1, 2. ¿Kuna guerras niya qalltañampïski, ukat uka guerran kunsa jiwasajj jan lurkañäni?

 OCTUBRE 30, 1938 maranjja, walja jaqenakaw Estados Unidos markan wali uñtʼat mä programa radiot ischʼukisipkäna. Uka programan parlirinakajja, Marte planetan jakirinakaw aka Oraqer purinisin tukjasipki sasaw yatiyapjjäna. Ukat ukajj mä cuentokiwa sasinsa yatiyaskchïnjja, cheqäkaspas ukhamwa waljanejj amuyapjjäna ukat wal sustjasipjjäna. Yaqhepasti, Marte planetat jutirinakat jarkʼaqasiñatakejj kunatï wakiskäna ukwa lurapjjäna.

² Niya ukhamarakiw mä guerrajj qalltañampïski, ukampis uka guerrat qhespiñatakejj jaqenakajj janiw kuns lurapkiti. Uka guerrajj Armagedón guerrawa, ukanwa Jehová Diosajj aka ñanqhapacha contra nuwasini. Ukasti janiw mä cuentokïkiti. Jehová Diosaw Arupan qhanañchistu (Apo. 16:14-16). Uka guerrajj qalltani ukhajja, janiw jiwasan nuwasiñasajj wakiskaniti, kunattejj Jehová Diosaw chʼamapampejj muspharkañpun qhespiyistani.

3. ¿Kuna profeciatsa yatjjataskañäni, ukat kunatsa jiwasatakejj wali wakiskirejja?

³ Zacarías 14 jaljan utjki uka profeciaw Armagedón guerrat qhanañchtʼistu. Uka arunakajj 2.500 maranak nayras qellqasiwaykchïnjja, jiwasatakejj wali wakiskiripuniwa (Rom. 15:4). Uka profecianjja, 1914 maran Cristojj alajjpachan apnaqaña qalltäna ukhatpachajj kunanakas Diosan markaparojj pasawayi ukat kunas jutïrin pasañampïski ukanakatwa qhanañchistu. Uka profecianjja “mä jachʼa valle[ta]” ukat “[‘jakañ churiri’, NM] suma qʼoma uma[twa]” parli (Zac. 14:4, 8). Aka yatichäwinwa kunas uka vallejja ukat kunjamsa Jehová Diosan Qhanañchirinakapajj uka vallen imantassna uk yatjjataskañäni. Ukatsti kunas jakañ churiri umajja ukat kunatakis yanaptʼistaspa ukanakwa yatjjataskarakiñäni. Ukat uka umajj  kunja wakiskiris uk amuytʼañäni ukhajja, janiw wali askirjamak uñjkañäniti, jan ukasti umtʼañ munarakiñäniwa. Ukhamasti, uka profeciat wali amuyumpi yatjjatañäni (2 Ped. 1:19, 20).

4. 1) ¿Kunapachas Diosan urupajj qalltawayi? 2) 1914 marat nayrajja, ¿kunsa Diosan servirinakapajj yatiyapjjäna, ukat kunsa politicanakana ukat religionanakan pʼeqtʼirinakajj lurapjjäna?

⁴ Zacarías 14 jaljan nayrïr jiskʼa tʼaqanakapajja, Jehová Diosan urupatwa parli (Zacarías 14:1, 2 liytʼasiñapawa). ¿Kunas uka urojja? ‘Tatitun urupawa’. Uka urusti, kunapachatï ‘akapachankir markanakjjaru munañanïñajja, Tatitusana ukat Cristopankjjäna’ ukhaw qalltawayi (Rev. 1:10; 11:15, NM). ¿Kuna maransa qalltawayi? 1914 marana, kunapachatï Cristojj Diosan Apnaqäwipan apnaqerit uttʼayatäkäna ukha. Uka marat walja maranak nayrajja, Jehová Diosan servirinakapajja ‘markanakar tiempojj churatäkäna’ ukajj 1914 maranwa tukusjjani, ukat uka marat aksarojj kunayman jan waltʼäwinwa akapachajj uñjasini sasaw yatiyapjjäna (Luc. 21:24). ¿Kunsa markanakajj lurapjjäna? Uka yatiyäwir istʼañat sipansa, politicanakana ukat religionanakan pʼeqtʼirinakajja, jan qarjtasa yatiyir ajllit jilat kullakanakat sawkasipjjänwa ukat arknaqapjjarakïnwa. Cheqas ukjja janiw jupanakar lurapkänti, jan ukasti Taqe Chʼamani Jehová Diosaruw lurasipkäna, kunattejj ajllitanakaw Diosan Reinopampi, mä arunjja, “alajjpach Jerusalén” markampi sasejja. Ukat jupanakarakiw Diosan Reinopan khitanakapäpjje (Heb. 12:22, 28).

5, 6. 1) ¿Diosan markapar uñisirinakajj kunsa lurapjjäna? 2) ¿Khitinakas markat jiltʼirinakajja?

⁵ Kuntï markanakajj lurapkäna ukjja Zacariasaw mä profecian arsuwayäna. Jupasti akham sänwa: ‘Jerusalén markajj katuntatäniwa’ sasa. ‘Markajja’, Diosan Reinopampi sasiwa, ukan markachirinakapajja kawkïr ajllitanakatï aka Oraqenkasipki ukanakawa. Jupanakaw aka Oraqenjja uka Reinon khitanakapäpjje (Fili. 3:20). Nayrïr Jachʼa Chʼajjwäwi apaskäna ukhaw ‘markajj katuntata’ uñjasïna, kunapachatï mä qhawqha jilatanakajj katuntata ukat Atlanta (Georgia, Estados Unidos) markar apatäsin carcelar jistʼantatäpkäna ukha. Uka jilatanakasti Diosan markapanjja wali wakiskiri luräwinakanïpjjänwa. Ukat kunapachatï uñisirinakapajj Bibliat apstʼata qellqatanak jan lurasiñapataki ukat Diosan Reinopat jan yatiyasiñapatak jarkʼañ munapkäna, ukhaw markan utanakapajj qʼala lunthatsutäkaspas ukhaman uñjasïna.

⁶ Jehová Diosan servirinakapajj jukʼanikïpkchïnsa ukat kʼarintata, arknaqata ukat tʼaqhesiyatas uñjasipkchïnjja, uñisirinakapajj janiw cheqa yupaychäwi chhaqtayawayapkiti. Kunattejj markat “jiltʼirinaka[jj]” utjaskakïnwa, mä arunjja, aka Oraqenkasipki uka ajllitanakajj taqe chuymaw Diosar yupaychasipkakïna.

7. Ajllit cristianonakan jan jitheqtasa Diosar yupaychapjjatapajja, ¿kun lurañatakis yanaptʼistu?

⁷ Nayrïr Jachʼa Chʼajjwäwejj tukuskäna ukhajja, ¿uñisirinakajj janit Diosan markapar arknaqjjapjjäna? Zacariasan profeciaparjamajja, markanakajj ajllit cristianonakarusa ukat aka Oraqen wiñay jakañ suytʼäwinïpki ukanakarus jukʼamp arknaqasipkakiñapänwa (Apo. 12:17). Amtañäni, Payïri Jachʼa Chʼajjwäwinjja, wali tʼaqhesiyatapuniw Diosan markapajj uñjasïna. Ukham tʼaqhesiyatas uñjasipkchïnjja, ajllitanakajj kunjamsa Diosar taqe chuyma yupaychasipkakïna uk yatiñaw jichhürunakanjja kunayman yantʼanakaru saykatañataki ukat aguantañatak yanaptʼistu. Yamas kunapachatï Diosar jan yupaychiri familiaranakasasa, yateqer masinakasasa jan ukajj trabajonkir masinakasas yaqhachapjjestu jan ukajj sawkasipjjestu  ukhaw yanaptʼistu (1 Ped. 1:6, 7). Kawkhansay jakaskstanjja, cheqa cristianonakajj “taqenisa mayak[ïpjjañasataki]” ukat ‘uñisirinakasampi jan sustjayasiñwa’ amttanjja (Fili. 1:27, 28). Ukampis Diosan markapar uñisir akapachanjja, ¿kawkinsa imantasiñ jikjjatsna? (Juan 15:17-19.)

8. 1) Bibliarjamajja, ¿qollunakajj kunanakampi sasispasa? 2) ¿“Olivos qollojj” kunampi sasisa?

⁸ Niyakejjay Jerusalén ‘markajj’ Diosan Reinopampi saschejja, “Olivos qollojj” kawkïritejj Jerusalén uñkatasinkki ukajja, ¿kunampi sasirakisa? ¿Kunjamsa uka qollojj ‘payaru jaljtayatäñapäna’ ukat pä qollur tukuñapäna? Bibliajj hebreo arut qellqaskäna ukanjja, uka pä qollunakarojj “qollunakaja” sasaw Jehová Diosajj säna. ¿Kunatsa? (Zacarías 14:3-5 liytʼasiñapawa.) Bibliarjamajja, qollunakajj reinonakampi jan ukajj gobiernonakampi sasiwa. Ukat Diosan qollupajja, bendicionanakapampi ukat jarkʼaqäwipampi sasirakiwa (Sal. 72:3; Isa. 25:6, 7). Jerusalén markat Inti jalsu toqenkir ‘Olivos qollun’ Jehová Diosajj saytʼatäki ukajja, Apnaqäwipampi sasiwa, mä arunjja, Jupakiw Taqe Kunjjaru Munañanejja.

9. ¿‘Olivo qollun’ payaru jaljtatapajj kun sañs muni?

⁹ Profeciarjamajja “Olivo qollojj” ‘payaruw jaljti’, ukajj ¿kun sañs muni? Jehová Diosajj mä machaq apnaqäwi uttʼayi sañ muni. Uka apnaqäwisti Jehová Diosankarakiwa, ukampisa, Jesucristoruw uka apnaqäwin apnaqañapataki uttʼayi. Ukatwa, kunapachatï “Olivo qollojj” payaru jaljtki ukat pä qollur tukuwayki ukarojj nayan “qollunakaja” sasin sejja.

10. ¿Kawkïr ‘jachʼa valletï’ pä qollunak taypin uñstki ukajj kunampi sasisa?

¹⁰ Kunapachatï, “Olivo qollojj” payaru jaljtki ukhajja, chikat qollusti amsta toqeruw jittʼi, maynïr chikatasti aynacha toqeruraki. Uka pä qollunak patjjaruw Jehová Diosajj taktʼasi ukat Jupa nayraqatansti “mä jachʼa vallerakiw” jistʼarti, uka ¿vallejj kunampi sasisa? Jehová Diosan jarkʼaqäwipampi sasiwa. Kunjamtï jaqenakajj pä qollo taypin jikjjatasir mä vallen jarkʼaqatäpkejja, ukhamarakiw Jehová Diosan yupaychirinakapajj Jupan Apnaqäwipampi ukat Yoqapan apnaqäwipampi jarkʼaqatäpjje. Ukhamatwa Jehová Diosajj cheqa yupaychäwi jan chhaqtayatäñapatakejj jarkʼaqani. ¿Kunapachas qollojj payar jaljtawayi? 1914 marana, uka maranwa ‘markanakar tiempojj churatäkäna’ ukajj tukusiwayjje ukat uka maraw Diosajj Apnaqäwipan apnaqañapatakejj Cristor uttʼayawayi. ¿Ukat kunapachas Diosan cheqa servirinakapajj uka “jachʼa valler” imantasir jaltjjañ qalltapjjäna? Uk jichhajj yatjjatañäni.

11, 12. 1) Jehová Diosan vallepar jaltjjañjja, ¿kunapachatsa qalltasiwayi? 2) Jehová Diosajj markapar chʼamapampi jarkʼaqaskatapjja, ¿kunas uñachtʼayi?

¹¹ Jesusajj akham sasaw arkirinakapar ewjjtʼäna: “Taqe jaqenakarakiw jumanakarojj uñisipjjätam nayar arkapjjatam layku” sasa (Mat. 24:9). 1914 marat aksaruw jukʼampi uñisitäpjjäna, kunapachatï aka ñanqhapachan qhep qhepa urunakapajj qalltkäna ukhatpacha. Ajllit cristianonakajj Nayrïr Jachʼa Chʼajjwäwin tʼaqhesiyatas uñjasipkchïnjja, janiw uñisirinakapajj chhaqtayawayapkiti. 1919 maranwa kʼari religionata, mä arunjja, Jachʼa Babiloniat qhespipjjäna (Apo. 11:11, 12). * Ukhaw Jehová Diosan markapajj uka pä qollo taypin jikjjataski uka valler jaltjjañ qalltawayapjje.

¹² Khä 1919 marat aksaruw uka vallejj Jehová Diosan servirinakaparojj oraqpachan jarkʼaqaski. Cheqas walja maranakaw marka apnaqerinakajj Jehová Diosan Qhanañchirinakapar Bibliat apstʼat qellqatanak jan  apsupjjañapatakejj jarkʼawayapjje, ukat walja markanakanwa Diosan Arup jan yatiyasiñapatakejj jarkʼawayapjjaraki. Ukampisa, markanakajj kunsay lurasipkpan janipuniw cheqa yupaychäwjja chhaqtayapkaniti. Jehová Diosaw jachʼa chʼamapampi markapar jarkʼaqaski (Deu. 11:2).

13. ¿Kunjamsa Jehová Diosan vallepanksna, ukat kunatsa uka vallepat janipuni mistupjjañasäki?

¹³ Jiwasatï Jehová Diosata ukat cheqa yupaychäwit jan jitheqtkañäni ukhajja, Jupasa ukat Jesucristo Yoqapasa jarkʼaqasipunistaniwa. Janipuniw kunas ni khitis ‘amparapat apaqkistaniti’ (Juan 10:28, 29). Jehová Diosajja, kuna yanapanaktï Jupar istʼañataki ukat Yoqapampi apnaqatäñatakis wakiski ukwa churistu. Ukat niyakejjay jachʼa tʼaqhesiñ urojj wali jakʼankchejja, janipuni Jehová Diosan vallepat mistupjjañäniti.

14, 15. Diosajj uñisirinakapampi nuwaskani uka urojja, ¿khitinakatï Jehová Diosan jan vallepankapki ukanakarojj kunas pasani?

¹⁴ Aka pachan tukusiñapkamajja, Supayajj Diosan markaparojj jukʼamp chʼamampiw arknaqaskakini. Ukampis niyaw Supayajj Diosan markap contrajj qhep qheppuni saytʼani. Uka uruw Jehová Diosajj markapar uñisirinakap contra nuwasini ukat qʼal tukjani. Uka ‘nuwasïwi urunwa’ Taqe Kunjjaru Munañani Jehová Diosajj wali chʼamanïtap qhan uñachtʼayani (Zac. 14:3).

¹⁵ Diosajj uñisirinakapampi nuwaskani uka urojja, ¿khitinakatï Jehová Diosan jan vallepankapki ukanakarojj kunas pasani? Zacarías 14:6 qellqatanjja akham siwa: ‘Uka urunjja janiw qhanajj utjkaniti ukat taqe kunas lojjontatäniwa’ (NM) sasa. Uka profeciarjamajja janiw jupanakatakejj qhanajj utjkaniti, mä arunjja, janiw Diosamp askit uñjatäpkaniti. Ukat profeciajj saskakiwa: ‘Caballonakasa, mulanakasa, camellonakasa, asnonakasa, taqe animalanakasa’ ‘lojjontatäniwa’. Mä arunjja, kuna armanakatejj nuwasiñataki apnaqapki ukanakajj janiw servjjaniti. Ukat uñisirinakaparojj ‘Tatitojj walpun castigani’ jan ukajj usuntayani. Jupanakan nayranakapasa ukat lakanakapas ‘qʼalaw ñusantani’ sasaw Zacariasajj qhanañchi. Ukajj cheqpach usüchini janisa, uk janiw yatktanti. Ukampis jupanakajj janiw armanakap jiwas contra aptapkaniti ni Diosarus arunakapamp ñanqhachapkaniti (Zac. 14:7, 12, 15). Akapachankir reyinakajj ejercitonakapampejj Supayamp chikas guerran nuwasiñataki saytʼasipkchinejja, Jehová Diosaw jupanakar qʼal tukjani (Apo. 19:19-21). “Khitinakarutejj Tatitojj uka urojj jiwaraykani ukanakasti aka oraqenjja mä thiyat mä thiyakamaw liwirtapjjani.” (Jer. 25:32, 33.)

16. Niyakejjay Jehová Diosan guerrapajj wali jakʼankchejja, ¿kunsa jisktʼasiñasa, ukat kun lurañasasa?

¹⁶ Guerranakanjja taqeniw tʼaqhesipjje, atipjirinakas ukhamaraki. Jaqenakajj utanakapsa, oraqenakapsa ukat derechonakapsa aptʼasipjjewa. Cheqas taqeniw jan waltʼäwin uñjasipjje ukat waljaninjja janiw kuna manqʼasiñapas utjkiti. Jachʼa tʼaqhesïwintï ukhaman uñjasiñäni ukhajja, ¿kuns lurañäni? ¿Ajjsarjjakiñäniti? ¿Qʼal aynachtʼasati janis kuna suytʼäwinïksna ukham amuyasiñäni? ¿Jehová Diosar janit yupaychjjañäni? Jan ukham jikjjatasiñatakejja, Jehová Diosan vallepankañasawa ukat Jupaw qhespiyistani sasaw taqe chuyma atinisiñasa (Habacuc 3:17, 18 liytʼasiñapawa).

17, 18. 1) ¿Jakañ churir umajj kunampi sasisa? 2) ¿Mar Muerto ukat Mediterráneo jachʼa lamar qotanakajj kunanakampi sasisa? 3) ¿Kun lurañsa muntanjja?

¹⁷ Armagedón qhepatjja, kawkhantï Jesusajj apnaqañatak qontʼatäki ukhatwa “[‘jakañ churiri’, NM] suma qʼoma umajj” mistunini.  ¿Uka umajj kunampi sasisa? Taqe kuntï Jehová Diosajj wiñay jakañ jikjjatañatak churkistu ukanakawa. Ukat profeciarjamajja, ¿jachʼa lamar qotanakajj kunanakampi sasisa? Mar Muerto ukat Mediterráneo jachʼa lamar qotasa, pä grupo jaqenakampi sasiwa. Mar Muerto jachʼa lamar qotajja, khitinakatï jiwatäpki ukanakampi sasiwa. Ukat niyakejjay Mediterráneo jachʼa lamar qotan jakañajj utjchejja, khitinakatï Armagedón jachʼa chʼajjwäwit qhespipkani uka ‘walja jaqenakampi’ sasiwa (Zacarías 14:8, 9 liytʼasiñapawa; Apo. 7:9-15). Paypach gruponakaw “jakañ churiri mä suma qʼoma jawir[at]” jutiri “uma” umtʼapjjani. Uka umat umtʼapjjatapatjja, janiw juchanëjjapjjaniti ukat wiñayatakiw jakapjjarakini (Apo. 22:1, 2).

¹⁸ Kunapachatï Jehová Diosajj aka ñanqhapacha tukjkani ukhajja, jiwasarojj qhespiyistaniwa ukat Diosan apnaqata mä suma machaq oraqeruw irpantistani. Ukatpï akapachankir markanakajj uñisipkchistpasa, taqe chuymaw Diosan Reinopar yanaptʼañasa ukat Jehová Diosan jachʼa vallepan imantasipjjañasa.