Jesucristo yatichäwipax uraqpachan wali uñtʼatawa

“Capernaum * markankir wali yatiñani jaqin yatichäwinakapax millón millón jaqinakan chuymanakapans amuyunakapans janiw armatäkiti, ukatwa taqit sipans wali uñtʼataxa.” (GREGG EASTERBROOK, QILLQIRI)

CHIQPACHANSA arunakax wali chʼamaniwa. Suma amuytʼat arunakax chʼamañchtʼistaspa, chuymachtʼistaspa ukat jakäwisans yanaptʼarakistaspawa. Ukampis janiw khitis Jesucristjam sum parlir jaqix utjawaykiti. Jesusan Wali Uñtʼat Arstʼäwipa mä istʼirix akham sasaw uka qhipat qillqtʼäna: “Kunapachatix Jesusax parlañ tukuyxän ukhaxa, taqi jaqinakaw uka suma yatichäwinak istasax muspharapxäna” sasa (Mateo 7:28).

Jichhürunakanxa, aka Uraqpachankir jaqinakawa Jesucriston chuymar purtʼkiri yaqhip suma yatichäwinakapxa uñtʼapxi. Amuytʼañataki:

“Diosampiru qullqimpirux janiw khitis sirvkaspati.” (Mateo 6:24)

“Kunjämtï jumanakax jaqinakampi uñjatäñ munapktas ukhamarak jumanakax jupanakar uñjapxam.” (Mateo 7:12)

“Cesarankkis ukxa Cesarar churapxam, Diosankkis uksti Diosarurak churapxam.” (Mateo 22:21)

“Katuqirit sipansa jukʼamp kusisiñaniw khititï churki ukaxa.” (Hechos 20:35)

Jesusax janiw ukham yatiñan arunakak arskänti. Yatichäwipax chuymar purtʼkirïnwa, kunatï chiqäki ukwa Diosxat qhanstayäna, jakäwitakis mä suytʼäwi churäna ukat Diosan Apnaqäwipaw jaqinakarux tʼaqhisiñanakat qhispiyani sasaw qhanañcharakïna. Jutïr yatichäwinakanwa yatichäwinakapat jukʼamp yatxatañäni. Ukhamatwa kunatsa yatichäwinakapax “millón millón jaqinakan chuymanakapans amuyunakapans” jan armatäki uks sum amuytʼarakiñäni.

[Qhanañchäwinaka]