PAQALLQ tunka jila marani Ernesto * jilatajj akham siwa: “Cuerpojajj walpun usutu” sasa. ¿Ukhamarakit jumajj uñjasta? Eclesiastés 12 qellqatan jikjjataski uka arunakjja, chuymani jilat kullakanakajj sumwa amuyapjje. Marat maratjamaw usuntañajj utj-jje, chʼamas janirakiw utjasjjeti. Eclesiastés 12:1 qellqatarjamajja, chuymanëjjasin ‘chʼama tukuña urunakaw’ purini. Ukampis jan kun lurirjamäjjasajj janiw sinti llakisiñamäkiti. Walja maranëjjsta ukasa, kusisitaw Diosar servisma.

Chuymani jilat kullakanaka, jumanakajj janiw jaytanukutäpktati. Nayra tiemponjja, jumanakjamarakiw waljanejj chuymanëjjasin kunaymana jan walinakan uñjasipjjäna. Sañäni: Isaac, Jacob, Ahías (Ahíya) chachanakajja, chuymanëjjasin juykhuptapjjänwa (Gén. 27:1; 48:10; 1 Rey. 14:4). Sara warmisti chuymanëjjasin qaritaw jikjjatasïna (Gén. 18:11, 12). Davitajj janjjatatas janipuniw juntʼuptirïkänti (1 Rey. 1:1). Barzilai chachasti umajj jayukʼarati, chʼaphaqacha ukjja janiw yatjjänti, ni qʼochurinakan qʼochutanakapsa sum istʼjjänti (2 Sam. 19:32-35). Abraham chachanjja, warmipaw jiwjjäna, Noemí warminsti chachaparakiw jiwjjäna (Gén. 23:1, 2; Rut 1:3, 12).

¿Kunas jupanakarojj Diosar jukʼamp confiyañatakisa, kusisita serviskakiñatakis yanappachäna? Abrahamajja, Diosan arsutapat janiw pächaskänti, Diosarojj jukʼampiw confiyäna (Rom. 4:19, 20). Chuymani jilat kullakanaka, jumanakajj qawqha maranïpjjstasa, jan ukajj kunjamsay jakasipjjstajja, Diosarojj confiyapjjañamarakiwa. Amuytʼañataki, Jacob chachajj usuta, juykhu ukhamas ikiñankkchïnjja, Diosajj arsutap phoqaniwa sasin confiyaskakïnwa (Gén. 48:1-4, 10; Heb. 11:21). Jichhürunakanjja chuymani jilat kullakanakajj ukhamarakiw Diosar confiyapjje. 93 marani Inés kullakajja, wali aynachtʼayir mä usuniwa. Jupasti siwa: “Sapürupuniw paraisot lupʼta, ukaw Diosar jukʼamp confiyañatak yanaptʼitu. Sapüru jakäwejja Jehová Diosan mä suma regalopawa” sasa. ¡Uka kullakajj wali yateqaskayawa!

Diosar jukʼampi confiyañatakejja, oración luraña, Bibliat yatjjataña, tantachäwinakar sarañaw yanaptʼapjjätam. Daniel profetajj urun kimsa kutiw Diosar mayisirïna, Arupatsa yatjjatapunirïnwa (Dan. 6:10; 9:2). Ana warmejj viudäkchïna ukasa, templonkapunirïnwa (Luc. 2:36, 37). Tantachäwinakar sarañasa, ukan arstʼañasa, jukʼampiw chʼamañchtʼapjjätam, ukatsti arstʼäwinakamajj mayninakaruw chʼamañchtʼarakini. Jehová Diosatakejj janis nayrjam lurjjapstajja, mayisitanakam wali askitwa Jupajj uñji, uk janipun armasipjjamti (Pro. 15:8).

Tantachäwinakar jan sarirjamäjjsta, janirak liytʼirjamäjjsta ukhajja, janiw aynachtʼañamäkiti, jan ukasti kuntï lurirjamäkta uka toqetwa lupʼiñama. Amuytʼañataki, janitï tantachäwinakar sarirjamäjjsta ukhajja, telefonotwa istʼasma. 79 maran Isabel kullakat parltʼañäni, jupajj janiw sum uñj-jjeti. Ukampis mä jilataw wali jachʼa letranakani revista imprimiraqe, ukhamatwa tantachäwitak wakichtʼasi.

Akapachanjja, taqeniw jan tiemponi sarnaqapjje, ukampis chuymani jilat kullakanaka ¿tiemponïpjjtati? ¿Janit Biblsa, qellqatanaksa, audiodramanaksa, discursonaksa grabacionan istʼapkasma? Ukatjja, jilat kullakanakaruw Biblia toqet parltʼasiñataki telefonot jawsapjjarakisma. Ukhamatwa ‘maynit maynikam yanaptʼasipjjasma’ (Rom. 1:11, 12).

Cristinajj 80 jila maraniwa, jupasti siwa: “Janiw nayrjam yatiyjjti” sasa. ¿Kunas llakimpi jan aynachtʼañatakejj yanaptʼapjjeristam? 75 marani Pedro jilatajj akham siwa: “Jan lurirjamäkta ukanakat  janiw añcha lupʼiñamäkiti, antisas lurirjamäkta uka toqetwa lupʼiñama” sasa.

¿Kunas yatiyaskakiñatakejj yanaptʼapjjeristam? 90 marani Heidi kullakajj janiw nayrjam utat uta yatiyir sarirjamäjjeti, ukampis computadora apnaqañ yateqawayi, ukhamat cartanak qellqasin yatiyañataki. Chuymani yaqhep jilat kullakanakajja, parquenakana, auto sayañ cheqanakanwa yatiyapjjaraki. Chuymankipstatanakar uñjaski uka utanakankapki uka chuymani jilat kullakanakajja, ukan trabajirinakaru ukankir mayni chuymani jaqenakaruw yatiyapjjaraki.

Davitajj wali chuymanëjjchïnsa, Jehová Diosatak irnaqaskakïnwa. Templo lurasiñapatakiw qollqe churäna, kunanakampis templojj lurasini ukanaksa wakicharakïnwa (1 Cró. 28:11–29:5). Chuymani jilat kullaka, jumajj ukhamarakiw Diosan arunakap yatiyasiñapatak yanaptʼasma. ¿Kunjamsa? Tamamankir precursoranakarusa mayni jilat kullakanakarusa jukʼamp yatiyapjjañapatakiw chʼamañchtʼasma. Inas kunsa regaltʼarakchisma, kun manqtʼasiñatakis invittʼarakchisma, jan ukajj arunakamampis chʼamañchtʼarakchisma. Ukatjja wayn tawaqonakatakisa, familianakatakisa, Diosatak sapüru irnaqtʼirinakatakisa, usutanakatakisa, Diosan markapan wal irnaqtʼapki ukanakatakisa, Diosatwa mayirakisma.

Chuymani jilat kullakanaka, jumanakajj Jehová Diosatak wali valoranïpjjtawa, kuntï Jupatak lurapkta ukas ukhamarakiwa. Janiw Jupajj janis valoranïpkasma ukham uñjapktamti (Sal. 71:9). Jehová Diosajj wal munasiptamjja. Paraisonkjjañäni ukhajja, walja maranakaw jakasjjañäni. Ukatsti kʼumara, chʼamaniw Jehová Diosar wiñayataki serviñäni.