Bibliajja, oraqpachan taqe libronakat sipansa jukʼamp uñtʼatawa. Cheqas jiwasatakjam lurtʼatawa, kunattejj jaqenakan cheqpach sarnaqäwipata ukat kunjamsa jupanak purajj apasipjjäna ukat kunjamsa Diosampis apasipjjarakïna ukanakatwa parli. Uka sarnaqäwinakajja, sum jakasiñasatakiw yatichistu. Ukat amuykaya qhana arunakamp qellqatawa, ukhamatwa walja arunakar jaqokipasispa ukat taqe jaqenakas amuytʼapjjarakispa. Ukhamarusa yatichäwinakapajj wiñayatakiw yanaptʼistu.

Ukat sipansa Bibliajj Diosat parlir mä librökchisa, Diosan libropawa sasaw pachpa Bibliajj qhanañchi, ukaw jukʼamp wakiskirejja. Diosan sutipatwa qhanañchistu ukat kunjam Diosasa, kuna amtampisa Oraqsa ukat jaqenaksa lurawayi uksa qhanañcharakiwa. Ukat kunanaksa jan walinak chhaqtayañatak lurawayi ukanakatsa parlarakiwa. Biblia suma amuyumpi liytʼañajja, iyawsäwinïñasataki ukat suma suytʼäwinïñasatakiw yanaptʼistu.

Kunanaktï Bibliajj yatichki ukjja, janipuniw kawkins jikjjatksnati. Amuytʼañataki, aka toqenakat kunatï cheqäki ukwa qhanañchistu:

• Kawkitsa juttanjja ukat kunatsa tʼaqhestanjja

• Kunsa Diosajj jaqenakar qhespiyañatak lurawayi

• Kunsa Jesusajj jiwasanak layku lurawayi

• Kuna suytʼäwis jaqetakisa ukat Oraqetakis utji

¿Kuna toqenakatsa Bibliajj parli uk yatjjatañatakejj janit akjjar jutki uka yatichäwinak liytʼkasma?