Sarnaqäwi

Diosar servisaw mä aski yatichäwi ‘yateqapjjta’

Olivier Randriamora jilatan arsutaparjama

“Yatiraktwa kunjämäkitejj pobresan jakañäkis ukjja, ukhamarak [...] taqe phoqtʼat jakañsa. Yateqaraktwa kunjäm sarnaqañsa sistʼatäñansa jan ukajj awtjatäñansa [...] [Diosan] chʼamapampejj taqe kunaruw saykatirista.” (Fili. 4:12, 13.)

APÓSTOL Pablon uka arunakapajj walipunwa nayarusa ukat Oly sat warmijarus Madagascar islan sirvkasajj yanaptʼawayapjjetu, Jehová Diosar taqe chuyma confiyasaw Juparojj kusisit yupaychsna ukwa Pabljamajj yateqapjjta.

Kunapachatï Olyn mamapajj Jehová Diosan Qhanañchirinakapampi Bibliat yatjjatañ qalltäna ukhajja, Olympi nayampejj casarasiñatakejj parlatäjjapjjayätwa, 1982 marana. Uka maranwa nayajj Bibliat yatjjatañ qalltawayarakta, Olyjj qhepatwa yatjjataski. Ukat 1983 maranwa casarasipjjta, 1985 maranwa bautisasipjjta ukat precursor auxiliarjam serviñ qalltawayapjjta, ukat julio 1986 maranwa precursor regularäjjapjjayäta.

Septiembre 1987 maranjja, precursor especialjamaw Madagascar markan Inti jalsu alay toqenkir mä jiskʼa markar khitapjjetu, ukansti janiw mä tamas utjkänti. Madagascar markanjja, kunayman costumbrenakani ukat luräwinakani 18 grupo jaqenakaw utji ukat jiskʼa gruponakas jan ukajj ayllunakas utjarakiwa. Ukat walja arunakas parlaskchejja, malgache aruw jil parlasi. Uka markar puripjjta ukhajja, kuna arutï uka cheqan parlapki uka aru yateqapjjta, ukhamatwa jaqenakajj istʼapjjetäna.

Qalltanjja sapa domingow mä arstʼäwi arstʼirïta, ukat tukuyirïta ukhajj esposajakiw ampar tʼajjllirtʼaniri, kunattejj jupa sapakiw ukankiri. Diosan Arunakap Yatiyañatak Escuela sat tantachäwinjja, Oly sapakiw demostracionanak uñachtʼayiri maynimpis parlkaspa ukhama. Ukat tamanaka tumptʼiri jilataw kunjamsa tantachäwinaka lurapjjerista uk sawayapjjetu, ukajj wal yanaptʼawayapjjetu.

Uka markarojj cartanakasa ukat apayanakasa janiw jankʼaki purinirïkiti, ukatwa awisajj kuna qollqtï sapa phajjsi apayanipjjerïkitu uk jan katoqapjjerïkti. Ukhamäkchïnsa kunatï utjapkitäna ukampi utjasiñwa yateqapjjta. Mä kutejja, 130 kilometronakwa pä uru jachʼa tantachäwir sarapjjañajäna, ukampis autot sarañatakejj janiw qollqejj utjapkitänti. Ukat mä jilatan aka ewjjtʼap amtasipjjta: “Jan walin jikjjatasïta ukhajja, Jehová Diosar yatiyam. Kunattejj Jupan luräwipwa phoqhasktajja”. Diosaruw oracionan maytʼasipjjta, ukat kayuki sarañwa amtapjjta. Utat niya mistuñampïsipkayäta ukhaw mä jilatajj visittʼapjjetu ukat mä qhawqha qollqe wajjtʼawayapjjetu, ukasti qhawqhatï autot sarañatak wakiskäna ukhapunïnwa.

 TAMANAK TUMPTʼIRJAMAW SERVIPJJTA

Febrero 1991 maranjja, tamanak tumptʼirit uttʼayapjjetu. Uka tiemponjja, jiskʼa grupon llätunka yatiyirikiw utjäna, ukat jupanakat kimsaniw bautisatäpjjäna, ukampis phesqa tunkaniw tantachasipjjerïta. Ukat tamanak tumptʼirïñatak wakichäwi katoqjjasajja, Antananarivo sat markaruw khitapjjetu. Ukat 1993 maranjja, Inti jalsu toqeruw khitapjjarakitu. Uka cheqan jakañajj janiw jachʼa markanjamäkänti.

Tamanakaru ukat gruponakar tumptʼirejja, kayukiw 145 kilometronak chʼumintat qollunak sarapjjerïta. Ukarojj kunatï wakiski ukakwa apasipjjerïta, ukat awisajja, taqenitak arstʼäwin videor uñtataw uka tiempon uñachtʼayasïna, ukatakejja esposajaw mä proyectador qʼepiri, ukat nayajj 12 voltioni auto batería qʼepirïta, ukatwa awisajj qʼepinakajajj jukʼamp jathïjjeri.

Mä tamat yaqha tamar sarañatakejj niya 40 kilometronakwa sapürojj qollnama sarapjjerïta, jawiranaka ukat joqhonakwa pasapjjerïta. Awisajja, thakhi thiyanwa jan ukajj qawayanwa ikipjjerïta, ukat jila partejj uka jakʼanakankir markaruw qorpachasiñatak sarapjjerïta. Awisasti, jan uñtʼat jaqenakaruw utapan qorpachasiñatak achiktʼasipjjerïta. Ukat qorpachasiñ jikjjatasajja, manqʼa phaytʼasipjjerïta. Esposajaw phukhu maytʼasiri ukat uka jakʼankiri jawiraru jan ukajj qotar um waytir sariri, nayasti kʼullunak kʼutjañatakiw mä hacha maytʼasirakirïta. Uk lurañatakejj tiempow munasïna. Awisakiw phayasiñatakejj wallpa alasipjjerïta ukat nänakaw jiwayasin lluchʼsupjjañajäna.

Manqʼasiñ tukuyasajja, jareqasiñatakiw um waytir sarapjjerïta ukat iktʼjjapjjerïta, niya jila partejj cocinanwa ikipjjerïta. Ukat jalluntirïki ukhajja, umampi jan chʼaqjayasiñatakejj perqa kʼuchunwa ikipjjerïta.

Qorpachasipkta uka utanirojj Bibliat yatiyañatak chʼamachasipjjapunirïtwa. Ukat kawkharutï puripjjañajäna ukar purisajja, jilat kullakanakajj wal munasiñampi ukat khuyaptʼayasiñampiw katoqtʼapjjerïtu. Ukham wali suma katoqtʼatäsajj kuna jan walinaktï thakin pasaniwayapkta uk armasjjapjjerïtwa.

Jilat kullakan utapan qorpachasipjjerïta ukhajja, kuna lurañanakatï utan utjkäna uk lurañ yanaptʼapjjerïta. Ukhamatwa jupanakajj nänakampi yatiyapjjañapatakejj tiemponïpjjeri. Janipuniw kunatï jilat kullakanakan jan utjkäna ukanaksa ni suma manqʼañanak churapjjañapsa suyapjjerïkti.

JAYA CHEQANKIR GRUPONAK VISITAPJJTA

Jaya cheqankir gruponakar visittʼañajj wali kusiskañapunïnwa. Jilat kullakanakajj kusisitaw walja lurañanakampi suyapjjerïtu, janiw samarañatakis tiempojj utjirïkiti (Mar. 6:31). Mä cheqanjja, mä chacha warmi jilat kullakajj Bibliat yateqerinakaparojj pusi tunkaniruw utapar jawsthapipjjatayna, ukhamat nänakamp yatjjatapjjañapataki. Olyjj pä tunkaniruw kullakampi yatichapjjeri ukat nayajj pä tunkaniruw jilatamp yatichapjjerïta. Maynimp tukuyasajj yaqhampiw qalltapjjerïta. Jaypʼurojj tantachäwi lurañatakikiw samartʼapjjerïta, tukuyatatjja arumkamaw yatichasipkakirïta.

Yaqha grupor visitkasajja, taqe yatiyirinakaw uka jakʼankir mä jiskʼa markar yatiyir sarapjjta. Ukarusti, niya kimsaqallqo alwa horasaruw mistuwayapjjta. Thantha isinakampi isthapitaw sarapjjta,  kunattejj chʼumi taypwa sarapjjañajäna, ukat kawkharutï sarapkayäta ukkharojj niya chiküruw puripjjta ukat qʼoma isimpi isthaptʼasisajj jankʼakirakiw utat utat yatiyañ qalltapjjta. Ukat niyakejjay waljanïpjjchiyätjja, media horanwa uka markan yatiyañ tukuyapjjta. Ukat yaqha jiskʼa markaruw sarapjjta, ukat uka cheqan yatiyañ tukuyjjasinjja, kuttʼaniwayjjapjjtwa. Ukham jayanak sarañajja, qalltan chʼam laqʼjtayapjjetäna, kunattejj mä hora yatiyañatakejj walja tiempo ukat chʼamaw munasïna. Ukampisa jilat kullakanakajj kusisitakïpjjänwa, janirakiw quejasipkänti.

Taviranambo sat cheqanjja, niya qollu punta jakʼanwa mä grupojj utjäna. Ukar puripjjta ukhajja, mä cuartoni utwa jikjjatapjjta. Ukanjja Jehová Diosar serviri mä familiaw jakasïna. Uka ladonsti, yaqha jiskʼa utaw utjäna, ukanwa tantachasipjjerïtayna. Ukat mä akatjamatwa, utani jilatajj akham sasin artʼäna: “¡Jilatanaka!”. Ukat uka jakʼankir mayni qollu puntatjja, akham siri istʼasïna: “¡Jay!”. Ukat utani jilatajj akham sarakïnwa: “¡Tamanak tumptʼiri jilataw purini!”. Ukat akham siri istʼasirakïna: “¡Iyaw!”. Amuyatatjja, uka pachpwa jukʼampi jayan jakasirinakarojj yatiyaspachäna. Ukat jankʼakirakiw jaqenakajj purinipjjäna. Tantachäwi qalltañatakejja, 100 jilaw ukankapjjäna.

VIAJAÑAJJ WALI CHʼAMAPUNÏNWA

1996 maranjja, Antananarivo sat markaruw khitapjjetu, uka markasti isla chikachikankir thaya markawa, ukankkasajj janiw taqe kunas sumapunïkänti. Mä kutejja, Beankàna (Besakay) markaruw mä grupor visitir sarapjjañajäna, ukasti Antananarivo markat 240 kilometronak sarañankänwa, ukar sarañatakejj janiw autojj utjkänti. Ukat mä jiskʼa auton uksar saraskatap yatipjjta, ukat auto apnaqerimpi parltʼasajja, aptawayapjjetuwa. Pasajeronakajj niya kimsa tunkanïpjjayätwa, yaqhepajj techor winktʼataw sarapjjäna, yaqhepasti auto qhepäjjat kattʼasisaraki.

Kunjamtï autonakajj chika thakin jan waltʼapjjerïkejja, ukhamarakiw uka autojj jan waltʼjjänti ukat mä jachʼa auto pasañapkamaw kayuk walja horanak sarapjjta. Uka autojj walja qʼepinakampi ukat wali phoqhas sarkchïnjja saytʼänwa. Ukat saytʼatas sarapjjañajäkchïnjja, makatawayapjjtwa. Ukatsti mä jawiraruw puripjjta, ukampis puentew askichasiskäna, ukatwa kayukejj wasitat sarapjjañajäna. Ukat mä jiskʼa markaruw puripjjta, ukanjja mä qhawqha precursor especialanakaw jakapjjäna. Ukat janis uka markar visitir sarapkchiyätjja, puente askichasiñapkamaw jupanakamp ukan qheparapjjta.

 Mä semanatwa autojj uka cheqnam pasäna ukhaw sarapjjañajäkäna uka cheqar sarapjjta. Thakejj pʼiya pʼiyapunïnwa, ukat awisajj auto nuktʼañatakejj qonqorkamaw umar mantapjjerïta. ¡Walja kutiw lanktasis tinkupjjta! Qhantatiw mä jiskʼa markar puripjjta. Ukat kayukiw arroz yapu chiknama sarapjjta ukat juri umajj cinturkamaw puripjjetäna.

Niyakejjay uka cheq jan uñtʼapkchiyätjja, mä qhawqha yapuchirinakaruw Bibliat yatiyapjjta ukat kunjamsa Jehová Diosan Qhanañchiripan utapar puripjjerista sasaw jisktʼapjjerïta. Ukat jupanakajj jilat kullakanakätap yatisajj wal kusisipjjerïta.

DIOSAR JUKʼAMPI SERVIPJJAÑAPATAKIW YANAPTʼAWAYAPJJTA

Taqe aka maranakanjja, Diosar jukʼampi servipjjañapatakiw jilat kullakanakar chʼamañchtʼawayapjjta, ukat ukarjam lurapjjatap uñjasajj wal kusisipjjta. Mä tamanjja, llätunka precursoranakaruw akham sapjjta: sapa maynejj mä jilataru jan ukajj kullakaruw precursorjam serviñapatak yanaptʼapjjäta sasa, ukat sojjta phajjsit kuttʼapjjta ukhajja, 22 precursoranakaw utj-jjäna. Pä precursora kullakajja, awkinakaparuw precursoräñapataki chʼamañchtʼapjjatayna, uka jilatanakajj irpir chuymanïpjjänwa. Ukat mayni irpir chuymaniruw ukham serviñapatak chʼamañchtʼapjjarakitayna. Ukat mä qhawqha tiempotjja, uka jilatajj precursor especialäjjänwa, qhepatsti esposapampi chikajj tamanak tumptʼirïjjänwa. Ukat mayni irpir chuymaninakatsti, maynïrejj tamanak tumptʼiriwa, maynisti Tantachasiñ Utanak lurañanwa yanaptʼaski.

Sapürupuniw Jehová Diosarojj yanaptʼatapat yuspärapjjta, kunattejj jan yanapapampejj janipuniw kuns jikjjatksnati. Awisajj wali qarita ukat usutas jikjjatasipkstjja, kunsa Diosar servisajj jikjjatawayapjjta ukanak amtasisajj wal kusisipjjta. Cheqas Jehová Diosaw markapar jiltayaski, ukat precursor especialjam ukar mä jukʼa yanaptʼasajj wali kusisitaw jikjjatasipjjta. Jïsa, chʼam churiri Jehová Diosaru taqe chuyma confiyasakiw kusisita jikjjatassna, ukwa yateqawayapjjta.

[6 janan qhanañchäwipa]

Jehová Diosaru taqe chuyma confiyasakiw kusisita jikjjatassna, ukwa yateqawayapjjta

[4 janankir mapa/foto]

Wila laqʼa utjatapatwa Madagascar markajj Gran Isla Roja sutimpi uñtʼatarakejja, ukat oraqpachan utjki uka jachʼa islanakatjja, Madagascar Islaw pusïrejja ukat yaqhep animalanakasa ukat alinakas janiw yaqha cheqan utjkiti

[5 janan fotopa]

Viajañajj wali chʼamapunïnwa

[5 janan fotopa]

Nänakatakejja, Bibliat yatichañajj wali kusiskañapuniwa