jitheqtir servirinakaparojj jukʼampiw munasi. Sañäni, Zacarías profetajj jakkäna uka tiemponjja, Jerusalenankir templojj mayampi saytʼayasiskipan jarkʼataw uñjasïna, ukhamïpansti mä angelajj wal llakisïna. Diosajj arunakap istʼasajja, ‘munasiña khuyapayasiña arunakampiw’ chʼamañchtʼäna (Zac. 1:12, 13). Elías profetarojj ukhamarakiw chʼamañchtʼäna. Mä kutejja, wali llakitäsajj ‘jakañajj apaqjjeta’ sasaw Jehová Diosar säna. Diosasti, kunjamsa jikjjatasïna uk amuyasajj mä angelaruw chʼamañchtʼañapatak khitäna. Ukatjja, ‘janiw sapäktati’ sasaw sarakïna. Ukanakaw Elías profetarojj Diosar serviskakiñatak yanaptʼäna (1 Rey. 19:1-18). Ukampis ¿khitis Diosat yateqasisajj mayninakar khuyaptʼayirïna?

Jesusajj aka oraqenkkäna ukhajja, khuyaptʼayasiri, munasiri ukham jaqet uñtʼatänwa. Janipuniw jaqenakarojj munañapar apnaqerïkänti  ni chuyma ustʼayir arunaksa parlirïkänti. Mayninakat sinttʼasisajj akham sänwa: “Nayar jutapjjam, taqe qarjatanaka, jatjatanaka, nayaw jumanakar samarañ churapjjäma. [...] Nayan yukuj apañajj janiw chʼama tukuñäkiti” sasa (Mat. 11:28-30). Ukatwa jaqenakajj taqe cheqar arkapjjäna. Jupajj sinttʼasiñatwa jaqenakar manqʼayäna, usutanakarus qolläna, Awkipatsa ‘kunayman toqenakat yatichäna’ (Mar. 6:34; Mat. 14:14; 15:32-38).

Niyakejjay Jesusajj khuyaptʼayasirïchïnjja, mayninakajj kunjamäsipkis uk amuytʼirïnwa, ukarjamaw uñjarakirïna. Awisajj janis tiemponïkchïnjja, jupar thaqerinakarojj munasiñampipuniw katoqerïna (Luc. 9:10, 11). Mä kutejja, wila apa usumpi 12 maranak tʼaqesir mä warmiw jupar jakʼachasïna, qollatäñatakejj isipatwa Jesusar llamktʼäna. Leyirjamajja, uka warmejj qʼañut uñjatänwa, janiw uk lurañapäkänti (Lev. 15:25-28). Ukampis Jesusajj janiw toqenoqkänti. Antisas khuyaptʼayasiñat uka warmir akham sänwa: “Wawa, Diosar confiyatam laykojj walikëjjtawa. Sumak sarjjam, janiw mayampis uka usumpejj tʼaqesjjätati” sasa (Mar. 5:25-34). Cheqas Jesusajj wali khuyaptʼayasirïnwa.

Jehová Diosasa Jesusas luratanakampiw khuyaptʼayasirïpjjatap uñachtʼayapjjäna ukwa akhakam yateqtanjja. Ukham lurañajj kunatsa wakisi uk yatichañatakejja, Jesusajj jaqe masipat khuyaptʼayir mä samaritano jaqetwa parläna. Samaritanonakampi judionakampejj janis sum apasipjjerïkchïnjja, samaritano jaqejj qʼal lluchʼsupkäna, nuwjapkäna, niya jiwirjam jaytapkäna uka judío jaqet sinttʼasïnwa. Usuchjatäkäna ukanaksa qolltʼänwa, chʼoqtʼarakïnwa, ukat mä alojasiñ utar apasasti utanirojj qollqwa uñjañapatak churäna. “Jukʼampi gastojj utjani ukhajja, kuttʼanï ukhaw churjjäma” sasaw sarakïna (Luc. 10:29-37).

Maysa toqetjja, chʼamañchtʼkir arunak parlasaw khuyaptʼayasirïtas uñachtʼayaraksna. Cheqas llakejj jaqer mayjtʼaykchisa, ‘suma arojj kusisiyiwa’ sasaw Bibliajj qhanañchi (Prov. 12:25). Ukhamajj khuyapayasirïñasa, suma chuymanïñasa mayninakar chʼamañchtʼañatakiw yanaptʼistani. * Ukhamatwa jupanakat llakisitas uñachtʼayañäni. Ukaw jan walinakar saykatañatakisa kusisitäñatakis jupanakar yanaptʼani (Prov. 16:24).

Niyakejjay Diosar uñtasit luratästanjja, taqeniw Jupjam khuyaptʼayasirïsna (Gén. 1:27). Amuytʼañataki, apóstol Pablojj Roma markar saräna ukhajja, Julio sat mä romano oficialaw jan escapañapatak jupamp chika saräna. Uka “oficialajj khuyapayasiñampiw Pablor uñjäna, amigonakapan ukar sarañsa janiw jarkʼkänti”, ukhamatwa Sidón markankir amigonakapas yanaptʼapjjäna (Hech. 27:3). Qhepatjja, Pablosa yaqha jaqenakasa barcompi qotar jalantapjjäna ukhajja, Malta sat islankirinakajj khuyapayasiñampiw jupanakar uñjapjjäna, juntʼurasipjjañapatakejj ninwa phichapjjäna (Hech. 28:1, 2). Ukham lurapjjatapajj wali yateqaskayawa. Ukampis khuyaptʼayasir jaqëñatakejja, janiw mayninakar awisak yanaptʼañasakïkiti jan ukasti jukʼampwa lurañasa.

Jehová Diosar kusisiyañatakejj khuyapayasir jaqëñasawa. Ukatwa Diosajj “suma chuymanïñampi” isthapisipjjam sasin ewjjtʼistu (Col. 3:12). Cheqas awisajja, mayninakar khuyapayañajj chʼamakïspawa. ¿Kunatsa chʼamäspa? Ajjsarirïtasata, jiwas pachpar jan confiyatasata, jiwas pachpatak llakisitasata, jan ukajj Diosan arunakap conträpjjätap laykuw jan  khuyapayjjsnati. Ukampis Jehová Diosatwa yateqasiñasa, espíritu santon yanaptʼapsa mayisiñasarakiwa ukaw mayninakar khuyaptʼayañatak yanaptʼistani (1 Cor. 2:12).

¿Kunjamatsa mayninakat jukʼamp khuyaptʼayassna uk amuyañatakejj kunas yanaptʼistaspa? Akham jisktʼasiñasawa: “¿Mayninakajj kun sapjjetu ukhajj sumti istʼtjja? ¿Kuna yanaptʼsa munapjje uk amuytti? ¿Kunapachas jan familiarajäki jan ukajj jan amigojäki ukanakat khuyaptʼayastjja?” sasa. Jaqenakaru jilat kullakanakaru jukʼamp sum uñtʼañatakejj kunsa lursna ukwa amuytʼañasa. Ukhamatwa kunjamsa jikjjatasipjje, kuna yanaptʼsa munapjje uk yatiñäni. Ukatjja kunjamtï uñjatäñ munktanjja, ukhamarakiw yaqhanakar uñjañasa (Mat. 7:12). Jehová Diosarus yanaptʼap mayiñasarakiwa, Jupajj chʼamachasitasar bendisiniwa (Luc. 11:13).

Apóstol Pablojj Diosan serviripjamajj kunjamäñapas uka toqet parläna ukhajja, ‘suma chuymaniñatwa’ parlarakïna (2 Cor. 6:3-6). Jupajja luratanakapampi arsutanakapampiw jaqenakat wal llakisitap uñachtʼayäna. Ukatwa jaqenakajj jupan ukar jutapjjerïna (Hech. 28:30, 31). Niya ukhamarakiw sarnaqatasajj jaqenakar Diosat yatjjatañ munapjjañapatak yanaptʼaspa. Jan yatiñ munapki ukanakarus munasiñampi uñjañäni ukhajja, suma chuymanïpjjañapatakiw yanaptʼsna (Rom. 12:20). Tiempompisti Diosan arunakap yatiñ munjjapjjaspawa.

Paraisonjja, waranq waranqa jaqenakaw jaktanipjjani. Nayrajj inas jupanakar jan khitis khuyaptʼayirïkchïnti, ukampis khuyaptʼayapjjani ukhajj wal kusisipjjani. Mayninakarus ukhamarakiw uñjapjjani. Taqe khitinakatï mayninakar munasiñampi, khuyapayasiñampi uñjapkani ukanakarojja, Jehová Diosajj wiñay jakañwa churani. Jan khuyapayasirinakasti janiw wiñay jakapkaniti (Sal. 37:9-11). Cheqas Diosan Reinopajj apnaqjjani ukhajja, jan kunar ajjsaras sumankañan jakasiñaw utjani. Ukampis janïr uka tiempo purinkipanjja, ¿kunjamsa khuyapayasirïñajj jichhürunakan yanaptʼistaspa?

‘Khuyapayasirïki ukajj jupa pachpatakiwa aski luraski’ sasaw Bibliajj qhanañchi (Prov. 11:17). Jaqenakajja, khuyapayasirinakampi chikachasiñsa jupanakat yateqasiñsa wal munapjje. Jesusajj akham sänwa: “Kunjamtï jumanakajj yaqhanakar uñjapktajja, ukhamarakwa jupanakajj uñjapjjätam” sasa (Luc. 6:38). Ukham chuymani jaqenakajj walja amigonakanïpjjewa.

Apóstol Pablojj Éfeso markankir cristianonakar akham sänwa: “Maynit maynikam suma chuymamp uñjasipjjam, maynit maynikamas sinttʼasipjjam. [...] Maynit maynikam taqe chuyma perdonasipjjam” sasa (Efes. 4:32). Jilat kullakanakajj maynit maynikam munasipjje, yanaptʼasipjje ukhajja, congregacionajj jukʼamp mayachtʼatawa. Jupanakajj janipuniw mayninakar chuyma ustʼayañatakisa, jiskʼachañatakis sawkasipkiti, ni mayninakampi jan wal uñjayañatakis jan walinak parlapkiti. Antisas mayninakjjat parlañat sipansa, kunanakatï chʼamañchkaspa ukanakwa parlapjje (Prov. 12:18). Ukatwa mayachtʼatäpjje, Diosarus kusisitaw servipjjaraki.

Cheqansa khuyaptʼayasirïtasjja, luratasampi arsutasampiw uñachtʼayañasa. Mayninakat khuyaptʼayastan ukhajja, Jehová Diosjam munasiri, churirïtaswa uñachtʼaytanjja (Efes. 5:1). Congregacionansa mayachtʼatätanwa, jaqenakarus Diosat yateqapjjañapatakiw yanaptʼtanjja. Ukhamajja, khuyaptʼayasirïñataki, mayninakatakis yateqaskay sarnaqañatak chʼamachasipjjañäni.