Aka revista liytʼirinakan jisktʼäwinakapa
Aka revista liytʼirinakan jisktʼäwinakapa
¿Bibliankir profeciarjamajj kunapachas angloamericanajj taqe markanakjjar chʼamani paqallqöri markar tuküna?
▪ Nabucodonosor reyejj metalanakat lurat mä jachʼa jaqe samkapan uñjkäna ukajja, janiw taqe markanakjjar chʼamani taqpach markanakampi sañ munkiti (Dan. 2:31-45). Jan ukasti, Danielan urunakapat aksar apnaqawayapki uka chʼamani phesqa markanakampi sasiwa, jupanakaw Diosan markaparojj arknaqawayapjje.
Danielan qhanañchäwiparjamajja, taqe markanakjjar chʼamani angloamericanajj janiw Roma Imperior tukjkiti, jan ukasti Romatwa mistu. Hierrojj kayunakapat lukʼananakapkamaw puri sasaw Danielajj qhanañchi. (Kayunakapasa ukat lukʼananakapasa, hierrompi ñeqʼempi kittatawa.) * Ukhamajja, taqe markanakjjar chʼamani angloamericanajj jachʼa jaqen hierrot lurat kayunakapatwa mistuñapäna. Ukajj ukhamapuniw phoqhasïna. Gran Bretaña markajj Roma Imperionkir markänwa, ukat 1700 maranak qhepatwa wali chʼamani tuküna. Ukatsti, Estados Unidos markajj wali chʼamaniw tukurakïna. Ukampisa, Biblian utjki uka profeciarjamajj janïraw taqe markanakjjar chʼamani paqallqöri markar tukkänti. ¿Kunatsa? Kunattejj uka pä markanakan mayachtʼasitapajj janïraw amuyaskänti. Ukampis Nayrïr Jachʼa Chʼajjwäwinwa mayachtʼasipjjatapajj qhanäjjäna.
Uka tiemponjja, ‘Diosan ajllit wawanakapajj’ jan inaktʼasaw Diosatak wal lurasipkäna, jukʼampis Estados Unidos, Brooklyn (Nueva York) markana (Mat. 13:36-43). Ukat Gran Bretaña Imperion apnaqata markanakansa, alajjpachar sarañatak ajllitanakajj taqe chuymaw yatiyasipkäna. Nayrïr Jachʼa Chʼajjwäwinjja, Gran Bretaña markampi Estados Unidos markampejj político enemigonakapampi nuwasiñatakiw mayachtʼasipjjäna. Ukatsti, uka chʼajjwäwi utjipanwa uka pä markajj markapat saytʼasipjjäna, ukat Diosan ‘warmipampi’ saski ukan wawaparus uñisipjjatap uñachtʼayapjjäna, kunattejj Bibliat apstʼat qellqatanakap jan apsupjjañapatakis jarkʼapjjänwa ukat khitinakatï yatiyasiñapatak pʼeqtʼapki ukanakarus carcelaruw jistʼantapjjäna (Apo. 12:17).
Ukhamasti Biblian profeciaparjamajja, 1700 maranakan Gran Bretaña markajj chʼamanir tukkäna ukhajja, janïraw paqallqöri taqe markanakjjar chʼamani markäkänti, jan ukasti Tatitun urup qalltkäna ukhaw taqe markanakjjar chʼamani markar tuküna. *
[Qhanañchäwinaka]
^ Hierrompi kittaski uka ñeqʼejja, khitinakatï taqe markanakjjar chʼamani angloamericanampi apnaqatäpki uka jaqenakampi sasiwa. Tiempompejja, ñeqʼempi saski ukanakaw angloamericanan chʼamap thayjtayawayapjje, ukatwa uka markajj jan sinti chʼamanïjjeti.
^ Las profecías de Daniel libron 57 jana 24 tʼaqana, 56 ukat 139 jananakan qhanañchaskäna ukwa machaqat qhanañchasjje.
[19 janan fotopa]
Watchtower ukan irnaqtʼir kimsaqallqo jilatanakaruw junio 1918 maran carcelar jistʼantapjjäna
