RUSIA markanjja, Jehová Diosan Testigonakapajj wali kusisitaw 1991 maran jikjjatasipjjäna. Uka maranjja gobiernow mä religionarjam uñtʼjjäna. Walja maranakaw arknaqata jarkʼata uñjasipjjatayna. 1991 maranjja 16.000 Testigonakakiw utjäna, ukampis jichhajj 170.000 ukhanëjjapjjewa. Janipuniw khitis ukham jiljjattañap amuykänti. Jupanakat yaqhepajja, yaqha markanakatäpjjewa (Mat. 9:37, 38). Jupanakat mä qawqhanir uñtʼapjjañäni.

Rusia markan Testigonakajj religionjam uñtʼatäjjapjjäna ukhajja, Gran Bretaña markan jakasir Matthew jilatajj 28 maranïnwa. Uka maranjja jupajj mä jachʼa tantachäwiruw saräna, ukanjja akham sasaw mä arstʼäwin qhanañchasïna: “Europat Inti jalsu toqenkir tamanakan walja yanaptʼaw munasi. San Petersburgo markan utjki uka tamanjja, jilat kullakanakajj walja patak jaqenakaruw Bibliat yatichapjje, ukampis irpir chuymanin mä yanapiripakiw uka taman utji” sasa. Uka arunakjja Matthew jilatajj janipuniw armkänti, ukatwa Jehová Diosar akham mayisïna: “Jehová Dios, Rusia markaruw sarañ muntjja” sasa. Mä jukʼa qollqe tanttʼasisina, walja cosasanakap aljasinsa, Rusia markaruw 1992 maran sarjjäna. ¿Kunjamakis uka markar purisajj jikjjatasïna?

Matthew jilatajj akham siwa: “Rusia markan parlapki uka aru yateqañajj wali chʼamänwa. Uka aru jan parlañ puedesajj janiw Bibliat yatichirjamäkayätti” sasa. Ukatjja, mä uta jikjjatañas jupatakejj wali chʼamarakïnwa. Jilatasti siwa: “Mä utat yaqha utaru sarjjañatakejja mä uru nayrakiw awisapjjerïtu. Walja kutiw ukhaman jikjjatasirïta” sasa. Ukhamanakansa uñjasiwaykchejja, jichhajj akham siwa: “Rusia markar saratajatjja janipuniw kunatsa amtaskti” sasa. ¿Kunatsa ukham sispacha? Jilatajj siwa: “Ukanjja Jehová Diosar jukʼamp confiyañwa yateqawaytjja, Jupajj walja kutiw yanaptʼawayitu” sasa. Tiempompejja, Matthew jilatajj irpir chuymanëjjänwa ukat precursor especialjamaw irnaqjjarakïna, jichhajja San Petersburgo jakʼan utjki uka Betel Utanwa irnaqaski.

Japón markankir Hiroo jilatajja, 1999 maranwa 25 maranïskäna ukhajj Escuela de Entrenamiento  Ministerial satäkis ukar saräna. Escuelanjja mä yatichiripaw yaqha markar sarañapatak chʼamañchtʼäna. Rusia markan yatiyirinaka faltatap yatisinjja, uka markan parlapki uka aru yateqañwa amtäna, ukatjja Rusia markaruw sojjta phajjsitak saräna. Jilatajj siwa: “Niyakejjaw juyphi pachan uka markan wali thayächejja, noviembre phajjsiw sarta. Ukhamat thayan walikïristti janicha uk yatiñataki” sasa. Juyphi pacha tukuyjjepansti, Japón markaruw kuttʼanjjäna, ukanjja qollqe imasiñatakejj jukʼakwa gastäna. Qhepatjja, Rusia markaruw ukankañatak sarjjäna.

Hiroo jilatajj 12 maraw Rusia markankjje, ukanjja walja tamanakanwa yanaptʼawayi. Yaqhep tamanakanjja patakat jila yatiyirinakaw utjirïna, ukanjja jupakiw irpir chuymanjam irnaqtʼirïna. Mä tamanjja sapa semanaw Yatiyañataki Tantachäwin walja arstʼäwinak arstʼirïna, ukhamarak Diosan Arunakap Yatiyañatak Escuela, Yatiyañataki revistat yatjjatañataki tantachäwi sarayirïna. Ukatjja, Estudio de Libro de Congregación sat tantachäwsa semanan phesqa gruponakwa sarayäna. Ukatsti jilat kullakanakarus sapa kutiw chʼamañchtʼañatak visittʼirïna. Jilatajj siwa: “Jilat kullakanakar Diosamp sum apasipjjañapatak yanaptʼasajj wal kusisiyäta” sasa. Yanaptʼa munaski uka cheqanakan serviñajj ¿kunjamsa Hiroo jilatarojj yanaptʼawayi? Jupajj siwa: “Rusia markaru janïr sarkasajja, irpir chuymanjama ukhamarak precursorjamaw irnaqtʼjjayäta. Ukampis Rusia markankjjasinjja, Jehová Diosampejj jukʼamp sumaw apastjja. Jupar taqe chuyma confiyañwa yateqawaytjja” sasa. Hiroo jilatajja, Svetlana kullakampiw 2005 maran casarasjjäna, jichhajja precursorjamaw panpachani servisipki.

Matthew jilatajj 34 maraniwa, Michael jilatasti 28 maraniraki, jupanakajj Canadá markankir jila sullkäpjjewa. Rusia markar sarapjjäna ukhajja, walpun muspharapjjäna. ¿Kunatsa? Uka markanjja walja jaqenakaw tantachäwinakar sarapjjäna, ukampis jilat kullakanakajj jukʼanikïpjjänwa. Matthew jilatajj siwa: “Sarkayäta uka tamanjja, pä patakaniw tantachasipjjäna, ukampis taqpach tanchäwinakjja, chuymankipstat mä irpir chuymanimpi irpir chuymaninakan yanapiripat mä wayna jilatampikiw sarayapjjäna” sasa. Uk uñjasajja, Matthew jilatajj walpun jilat kullakanakar yanaptʼañ munäna, ukatwa 2002 maranjj Rusia markar sarjjäna.

Pusi maranak qhepatsti, Michael jilatajj Rusia markan yanaptʼa munasiskakitap yatisajj jilapjamarakiw yanaptʼir saräna. Niyakejjay jupajj irpir chuymaninakan yanapiripächïnjja, taman qollqe toqet uñjirjama, Bibliat apstʼat qellqatanaka ukhamarak territorionak uñjañapatakiw uttʼayapjjäna. Ukatjja, discursonak arstʼasa, secretariot taman irnaqtʼasa, jachʼa tantachäwinak waktʼayasaw yanaptʼäna, Tantachasiñ Utanak lurasiñapatakis yanaptʼarakïnwa. Jichhajja, Michael jilatajj irpir chuymanjamaw jan tiemponi irnaqtʼaski. Jupasti siwa: “Jilat kullakanakar yanaptʼañajj wali kusiskañapuniwa. Ukham yaqha lurañajj janipuniw utjkaspati” sasa.

Matthew jilatajj Marina kullakampiw casarasjjäna, Michael jilatasti Olga kullakampiraki. Jupanakajja yaqha jilat kullakanakjamaw tamanakar yanaptʼasipki.

Ucrania markan jakasir Tatyana kullakat parltʼañäni, jupajj 1994 maranjja 16 maranikïskänwa. Uka maranjja República Checa, Polonia, Eslovaquia markanakatwa sojjta precursor especialanakajj tamapar puripjjäna. Tatyanajj jupanakat akham siwa: “Wali munasiri irnaqtʼiri ukhamäpjjänwa, taqeniw jupanakar jakʼachasirïna, Bibliatsa wal yatipjjarakïna” sasa. Jehová Diosajj chʼamachasitanakapar bendecitap uñjasajja, Tatyanajj jupanakjamäñwa munarakïna.

Tatyanajj colegion vacacionankkasaw yaqha jilat kullakanakampejj Ucrania ukat Bielorrusia markanakat  jaya cheqanakar saräna. Ukanjja janiw Diosan arunakapat yatiyaskänti. Yaqha cheqanakar sarañajj walpun gustäna, ukatwa Rusia markar sarañ amtäna. Uka markanjja, qalltan yaqha markat jutiri kullakampiw mä jukʼa tiempo jakasïna. Uka kullakampïsajj uka markan qheparañatakiw trabaj thaqhäna. Ukatsti 2000 maranwa Rusia markar sarjjäna. ¿Uka markar sarañajj jupatak chʼamakïnti?

Kullakajj siwa: “Walja cuartonakani uta alquiler pagañatakejj janiw qollqejj utjkitänti, ukatwa mä jiskʼa utak alquilasiyäta. Jaqen utapan jakañajj chʼamakïnwa. Awisajj markajaruw kuttʼañ munjjayäta, ukampis Jehová Diosaw qheparañatak sapa kuti yanaptʼawayitu” sasa. Jichhajj Tatyanajja Rusia markanwa misionerjam serviski. Jupajj saskakiwa: “Akankasinjja, walja experiencianakwa jikjjatawayta, amigonakas utjarakituwa. Jupanakaw Diosar jukʼamp confiyañatak yanaptʼawayapjjetu” sasa.

Jichhajj Japonan jakasir 50 marani Masako kullakat parltʼañäni. Jupajj misionerjamaw serviñ munäna, ukampis usutätap laykojj janiw uka amtapajj phoqasirjamäkänti. Usupat mä jukʼa walirtjjäna ukhajja, Rusia markaruw Bibliat yatiyir saräna. Ukanjja, uta jikjjatañasa, trabajonïñasa chʼamakïnwa, ukampis yanaptʼasiñatakejj japonés arwa yatichäna, qʼomachiritsa trabajirakïnwa. ¿Kunas uka markan qheparañatakejj yanaptʼpachäna?

Masako kullakajj 14 maranakaw Rusia markan jakasjje. Taqe chuymaw jupajj akham si: “Jan walinakansay uñjasiwaystjja, yatiyir saratajat wali kusisitaw jikjjatasta. Yatiyirinakajj munaski ukan yanaptʼañajj wali kusiskañawa. Akanjja, manqʼañsa, issa, utsa, yaqha ukhamanaksa Diosaw churawayitu. Ukanak uñjasajj janiw cheqaw sañjamäkiti” sasa. Kullakajj janiw Rusia markanak yanaptʼawaykiti, Kirguistán markansa yatiyarakïnwa, ukatjja inglés, china, uigur aru parlir jiskʼa gruponakansa yanaptʼawayarakiwa. Jichhajja, San Petersburgo markanwa precursorjam serviski.

Qollqe toqet jan walin uñjasisaw walja familianakajj yaqha markanakar sarjjapjje. Ukampis yaqhep familianakajj Diosar serviñ laykuw sarapjje, kunjamtï  Abraham chachampi Sara warmipampejj lurapkäna ukhama (Gén. 12:1-9). Ucrania markan jakasiri Mikhail jilatampi Inga esposapampejj ukhamwa lurapjjäna. Jupanakajj 2003 maranwa Rusia markar sarapjjäna. Ukanjja Bibliat yatjjatañ munirinakaruw jikjjatapjjäna.

Mikhail jilatajj siwa: “Mä kutejja, Diosan arunakapat jan yatiyaskäna uka cheqaruw sarapjjta. Ukanjja, mä chuyman chachaw akham jisktʼapjjetäna: ‘¿Diosat parlirïpjjtati?’ sasa. ‘Jïsa’ sapjjta ukhajja, jupajj sapjjetänwa: ‘Mä urojj jutapjjapuniniw sasaw sayäta. Jesusan profecianakapajj phoqasiñapapuniwa’ sasa. Ukatjja, Mateo 24:14 qellqatwa aytäna. Ukatsti, bautista religionar sariri tunka warminakaruw jikjjatapjjayäta, jupanakajj cheqa yatichäwinak wal yatiñ munapjjäna. Vivir para siempre sat libros jupanakan utjataynawa, ukampiw sapa semana tukuyajj Bibliat yatjjatapjjerïtayna. Jisktʼanakaparojj walja horanakaw qhanañchapjjayäta, Diosarus qʼochupjjarakiyäta, ukatsti arumarojj manqʼasipjjarakiyätwa. Janipuniw uk armaskäti” sasa. Rusia markar sarasajja, Mikhail jilatampi Inga esposapampejj Jehová Diosar jukʼampiw jakʼachasiwayapjje, jaqenakarus jukʼampiw munasipjjaraki. Ukaw kusisitäñatakejj jupanakar yanaptʼawayi. Jichhajja Mikhail jilatajj tamanak tumptʼirjamaw esposapamp servisipki.

Ucrania markankir Yury jilatampit Oksana esposapampit parltʼarakiñäni. Jupanakajja Aleksey wawapampiw 2007 maran Rusia markankir sucursalar sarapjjäna, jichhajja uka wawapajj 13 maranëjjewa. Ukanjj uka markankir mapap uñjjattʼasajja, walja cheqanakan Bibliat jan yatiyasitapwa amuyapjjäna. Oksana kullakajj siwa: “Mapa uñjasajja, walja yatiyirinak munasitapwa amuyapjjayäta. Ukaw Rusia markar sarañatak yanaptʼawayapjjetu” sasa. Yury jilatajj sarakiwa: “‘¿Puede usted servir en el extranjero?’ siski uka yatichäwi ukhamarak yaqha ukham yatichäwinak liytʼañaw yanaptʼawayapjjarakitu. * Qhepatsti, sucursalajj sapkitäna uka cheqaruw sarapjjayäta, ukanwa trabajsa utsa thaqapjjayäta” sasa. Jupanakajj 2008 maranwa Rusia markar sarjjapjjäna.

Qalltanjja trabajo jikjjatañajj jupanakatak chʼamakïnwa. Ukatjja, walja kutirakiw mä utat yaqha utar jakiri mistupjjäna. Yury jilatajj siwa: “Jan aynachtʼañatakisa jan qarjtas yatiyir saraskakiñatakisa, sapa kutiw Jehová Diosar mayisipjjerïta. ‘Diosajj yanaptʼistaniwa’ sasaw taqe chuyma confiyapjjayäta. Cheqas Jupajj yanaptʼawayapjjetuwa. Reinop nayraqat thaqherinakarojj janipuniw Diosajj jaytanukkiti. Arunakap yatiyañajja jukʼampiw familjam mayachtʼawayapjjetu” sasa (Mat. 6:22, 33). Familiaparu ukham uñjañajja, ¿kunjamsa Aleksey waynitur yanaptʼäna? Mamapajj siwa: “Walpun yanaptʼawayi. Llätunka maraniw bautisasiwayi, yanapa munasitap amuyasajj precursor auxiliarjamaw sapa vacacionan irnaqtʼi. Taqe chuyma yatiyir uñjasajj walpun kusisipjjta” sasa. Yury jilatampi Oksana kullakampejj 35 maranïpjjewa, jupanakasti precursor especialjamaw servisipki.

Yaqha cheqanakaru yatiyir sarañatakejja, Diosar taqe chuyma confiyañaw wakisi, ukwa yatjjatawayktan uka jilat kullakanakan arunakapat amuysna. Yaqha toqenakar yatiyir sarawayapki uka jilat kullakanakajj jan walinakansay uñjasiwayapkchejja, suma chuymani jaqenakar Diosan Reinopata yatiyasajj wali kusisitaw jikjjatasipjje. Ukhamasti, yatiyirinakajj munaski ukar sarapjjañäni, ukhamatwa Yury jilatjam wali kusisita jikjjatasiñäni. Nayratpach yaqha markar yatiyiri jan saratapatjja jilatajj akham siwa: “Nayratpach jan luratajat wal chuym pisayasta” sasa.