Armagedón chʼajjwäwejj ¿kunapachas purinini?

“Uñjaraktwa walja jaqenaka taqe markanakata, kunayman janchini, ukhamarak taqe casta parlani, [...] akanakajj wali jachʼa llakinakwa pasanipjje.” (APOCALIPSIS 7:9, 14)

KAWKHANTÏ Armagedón jachʼa chʼajjwäwejj apaskani ukhajja, wakichatäjjewa.

¿Kunjamsa? Jichhürunakanjja millón millón jaqenakaw Jehová Diosar yupaychapjje ukat Biblian ewjjanakaparjamaw jakapjjaraki. Jupanakajja kunayman markata, kunayman janchini, ukat taqe kasta parlanïpjjarakiwa. Jupanakajj Diosan yanaptʼataw mayachtʼat jakapjje ukat munasiñarakiw jupanakarojj mayachthapi. Ukanakasti Jehová Diosan Qhanachirinakapanwa qhan uñjasi (Juan 13:35).

Mä jukʼa tiempotjja Supayajj Diosan markapar tukjañatakejj ejercitoparuw tantachthapini uka markajj mä rat tukjañjamäkaspas ukhamaw Supayatakejja (Ezequiel 38:8-12; Apocalipsis 16:13, 14, 16). ¿Kunats ukham sistanjja? Bibliaw kunjamanisa, kunapachas Armagedón chʼajjwäwejj apasini uk sum qhanañchi. Uka toqet walja profecianakaw phoqhasiski.

Kuna profecianakas phoqhasiski

‘Akapach tukusiñapajj’ kunapachäs qalltasini ukjja, ¿kunjamatsa jaqenakajj yatispa? sasaw discipulonakapajj Jesusar jisktʼapjjäna (Mateo 24:3). Jutïrpachat qhanañchkasajj akham sasaw Jesusajj säna: “Mä jachʼa markajj yaqha jachʼa marka contraw nuwasini, mä markasti yaqha marka contrarakiw sartani, ukapachaw manqʼat pistʼañajj utjani, usuñanakasa, oraq khatatinakas walja cheqanakana” sasa. Ukjjarusti akham sakakïnwa: “Taqe akanakasti jachʼa tʼaqhesiñan qalltapakïskiwa” sasa (Mateo 24:7, 8). Apóstol Pablojj uka toqet akham sarakïnwa: ‘Qhepa urunaka’ sasa. Ukat “jan wali tiemponakaw jutani” sasaw sarakïna (2 Timoteo 3:1). ¿Uka profecianakajj jichha tiempon phoqhasiski sasmati?

¿Qhepa urunakanjj kunats wali chʼamäspa? ‘Mä jukʼa tiempokiw’ Supayas ukat  sajjranakapas aka Oraqen apnaqjjapjjani sasaw apóstol Juanajj uka toqet arsuwayatayna. Ukat Supayasti ‘wal colerataniwa’ sasaw sarakïna (Apocalipsis 12:7-12). Jaqenakajja wali colerata ukat khitimps nuwasiñ munasipkakispas ukham sarnaqapjje, ukajj oraqpachan qhan uñjasi.

Aka qhepa urunakanjja aski luräwinakaw utjani sasaw Jesusajj sarakïna: “Diosan reinopat aka suma yatiyäwisti aka oraqpachanwa yatiyatäni, ukhamat taqe markanakan yatipjjañapataki, ukatsti akapachan tukusiñapaw jutani” sasa (Mateo 24:14). Jehová Diosan Qhanañchirinakapajja 235 jila markanakan ukat 500 arunakatwa Diosan arunakap yatiyasipki. Yatiyañataki ukat ¡Despertad! sat ­Bibliat apstʼat qellqatanakwa apsupjjaraki, uka revistanakaw yaqha qellqatanakat sipansa oraqpachan jukʼamp lakirasi. Ukat Bibljja niya 100 arunakaruw jaqokipapjjaraki. Taqe ukanak lurasiñapatakejj jupanakpachapaw irnaqapjje ukat chuymapat qhawqhay qollq churañ munapjjchi ukampiw yanaptʼapjje. Jichha tiempon Diosan arunakapat yatiyasiski ukajja Jesusan mä profeciapaw phoqasiski.

Armagedón chʼajjwäwejj janïr purinkani ukhajja, kunanakas pasani ukwa Bibliajj qhanañcharaki. Uka toqet kuna profecianakas phoqhasini uk jichhajj uñjañäni.

Aka profecianakaw niy phoqhasiñampïski

Nayrïr profecía. Bibliajj akham siwa: “Taqe kunas sumakïskiwa, janiw kunas paskaniti” sasaw oraqpachan marka pʼeqtʼirinakajj sapjjani sasa. Ukat jan waltʼäwinakjja niyaw askichjjañäni sasay inas amuyapjjchini. Ukampis uka arsut qhepharojj janiw kuna sumankañas utjkaniti (1 Tesalonicenses 5:1-3).

Payïr profecía. Ukjjarusti walja gobiernonakaw oraqpachankir kʼari religionanakar tukjañ amtapjjani. Biblianjja uka gobiernonakarojj mä jachʼa ajjsarkañ animalakaspas ukhamwa uñtayi. Ukat oraqpachankir kʼari religionanakarojja mä warmejj jachʼa ajjsarkañ animalar latʼjjatatäkaspas ukhamwa uñtayaraki (Apocalipsis 17:3, 15-18). Ukat kunapachatï uka jachʼa ajjsarkañ animalajj Diosaruw sirvipta sasin sapki uka kʼari religionanakar tukjani ukhajja, jan amuyasisaw Diosan munañap phoqhasipkani.

Apóstol Juanajj uka toqetjja, mä uñtasiwimpiw akham qhanañchi: “Uka tunka wajjranaka uñjktas ukanakasti uka qʼañu warmirojj uñisipjjaniwa, qʼalalpacharaki irpanukupjjani, janchipsti manqʼapjjarakiniwa, ninampirakiw nakhantayapjjani. Diosarakiw jupanakan chuymaparojj usku mayakïpjjañapataki” sasa (Apocalipsis 17:16, 17).

Kimsïr profecía. Ukat kʼari religionanakar tʼunjasinsti, Supayajj akapach gobiernonakampiw Jehová Diosan markapar tukjañ munani. Ukhamat armagedón chʼajjwäwejj qalltani (Apocalipsis 7:14; Mateo 24:21).

¿Uk yatiñajj kunjamakis jumatakejja?

Jumatï Bibliat jan sum yatjjatksta ukhajja, Armagedón chʼajjwäwit parlki ukanak creyeñajj inas chʼamakïchi. Ukampis Armagedón chʼajjwäwejj cheqapuniw utjani. Jichhakamajj walja profecianakaw phoqhasiwayjje, ukatwa armagedónajj utjapuniniw sasajj sissna. *

¿Kunatsa Jehová Diosan qhanañchirinakapajj ‘taqe chʼaman Diosan jachʼa urupajj’ jakʼankjjewa sasajj sapjje, ukat kunats jan ajjsarapki? Uka toqet jukʼamp yatjjatañatakejj ¿janit tiemp apstʼaskasma? Jehová Diosamp jarkʼaqatañatakejj kun lurañas wakisi uk Bibliamp qhanañchtʼayasiñatakiw jupanakar mayisma (Apocalipsis 16:14). Kuntï yateqkäta ukajj jutïrin kunas pasani uk sum amuytʼañatakiw yanaptʼätam.

[Qhanañchäwi]

[8 janan qhanañchäwipa]

Jichha tiempon Diosan arunakapat yatiyasiski ukajja, Jesusan mä profeciapaw phoqasiski.