Josué 6:10-15, 20 qellqatarjamajja, israelitanakajj Jericó mark urun mä kutiw muytapjjäna, sojjta uruw ukham lurapjjäna. Paqallqöri urusti paqallq kutiw muytapjjäna. Ukhaw Jehová Diosajj perqanakap qʼal tinkuyäna. Ukhamatwa israelitanakajj uka markar mantasin katuntapjjäna. ¿Jukʼa tiemponakwa israelitanakajj Jericó mark katuntapjjäna sasin Bibliajj siski ukajj cheqäpachati? ¿Kunjamatsa yatsna?

Nayra tiemponakanjja, mä markatï yaqha markar katuntañ munchïna ukhajja, uka markarojj muyuntapjjerïnwa. Jaya tiemposa, jukʼa tiempos muyuntapjjerïchïnjja, atipiriw jila alan cosasanaksa manqʼanaksa katuntat markat apsupjjerïna. Ukampis allthapit Jericó markanjja, arqueologonakajj walja manqʼanakwa jikjjatawayapjje. Mä revistajj siwa: “Allthapit Jericó markanjja, ñeqʼet lurat cosasanakaw jikjjatasiwayi, ukampis ukat sipansa jukʼampejj grano achuw jikjjatasiwayi. [...] Palestina markanjja, arqueologonakajj janipuniw kunapachas ukham jikjjatawayapkiti. Inas maya jan ukajj pä vasija (yuru) grano achu jikjjataschispa, ukampis ukham walja jikjjatañajj wali muspharkañapuniwa” sasa (Biblical Archaeology Review).

Bibliarjamajja, israelitanakajj janiw Jericó markat kunsa apsupkänti, janiw “kunsa aptasipjjätati” sasin Jehová Diosaw satayna (Jos. 6:17, 18). Jallu pacha tiemponwa israelitanakajj uka marka katuntapjjäna, ukhatakejj mä qawqha tiempokiw yapu apthapiñ tiempot pasaskäna. Ukhamajj walja grano apthapitaw utjpachäna (Jos. 3:15-17; 5:10). Jericó markan walja grano jikjjatasitapajja, israelitanakan mä jukʼa tiemponak katuntapjjatapwa uñachtʼayi. Ukhamasti kunatï Biblian qellqatäki ukajj cheqapunïskiwa.