KINGSLEY jilatajja, kallachit tʼajjllinttʼatajj Biblia liytʼañwa qallti. Nayrïr kutiw Diosan Arunakap Yatiyañatak Escuelan liytʼaski. Wali sumpunwa liytʼi, ukampis janiw Biblia uñjjatkiti. ¿Kunatsa jan uñjjatkpacha?

Kingsley jilatajj Sri Lanka markanwa jakasi, jupasti juykhuwa. Janirakiw sumsa istʼkiti, ukatsti silla de ruedas ukatakwa sarnaqaraki. ¿Kunjamatsa Jehová Diosat yateqawayi? Diosan Arunakap Yatiyañatak Escuelarus ¿kunjamatsa qellqayasiwayi? Uk jichhajj parltʼapjjäma.

Kunapachatï Kingsley jilatar uñtʼkayäta ukhajja, Bibliat wal yatjjatañ munäna, ukajj wal muspharayitäna. Nayrajj walja jilatanakampiw Bibliat yatjjatatayna, braille arut El conocimiento que lleva a la vida eterna libropas qʼala merqʼëjjänwa. * “¿Bibliat wasitat yatjjatañ munasmati?” satajja, iyaw sasaw sitäna. Ukampis pä jan walinwa uñjasipjjayäta.

Nayrïrejj akänwa: Kingsley jilatajja, kawkintï chuymankipstatanakarusa usutanakarusa uñjaski (hogar para ancianos) ukanwa jakasïna. Ukan wali ruido utjatap layku ukhamarak Kingsley jilatan jan sum istʼatap laykojja, jachʼat parlañajänwa. Ukhamajj sapa semana Bibliat yatjjatapkayäta ukajj taqenin istʼkayänwa.

Payïrejj akarakïnwa: sapa semanajja, Kingsley  jilatajj mä jukʼakwa liytʼirjamäna, ukhamarak yateqerjamäna. Ukatwa kuntï jutïr semanajj yatjjatapjjañajäkäna uk kutin kutin liytʼas janïräkipan wakichasjjerïna, ukhamat yateqatajj utjañapataki. Braille arut Bibliapatsa textonak liytʼjjarakïnwa. Ukarjamaw kunjamsa sapa jisktʼarojj jaysani uk amuytʼjjerïna. Ukham waktʼayasisinjja, wali sum yateqäna. Bibliat yatjjatapkayäta ukhajja, Kingsley jilatajj alfombrar qontʼasisaw kuntï yateqkäna uk jachʼat qhanañchtʼirïna. Ukat mä jukʼa tiemporojja, semanan pä kutiw yatjjatjjapjjayäta. ¡Sapa estudiojj pä horapuniw apasirïna!

Kingsley jilatajj tantachäwinakar wal sarañ munäna, ukampis ukajj chʼamakïnwa. ¿Kunatsa? Silla de ruedar qonjjatañatakisa, saraqañatakisa yanaptʼañänwa. Tantachasiñ Utar autot sarañapatakisa kuttʼaniñapatakisa yanaptʼañajj wakisirakïnwa. Ukhamäkchïna ukasa, jilat kullakanakajj mayn mayniw yanaptʼapjjerïna. Jilatar yanaptʼañajj jupanakatak mä bendicionänwa. Tantachäwinakanjja, Kingsley jilatajj jiñchu jakʼaru mä parlante apkatasisajja, wali amuyumpiw istʼirïna, janiw istʼa mayak istʼirïkänti, jan ukasti ¡arstʼarakirïnwa!

Mä qawqha tiempo Bibliat yatjjatasajja, Kingsley jilatajj Diosan Arunakap Yatiyañatak Escuelaruw qellqayasïna. Nayrïr kuti taman Bibliat liytʼañapajj waktʼkäna uka urutak niya pä semana faltkipanjja, akham sasaw jupar jisktʼayäta: “¿Biblia liyiñ wakichasjjtati?” sasa. Jupasti sitänwa: “Jïsa jilata, niya 30 kutiw liyjjta” sasa. “Walik ukham lurtajja. Ukampis istʼañwa munirisma” sarakiyätwa. Braille arut Bibliapar lukʼananakampi loqjjatasajj liyiñwa qalltäna. Ukampis lukʼananakapajj janiw maysarus ni maysarus onjjtkänti, ¿kunatsa? Liyiñ waktʼkäna ukjja, ¡pʼeqeruw yatsutayna!

Uk uñjasajj walpun chuym chʼalljjtayasiyäta, janiw cheqaw sañjamäkänti. Juparusti sayätwa: “30 kuti liytʼasakejj ¿kunjamaraki taqpach amtastasti?” sasa. Jupasti sarakitänwa: “Sapüruw 30 kuti liytjja” sasa. Mä phajjsi jilaw alfombrapar qontʼasisajj kutin kutin liyitayna, ukhamatwa taqpach yatsutayna.

Tantachasiñ Utan liyiñap urojj purinjjänwa. Biblia liyiñ tukuyjjäna ukhajja, walpunwa jilat kullakanakajj tʼajjllirapjjäna. Waljanirakiw ukham jan ajjsartʼas luratapat jachaqtʼasipjjäna. Mä kullakajja, ajjsarirïtap laykojj janiw plataformar arstʼiri makatjjänti, ukampis jilatar uñjasajj akham sänwa: “¡Kingsley jilatatï puedchejja, nayajj kunatarak janisti!” sasa. Uka kullakajj wasitatwa escuelar qellqayasjjäna.

Kimsa mara Bibliat yatjjatasajja, Kingsley jilatajj 2008 septiembre 6 urunwa bautisasiwayjje. Jilatajja, jiwañkamaw Jehová Diosar taqe chuyma loqtawayi. Jupasti 2014 mayo 13 urunwa jiwawayjje. Taqe chuymapuniw Jehová Diosar confiyäna. “Kunapachatï aka Oraqejj mä suma paraisöjjani ukhajja, nayajj kʼumara, chʼamani ukhamaw Jehová Diosar sirvjjäjja” sasaw sirïna (Isa. 35:5, 6). (Paul McManus jilatan arsutaparjama.)