¡Reinon markachiripjam sarnaqapjjañäni!

“Jumanakasti Jesucriston arunakaparjam sarnaqapjjam.” (FILI. 1:27.)

¿KUNJAMSA QHANAÑCHTʼASMA?

¿Khitinakas Reinon markachirinakapäpjjaspa?

¿Reinon arupata, saräwinakapata ukat leyinakapat yateqañajj kamsañsa muni?

¿Diosan kamachinakap munasipjjatap kunjamsa Reinon markachirinakapajj uñachtʼayapjje?

1, 2. ¿Pablon ewjjtʼanakapajj Filipos markankir jilat kullakanakatakejj kunatsa wali askïnjja?

 APÓSTOL Pablojj Filipos markankir cristianonakarojj akhamwa ewjjtʼäna: “Taqe jumanakasti Jesucriston arunakaparjam sarnaqapjjam” sasa (Filipenses 1:27 liytʼasiñapawa). Griego arun “Jesucriston arunakaparjam sarnaqapjjam” siski uka arunakajja, ‘suma markachirjam sarnaqapjjam’ sasaw jaqokipasirakispa. Uka arunakajja, Filipos markankir tamatakejj wali wakiskirïnwa. ¿Kunatsa? Uka markajj kawkïr markanakatï Roma imperiompi apnaqatäpkäna uka taypinkarakpachänwa, ukatwa Roma markankirinakjam uñtʼatäpjjäna. Filipos markasa ukat taqpach Roma imperionkirinakasa ukham uñtʼatäpjjatapatjja jachʼa jachʼaw tukupjjäna, kunattejj Roma markan leyinakaparjamajj jupanakakiw yaqhep derechonak katoqapjjäna.

² Ukampisa Filipos markankir jilat kullakanakajj jukʼampiw jachʼañchasipjjaspäna. Kunattejja, qollan ajayumpi ajllitanakjamajja, jakäwinakamajj ‘alajjpachankiwa’ sasaw apóstol Pablojj amtayäna (Fili. 3:20). Jupanakasti Diosan Reinopan markachirinakapäpjjänwa, janiw jaqen uttʼayat mä markan markachirinakapäpkänti. Ukatwa jan walinakat jarkʼaqatapjjäna ukat bendicionanaksa katoqapjjäna (Efe. 2:19-22).

3. 1) ¿Khitinakas Diosan Reinopan markachirinakapäpjjaspa? 2) ¿Kunsa aka yatichäwin yatjjataskañäni?

³ “Alajjpachankir jaqenak[jam]” jakapjjam sasin Pablojj ewjjtʼkäna ukajja, khitinakatï Cristomp chika alajjpachat apnaqanipkani ukanakatakiwa (Fili. 3:20). Ukampisa, khitinakatï Diosan Reinopampi aka Oraqen apnaqatäpkani ukanakampitakiwa. ¿Kunatsa? Kunattejj taqe cristianonakaw Jehová Dios Reyir yupaychapjje ukat kamachinakaparjam sarnaqapjjañaparaki (Efe. 4:4-6). Jichhürunakanjja,  waljaniw qamir markan markachiripäñatakejj wal chʼamachasipjje. Diosan Reinopan markachirïñatakejj jiwasajj jukʼampiw chʼamachasiñasa. Ukat ukar wali askirjama uñjañatakejja, mä markan markachirjam jakañatakejj kunas munasi ukat Diosan Reinopan markachiripäñatakejj kunsa wakisiraki uk yatjjatañäni. Ukatjja, Reinon markachiripäskakiñatakejj kunsa lurañasa ukwa kimsa toqet yatjjatarakiñäni.

MÄ MARKANKAÑATAKEJJ MAYITANAKAP PHOQHAÑASAWA

4. ¿Kunas “qʼoma arojja”, ukat kunjamsa uka aru parltanjja?

⁴ Aru yateqaña. Yaqhep markanakanjja, gobiernojj machaq markachirinakarojj kuna arutï uka markan jilpach parlaski uka aru yateqapjjañapwa mayi. Ukat yaqhepajj uka markan markachirëjjchisa, parlaski uka aru sumpach parlañatakejj walja maranakaw chʼamachasipjje. Inas kunjamtï qellqasiñapäki uk ratuk yateqapjjchi, ukampis janiw sum arsurjamäpkiti. Ukhamarakiw Diosan Reinopajj markachirinakaparojj mä machaq aru yateqapjjañap mayi, Biblianjja, “qʼoma aru” satawa (Sofonías 3:9 liytʼasiñapawa). * ¿Kawkirïpachas uka arojja? Kunatï Diosata ukat amtanakapat cheqäki uka yatichäwinakawa, ukasti Biblianwa jikjjatasi. Kunapachatï Diosan leyinakaparjama ukat kamachinakaparjam sarnaqtan ukhaw uka qʼoma aru parltanjja. Diosan Reinopan markachirinakajja, jankʼakiw Biblian qallta yatichäwinakap yateqapjjaspa ukat bautisasipjjaspa. Ukampis bautisasipki uka qhepatsa “qʼoma aru” jukʼamp sum parlañatakejj chʼamachasisipkakiñapawa. ¿Kunjamatsa? Sapa mayniw kuntï Bibliat yateqktan ukarjam sarnaqañataki chʼamachasiñasa.

5. ¿Kunatsa Diosan markapan saräwinakapat sum yatjjatañasajj wakisi?

⁵ Saräwinakapat yatjjataña. Khitinakatï mä markan markachiripäñ munapki ukanakajja, inas uka markan saräwinakapat yatjjatañapächispa. Ukhamarakiw Diosan Reinopan markachiripäñ munapki ukanakajj kunatï Diosan Reinopat wakiski ukanak yatjjatapjjañapa. Kunsa Coré chachan yoqanakapajj lurapjjäna uk amuytʼañäni, jupanakajj nayra Israelanwa Diosaru servipjjäna. Ukat munasiñampiw Jerusalén markarusa ukat kawkhantï Diosar yupaychaskäna ukarus uñjapjjäna, ukat uka markan saräwinakapat sum qhanañchapjjarakïna. Jupanakajj janiw kunjamsa Jerusalén markasa ukat kawkhantï Diosar yupaychaskäna ukan perqanakapas jachʼa qalanakampi lurtʼatäkäna ukanakaki wali askit uñjapkänti, jan ukasti kuna amtampi luratänsa ukwa wali askit uñjapjjäna. Kunattejja, Jerusalén markajj “jachʼa chʼaman [Jehová] reyin marka[pän]wa”, uka markanwa Jehová Diosarojj yupaychasïna. Ukanarakwa Diosan Leyinakapsa yatichasïna ukat uka markarurakiw Jehová Diosajj Reyjam apnaqäna  ukat khuyaptʼayasiñapsa uñachtʼayarakïna (Salmo 48:1, 2, 9, 12, 13 liytʼasiñapawa). ¿Jupanakjamarakiti jumajj Diosan markapan saräwinakapat sum yatjjatañsa ukat yaqhanakar qhanañchañsa wal munta? Jumatï uka toqet jukʼampi yatjjatäta ukat kunjamsa Jehová Diosajj markapar yanaptʼaski ukanakatsa yatjjatäta ukhajja, Diosan Reinopat janiw pächaskätati ukat taqe chuymarakiw Reinon suma yatiyäwinakap yatiyäta (Jer. 9:24; Luc. 4:43).

6. ¿Kunatsa Jehová Diosajj leyinakapa ukat kamachinakap yatjjatañassa ukat ukarjam sarnaqañassa mayistu?

⁶ Leyinakap uñtʼaña. Markan leyinakap sum uñtʼapjjañapa ukat ukarjam sarnaqapjjañapwa gobiernonakajj markachirinakapar mayipjje. Ukhamarakiw Jehová Diosan Reinopan markachirinakajj kamachinakapa ukat leyinakapa uñtʼapjjañapsa ukat ukarjam sarnaqapjjañapsa mayi (Isa. 2:3; Juan 15:10; 1 Juan 5:3). Awisajja, jaqenakan uttʼayat leyinakajj janiw askipunïkiti ukat awisajj janirakiw cheqaparükiti. Ukampisa, “Tatitun arsutanakapajj [jan ukajj leyinakapajj] cheqapawa” (Sal. 19:7). ¿Jumajj Diosan Arupanti kusisiñ jikjjatta ukat sapüruti liyirakta? (Sal. 1:1, 2.) Sapa mayni yatjjatasakiw Diosan leyinakap uñtʼsna. Janiw khitis jiwas lantejj uk lurkaspati.

REINON MARKACHIRINAKAPAJJ DIOSAN KAMACHINAKAPAR MUNASIPJJEWA

7. ¿Reinon markachirinakapajj kuna kamachinakarjamas sarnaqapjje?

⁷ Diosan Reinopan markachiripäskakiñatakejja, janiw Diosan kamachinakap uñtʼañasakïkiti, jan ukasti munasiñasawa. Waljaniw kawkïr markantï jakasipki uka markankir leyinakapar iyaw sapjje. Ukampisa, kunapachatï jupanakatakejj jan walïki ukat janirak khitis uñjkiti ukhajja, jankʼakiw leyinak pʼakintapjje. Uksti jaqenakamp sum uñjatäñatakikiw lurapjje (Col. 3:22). Ukampis Reinon markachirinakapajj janiw ukhamäktanti, jan khitin uñjkatas taqe chuymaw Diosan leyinakap phoqtanjja. ¿Kunatsa? Kunattejj uka leyinak Uttʼayiriruw wal munastanjja (Isa. 33:22, 23; Lucas 10:27 liytʼasiñapawa).

8, 9. ¿Diosan kamachinakapar cheqapun munasitam kunjamatsa amuyasisma?

⁸ ¿Diosan kamachinakapar cheqapun munasitam kunjamatsa amuyasisma? Kuntï sapa mayni amtañapäki uka toqet ewjjtʼapktam ukhajja, kunjamsa uka ewjjtʼanak katoqasta uk amuytʼasisa, inas isisiñata ukat kʼachachtʼasiñat ewjjtʼapjjeristam. Jehová Diosar janïr yupaychkayäta ukhajja, inas jan yäpar isiskchiyätati, jan ukajj maynir jan walinaka amuyayirjam isischiyäta. Ukampis jichhajja, Jehová Diosar munasisajj kunjamsa Jupan sutip jachʼañchasma ukarjamaw isisjjtajja (1 Tim. 2:9, 10; 1 Ped. 3:3, 4). Jichhajj sumsa isiskasma ukhamwa amuyasisma. Ukampisa mä irpir chuymanitï isisitamajj walja jilat kullakanakaruw jan waltʼaykiti sasin siristam ukhajja, ¿kamachasmasa? ¿Jumakit saytʼasjjasma? ¿Chuymti ustʼayasisma jan ukajj munañamarjamakich isisiskasma? Diosan Reinopankañ munapki ukanakajja, Cristot yateqasisinwa sarnaqapjjañapa, ukasti mä wakiskir leyiwa (1 Ped. 2:21). Uka toqet parlkasinjja, akham sasaw apóstol Pablojj qellqäna: “Sapa mayniw jiwasanakajj jaqe masisatak taqe kunansa sumäñasa, jupan iyawsañapajj jiltañapataki. Cristosa janiw jupa kikparojj kusisiyaskänti” sasa (Rom. 15:2, 3). Taman sumankaña utjañapatakejja, Jehová Diosaru taqe chuyma serviri mä cristianojj janiw munañaparjamak kuns lurkiti, jan ukasti kunanakatï mayninakan concienciap jan waltʼayirjamäspa ukanak janiw lurkiti (Rom. 14:19-21).

⁹ Jichhajja, chacha warmjam ikthapiñarusa ukat casado sarnaqañarus kunjamsa uñjasktan uka toqetwa parltʼarakiñäni. Khitinakatï Diosan Reinopan jan markachiripäpki ukanakajj inas chacha pura jan ukajj warmi pura sarnaqañasa ukat qʼañu luräwinak uñchʼukiñas walikïkaspas ukham amuyapjjchispa, ukat casadökasin yaqhampi sarnaqañasa ukat divorciasiñas sapa maynitäjjewa sasin sapjjarakchispa. Ukampisa  Reinon markachirinakapajj taqe uka jan walinakwa apanukuwayapjje. Janïr cristianökasajj qʼañu luräwinakansa yaqhepajj sarnaqapkchïnjja, jichhajj chacha warmi ikthapiñasa ukat chacha warmi sarnaqasiñas Diosan regalopätapwa amuyjjapjje. Diosan kamachinakapjja wali askitwa uñjapjje, ukat khitinakatï qʼañu luräwinakan sarnaqapki ukanakajj “janiw Diosan markapar mantkaniti” uk sumwa amuyapjjaraki (1 Cor. 6:9-11). Ukat jaqen chuymapajj engañerïtapsa sum yatipjjaraki (Jer. 17:9). Ukatwa kuntï Jehová Diosajj qʼoma sarnaqañ toqet qhana ewjjtʼanak apayanki ukanakat wal yuspärapjje.

REINON MARKACHIRINAKAPAJJ EWJJTʼANAK WALI ASKIT UÑJAPJJE

10, 11. ¿Kuna ewjjtʼanaksa Diosan Reinopajj churistu, ukat kunsa jumajj ukanakat amuyta?

¹⁰ Kuna manqʼanakasa ukat kuna qollanakasa markachirinakapatak jan walïkaspa jan ukajj usuntaykaspa ukanak amuyasajj jankʼakiw gobiernonakajj uka toqet ewjjtʼapjje. Cheqas janiw taqe ukanakajj jan walipunïkiti. Ukampisa ukanakat mayatï jan walïkchejja, inas gobiernojj markachirinakapar jan walinakat jarkʼaqañatak ukanakat amuyumpi ewjjtʼchispa. Janitï uk lurkaspajj juchanïspawa. Ukhamarakiw Diosan Reinopajj sum sarnaqañ toqeta ukat Diosar yupaychañ toqet kuna jan walinakatsa amuyasiñasa uk ewjjtʼistu. Sañäni: Amuyasiri Cheqapa Uywatajja, walja maranakaw kunjamsa Internetan pornografía uñchʼukiñajj Reinon markachirinakaparojj Diosamp sum apasiñat aynachtʼayaspa uk ewjjtʼaski. ¿Uka ewjjtʼanakat walpunjjay yuspärtanjja?

¹¹ Aka qhepa maranakanjja, yaqha programanakaw Internetan uñstawayaraki. ¿Kuna toqetsa parlasktanjja? Redes sociales satäkis ukanakatwa parlasktanjja, ukanak wali amuyumpi apnaqsna ukhajj askïspawa, ukampis janitï sum apnaqksnajj jan walinakaruw purtʼayistaspa, kunattejja jan wali jaqenakampi chikachasiñaruw aptʼistaspa (1 Cor. 15:33). Ukatwa Jehová Diosan markapajj uka toqenakat sum amuyasiñasatakejj ewjjtʼistu. ¿Amuyasiri Cheqapa Uywatajj redes sociales satäkis uka toqet Bibliat apstʼat qellqatanakan jichhak apsupki ukanak liytʼtati? Uka ewjjtʼanak jan liytʼasa Internetar mantsna ukhajja, wali chʼamani mä qollajj kunjamsa umasiñapa uka ewjjtʼanak jan liytʼas umantksna ukhamäspawa. *

12. ¿Ewjjtʼanak jan istʼañajj kunatsa janipun walïki?

¹² Khitinakatï Amuyasiri Cheqapa Uywatan ewjjtʼanakap jan istʼasa sarnaqapki ukanakajj jupanakpachaw jan waltʼayasipjje ukat khitinakatï jupanakar munasipki ukanakaruw jan waltʼayaraki. Yaqhepajja, pornografía qʼañu luräwinak uñchʼukiñaruw yatintawayapjje ukat yaqhepajj wachoqa qʼañu luräwinakan sarnaqapjje, ukat Jehová Diosajj janis uñjkaspa ukhamwa amuyasipjje. ¡Ukham amuyañajj janipuniw akchʼas walïkiti! (Pro. 15:3; Hebreos 4:13 liytʼasiñapawa.) Kunjamtï gobiernonakajj jan walinak lurir jaqerojj markapat jaqsupkaspajja, ukhamarakiw Jehová Diosajj khitinakatï kamachinakap jan istʼas sarnaqapki ukat janirak arrepentisipkiti ukanakarojj Reinopat jaqsuni (1 Cor. 5:11-13). * Ukampisa wali khuyaptʼayasiñapatwa Jehová Diosajj uka jaqenakar markap toqe yanaptʼañ muni (Gál. 6:1). Ukat khitinakatï arrepentisipki ukat jan wali luräwinakap apanukupki ukanakajja, wasitatwa Diosampejj sum apasipjjaspa  ukat Reinon markachiripäsipkakispawa (2 Cor. 2:5-8). ¡Ukham wali munasiri Reyir serviñajj sumapuniwa!

REINON MARKACHIRINAKAPAJJ WALI ASKITWA YATICHÄWINAK UÑJAPJJE

13. ¿Kunjamsa Reinon markachirinakapajj yatichäwinak wali askit uñjapjjatap uñachtʼayapjje?

¹³ Walja gobiernonakaw markachirinakapar yatichañatak chʼamachasipjje. Ukatwa, liyiña qellqaña yatichañatakejj escuelanak uttʼayapjje ukat jachʼa yateqañ utanaksa uttʼayapjjaraki. Cristianonakajj wali askitwa uka yatichäwinak uñjapjje ukat sumwa liyiñsa qellqañsa yateqapjje, ukat kunatï trabajañatak wakiski uks yateqapjjaraki. Ukampisa, Reinon markachirinakapjamajj kuna yatichäwinaktï Diosan markapat katoqapki uka yatichäwinakaruw jukʼampi askit uñjapjje. Jehová Diosajj tamap toqew leyiñasatak chʼamañchtʼistu. Ukat awk taykanakarojj jiskʼa wawanakapatak liyirapipjjañapatakiw ewjjtʼi. Amuyasiri Cheqapa Uywatajj sapa phajjsiw Bibliat apstʼat qellqatanak apayanistu. Jiwasatï sapüru maya jan ukajj pä jananak liytʼañänejja, kuna yatichäwinaktï Jehová Diosajj churkistu ukanakat askinak yateqaskakiñäniwa.

14. 1) ¿Kuna yatichäwinaksa katoqtanjja? 2) ¿Familiana Diosar Yupaychañataki Aruma apasiñapatak ewjjtʼanakatjja kawkïrinakarjamas lurta?

¹⁴ Sapa semanaw Reinon markachirinakaparojj tantachäwinakan yatichasi. Amuytʼañäni, Diosan Arunakap Yatiyañatak Escuelajja, 60 maranak jilaw Diosan Arupat suma yatichirïpjjañapatakejj waljanir yanaptʼaski. ¿Jumajj uka escuelar qellqayasjjtati? Aka qhepa maranakanjja, Amuyasiri Cheqapa Uywatajj sapa semana Familiana Diosar Yupaychañataki Aruma apañajj kunja wakiskiris ukwa amtayistu. Uka wakichäwejj familianakaruw mayachtʼi. ¿Familiana Diosar Yupaychañataki Aruma apasiñapatakejj qellqatanakan mistki uka ewjjtʼanakarjam lurasktati? *

15. ¿Jiwasatakejj kun lurañas wali kusiskañapunejja?

¹⁵ Gobiernonakampi apnaqatäpki uka markanakanjja, markachirinakajj qhana ukat taqenin uñjkataw mä partido politicor yanaptʼapjje ukat punkut punku kunaw votonak mayir sarapjje. Ukat sipansa, Reinon markachirinakapajj jukʼampiw Diosan gobiernopar taqe chuyma yanapapjje, callenakana ukat utat uta yatiyasa. Ukat kunjamtï nayrïr yatichäwin yatjjataniwayktanjja, Yatiyañataki revistajj oraqpachanwa churatäski, uka revistajj Jehová Diosan Apnaqäwipat yatiyañatakiwa. Diosan Reinopat jaqe masisar yatiyañajj wali kusiskañapuniw jiwasatakejja. ¿Ukham yatiyasiñapatakejj jumajj taqe chuym yanaptʼasktati? (Mat. 28:19, 20.)

16. ¿Kunjamsa Diosan Reinopan suma markachirïtas uñachtʼaysna?

¹⁶ Niyaw Diosan Reinopajj aka oraqpach apnaqjjani. Diosan leyinakapakiw jaqenakar taqe kunan yanaptʼani. Uka tiemponjja, ¿Diosan Reinopan suma markachiriñäniti? Suma markachirïtas jichhaw uñachtʼayañasa. Kun lurañtï sapür amtktan ukanakjja, Jehová Diosaru jachʼañchañatakipun lurapjjañäni, ukat Diosan Reinopan suma markachiripjam sarnaqaskatas uñachtʼayapjjarakiñäni (1 Cor. 10:31).

[Qhanañchäwinaka]

[Jiskt’anaka]

[14 janan qhanañchäwipa]

¿Internetar mantañat Bibliarjam ewjjtʼkistu ukanakar istʼasktati?

[12 janan fotopa]

¿Coré chachan yoqanakapjamarakiti jumajj cheqa yupaychäwiru ukat saräwinakapar munasta?

[15 janan fotopa]

Familiana Diosar Yupaychañataki Arumaw Reinon markachiripjam sum sarnaqapjjañamataki jumarus familiamarus yanaptʼapjjätam