DÉBORA warmejja, Tabor sat qollu patan soldadonakar tantachasirwa uñji. Ukham uñjañajj chuymaparuw purtʼi. Inti jalsunjje ukhajja, uka soldadonakajj kunja jan ajjsartʼirïpjjesa, soldadonak pʼeqtʼir Barac chachas qawqha iyawsäwinisa uka toqetwa lupʼiski. 10.000 soldadonakas utjkchejja, qawqha iyawsäwinïpjjesa, kunjam jan ajjsarirïpjjesa ukaw yantʼat uñjasiñampiskäna. Janiw walja armanakanïpkiti, niyaw jan sinttʼasir mä jachʼa ejercitompi nuwasiñampïsipki, jupanakat sipansa, uñisirinakapajj waljaniwa. Ukhampachasa, janiw ajjsarapkiti, mä jan ajjsartʼir warmirakiw jupanakamp chikäski.

Débora warmir uñjksnas ukham amuytʼañäni, jupajj Tabor sat qollu patankaskiwa, isinakapsa thayaw khursar aksar laphaqeyaski, Barac chachampiw pampanak uñatatasipki. Uka qollojj Esdrelón jan ukajj Jezreel sat pampanakat 400 metronaka altonkiwa, uka patatjja pampanakajj sumaw unjasiraki. Cisón sat jawirasti Carmelo sat qollu thiynamaw Jachʼa Qotar puriraki. Inas uka jawiran umajj jan utjkchïnti, ukampis Sísara chachan ejercitopaw kʼajtas kʼajtas jakʼachasisinki. ¿Kunas kʼajtasinkäna? Ajjsarkay armanakapampi, 900 carronakapampiw kʼajasinkäna. Carronakan llantanakapatjja, hierrot lurat cuchillonakaw chhoqstanïna, ukajj wali ajjsarkañäpachänwa. Sisarajj jankʼakiw israelitanakar chʼojjña alinakar uñtasit jiwarayä sasaw amuypachäna.

Barac chachasa, soldadonakapasa, Deborajj kun lurapjjam sanisa ukwa suyasipkäna. Jupajj uk sum yatïna. Jupatakejj taqe ukanak lurañajj ¿kunjamakïpachänsa? ¿Nayajj kunsa akan luraskta sasint jisktʼaspachäna? Janiwa. Jehová Diosaw jupar guerra qalltayam säna. Ukatjja kunjamas uñisiripajj mä ‘warmin amparaparu katuyasini’ uksa, arsjjarakïnwa (Jueces 4:9). ¿Kunsa Débora warmin iyawsäwipat yateqsna, ukat kunsa uka jan ajjsartʼir soldadonakat yateqaraksna?

Deborajj profetisänwa sasaw Biblian qhanañchi. Ukampis janiw jupa sapak profetisäkänti. * Ukhamarus Deborajj juezjamaw saytʼarakirïna, Israel markan kuna jan walinak askichasa, Jehová Diosajj kuntï siskäna ukanak yatiyasa (Jueces 4:4, 5).

Deborajj Efraín qollu toqenwa jakasïna, ukajj Betel ukat Ramá sat cheqanak taypinkiwa. Mä palmera qoqan thiyapar qontʼasisaw jaqenakar katoqerïna, Jehová Diosan kamachinakaparjam sarnaqapjjañapatakis yanaptʼarakirïnwa. Ukanak lurañajj chʼamäkchïnsa, janiw ukanak jupajj ajjsarkänti. Awisajj jan walinakanwa uñjasipjjäna, ukajj Barac chachampi apsupkäna uka qʼochünwa amuyasi, ukan akham siwa: “Taqenisa yaqha machaq diosanak ajllisipjjäna, kunapachatejj marka punkuna nuwasiñajj utjki ukkhajja” sasa (Jueces 5:8). Israelitanakajj yaqha diosanak thaqasipjjatap laykojja, Jehová Diosajj uñisirinakapat janiw jarkʼaqjjänti. Ukatwa Jabin sat cananeo reyin munañapan apnaqata uñjasipjjäna, uka reyin ajjsarkañ ejercitopsa Sísara chacharakiw pʼeqtʼäna.

 Israelitanakajj Sisaran sutip istʼasajja, wal ajjsarañat khatatipjjäna. Canaán markankirinakan religionapasa, sarnaqäwipas jan walit uñjatänwa. Wawanakarus sacrificiot loqtapjjerïna, jan phenqʼaniw templon wachoq jucha lurapjjäna. Cheqas ukhaman uñjasiñajj kunja chʼamakïkäna. Deboran qʼochuparjamajja, viajiñajj wali chʼamänwa, utanakapas apanukutaw uñjasïna (Jueces 5:6, 7). Jaqenakajj ajjsarañatjja, chʼuminakaru jan ukajj qollunakaruw imantasir sarjjapjjäna. Wawanakap jan aptʼasiñatakisa, warminakapar jan walinakat jarkʼaqañatakisa, janiw yapunaksa yapuchjjapjjänti, ni thaknamsa sarnaqjjapjjänti. *

Israelitanakajj 20 maranakaw tʼaqhesiyata uñjasipjjäna, ukampis arrepentisipjjatapatwa Jehová Diosajj jupanakar yanaptʼäna. Kunjamtï Débora ukat Barac chachan qʼochupan siskejja: ‘Nayaw saytʼta, israelitanakan mä taykapjama’ sasa. Deboran chachapajj Lapidot satänwa, jupajj wawanïnti janicha ukajj janis yatiskchejja, ‘Israel markan taykapjamaw’ saytʼäna. Jehová Diosaw uka markar mä taykjam uñjañapatak ajllïna. Barac juezar Sísara chachampi nuwasiñapatakiw yatiyañaparakïna (Jueces 4:3, 6, 7; 5:7).

Jehová Diosajja, Débora toqew Barac chachar akham säna: ‘Saram Tabor sat qolluru’ sasa. Ukansti 10.000 chachanaka tantachtʼam Israelan pä tribupata. Kunjamsa Sisararusa, ejercitoparusa ukat 900 carronakaparus atipjani, uksa Débora toqew yatiyarakïna. Ukanak yatiñajj Barac chacharojj wal muspharaypachäna, Israel markan janiw ejercitopasa, ni walja armanakapas utjkänti. Ukhampachasa, nuwasiñ janiw ajjsarkänti. Ukampis Deboraw jupanakampi chika Tabor sat qollur makatañapäna (Jueces 4:6-8; 5:6-8).

Yaqhepanakajj Barac chachajj janiw Diosar confiykänti, ukatwa yanap mayïna sasaw sapjje, ukampis ukajj janiw cheqäkiti. Jupajj janiw walja armanak maykänti, jan ukasti jupanakampi chika sarañapatakejj Dios toqet saytʼir mä chʼamañchir mayïna (Hebreos 11:32, 33). Diosatakisti ukajj walikïnwa, ukatwa Deborar khitäna. Ukampis Sisararojj mä warmin amparaparuw katuyä sasaw jupa toqe arsurakïna (Jueces 4:9). Ukhamajj mä warmiw Sisarar jiwayani sasaw Diosajj yatiyäna.

Jichha tiemponakanjja, warminakajj jiskʼachata, tʼaqhesiyataw uñjasipjje. Janiw kunjamtï Diosajj jupanakar uñjapjjañap munki ukham uñjasjjeti. Ukampis Jehová Diosajj chachäpasa, warmïpasa, taqeniruw mä kikpak uñji (Romanos 2:11;  Gálatas 3:28). Deboran sarnaqäwipajja, Jehová Diosajj warminakar askit uñjatapwa yatichistu, ukat aski luräwinaksa jupanakar churarakiwa, ukhamatwa jupanakar confiyatap uñachtʼayi. Ukatwa warminakar jan akapachankir jaqenakjam jiskʼachañasäkiti.

Barac chachajja, 10.000 jan ajjsarir chachanakaruw Sísara chachan wali ajjsarkañ ejercitopampi nuwasiñatak tantachthapïna. Tabor sat qollurojj janiw sapak makatkänti, jan ukasti “Débora sat warmejja jupampi chikarakiw sararakïna” ukaw Barac chacharusa, soldadonakar wal chuymachtʼäna (Jueces 4:10). Deborajj Jehová Diosar munasitap laykuw uk luräna.

Sisarajj uk yatisajja, jankʼakirakiw sarjjarüna. Canaán markankir reyinakas ejercitonakapwa Jabin sat reyir yanaptʼañatak khitapjjäna, jupajj taqe uka reyinaka taypin munañanïnwa. Sisaran soldadonakapasa, 900 carronakapasa wali ojjosaw jutantarakïna, oraqsa khatatiyapjjarakïnwa. Cananeonakan ejercitopajja, jan kunakiw Israelan jan yäqkaña ejercitop tʼunjañäni sasaw amuyapjjäna (Jueces 4:12, 13; 5:19).

Barac chachampi, Deborampejj ¿kamachapjjakinisa? Jupanakatï Tabor qollu patankasipkakinejja, inas cananeonakar atipjapjjchini, carronakapajj janiw qollur makatkaspati. Ukampis Barac chachajj Jehová Diosajj siskani, ukhakiw nuwasini, ukatwa kamsanis Deborajj uk suyaskäna. Horasajj purinjjänwa, Deborasti akham sänwa: “‘¡Sarantam nayraqataru, Diosasti niyawa soldadonakaman nayraqatapa sarantaski!’ sasa. Ukatsti Barac sat chachajja, Tabor sat qollutsti tunka waranqa soldadonakampiw saraqtanipjjäna” (Jueces 4:14). *

Israelan ejercitopajja, tʼijukamaw qollu patat saraqanipjjäna, Sísara chachan ajjsarkañ ejercitopampi nuwasiñataki. ¿Jehová Diosajj yanaptʼpachäniti? Kuntï Deborajj siskäna ukajj ¿phoqaspachäniti? Horasajj purinjjänwa, “oraqes khathatïnwa, alajjpachasti chhijthaptarakïnwa; qenayatsa jallurakiw purintarakïna” sasaw Bibliajj qhanañchi. Jallojj waliw purintäna, uk uñjasajj Sisaran ejercitopajj sustjasïnwa. Sintipuniw jallojj purintjjäna, oraqerus umaw phoqantjjarakïna, carronakapas janiw sartirjamäjjänti, ñeqʼeruw jithintjjarakïna (Jueces 4:14, 15; 5:4).

Barac chacharusa, soldadonakaparusa janiw jallojj ajjsaraykänti. Jupanakajj Jehová Diosaw uk apayanistu sasaw amuyapjjäna. Ukatwa cananeonakan soldadonakapar jankʼaki jiwarayapjjäna. Janipuniw ni mä uñisiripsa jiltʼayapkänti, taqeniruw jiwarayapjjäna. Cisón sat jawirans umajj waliw jiljjattarakïna, jiwatanaksa qʼalwa Jachʼa Qotar apasjjarakïna (Jueces 4:16; 5:21).

Jichha tiemponjja, Jehová Diosajj janiw servirinakaparu guerrar nuwasir khitjjeti. Ukampis iyawsäwis layku ajay toqen nuwasiñaswa muni (Mateo 26:52; 2 Corintios 10:4). Diosar istʼañäni ukhajja, khiti toqetsa saytʼasisktan ukaw amuyasini. Awisajj Diosan uñisirinakapajj wali ajjsarkañäkchisa, janiw ajjsarañasäkiti. Jehová Diosajj pachpakïskiwa, confiyapki ukanakarojj arjjatiwa, kunjamtï Débora, Barac ukat jan ajjsarir israelit soldadonakarus arjjatkäna ukhama.

Wali ajjsarkay uñisiri Sísara chachajj escapawayjjänwa, jupajj Diosan markapar wal tʼaqhesiyäna, ukampis soldadonakap jaytasaw waña oraqer puriñkam jaltawayjjäna. Walja kilometronakwa imantasiñataki tʼijüna, kawkhantï arjjatirinakapajj jakkäna ukar puriñkama. Jan israelitanakampi katjayasiñatakejja, Heber sat quenit chachan utaparuw saräna, jupasti mayni quenitanakat jayaruw sarjjatayna, “Jabin sat reyimpi, Heber sat quenitan familiapampisti sumankapjjänwa” (Jueces 4:11, 17).

 Sisarajj wali qaritaw Heber chachan utapar purïna, jupajj janiw utankkänti, ukampis Jael warmipaw utan katoqäna. Sisarajja, ‘janiw aka warmejj kuns kamachkitaniti’ sasin inas amuychïna, kunatejj chachapampi ukat Jabin sat reyimpejj mä arustʼäwir mantatänwa. Janirakiw chachapjam jan amuyatapsa amuykpachänti. ¡Ukham amuyasajj pantjasiskänwa! Jael warmejja, cananeonakan ñanqha jaqenakäpjjatapsa, kunjamsa jaqenakarus tʼaqhesiyapjje uk sum yatïna. Ukatwa jankʼaki mä amtar puriñapäna: ¿Sísara jaqerojj yanaptʼaniti? Jan ukajj ¿Jehová Dios toqet saytʼasisajj uñisiripar jiwayanicha? Ukampisa, ¿kunjamarak mä warmejj wali chʼamani nuwasiriru jiwayanisti?

Jaelajj jankʼakiw Sisarar utapar irpantäna. Ukat Sisarajj ‘janiw khitirus akar imantasitajat yatiyätati’ sasaw sarakïna. Ukatjja Sisarajj samartʼaskänwa, Jael warmejj mä mantampiw janjjatarakïna. Uma mayïna ukhajja, Jaelajj leche churäna. Sisarajj jankʼakiw ikjawayjjäna jan sartkiri. Ukham uñjasinsti Jael warmejj mä martillo, mä chʼakuru aptasinjja, Sisarajj kawkhantï ikki ukharuw kʼachat jakʼachasïna, ukhamat Jehová Diosan uñisiripar jiwayañataki. Cheqas uk lurañajj jupatak wali chʼamäpachänwa. Ukampis pächasispäna ukhajja, janiw jiwaykasapänti. ¿Diosan markapar tʼaqhesiyatapatti jiwaypachäna? ¿Jan ukajj Jehová Dios toqet saytʼasitapatcha luräna? Cheqas Bibliajj janiw uka toqet kamskisa, jan ukasti Sísara chacharojj jankʼakiw jiwayäna ukak qhanañchi (Jueces 4:18-21; 5:24-27).

Qhepatsti Barac chachaw uñisiripar thaqas purirakïna. Jael warmejj Sisaran jiwat cuerpop uñachtʼaykäna ukhajja, kuntï Débora warmejj arskäna uk phoqasitap amuyäna. ¡Mä warmiw wali chʼamani Sísara chachar jiwayäna! Jichha tiempon waljaniw kuntï Jaelajj lurkäna ukajj janis walïkaspa ukham sapjje, ukampis Barac chachatakisa, Débora warmitakisa Jaelan ukham luratapajj wali askïnwa. Qʼochunaka Diosan yanapapampi apsupkäna ukan Jael warmit akham sasaw sapjje: “Bendecitapän taqe warminak taypinjja” sasa (Jueces 4:22; 5:24). Débora warmejja, Jael warmir wali askit uñjasitapat janiw envidiaskänti, Débora warmitakejj Jehová Diosan arsutanakap phoqasitapaw taqe kunat sipansa, wali askïna.

Ejercitop pʼeqtʼiri Sisaran jiwatapatjja, Jabin sat reyejj janiw nayrjam wali munañanëjjänti. ¡Cananeonakajj janiw jaqenakar tʼaqhesiyjjänti! Israel markajj 40 maranakaw suman jakasjjäna (Jueces 4:24; 5:31). Ukhamasti Débora warmina, Barac chachana ukat Jael warmin Diosar iyawsapjjatapajj janiw inamayäkänti. Débora warmjam jan ajjsarasa Dios toqet saytʼasipjjañäni, yaqhanakarus ukham lurañatak yanaptʼarakiñäni. Ukhamtï lurañänejja, Jehová Diosajj jan walinakar saykatañatakejj yanaptʼapunistaniwa, ukat wiñayaw sumankañan jakasirakiñäni.