1, 2. ¿Kunatsa jiwasatakejj Salmo 45 qellqatajj wali askejja?

KUNATÏ cheqäki ukat cheqapäki uk arjjatañataki ukat uñisirinakapar atipjiriw mä reyejj caballor latʼjjatat sari. Uñisirinakapar atipjasajja, mä suma noviampiw casarasi. Uka Reyirojj wiñayatakiw amtasi ukhamarak jachʼañchasi. Cheqas uka toqetwa Salmo 45 qellqatajj parli.

² Salmo 45 qellqatajj janiw aleq kusiskañ sarnaqäwita ukat qhepat wali kusisit jikjjatasiñatak parlkiti. Kunanaktï ukan parlki ukajj jiwasatakejj wali askiwa. Jichhürutakisa ukat jutïritakis wali wakiskiriwa. Ukhamajj Salmo 45 qellqatat wali amuyump yatjjatañäni.

3, 4. 1) ¿Kuna asksa jiwasajj yatiñ muntanjja, ukat kunjamsa ukajj chuymasar purtʼi? 2) ¿Kunjamsa ‘mä reyitak qʼochurapisktanjja’, ukat kunjamsa lajjrasajj ‘qellqerin suma qellqañaparjam’ tuku?

³ (Salmo 45:1 liytʼañataki.) “Mojjsa arunakaw” Salmo qellqerin chuymapar purtʼi, ukatwa ukajj chuymapan ‘phullchʼirayaraki’, ¿kunatsa? Ukajj mä reyi laykuwa. Ukaw Salmo qellqerin chuymap wal kusisiyäna ukat lajjrapajj ‘qellqerin suma qellqañapjamäkaspas’ ukham tukuyarakïna.

 ⁴ ¿Jiwasat kamsasirakispasa? Cheqas Cristojj alajjpachan apnaqkani uka suma yatiyäwinakajj chuymaruw purtʼistu. Diosan Reinopat suma yatiyäwinakajj 1914 maranwa wali askir tuküna, mä arunjja, “mojjsa” arükaspas ukhama. Uka marat aksaruw Diosan Reinopajj alajjpachan uttʼayatäjjatap qhan amuyasi, janiw jutïr urunakans puriniñapäkaspa ukhamäjjeti. ‘Diosan Reinopat uka suma yatiyäwjja aka oraqpachanwa yatiytanjja, ukhamat taqe markanakan yatipjjañapataki.’ (Mat. 24:14.) ¿Diosan Reinopat suma yatiyäwejj chuymasan ‘phullchʼirarakiti’? ¿Taqe chuymat Diosan Reinopat suma yatiyäwinak yatiytanjja? Salmo qellqerjamarakiw jiwasajj ‘mä reyitak qʼochurapisktanjja’, jupajj Jesucristo Reyisawa. Jupajj Diosan apnaqäwipan alajjpachan uttʼayatäjjewa sasaw yatiytanjja. Ukhamarus taqe apnaqerinakaru ukat jaqenakaruw uka Reyimp apnaqatäpjjañapatak yatiyasktanjja (Sal. 2:1, 2, 4-12). Ukat Diosan arunakap yatiykasajj Biblia apnaqtan ukhajja, lajjrasajj ‘qellqerin suma qellqañapjamäkaspas’ ukhamaruw tuku.

5. 1) ¿Kuna toqenakatsa Jesusajj ‘suma’ uñnaqtʼanïnjja? 2) ¿Kunjamsa ‘lakapat suma arunakajj mistüna’, ukat kunjamsa jupat yateqasiñatak chʼamachassna?

⁵ (Salmo 45:2 liytʼañataki.) Jesusajj jañchi toqet kunjamänsa uk mä jukʼakwa qellqatanakajj parli. Jupajj jan pantjasir chachjamajj ‘suma’ uñnaqtʼanïpachänwa. Ukampis Diosar taqe chuyma ukat jan jitheqtas yupaychatapaw jukʼamp askïnjja. Ukhamarus Jesusajj Diosan Reinopat ‘suma arunakampiw’ yatiyirïna (Luc. 4:22; Juan 7:46). ¿Diosan arunakap yatiykasin jupat yateqasiñataki, ukat jaqenakan chuymapar purtʼkir arunakampi parltʼañatakit chʼamachasisktanjja? (Col. 4:6.)

6. ¿Kunjamsa Jehová Diosajj Jesusar ‘wiñayatak’ bendicïna?

⁶ Jesusajj taqe chuyma aka Oraqen yatiykäna ukhajja, Jehová Diosajj juparojj bendicïnwa, ukat jiwasanak layku jakäwip loqtaskäna uka qhepatjja bendicirakïnwa. Apóstol Pablojj akham qellqäna: “Jaqer tukutäjjän ukkhajja, jupa kipkaw jiskʼar tukuwayi, jaysatap laykusti [lawan] jiwañkamarakiw puriwayi, ukham jiwañajj sinti pʼenqäkchïna ukasa. Ukatwa Diosajj juparojj wali jachʼaru apti, mä suti churaraki, uka sutisti taqe sutit sipans wali jachʼarakiwa. Ukhamat Jesusan sutip istʼasinjja taqe jakir jaqenakasa, akapachansa, alajjpachansa, manqhapachansa, killtʼasipjjañapataki, ukat taqeni arsuñapataki Jesucristojj Tatitütapa, Dios Awkejj jachʼachatäñapataki” (Fili. 2:8-11). Jehová Diosajj Jesusar wiñay jakañapatak jaktayasaw ‘wiñayatak’ askinak churawayi (Rom. 6:9).

7. ‘Masinakapat’ sipansa, ¿kunjamanakatsa Diosajj Jesusar ajllïna?

⁷ (Salmo 45:6, 7 liytʼañataki.) Kunatï cheqapäki ukwa Jesusajj wal munasïna ukat kunatï Awkipar jan walir uñjaykaspa uk uñisirakïnwa, ukatwa Jehová Diosajj apnaqäwipan apnaqañapatak Reyjam ajllïna. Jesusajj ‘masinakapata’, mä arunjja, Judá markankir Davitan wawapat jutir reyinakat sipansa ‘suma qʼapkir kusisiñ’, (NM) aceitempi ajllitänwa. ¿Kunjamatsa? Nayraqatajj Jehová Dios pachpaw Jesusarojj ajllïna. Ukat janiw Reyïñapatakik ajllkänti, jan ukasti Jilïri Sacerdotëñapatakiw  ajllirakïna (Sal. 2:2; Heb. 5:5, 6). Ukat Jesusajj janiw aceitemp ajllitäkänti, jan ukasti qollan ajayump ajllitänwa, ukat apnaqäwipajj janiw aka Oraqenkkiti, jan ukasti alajjpachankiwa.

8. ¿Kunatsa Jesusan apnaqäwipajj cheqaparjamawa sasin sissna, ukat kunatsa juparuw apnaqañajj waktʼi sasin saraksna?

⁸ Jehová Diosajj 1914 maranwa Yoqaparojj Reyjam uttʼayäna. ‘Reyi kankañapajj cheqapar uñjañawa’, ukhamajj reinopan cheqaparu ukat mä kikpaki uñjañajj utjapuniniwa. Juparuw uka Reinon apnaqañapajj waktʼi, kunattejj Jehová Diosaw uttʼayi. Ukhamarus Jesusan apnaqäwipajj “wiñayatakiwa”. Jehová Diosan uttʼayat chʼamani Reyin apnaqatajja, ¿janit Diosar servisajj kusisitäktanjja?

9, 10. 1) ¿Kunapachas Cristojj espadamp wakʼantasïna, ukat ukampejj kunsa luräna? 2) ¿Kunjamsa jutïrin Cristojj espadap apnaqani?

⁹ (Salmo 45:3 liytʼañataki.) Jehová Diosajj Jupan uttʼayat Reyirojj ‘espadamp wakʼantasim’ sasaw sejja, ukhamat khitinakatï Diosan apnaqäwipar kutkatasipki ukanakar tukjañapataki ukat arsutanakaparjam phoqayañataki (Sal. 110:2). Niyakejjay Cristojj jan atipjkay Nuwasir Reyïchejja, ‘jan ajjsariri’ jan ukajj chʼamani sas uñtʼatawa. Jesusajj 1914 maranwa espadamp wakʼantasïna, ukhamat Supayaru ukat sajjranakar alajjpachan atipjasin aka Oraqer jaqoqaniñataki (Apo. 12:7-9).

¹⁰ Ukampis ukajj atipjir Reyin qallta nuwasïwipakïnwa, cheqas atipjäwip phoqachañapakïskiwa (Apo. 6:2). Ukampis kunanakampitï Supayajj akapach apnaqki ukasa, ukat Supayampi sajjranakapampejj tukjatäniwa sasin Diosajj arskän ukajj janïraw phoqaskiti. Nayraqatajj oraqpachankir kʼari religionanak apnaqer Jachʼa Babiloniaw tukjatäni. Ukat “qʼañu warmirojj” marka apnaqer politiconak toqe tukjañwa Jehová Diosajj amtawayi (Apo. 17:16, 17). Ukjjarusti Nuwasir Reyejj Supayan apnaqat politiconakaruw jan mayampitak tukjani. Ukhaw ‘chʼamak manqhan angelapa’, mä arunjja, Jesucristojj Supayaru ukat sajjranakaru mikʼayar jaqontas atipjäwip phoqachani (Apo. 9:1, 11; 20:1-3). Kunjamsa Salmo 45 qellqatan uka toqet profecianakajj qellqatäjjäna uk uñjañäni.

11. ¿Kunjamsa Cristojj ‘cheqa layku nuwasi’?

¹¹ (Salmo 45:4 liytʼañataki.) Nuwasir Reyejj janiw markanak katuntasiñataki ukat markanakjjar munañanïñatak nuwaskiti, jan ukasti mä suma amtampiw kunatï cheqäki ukarjam nuwasi. Jupajj ‘cheqa layku, llampʼu jan ukajj altʼat chuymaninakar cheqapar uñjañatakiw’ nuwasi. Ukat kunanakattï nuwaski ukanakatjja, Jehová Diosajj Taqe Kunjjaru Munañanïtapwa arjjatañapa. Kunapachatï Diosan Apnaqäwip contra Supayajj saytʼkäna ukhaw Diosan apnaqañapajj janis waktʼkaspa ukham pächasiyäna. Ukhat aksaruw sajjranakasa ukat jaqenakas uka cheqa yatichäwit kʼarinak parlawayapjje. Horasajj puriniwa, Diosajj Taqe Kunjjar Munañanïtap Jehová Diosan ajllit Reyipaw arjjatani.

12. ¿Kunjamsa Reyejj altʼat chuymanïtap uñachtʼayi?

¹² Reyejj altʼat chuymanirakiwa. Diosan mä sapa Yoqapjamajja, altʼat chuymanïtapa ukat Awkipan apnaqäwipat jan jitheqtirïtapwa uñachtʼayawayi (Isa. 50:4, 5; Juan 5:19). Taqe khitinakatï Reyimp apnaqatäpki ukanakajj jupatwa yateqasipjjañapa ukat altʼat chuymampiw Jehová Diosarojj Taqe Kunjjaru Munañanirjam taqe kunan uñjapjjañapa. Khitinakatï ukarjam sarnaqapki ukanakakiw paraison jakasipjjani (Zac. 14:16, 17).

13. ¿Kunjamsa Cristojj kunatï ‘cheqapäki’ uka layku nuwasi?

¹³ Cristojj kunatï ‘cheqapäki’ uka laykuw  nuwasiraki. Ukat Dios nayraqatan kunatï cheqapäki uk arjjati, mä arunjja, Dios nayraqatan kunatï askïki ukat jan walïkaraki uk arjjati (Rom. 3:21; Deu 32:4). Isaiasajj Jesucristo Reyit akham arsüna: “Mä reyiw utjani, jupasti cheqaparurakiw apnaqani” sasa (Isa. 32:1). Jesusan apnaqäwipajj ‘machaq alajjpacha’ ukat ‘machaq oraqe’ utjayani, “ukansti taqe kunasa cheqapapunïniwa” (2 Ped. 3:13). Taqe ukan jakirinakasti Jehová Diosan kamachinakap istʼapjjañapaw wakisini (Isa. 11:1-5).

14. ¿Kunjamsa Cristojj kupi amparapampejj ‘muspharkañanak lurani’? (3 janankir foto uñjjattʼam.)

¹⁴ Reyejj espadapas cinturar warktʼataw caballor latʼjjatat mistuski (Sal. 45:3). Ukampis niyaw espadap kupi amparapampi katjjaruñ urojj purinini. Salmo qellqerejj akham sänwa: “¡Kupi amparamajj muspharkañanak luraypan!” (Sal. 45:4). Kunapachatï Jesusajj caballor latʼjjatat Armagedonan Jehová Diosan amtap phoqer jutkani ukhajja, uñisirinakap contrajj ‘muspharkañanak lurani’. Kunanakampis Supayan apnaqäwip tukjani uk janiw yatktänti. Ukampis Reyin apnaqäwipat saytʼasipjjam sasin Jehová Diosajj ewjjtʼkäna ukar jan istʼirinakajj chuymanakapan ajjsarapjjaniwa (Salmo 2:11, 12 liytʼañataki). Jesusajj qhepa urunakat parlkäna uka profeciapanjja, “jaqejj ajjsarañatwa thayjtani kunatejj oraqen paskani ukat yatisina; ukatsti alajjpachanjja jachʼa chʼamanakapamppachaw khathatini, ukapachaw jaqen Yoqaparu uñjapjjani, qenay patan chʼamampi, jachʼa kankañapampi jutaskiri” sasaw säna (Luc. 21:26, 27).

15, 16. Cristomp chika nuwasir sarapki uka ejercitonjja, ¿khitinakas ukankapjjarakini?

¹⁵ Reyejj ‘chʼamampi ukat jachʼa kankañapampi’ juchañchir jutatapat yatiykasajj akham sasaw Apocalipsis qellqatajj qhanañchi: “Ukatsti alajjpacha jistʼarata uñjta, mä janqʼo caballorakiw uñstanïna. Uka caballor latʼjjatat jaqesti, Cheqa, Aski satarakïnwa. Jupasti cheqa kankañampiw taqe kunsa apnaqe, nuwasirakisa. Qhepapsti taqe alajjpachankirinakarakiw arkapjjäna suma lino janqʼo qʼoma isimpi isthapitkama taqenisa janqʼo caballor latʼjjatatkamaraki. Lakapatsti mä ari espadarakiw mistüna markanakaru ukampi chhojjriñchnoqañataki. Ukatsti wali qhoru kankañampirakiw apnaqani, kunjämtï uva uma chʼirwsurejj kayumpi takis chʼirwsojja ukhama. Diosan colerasiñapsti mä vinökaspas ukhamwa jaqenakarojj umarayani, uka mutuñasti taqe chʼamani Diosan colerasiñapatwa juti” (Apo. 19:11, 14, 15).

¹⁶ ‘Alajjpachankir’ ejercitojj Cristomp chik nuwasir sarapkani uka taypinjja, ¿khitinakas utjaraki? Kunapachatï Jesusajj nayrïr kuti espadap wakʼantaskän Supayaru ukat sajjranakar alajjpachat aka oraqer jaqoqaniñataki ukhajja, “angelanakapampi” chikäskänwa (Apo. 12:7-9). Ukhamasti, Armagedón chʼajjwäwin qollan angelanakajj Criston ejercitopankapjjaniwa. ¿Uka ejerciton yaqha yanapirejj utjarakpachäniti? Ajllit cristianonakarojj akham sasaw Jesusajj säna: “Khitinakatejj atipjkani ukhamarak kuntejj nayajj munktjja [uk tukuykam uñjirinakarojj] markanakjjaru munañanïñwa churäjja, kunjämatï nayarojj Awkijajj munañanïña kankañ churitojja ukhama. Markanakarusti mä hierro varampjamarakiw apnaqapjjani, ñeqʼet lurat phukhunakäkaspas ukhamarakwa tʼunthapipjjani” sasa (Apo. 2:26, 27). Ukhamajj ajllit cristianonakajj Criston alajjpachankir ejercitop taypinkapjjarakiniwa, ukjatakejj jupanakajj alajjpachan bendición katoqapjjani. Kunapachatï Jesusajj markanakaru hierrot lurat mä varampi apnaqkani ukat ‘muspharkañanak  lurkani’ ukhajja, ajllit cristianonakajj jupamp chiktʼatäsipkaniwa.

17. 1) Cristojj janqʼo caballor latʼjjatatäki ukajja, ¿kunamp sasisa? 2) Arcosa ukat espadasa ¿kunap sasirakisa?

¹⁷ (Salmo 45:5 liytʼañataki.) Reyejj mä janqʼo caballor latʼjjatataw sari, ukajj Jesusan chʼajjwäwipajj Jehová Diosan nayraqatapan qʼomätapa ukat cheqapätapwa uñachtʼayi (Apo. 6:2; 19:11). Jupajj mä espadanïkchisa, mä arconirakiwa. Bibliajj akham siwa: “Ukat uñtta, ukatsti mä janqʼo caballo uñjarakta. Caballor latʼjjatatäkän ukasti mä arco aptʼatänwa. Mä coronraki churapjjäna, ukatsti mä atipjirjamaw mistuwayäna jukʼampi atipjäwinaka atipjañapataki” sasa. Espadasa ukat arcosa kunanakampitï Cristojj enemigonakapar tukjkani ukanakamp sasiwa.

18. ¿Kunjamsa Criston ‘flechanakapajj wali arïtap’ uñachtʼayasini?

¹⁸ Salmo qellqerejj Reyin ‘flechanakapajj wali arinakawa, Reyin uñisirinakapajj ajjsarayasjjapjjewa’ ukat “markanakajj jumaruw makhatjjapjjtam” sasaw säna. Taqe aka oraqpachanwa jiwatanakajj utjani. Jeremiasan profeciapajj akham siwa: “Khitinakarutejj Tatitojj uka urojj jiwaraykani ukanakasti aka oraqenjja mä thiyat mä thiyakamaw liwirtapjjani” sasa (Jer. 25:33). Juan chachajj niya ukar uñtasit mä profecía akham sasaw arsüna: “Ukatsti uñjaraktwa mä ángel lupin saytʼatäskiri, ukatsti jupajj taqe alajjpach jamachʼinakaruw artʼäna wali chʼamampi, akham sasa: ‘¡Jutapjjam, tantachtʼasipjjam Diosan jachʼa manqʼañaparu. Ukatsti manqʼapjjam reyinakan, comandantenakan aychapa, caballonakan aychapa, caballonakan latʼjjatatäkän uka jaqenakan aychapa, taqe jaqen aychapsa, jiskʼäpasa, jachʼäpasa, librëpasa, esclavöpasa!’” (Apo. 19:17, 18).

19. ¿Kunjamsa Cristojj ‘atipjañan nayrar sartaskakini’, ukat atipjäwip phoqachani?

¹⁹ Supayan ñanqha pachap aka Oraqen tukjasajja, Cristojj ‘atipjañan nayrar sartaskakiniwa’ (Sal. 45:4). Jupajj Waranq Mara Apnaqañapkamaw Supayaru ukat sajjranakar mikʼayar jaqontani, ukhamatwa atipjäwip phoqachani (Apo. 20:2, 3). Kunapachatï Supayampi ukat sajjranakampejj jiwatäpkaspas ukham jan kun lurirjamäpkani ukhajja, aka Oraqen jakirinakajj janiw Supayamp apayasjjapjjaniti ukat atipjiri ukat jachʼañchat Reyimp apnaqataw jakasipjjani. Ukampis aka Oraqejj jukʼat jukʼat mä suma paraisor janïr tukkipanjja, Reyimpi ukat alajjpachan Jupamp chikäpki ukanakampiw kusisipjjarakini. Ukajj kunjamänisa uk jutïr yatichäwinwa yatjjataskañäni.