Tokmak (Kirguistán) marka jakʼanwa 1937 maran nasiwayta. Walja jaqenakajj mä granjan trabajipkäna ukana, ukanakajj koljós sasin uñtʼatänwa. Familiajajj kirguís aru parlirïpjjewa. Awk taykajajja, willjtat inti jalantkamaw koljós ukan trabajipjjäna. Ukan trabajirinakajja, maran walja kutiw manqʼañanak katoqasipjjerïna, ukampis pagopjja maran mä kutikwa katoqapjjäna. Taykajajj sullka kullakajampiru nayampir sum uñjañatakejja, wal chʼamachasïna. Phesqa maranakakiw escuelar sarawayta. Uka qhepatjja, koljós ukanwa uru jornal trabaj-jjayäta.

Jakaskayäta uka cheqanjja, niya taqeniw pisin jakasipjjäna, kunatï jakañatak wakiski uk jikjjatañatakis wal trabajiñaw wakisïna. Waynäkayäta ukhajja, jutïr urunakatsa jakäwijatsa janiw llakisirïkti. Jehová Diosata ukat jaqenakatak kuna amtanisa uka toqet kunatï cheqäki uk yatiñajja, kunjamsa yanaptʼitaspäna uk janiw amuykayätti. Cheqa yatichäwinakajj kunjamsa Kirguistán markat alay (norte) toqer purïna, yatiyasirakïna ukajj jan armkañawa.

Khä 1950 maranakanwa Diosan arunakapajj Kirguistán markar puriwayi. Ukampis Diosat yatiyañajj chʼamakïnwa. Uka tiemponjja, Kirguistán markajj Unión Soviética uka taypinkänwa. Uka markanakan jakasiri Testigonakajj janiw politicar mitisipkänti (Juan 18:36). Ukatwa Estado comunista ukan enemigopäpjjewa sasin arknaqat uñjasipjjäna. Ukampis Diosan arunakapajj suma chuyman jaqenakar puriñapatakejja, janiw jaqen kuna amuyunakapas jarkʼkaspati. “[Diosatakejj] taqe kunas lurasikispawa”, ukwa aka maranakan yateqawayta (Mar. 10:27).

 Testigonakar arknaqasiwayki ukajja, Kirguistán markan jukʼamp uñtʼatäpjjañapatakiw yanaptʼawayi. Estado comunista ukar jan yanaptʼirinakajj Siberia cheqar apataw uñjasipjjerïna, uka cheqajj Unión Soviética uka taypinkarakïnwa. Siberia cheqat antutatäsinjja, waljanejj Kirguistán markaruw jutjjapjjäna, mä qhawqhanejj Testigöpjjänwa, jupanakaw Bibliat yatichapjjetäna. Maynejj Emil Yantzen satänwa, jilatajj Kirguistán markana 1919 maranwa nasïna. Chʼama trabajonak lurapkäna ukar apatäsaw Bibliat yateqäna. 1956 maran kuttʼanjjasajja, Emil jilatajj Sokuluk markaj jakʼaruw jakasir jutjjäna. Uka markanwa 1958 maran Kirguistán markankiri nayrïr congregacionajj uttʼayasirakïna.

Niya mä mara qhepatjja, Victor Vinter jilataw Sokuluk markar purinirakïna. Uka jilatajja, kunayman jan walinakanwa uñjasiwayi. Politicar jan mitisitapatjja, pä kutiw 3 maranaka carcelankañapatak juchañchatäna. Uka qhepatjja, 10 maranakaw carcelan llawintatäna. 5 maranakarakiw yaqha markar apat uñjasïna. Jilat kullakanakajj ukham arknaqatas uñjasipkchïnjja, cheqa yatichäwinakajj yatiyasiskakïnwa.

Khä 1963 maratakejja, niya 160 Testigonakaw Kirguistán markan utj-jjäna, jupanakat waljanejj Alemania, Ucrania, Rusia markatäpjjänwa. Maynejj Eduard Varter satänwa, jupajj Alemania markana 1924 maranwa bautisasïna. 1940 maranakanjja, nazi partidonkirinakaw jilatarojj campos de concentración ukar khitapjjäna. Mä qhawqha tiempotjja, Unión Soviética ukar yanaptʼir jaqenakarakiw jilatarojj markat alisnukupjjäna. 1961 maranjja, uka jilatajj Kant markaruw jakasir sarjjäna, uka markajj markajat jakʼankakiwa.

Elizabeth Fot kullakaw Kant markan jakasirakïna. Kullakajj isinak lurirïnwa. Sum chʼukhurïtapatjja, doctoranaka, profesoranaka ukat yaqha ukham yatjjatat jaqenakaw kullakamp isinak chʼukhuyasipjjerïna. Jupanakat maynejj Aksamai Sultanalieva satänwa, jupajj fiscalian trabajiri mä chachan esposapänwa. Aksamai warmejj isinak lurayasiñatakiw kullakan ukar saräna, ukampis jaqenakajj kuna amtamp luratätansa, jiwatanakas kunjamäsipkisa uka toqenakatwa kullakar jisktʼäna. Elizabeth kullakajj Bibliampiw jisktʼanakapar qhanañchäna. Tiempompejja, Aksamai warmejj taqe chuymaw Diosan arunakap yatiyjjäna.

Uka maranakanjja, Moldavia markankiri Nikolai Chimpoesh jilataw tamanak tumptʼirit uttʼayatäna, niya 30 maranakaw ukham serviwayi. Jilatajj janiw congregacionanakaruk visitkänti, jan ukasti qellqatanak copiasiñapataki ukat congregacionanakar puriyasiñapatakiw yanaptʼarakïna. Kuntï jilatajj luraskäna uk autoridadanakajj uñjapjjänwa. Ukatwa Eduard Varter jilatajj Nikolai jilatar akham säna: “Autoridadanakatï qellqatanakat jisktʼapjjätam ukhajja, jan ajjsarasaw ‘Brooklyn markat apayanipjjetu’ sasin säta. KGB policianakarojj janiw ajjsarätati. ¡Janiw kunar ajjsarañas utjkiti!” sasa (Mat. 10:19).

Uka qhepatakwa Kant markan KGB policianakajj Nikolai jilatar jawsayapjjäna. Jilatajj uk amtasajj akham siwa: “‘¿Kawkitsa qellqatanak apsupjjta?’ sasin policiajj jisktʼitäna ukhajja, ‘Brooklyn markat apayanipjjetu’ sasaw sayäta. Policiajj jan kamsirjamäsajj ‘sarjjam’ sitänwa, ukat janiw mayamps jawsayjjetänti” sasa. Testigonakajj jan  ajjsarasaw markajan yatiyasipkakïna. Familiajanjja, Mairambubu warmijaw cheqa yatichäwinak 1981 maran nayrïr kut istʼäna.

Mairambubu warmijajj Naryn (Kirguistán) sat cheqankiriwa. Jupampejj sullka kullakajan utapanwa agosto, 1974 maran uñtʼasipjjta. Uñjta uka urutpachaw jupar wal munasiyäta, ukatwa ukürpach casarasipjjta.

Khä 1981 maran enero phajjsinjja, warmijajj qhaturuw autot saraskäna, ukhaw kuntï qalltan siskayäta ukajj pasäna. Jukʼamp yatiñ munasajja, ‘kuna sutinïtasa, kawkjansa jakasta’ sasaw esposajajj uka warmir jisktʼatayna. 1980 maranakanjja, Testigonakajj jarkʼatäpjjänwa, ukatwa uka warmejj sutipak yatiyäna, Apun satänwa. Kawkjansa jakasïna uk esposajar yatiyañat sipansa, kawkjansa nanakajj jakasipjjayäta ukwa qellqtʼasïna. Esposajajj wali kusisitaw ukürojj utar purinïna.

Jupajj akham sitänwa: “Wali musparkañ arunak istʼawaytjja. Jutïrinjja, janiw jiwjjañäniti, ajjsarktan uka animalanakarus janiw ajjsarjjañäniti sasaw mä warmejj situ” sasa. Kuntï siskitäna ukajja, nayatakejj cuentokïkaspas ukhamakïnwa. Ukatwa “visitir jutkani ukhaw uka toqet jukʼamp qhanañchistani” sasin sayäta.

Apun kullakasti kimsa phajjsinak qhepatwa utar jutäna. Tiempompejj yaqha kullakanakaw jutapjjarakïna, ukhamatwa kirguís jaqenakat nayrïr Testigonakar uñtʼapjjayäta. Kullakanakajja, Jehová Diosatsa jaqenakatak kuna amtanisa uksa, De paraíso perdido a paraíso recobrado sat librompiw yatichapjjetäna. * Niyakejjay Tokmak markan uka librojj mayak utjchïnjja, nanakaw uka librot amparamp copiasipjjerïta.

Génesis 3:15 qellqatan utjki uka profeciatwa nayraqat yateqapjjayäta. Uka profeciajj Diosan Reinopan apnaqeri Jesucristo toqew phoqasini. Ukajj wali wakiskir yatiyäwiwa, ¡taqe jaqenakaw yatipjjañapa! Ukaw nanakarus Diosan arunakap yatiyañatak chʼamañchtʼawayapjjetu (Mat. 24:14). Bibliat yateqañajj jukʼat jukʼatwa nayra jakäwij jaytañatak yanaptʼapjjetäna.

Tokmak markanjja, mä jilataw casarasïwipar invitapjjetäna. Ukanjja, Testigonakajj mayjäpjjatapwa esposajamp amuyapjjayäta. Casarasïwinjja, janiw machjayir umañanakajj utjkänti, taqe kunas  yäpar waktʼayatarakïnwa. Yaqha ukham fiestanakanjja, jaqenakajj machjasiri, jan wali arunak parliri, jan walinak luriri ukhamäpjjerïnwa.

Mä qhawqha tantachäwinakaruw Tokmak markan sarapjjarakiyäta. Jallojj jan purkäna ukhajja, tantachäwinakajj bosquenwa apasïna. Policianakajj thaqapjjapunitänwa, ukatwa jupanakajj jutasipkiti janicha uk uñjir mä jilatajj tantachäwinakan utjäna. Juyphi pachanjja, mä utanwa tantachasipjjerïta. Mä qhawqha kutiw policianakajj kuntï lurasipkta uk uñjir jutapjjäna. Chu sat jawirana julio, 1982 maranwa esposajamp bautisasipjjayäta. Jan katjayasiñatakejja, wali amuyumpiw taqe kuns lurapjjayäta (Mat. 10:16). Uka urojj jukʼat jukʼatwa jilat kullakanakajj bosquer purinipjjäna. Diosar mä cancionampi jachʼañchasajja, bautisasirinakatak arstʼäw istʼapjjarakiyäta.

Khä 1987 maranjja, Bibliat yateqañ muniri mä jaqer visitir sarañajatakiw mä jilatajj mayitäna. Uka jaqejj Balykchy markanwa jakasïna. Ukar puriñatakejj pusi horaw trenat viajipjjañajäna. Uka markanjja, walja jaqenakaw Diosan arunakapat wal yatiñ munapjjäna, ukwa ukar sarasin amuyapjjayäta. Ukaw Diosar jukʼamp serviñatakis chʼamañchtʼawayapjjetu.

Diosan arunakap yatiyañatakejja, niya sapa sabadompi domingompiw esposajampejj Balykchy markar sarapjjerïta, tantachäwinakas utjarakïnwa. Bibliat apstʼat qellqatanakjja, chʼoqe costalanakaruw apapjjerïta, uka costalanakajj mishok sasin uñtʼatänwa. Jaqenakajj qellqatanak liyiñ wal munapjjerïna, ukatwa sapa phajjsejj pä costalanak phoq apapjjerïta, ukampis janiw taqenitakipunejj utjirïkänti. Balykchy markar trenat sarkasasa kuttʼankasasa, yatiyapjjapunirïtwa.

Balykchy markar sarapkayäta ukhatjja, 8 maranakaw pasjjäna, ukhaw uka markan 1995 maran nayrïr congregacionajj uttʼayasïna. Uka markar sarañajj qollqetakïnwa. Nanakajj janiw añcha qollqenïpkayätti. Ukampis mä jilataw qollqemp yanaptʼapjjetäna. Jehová Diosajj qhawqsa Jupar serviñ munapjjayäta uk yatïnwa, ukatwa “alajjpach ventananak jistʼaranisina” wal bendisipjjetäna (Mal. 3:10). Cheqas Diosan yanaptʼapampejj kunas lurasikispawa.

Jilïr irpiritwa 1992 maran uttʼayapjjetäna. Markajanjja, nayaw kirguís jaqenakat nayrïr jilïr irpiriyäta. Tokmak markan congregacionar sarapkayäta ukanjja, Jehová Diosar jukʼamp serviñatakejj walja lurañanakaw utjäna. Uka markan institutonakan yateqapkäna uka wayn tawaqonakat waljaniruw Bibliat yatichapjjayäta, jupanakajj kirguís aru parlirïpjjänwa. Jupanakat maynejja, sucursal sarayiritwa jichhajj serviski. Paninejj precursor especialatwa servisipkaraki. Tantachäwinakansa, yaqhanakar yanaptʼapjjapunirïtwa. 1994 marakamajja, ruso arutakwa qellqatanak katoqapjjerïta, tantachäwinakas uka arutänwa. Ukampis kirguís aru parliri jilat kullakanakan jukʼamp utj-jjatap laykojja, tantachäwinak uka arur jaqokipasaw yanaptʼayäta. Ukhamat cheqa yatichäwinak sum amuyapjjañapataki.

Esposajampejja, wawanakajar yatichañatakiw wal chʼamachasipjjayäta. Nanakampiw Diosan  arunakap yatiyirisa tantachäwinakarus sapjjerïna. Gulsayra phuchajajj 12 maranïkäna ukhajja, callen saraskir jaqenakampejj Bibliat parlapunirïnwa. Taqe wawanakajaw Biblian textonakap pʼeqer yatsuñatak chʼamachasipjjerïna. Nayratpachaw wawanakajasa allchhinakajasa, congregacionan yanaptʼañatak chʼamachasiwayapjje. 9 wawanakaja ukat 11 allchhinakajaw jakasipki, jupanakatjja 16 Diosar servisipki, jan ukajj awk taykapamp chik tantachäwinakar sarapjje.

Kirguistán markana, 1950 maranakan yatiyañ qalltapkäna uka jilat kullakanakatakejja, kunjamsa jichhajj Diosar servisipkta uk uñjañajj wali kusiskañäspawa. 1990 maranakatjja, jan khitins jarkʼataw Diosan arunakap yatiyjjapjjta, jachʼa tantachäwinakansa tantachasjjapjjta.

Khä 1991 maranjja, Alma-Atá (Kazajistán) sat markaruw esposajamp viajipjjayäta (uka markajj Almaty satäjjewa). Ukhapuniw mä jachʼa tantachäwir sarapjjayäta. Kirguistán markanjja, 1993 maranwa nayrïr jachʼa tantachäwejj apasïna, Spartak sat estadionajj Biskek markan utjkäna ukana. Semanapuniw jilat kullakanakajj uka cheq sum qʼomachapjjäna. Spartak sat estadio uñjiri chachas wal musparäna, alquileratsa janiw kuns mayipkitänti.

Khä 1994 marajj jan armkañarakiwa, uka maraw kirguís arut nayrïr qellqatajj mistuwayi. Jichhajja, Biskek markankiri sucursalanwa qellqatanakajj kirguís arur jaqokipasiski. Kirguistán markanjja, 1998 maratwa Testigonakajj leyinakarjam uñtʼatäjjapjje. Jichhajj 5.000 jila yatiyirinaka ukat 83 congregacionanakaw aka markan utj-jje. Chino, inglés, kirguís, ruso, lenguaje de señas ruso, turco, uigur ukat uzbeko arunakanjja, 25 gruponakaw utjaraki. Jilat kullakanakajj janis kikpäpkchejja, mayachtʼataw Jehová Diosar servipjje. Cheqas Jupaw aka markan ukham yatiyasiñapatak wal yanaptʼawayi.

Jehová Diosajj wal yanaptʼawayitu. Pisin jakasiri familianwa jilsuwayta, phesqa maranakakiw escuelarus sarawayta. Ukhamäkchisa, Jehová Diosajj jilïr irpirïñataki ukat nayat sipansa jukʼamp yatjjatat jaqenakar Bibliat yatichañatakiw yanaptʼawayitu. Kunatï jiwasatakejj wali chʼamäki ukajja, Diosatakejj janiw chʼamäkiti. Kuntï aka maranakan uñjawaykta ukajja, Diosat yatiyaskakiñatakiw chʼamañchtʼawayitu. Jupatakejj “taqe kunas lurasikispawa” (Mat. 19:26).