1-3. ¿Kunatsa Diosar sapürunjam servir jilat kullakanakat yaqhepajj asignacionap jaytapjje?

ROBERT jilatampi Mary Jo esposapampejja, 21 maranakaw misionerot wali kusisita servisipkäna, ukhaw awk taykanakapajj usuntapjjäna. Jupanakajj akham sapjjewa: “Awk taykanakajar cuidañajj kusiskañänwa, ukampis servipkayäta uka cheqat sarjjasajj wal llakisipjjayäta, ukankañajj wal gustapjjetäna” sasa.

² William jilatampi Terrie esposapampejj akham sapjjarakiwa: “Usutäpjjataj layku asignacionajar jan kuttʼirjamäjjapjjayäta ukhajja, wal jachapjjayäta. Nanakajj yaqha markan serviñ wal munapjjayäta, ukampis jichhajj janiw puedisjjänti” sasa.

³ Alexéi jilatajj akham siwa: “Gobiernojja, kawkintï nayajj trabajkayäta uka Betel jistʼantañwa munäna, uk yatipjjayätwa. Ukampis jistʼantapjjäna ukhajja, wali llakitaw Betelat sarjjapjjayäta” sasa.

4. ¿Kuna jisktʼanakarus aka yatichäwin qhanañchaskañäni?

⁴ Janiw jupanakakejj asignacionap jaytapkänti, walja betelitanakasa, Diosar sapürunjam servir yaqha jilat kullakanakas ukhamarakiw jaytapjje. * Jupanakatakejja, asignacionap jaytañajj chʼamakïspawa. Ukampis ¿kunas Diosar kusisit serviskakiñatakejj jupanakar yanaptʼaspa? ¿Kunsa yanaptʼañatak lursna? Uka jisktʼanakar qhanañchañajj wali wakiskiriwa, ukaw cambionak utjani ukhajj taqenirus yanaptʼistani. *

5. ¿Kuna jan walinakansa asignacionasat cambiatajj uñjassna?

⁵ Betelansa, jan ukajj yaqha cheqansa sirvstanjja, ukankirinakar wal munastanjja, ukan serviñas wal gustarakistu. Ukatwa uka cheqat sarjjasajj wal llakistanjja. Quedasirinakatsa ukhamarakiw llakistanjja, jupanakamp jikisiñsa munaraktanwa. Yamas gobiernonakan arknaqat uñjasitas layku sarjjtan ukhajj jukʼampiw llakistanjja (Mat. 10:23; 2 Cor. 11:28, 29). Maysa toqetjja, yaqha costumbrenakar yatinoqtañasa markasar kuttʼjjasin yatinoqtañas chʼamakïspawa. Robert jilatampi Mary Jo esposapampejj akham sapjjewa: “Niyakejjay yaqha markan walja maranak servipjjchiyätjja, markajan utjki uka costumbrenak janis uñtʼapkirista ukhamänwa. Wawatpach parlapkayäta uka arut predicañas mayjänwa, yaqha markatäpkiristsa ukhamaw amuyasipjjayäta” sasa. Maysa toqetjja, akatjamatwa qollqet pistʼsna, jan ukajj wali llakita, jan kuns lurirjamaw uñjassna. ¿Kunas ukhajj yanaptʼistaspa?

6. ¿Kunsa Jehová Diosan jakʼapankañatakejj lurañasa?

⁶ Jehová Diosan jakʼapankañasawa (Sant. 4:8). Ukatakejj Juparuw confiyañasa, Jehová Diosajj ‘mayisitanakar istʼiri’ Diosawa (Sal. 65:2). Salmo 62:8 qellqatajj akham siwa: “Chuymanakam jupar jistʼarapjjam” sasa. “Kunanaktï mayktan jan ukajj amuyktan ukanakat sipansa jukʼampinakwa” Jehová Diosajj luraspa (Efes. 3:20). Jupajj janiw kunanaktï oracionan mayktan ukak lurkiti, problemanakas askichañatakejj kunanaktï jan suyktan ukanakwa luraspa.

7. 1) ¿Kunas Diosan jakʼapankañatakejj yanaptʼistaspa? 2) Hebreos 6:10-12 textorjamajja, ¿Diosar taqe chuyma servitasajj inamayäniti?

⁷ Biblia sapür liyiña ukhamarak kuntï liyktan ukat lupʼiñaw Jehová Diosan jakʼapankañatakejj yanaptʼarakistaspa. Nayrajj misionerot sirvkäna uka mä jilatajj akham siwa: “Kunjamatï nayra asignacionasan lurkayätanjja, ukhamarakiw familjamajj Bibliat yatjjataskakiñasa, tantachäwinakatakis wakichtʼasiskakiñasa” sasa. Maysa toqetjja, jichhak purktan uka congregacionankir jilat kullakanakampi predicañatakejj chʼamachasiskakiñasawa. Janis nayrjam serviñ puedjjstanjja, Diosajj janipuniw Jupar taqe chuyma servirinakapat armaskaniti (Hebreos 6:10-12 liytʼañataki).

8. ¿Kunjamsa 1 Juan 2:15-17 texton qellqatäki uka arunakajj kunatï wakiski ukampik jakasiñatak yanaptʼistu?

 ⁸ Kunatï wakiski ukampikiw jakasiñasa. Kunatï akapachan utjki ukanakat sint llakisiñajj janipun Diosar serviñat jitheqtayistpanti (Mat. 13:22). Amigonakasasa, familiaranakasasa, yaqha jaqenakasa, yanaptʼañ munasajj akham sapjjestaspawa: “Kusisit jakasiñatakejj walja qollqenïñamawa” sasa. Ukampis jan ukar istʼañäniti (1 Juan 2:15-17 liytʼañataki). Diosaruw confiyañasa, Jupajj ‘horasaparuw’ jan sint llakisiñatakisa, Jupar serviñatakisa, kunatï jakañatak munaski ukampis yanaptʼistani (Heb. 4:16; 13:5, 6).

9. 1) Kuntï Proverbios 22:3, 7 texton siski ukarjamajja, ¿kunatsa jan manunïñatak chʼamachasiñasa? 2) ¿Kunas suma amtanakar puriñatakejj yanaptʼistaspa?

⁹ Jan manunïñatakiw chʼamachasiñasa (Proverbios 22:3, 7 liytʼañataki). Mä markat yaqha markar sarjjañatakejj walja qollqew munasispa, ukatwa awisajj manur facilak purtʼassna. Ukhamajj janipun jan wakiski ukanak alañatakejj manusiñäniti. Awisajj usut mä familiarar uñjatas layku, jan ukajj yaqha ukham llakinakan uñjasitas laykuw qhawqsa maytʼasiñäni uk amuytʼañajj chʼamakïspa. Ukapachanjja, Diosar ‘taqe chuym ruwtʼasiñaw’ suma amtanakar puriñatak yanaptʼistaspa. Jupaw jan sint llakisiñatakisa sum amuytʼasiñatakis yanaptʼistani (Filip. 4:6, 7; 1 Ped. 5:7).

10. ¿Kunas yaqha amigonakanïñatak yanaptʼistaspa?

¹⁰ Suma amigonakanïñasawa. Amigonakasampiw kunjamäsktansa kuna jan walinakansa uñjastan ukanakat parltʼañasa, cheqas jiwasjam jan walinakan uñjasiwayapki ukanakampiw parltʼañasa. Ukaw jan sint llakisiñatak yanaptʼistani (Ecl. 4:9, 10). Nayra asignacionasan utjkistäna uka amigonakasampejj parltʼasiskakiñäniwa, ukampis yaqha amigonak thaqañaw wakisispa. Ukatakejj jiwasaw jupanakan amigopäñatakejj chʼamachasiñasa. Jehová Diosajj kunjamsa bendisiwayistu ukanakat jupanakar cuenttʼañäni ukhajja, qhawqsa Diosar serviñajj kusisiyistu ukwa amuyapjjani. Yaqhep jilat kullakanakajj janis uk amuyapkchinejja, yaqhepajj yateqaskay sarnaqatas uñjasajj amigosäñwa munapjjaspa. Ukampis kunanaktï lurawayktan ukanakatsa, kunja llakitätansa uka toqetsa jan añcha parlañäniti.

11. ¿Kunas chacha warmjam kusisit jakasiskakiñatakejj yanaptʼistaspa?

¹¹ Chachasana jan ukajj warmisan usuntatap laykus asignacionas jaytawaystanjja, jan jupar juchañchañäniti. Jiwasan usuntatas layku jaytawaystan ukhas janirak juchañchasiñäniti, janirak chachasarusa jan ukajj warmisarus jan waltʼayksna ukham amuyañäniti. Amtapuniñäni, chacha warmejj ‘mä jañchikïtanwa’, Jehová Diosar akham sayätanwa: ‘Walinsa jan walinsa purapatwa cuidasipjjä’ sasa  (Mat. 19:5, 6). Maysa toqetjja, inas jan wawanïñ munasajj wawan uñjasstan. Ukhamächejja, wawar akham sañasawa: ‘Jaytawaykta uka asignacionat sipansa jumaw jukʼamp wakiskirïtajja’ sasa. Sapa kutiw ‘Jehová Diosan regalopätawa’ sasin sañasaraki (Sal. 127:3-5). Diosar kunja kusisitas serviyätan uka toqetsa parlañasarakiwa, ukaw Diosar jiwasjam sapür serviñatakejj yanaptʼaspa.

12. 1) Diosar sapürunjam servir jilat kullakanakarojja, ¿kunjamsa asignacionapan servisipkakiñapatak yanaptʼsna? 2) ¿Kunjamsa asignacionapan yatinoqtañapatakejj jilat kullakanakar yanaptʼsna?

¹² Walja congregacionanakasa, jilat kullakanakasa, asignacionapan servisipkakiñapatakiw Diosar sapürunjam servirinakar yanaptʼapjje. Jupanakajj qollqempi, jakañatak wakiski ukampi, familiapat maynir uñjasa, jan ukajj asignacionapan serviskakiñapataki chʼamañchasaw yanaptʼapjje. Ukham lurapjjatapat wal yuspärtanjja (Gál. 6:2). Diosar sapürunjam servirinakat maynejj congregacionasar purinispa ukhajja, jan akham amuyañäniti: ‘Asignacionap jan sum phoqatapata, jan ukajj juchar purtʼasitapatwa akar khitanipjjpacha’ sasa. * Antisas yatinoqtañapatak yanaptʼañäni. Usutätap laykojj janis nayrjam lurañ puedjjchejja, munasiñamp katoqtʼañäni, kunanaktï lurawayki ukanakat ‘walik ukham lurawaytajja’ sarakiñäni. Jukʼamp uñtʼañatakisa, yateqasiñatakis chʼamachasiñäni. Jupanakajj wali experienciani, yatiñani, yatjjattʼata ukhamäpjjewa.

13. ¿Kunjamsa yaqha asignación katoqer jilat kullakanakar yanaptʼsna?

¹³ Qalltanjja, inas jilatajj uta jikjjatañataki,  yaqha cheqanakar sarañataki, trabajo jikjjatañataki, kunatï jakasiñatak munaski ukanak jikjjatañatak yanaptʼa munchini. Jan ukajja, inas impuestonak pagañ toqeta, seguronïñ toqeta, jan ukajj yaqha ukhamanakan yanaptʼatäñ munarakchini. Cheqas jupanakajja, khuyaptʼayatäñat sipansa, kunjamäskisa uk amuyañatak chʼamachassna ukwa munapjje. Inas familiapat maynisa, jan ukajj jupas usutächi, jan ukajja, mä familiarapan jiwatapat wali llakitäskchi. * Janis kuns siskchistanejja, amigonakapampïñ munasajj wali llakitäskaspawa. Ukhaman uñjasiñajj chʼamakïspawa, jan llakisjjañatakis tiempow munasispa.

14. Jilat kullakanakajja, ¿kunjamsa yaqha cheqat jutir mä kullakarojj yatinoqtañapatak yanaptʼapjjäna?

¹⁴ Uka jilat kullakanakarojja, jupanakamp predicasa, yateqaskay sarnaqasaw yatinoqtapjjañapatak yanaptʼsna. Yaqha markan walja maranak servir mä kullakajj akham siwa: “Nayra asignacionajanjja, sapüruw Bibliat yatichirïta. Ukampis yaqha cheqar cambiapjjetäna ukhajj janiw Bibliat mä texto liytʼañsa ni mä video uñtayañsa puedjjayätti. Ukampis jilat kullakanakajj revisitanakaparu, Bibliat yateqerinakapan ukaruw irpapjjetäna. Diosar taqe chuyma serviri uka jilat kullakanakajj kunjamsa jaqenakar Bibliat yatichapjjäna uk uñjañaw wal chʼamañchtʼitäna. Ukan Bibliat parlañ qalltañsa yateqarakiyätwa. Ukaw Diosar kusisit serviskakiñatak yanaptʼitäna” sasa.

15. ¿Kunas yaqha asignacionan kusisit serviskakiñatakejj yanaptʼistaspa?

¹⁵ Yaqha asignación katoqasajj kusisitaw Diosar serviskaksna. Jan akham amuyañäniti: “Nayra asignacionajan janiw sum serviwaykti, jichhas janiw sum sirvkti” sasa. Antisas kunjamsa Diosajj yanaptʼaskistu uk amuyañäni, arunakapsa yatiyaskakiñäni. Nayrïr cristianonakatwa yateqassna, jupanakajj “Diosan arunakapat suma yatiyäwinak yatiyasaw taqe  cheqanakar sarapjjäna” (Hech. 8:1, 4). Jiwasatï yatiyaskakiñänejja, waljaniruw Diosar uñtʼapjjañapatak yanaptʼsna. Mä qhawqha precursoranakat parltʼañäni, mä markat jaqsutäsajja, yaqha markaruw sarjjapjjäna. Ukanjja, parlapkäna uka arut yatiyirinakajj wal munasïna. Mä qhawqha phajjsinjja, walja gruponakaw utj-jjäna, uka gruponakajj ratukiw jiljjattarakïna.

16. ¿Kunsa yaqha asignacionan kusisit serviskakiñatakejj lurañasa?

¹⁶ Nehemiasajj judionakar akham sänwa: “Tatitusti kusisiñapampiw jiwasar chʼamañchistani” sasa (Neh. 8:10). Servisktan ukan wali kusisitäkstansa, Jehová Diosamp sum apasiñaw cheqpach kusisiñ churistu. Ukhamajj janipun Diosat jitheqtañäniti, Jupaw yanaptʼaskistani, irpaskistani, yatiñsa churarakistani. Nayra asignacionasanjja, jaqenakar yanaptʼañatak chʼamachasiñaw kusisit serviñatak yanaptʼistäna. Jichhajj ukhamarakiw jaqenakar yanaptʼañatak chʼamachasiñajj Diosar kusisit serviñatak yanaptʼistani (Ecl. 7:10).

17. ¿Kunsa servisktan uka asignacionat jan armañasäki?

¹⁷ Ak jan armañäniti, Jehová Diosarojj wiñayaw serviñäni, ukampis jichhajj servisktan uka asignacionajj janiw wiñayatakïkiti. Paraisonjja, inas yaqha asignación katoqchiñäni. Kimsïr parrafon parlaniwayktan uka Alexéi jilatajja, jichhajj utjki uka cambionakajj jutïrin utjkani ukatakiw wakichtʼistu sasaw amuyi. Akham siwa: “Diosasa Paraisos nayatak cheqawa, ukampis nayrajja, mä jukʼa jayankkaspas ukhamwa amuyirïta. Jichhajj Jehová Diosan jakʼapankkiristsa, Paraíso puriniñapajj sinti jakʼäjjaspasa ukhamwa amuyta” sasa (Hech. 2:25). Ukhamajj kuna asignacionanjjay Diosar serviskstanjja, janipun Jupat jitheqtañäniti. Qhawqtï lurirjamäktan uk luraskakiñäni. Jehová Diosajj janipuniw jaytanukkistaniti, Jupar kusisit serviskakiñatakejj yanaptʼistaniwa (Is. 41:13).