Bibliajj Apocalipsis libron parlki uka pusi caballonakajj sarantjjapjjewa, ukajj wali muspharkañawa. Nayrïr caballojj janqʼowa, uka caballjjar qonjjatatäki ukasti coronani mä reyirakiwa. Ukjjarusti mä nina color caballow mistuniraki, uka caballjjar qonjjatatäki ukajja, oraqen sumankañapwa apaqe. Ukatsti chʼamak arumar uñtata mä chʼiyar caballow uñstaniraki, uka caballjjar qonjjatatäki ukajj amparapar mä balanza aptʼatawa, manqʼat pistʼañaw utjani sasaw mä arojj istʼasiraki. Ukat qʼellsut mä caballow mistuniraki, uka caballjjar qonjjatatäki ukajj Jiwaña satawa. Juparojja, Sepulturaw walja jaqenakar jiwarayasa qhepat arktasinkaraki (Apocalipsis 6:1-8).

“Apocalipsis libron caballot saririnakata nayrïr kuti liytʼasajja, wal ajjsarayasiyäta. Diosan jachʼa urupajj niyaw purinjjpachäni. Nayajj janiw ukatak wakichtʼatäkti, ukhamajj jiwjjakchëjjaya sasaw amuyayäta” (Crystal).

“Caballot saririnakat wal yatjjatañ munayäta. Ukanakajj kamsañsa muni uk yatisajja, Bibliajj kunatsa uka caballonakat parli uk sumwa amuyjjayäta” (Ed).

Jumajj inas jupanakjam amuyirïsta. Apocalipsis librojj caballot saririnakata, jan ukajj pusi jinetenakat parlki ukajj niya taqe jaqenakan uñtʼatawa. Ukajj kamsañsa muni uk yatiñajj ¿yanaptʼistaspati? Jïsa. Kunjamtï Diosajj Biblian siskejja, jiwasatï Apocalipsis libro liytʼañäni, ukan qellqatäki ukajj kamsañsa muni uk sum amuytʼañäni ukat ukarjam sarnaqañatak chʼamachasiñäni ukhajja, cheqpachapuniw kusisit jakassna (Apocalipsis 1:1-3).

Biblian qellqatäki uka pusi jinetenakat liytʼasajja, yaqhep jaqenakajj wal ajjsarayasipjje. Ukampis ukajj janiw jaqenakar sustjañatak qellqatäkiti. Antisas ukajj kamsañsa muni uk yatjjatañajja, walja jaqenakaruw Diosar jukʼamp confiyapjjañapataki, jutïr urunaksa suma chuymamp suytʼapjjañapatak yanaptʼawayi. Jumarus yanaptʼarakiristamwa, ¿kunatsa ukham sissna? Uka toqetwa jichhajj yatjjatañäni.