Jehová Diosaw kusisit markapar tantachtʼi
Jehová Diosaw kusisit markapar tantachtʼi
“Taqpach markaw tantachasiñapa, taqe jaqenaka, warminaka, wawanaka, ukhamaraki kawkïri yaqha markat jutir jaqenakati jumanak taypin jakki ukanakasa.” (DEU. 31:12.)
¿KUNJAMSA QHANAÑCHTʼASMA?
¿Diosan markapanjja nayratpachaw jachʼa tantachäwinakajj wali amtkayapunïnjja sasajj kunatsa sissna?
¿Jerusalenan apaskäna uka fiestanakar sarañatakejj kunjamsa israelitanakajj chʼamachasipjjerïna?
¿Kunatsa taqpach jachʼa tantachäwinakarojj sarañasapuni?
1, 2. ¿Kunsa jachʼa tantachäwinakat yatjjataskañäni?
DIOSAN markapanjja, kimsa uru jachʼa tantachäwinakasa ukat walja markanakat jachʼa tantachäwinakas walja maranakaw apasjje. Ukham wali wakiskir jachʼa tantachäwinakarojj waljaniw sarpachätanjja, ukat inas walja maranak sarjjarakstan.
2 Nayra maranakanjja ukhamarakiw Diosan markapajj tantachasipjjerïna. Jichhajja, kunjamsa nayra tiempon jachʼa tantachäwinakajj apasirïna ukat kunjamsa jichhürunakan apasiraki ukanakwa sum amuytʼañäni, ukat kunatsa uka tantachäwinakar sarañajj wali askejja ukwa yatjjatañäni (Sal. 44:1; Rom. 15:4).
NAYRA TIEMPON APASKÄNA UKAT JICHHA TIEMPON APASKI UKA WAKISKIR JACHʼA TANTACHÄWINAKA
3. 1) ¿Diosan markapan nayrïr jachʼa tantachäwipan kunas pasäna? 2) ¿Kunjamsa israelitanakajj tantachasipjjañapätap yatipjjäna?
3 Israelitanakajj Sinaí qollu jakʼanwa Diosan yatichäwinakap istʼañatakejj tantachasipjjäna, ukaw nayrïr jachʼa tantachäwipachänjja. Ukatwa ukajj Diosan markapan wali amtatapunejja. Uka jachʼa tantachäwinwa Jehová Diosajj israelitanakar Leyip churasajj wali chʼamanïtap uñachtʼayäna (Éxo. 19:2-9, 16-19; Éxodo 20:18; Deuteronomio 4:9, 10 liytʼasiñapawa). Ukürutwa kunjamsa Diosajj israelitanakampi apasiñapäna ukajj qhanstäna. Uka qhepatjja, kunjamsa Moisesajj Diosan markapar tantachañapäna ukwa Jehová Diosajj qhanañchäna. Ukatakisti qollqet pä trompeta luram sänwa. Uka trompetanak phustʼir istʼasaw “mark[pachajj]” “Diosampi Jikisiñ Carpäkis uka mantañaru” tantachasipjjañap yatipjjäna (Núm. 10:1-4). ¡Kunja kusisitak tantachasirinakajj jikjjatasipkäna!
4, 5. ¿Moisés chachasa ukat Josué chachas Diosan markapar tantachthapkäna ukajj kunatsa wali wakiskiripunïnjja?
4 Israelitanakajj niya 40 maranak wasaran sarnaqjjapjjäna ukhaw Moisesajj markpacharu tantachthapïna. Uka tiempojja israelitanakatakejj wali wakiskiripunïnwa. Jupanakajj Suma Oraqer niya mantañampïsipkäna ukhaw Moisesajj markpachar kuntï Jehová Diosajj jupanak layku luräna ukat kunsa jutïrin lurani uk amtayañapajj wakisïna (Deu. 29:1-15; 30:15-20; 31:30).
5 Moisesajj uka tantachäwinwa, kunja wakiskiris Diosan yatichäwinakap yateqañataki tantachasiñajj uk israelitanakar arsuwaypachäna. Sapa paqallqo mara apaskäna uka Enramada fiestanjja, kawkharutï Diosajj siskäna uka cheqaruw chachanakasa, warminakasa, wawanakasa, ukhamaraki jupanak taypin jakir yaqha markat jutir jaqenakasa tantachasipjjañapäna. Ukhamat leyinak liytʼasiri istʼapjjañapataki, ukat Jehová Diosar jaysañ yateqapjjañapataki, ukhamaraki kuntï leyinakas siski ukarjam sarnaqapjjañapataki (Deuteronomio 31:1, 10-12 liytʼasiñapawa). Ukhamasti, Diosan markapajj sapa kuti Jupan arunakapa ukat amtanakapa yateqañataki tantachasipjjañapajj wali wakisirïtap uka tiempotpachaw qhanäjjäna. Suma Oraqer mantjjapjjäna uka qhepatjja, kʼari diosanakar yupaychiri markanak taypinkasipkänwa, ukhaw Josué chachajj israelitanakar chʼamañchtʼañatak tantachthapïna, ukhamata Jehová Diosar jan jitheqtas yupaychasipkakiñapataki. Ukat israelitanakajj Jehová Diosar taqe chuyma serviñwa amtapjjarakïna (Jos. 23:1, 2; 24:1, 15, 21-24).
6, 7. Diosan markapan jachʼa tantachäwinakapajja, ¿kunatsa wali wakiskiripunïnjja?
6 Aka qhepa tiemponjja, wali wakiskir jachʼa tantachäwinakajj utjawayarakiwa, ukanwa kunanakas Diosan markapan mayjtʼäna ukat Bibliankir yaqhep tʼaqanakajj kamsañsa muni ukanak sum qhanañchasïna (Pro. 4:18). Bibliat Yatjjatirinakan nayrïr jachʼa tantachäwipajja, 1919 maranwa Nayrïri Jachʼa Chʼajjwäwi pasatarojj Cedar Point, (Ohio, Estados Unidos) markan apasïna. Ukanjja, mä 7.000 ukhaniw tantachasipjjäna, ukanwa Diosan arunakap oraqpachan yatiyasiñapatak chʼamañchtʼasïna. Ukat 1922 maranjja, uka pachpa cheqanwa jachʼa tantachäwejj llätunka urunak apasïna. Ukanjja, Joseph F. Rutherford jilataw tantachasirinakarojj Jachʼa Babilonian tukjatäñapkama oraqpachan yatiyasipkakiñapatak aka arunakamp chʼamañchtʼäna: “Diosajj Jehová sutinïtapa ukat Jesucristojj reyinakans Reyipätapa ukat munañaninakans Munañanïtap taqeniw yatipjjañapa. Aka urojj wali wakiskiripuniwa. Reyejj apnaqjjewa, jumanakaw yatiyiripäpjjtajja. Ukhamasti, Reyita ukat Apnaqäwipat yatiyapjjam, yatiyapjjam, yatiyasipkakim” sasa. Ukan tantachasirinakasa ukat oraqpachankir mayni jilat kullakanakas taqe chuymaw uka arunak katoqasisajj yatiyañ qalltapjjäna.
7 Bibliat Yatjjatirinakajja, Columbus (Ohio) markanwa 1931 maran mä jachʼa tantachäwin Jehová Diosan Qhanañchirinakapa suti katoqawayapjje. 1935 maranjja, Washington markanwa Rutherford jilatajj khitinakatï “trono nayräjjan ukhamarak Cordero nayräjjapan saytʼatäsipkän[a]” uka “walja jaqenaka[jj]” khitinakasa uk qhanañchtʼäna (Apo. 7:9-17). 1942 maranjja, kunapachatï Payïr Jachʼa Chʼajjwäwejj utjkäna ukhaw Nathan H. Knorr jilatajj “¿Sumankañajj wiñayatakit utjani?” sat arstʼäwipanjja Apocalipsis 17 qellqatan parlki uka “jachʼa wila ajjsarkañ animal[ajj]” khitis uk qhanañchtʼäna, ukat chʼajjwäwi qhepatjja jukʼampi yatiyaskakiñaw wakisini sasaw sarakïna.
8, 9. ¿Kunatsa yaqhep jachʼa tantachäwinakajj chuymar purtʼkiripunïnjja?
8 “Kusisit Markanaka” sat Jachʼa Tantachäwejj 1946 maranwa Cleveland (Ohio) markan apasïna, uka tantachäwinjja, Knorr jilataw “Wasitat utachañataki ukat jachʼaptayañataki jan waltʼäwinaka” sat pʼeqeñchäwini arstʼäwi arstʼäna. Uk istʼañajj kunja kusiskañänsa uk amtasaw mä jilatajj akham säna: “Uka arumajja, Knorr jilatan arstʼkipan uka qhepäjjankañajj nätakejj wali kusiskañapunïnwa. Ukat kunjamsa Diosan markapajj nayrar sartaski ukat Brooklyn markankir Betel uta ukat fabricap jachʼaptayañatakejj kun lurañsa amtasiski uk qhanañchaskäna ukhajja, tantachasirinakajj mayamp mayampwa wal tʼajjllirtʼapjjäna. Plataformat janis tantachasirinakan ajanunakapajj uñjaskchïnjja, wal kusisipjjatapajj qhanaw amuyasïna” sasa. 1950 maran Nueva York markan walja markanakat jachʼa tantachäwejj apaskäna ukanwa, tantachasirinakajj Traducción del Nuevo Mundo de las Escrituras Griegas Cristianas Biblia katoqapjjäna. Uka Biblianakwa kawkhantï Diosan sutipajj uñstañapäkäna uka cheqanakan uñstäna ukat kunjamtï inglés arojj parlaskäna ukham qellqatarakïnwa (Jer. 16:21, NM).
9 Ukat kawkïr markanakantï Jehová Diosan Qhanañchirinakapajj arknaqata jan ukajj jarkʼata uñjasiwayapkäna uka markanakan jachʼa tantachäwi apaskäna ukajj chuymar purtʼkiripunïnwa. Amtañäni, Alemania markanjja Adolf Hitler chachajj Jehová Diosan Qhanañchirinakaparojj chhaqtayapunïwa sasaw arsutayna. Ukampis 1955 maranjja, kawkhantï Hitler chachajj ejercitopampi tantachasirïkäna ukanwa 107.000 ukhanejj Nuremberg markan mä jachʼa tantachäwin tantachasipjjäna. ¡Ukankirinakatjja waljaniw kusisiñat jachaqtʼasipjjäna! Ukat 1989 maranjja, Polonia markanwa kimsa jachʼa tantachäwinakajj apasïna, ukasti “Dios chuymäpjjañäni” sat pʼeqeñchäwinïnwa. Ukanjja, 166.518 ukhaniw Unión Soviética ukat Checoslovaquia ukhamarak Europa markan Inti jalsu toqenkir markanakat jutirinakas tantachasipjjäna. Ukat jila parte jilat kullakanakajja, janipuniw 15 jan ukajj 20 jilaniru tantachasir uñjapjjerïkänti. Ukat 1993 maranjja, Kiev (Ucrania) markanwa “Diosan yatichäwinakapa” sat pʼeqeñchäwini Walja Markanakat Jachʼa Tantachäwejj apasïna. Ukan 7.402 jilat kullakanakar bautisasir uñjañajj wali kusiskañapunïnwa. Ukham mä urun walja bautisasirinakajj janiw yaqhajj uñjasiwaykiti (Isa. 60:22; Hag. 2:7).
10. ¿Kawkïr jachʼa tantachäwinaksa wali munasiñampi amtta, ukat kunatsa?
10 Kimsa uru jachʼa tantachäwinakatsa jan ukajj walja markanakat jachʼa tantachäwinakatsa inas jumajj maysa wali munasiñampi amtsta. ¿Nayrïr jachʼa tantachäwir sarkayäta jan ukajj bautisaskayäta uka tantachäwit amtasisktati? Cheqas jumatakejj wali amtatäpachawa. ¡Ukhamasti uka tantachäwinakat janipun armasimti! (Sal. 42:4.)
SAPA MARAN KUSISKAÑ TANTACHÄWINAKA
11. ¿Kuna fiestanak amtapjjañapsa Diosajj israelitanakar mayïna?
11 Jehová Diosan aruparjamajja, israelitanakajj sapa maraw Jerusalenar aka kimsa fiestanak amtañatak sarapjjañapäna: Jan Levaduran Tʼantʼa Manqʼañ fiesta, Semananaka sat fiesta (qhepatjja Pentecostés satäjjänwa), ukhamaraki Enramada fiesta. Leyejj akham sänwa: “Taqe chachanakasti maranjja kimsa kutiw jutapjjañapa [Jehová] Tatitur uñstirejja” sasa (Deu. 16:16; Éxo. 23:14-17). Uka tantachäwinakar sarañajj kunja wakiskirisa Diosar yupaychañatakejj ukjja familia pʼeqtʼirinakat waljaniw amuyapjjäna, ukatwa taqpach familiapampi sarapjjäna (1 Sam. 1:1-7; Luc. 2:41, 42).
12, 13. ¿Israelit familianakatakejj sapa mara amtasiñapäkäna uka fiestanakar sarañajj kunjamäpachänsa?
12 Uka tantachäwir sarañajj israelita mä familiatakejj kunjamäpachänsa uk amuytʼañäni. Joseyampi Mariyampejja, 100 kilometronakwa Nazaretat Jerusalenkamajj sarapjjañapäna. ¿Jiskʼa wawanakam irptʼat kayuk sarasajj qhawqha tiemponsa purisma? Jesusajj waynitükasin Jerusalenar saratapat Biblian parlki ukarjamajja, familiaranakasa ukat amigonakasa juntukiw sarapjjerïpachäna. Ukham waljani sarañasa, taqenitak phayañasa ukat jan uñtʼat cheqanakan qorpachasiñ jikjjatañasa wali kusiskañapunïpachänwa. Ukhamarusa uka cheqanakanjja janiw ajjsarañanakajj utjkpachänti, ukatwa 12 marani wayniturus sapak sarnaqer jaytapjjerïpachäna. ¡Ukham sarañajj jan armkayapunïpachänwa, yamas wayn tawaqetanakatakejj jukʼamp amtkayäpachänwa! (Luc. 2:44-46.)
13 Walja israelitanakajja, nasipkäna uka markat yaqha markanakar apataw uñjasipjjäna. Ukatwa waljanejj uka fiestanakar kunayman markanakat jutapjjäna. Pentecostés 33 maranjja, Diosar taqe chuyma yupaychir judionakasa ukat jan judionakasa jaya markanakatwa Jerusalenar jutapjjäna: Italia, Libia, Creta, Asia Menor ukat Mesopotamia (Hech. 2:5-11; 20:16).
14. ¿Sapa mara tantachasir sarasajj kuna askinaksa israelitanakajj jikjjatapjjäna?
14 Diosar taqe chuyma yupaychiri israelitanakatakejja, jupanakjam Diosar munasir mayni israelitanakampi chika Jehová Diosar yupaychañaw jukʼampi wakiskirïnjja. ¿Ukat kunjamsa jikjjatasipjjpachäna? Ukjja Enramada fiestajj kunjamsa apasiñapa säns Jehová Diosajj ukarjamaw amuytʼsna. Jupajj akham sänwa: “Taqe wawanakamampi, uywatanakamampi, levitanakampi, yaqha markat jutir jaqenakampi, wajchanakampi, viudanakampi ukhamaw uka fiestanjja kusisipjjäta. Paqallqo uruw aka fiestampejj Diosaru jachʼañchapjjäta, kawkha cheqtejj jupajj ajlliskani uka cheqana, ukatsti [Jehová] Diosamajj taqe cosechanakamaruw bendecipjjätam ukhamaraki taqe trabajonakamarusa ukatsti jumanakajj kusisitapuniw sarnaqapjjäta” sasa (Deu. 16:14, 15; Mateo 5:3 liytʼasiñapawa).
JACHʼA TANTACHÄWINAK WALI ASKIT UÑJAPJJAÑÄNI
15, 16. ¿Jachʼa tantachäwinakar sarañatakejj kunanaksa jumajj lurirïta? ¿Ukat kunatsa ukajj jan inamayäkänjja?
15 Diosar yupaychirinakajja, israelitanakan tantachäwinakapat wal yateqsna. Cheqas tantachäwinakasajj janiw uka tiemponjamäjjeti, ukampis Diosar yupaychañ toqet pachpakïskiwa. Biblia qellqaskäna uka tiemponjja, Diosan markapajj uka tantachäwinakar sarañatakejj wal chʼamachasipjjäna, jiwasajj ukhamarakiw wal chʼamachastanjja, ukasti janiw inamayäkiti. Uka tantachäwinakajja, Diosar yupaychañatakejj wali wakiskirikïskiwa. Ukanwa kunatï Jehová Diosampi sum apasiñatakejj wakiski ukanak yateqtanjja ukat amuytʼaraktanjja. Ukat kuntï yateqktan ukarjam sarnaqañataki ukat jan waltʼäwinakar jan puriñatakis yanaptʼistu. Ukhamarak kunanakatï llakisiyañat sipansa kusisiykistaspa uk lurañatakiw chʼamañchtʼarakistu (Sal. 122:1-4).
16 Khitinakatï tantachäwinakar sarapki ukanakajj kusisitapuniw jikjjatasipjje. 1946 maran apasir jachʼa tantachäwit yatiyäwejj akham sänwa: “Jehová Diosan Qhanañchirinakaparu waljanir suma qontʼata uñjañajj wali kusiskañänwa. Yamas tantachasirinakaru gradanak khathatiyañkam mä jachʼa orquestampi Jehová Diosar wali jachʼat qʼochtʼir istʼañajj wali sumapunïnwa” sasa. Ukat akham saskakiwa: “Departamento de Servicio Voluntario satäkis ukarojja, walja jilat kullakanakaw tantachäwin yanaptʼañatakejj sarapjjäna” sasa. Jumajj kimsa uru jachʼa tantachäwinakansa jan ukajj walja markanakat jachʼa tantachäwinakansa, ¿ukhamarakit jikjjatasirïta? (Sal. 110:3; Isa. 42:10-12.)
17. ¿Kunjamsa jachʼa tantachäwinakajj jichhürunakan apasjje?
17 Jachʼa tantachäwinakajj janiw kunjamtï nayrajj apaskäna ukhamäjjeti. Yaqhep jilat kullakanakajja, jachʼa tantachäwinakajj kimsaqallqo urunak apaskäna uk amtasipkakiwa. Tantachäwejj alwataki, jaypʼutaki ukat arumataki wakichatänwa. Ukat yatiyir sarañas utjarakïnwa. Yaqhep arstʼäwinakajj llätunka alwa horasaruw qalltirïna ukat niya jila partejja, tantachäwejj llätunka aruma horasaruw tukuyirïna. Yanaptʼiri jilat kullakanakajja, tantachasirinakan alwa, chika uru ukat aruma manqtʼasipjjañapatak phayañatakejj walpun irnaqtʼapjjerïna. Jichhürunakanjja janiw ukham walja urunakäjjeti ni walja horanakäjjesa, ukat sapa maynirakiw mirintap apasjjapjje. Ukhamatwa Jehová Diosan yatichäwinakap jukʼamp sum istʼjjapjje.
18, 19. Jachʼa tantachäwinakatjja, ¿kunas jumatakejj wali sumapunejja, ukat kunatsa?
18 Jachʼa tantachäwinakajj nayratpachaw wali suyatapunïnjja. Uka tantachäwinakanwa Diosar yupaychañ toqet “horasapar manqʼanaks” katoqtanjja. Ukhamatwa profecianakatsa ukat Biblian yatichäwinakapatsa sumpach yateqtanjja, ukanakjja janiw arstʼäwinak toqekejj amuyktanti, jan ukasti Bibliat apstʼat qellqatanak uka tantachäwinakan churapkistu ukanakanwa yateqaraktanjja (Mat. 24:45). Uka qellqatanakat jila partejja, jaqenakan Diosan arunakapat yateqapjjañapatak yanaptʼañatakiwa. Ukat dramanakajja wayn tawaqonakarusa ukat jilïrinakarusa kunjamsa sarnaqasipki ukat kunjamsa akapachan utjki uka jan walinakat jarkʼaqasipjjaspa uk amuytʼasipjjañapatakiw yanaptʼi. Bautisasirinakatak arstʼäwisti, kunanaksa jakäwisan nayrar uchasktan uk amuytʼasiñatakiw yanaptʼistu, ukat kunjamsa waljanejj Diosar jakäwip katuyasisajj bautisasipjje uk uñjasajj wal kusisiraktanjja.
19 Jachʼa tantachäwinakajj nayratpachaw Jehová Diosar sum yupaychañatak apasiwayi. Ukanwa Jehová Diosar kusisit yupaychirinakarojj jan wali tiemponakan jikjjataskasas Diosar taqe chuyma yupaychasipkakiñapatak wakichtʼasi. Ukhamarusa Diosar yupaychañ toqet wali sumpun chʼamachtʼistu, ukanarakwa suma amigonak jikjjatsna, ukat oraqpachakir jilat kullakanakar wali askirjam uñjañatakis yanaptʼarakistuwa. Uka tantachäwinak toqew Jehová Diosajj bendicistu ukat sum uñjarakistu. Ukhamasti, taqpach jachʼa tantachäwinakar sarañatakisa ukat qalltat tukuykam istʼañatakis kunanak lurañatï wakiski ukanak lurañatakejj taqeniw chʼamachasiñasa, ukhamat sum yateqañäni ukat askinaksa jikjjatarakiñäni (Pro. 10:22).
[Jiskt’anaka]
[30 janan fotopa]
Walja markanakat jachʼa tantachäwi, 1950, Nueva York markana
[32 janan fotopa]
Mozambique
[32 janan fotonakapa]
Corea del Sur
