Jehová Diosaw qhespiyañatak imaskistu
Jehová Diosaw qhespiyañatak imaskistu
“Iyawsapjjatam laykojja, [Diosajj] jachʼa chʼamapampiw taqe kunatsa imasipkaraktam, kuna qhespiyasiñatejj jumanakataki wakichatäki uka katoqapjjañamkama. Uka qhespiyasiñsti qhepa urunakaw [...] katoqasjjapjjäta.” (1 PED. 1:5.)
¿QHANAÑCHTʼASMATI?
¿Kunjamsa Jehová Diosajj markapar apanistu?
¿Kunjamsa Jehová Diosampi irpayastanjja?
¿Kunjamsa Jehová Diosajj chuymachtʼistu ukat chʼamañchtʼistu?
1, 2. 1) ¿Jehová Diosaw taqe chuyma tukuykama Jupar yupaychaskakiñasatakejj yanaptʼistani sasinjja kunatsa confiysna? 2) ¿Diosajj qhawqsa uñtʼistu?
“KHITITEJJ tukuykama saytʼkani [jan ukajj aguantkani] ukawa qhespiyatäni.” (Mat. 24:13.) ¿Uka arunakampejj kamsañsa Jesusajj munäna? Supayan apnaqat akapachan tʼunjäwipat qhespiñatakejja, taqe chuymaw Jehová Diosar tukuykam yupaychañasa sañwa munäna. Ukampis Jehová Diosajj janiw chʼamasaru ukat yatiñasaru atinisisin aguantañassa suykaspa ukham sañ munkiti. Biblianjja akham siwa: “Diosajj cheqapawa, janiw jupajj chʼamanakamat jukʼampi yantʼäwiru antutapkätamti; ukatsipana yantʼäwimp chikajja, mistuñjja churarakiniwa, qʼewtasipjjañamataki” sasa (1 Cor. 10:13, MT). ¿Uka arunakajj kamsañsa muni?
2 Kunjam chuyman jaqëtansa, kuna jan waltʼäwinsa jikjjatastan ukat qhawqsa aguantirjamätan taqe ukanakwa Jehová Diosajj sum yati, ukatwa chʼamasat jukʼampi yantʼanakarojj sapaki jan antutkistuti. ¿Cheqapuniti Diosajj sum uñtʼpachïstu? Jïsa. Sapa mayniruw sum uñtʼistu sasaw Bibliajj qhanañchi. Ukat kunanaksa sapür lurtan, kunas chuymasansa amuyusansa utji ukanaksa yatirakiwa (Salmo 139:1-6 liytʼasiñapawa).
3, 4. 1) ¿Jehová Diosajj kunjamtï Davitar uñjkäna ukajj kunjamsa jiwasat llakisitap uñachtʼayistu? 2) ¿Kunsa Diosajj jichhürunakan luraski?
3 ¿Jan yäqkaya jaqenakat Jehová Diosan llakisitapajj janejjay cheqaw sañjamäkitejja? Davitajj ukhamwa jisktʼasirakïna, ukatwa Diosar akham säna: “Kunapachatejj juman lurat alajjpach uñatatkta, juman uchat phajjsimpiru, warawaranakampir uñtkta ukapachajj sistwa: ‘¿Kunarak jaqesti, jupat amtasiñamatakisti?’” sasa (Sal. 8:3, 4). Ukham jisktʼasisajj inas Davitajj jupa pachpat amtaschïna. Jesé chachan sullka yoqapäkchïnsa, Jehová Diosan “chuymapar purtʼkiri” waynitünwa, ukatwa Diosajj uwij ‘tama qhepäjja sarañatsa apaqarakïna ukhamat Israel markapan jilïripäñapataki’ (1 Sam. 13:14; 2 Sam. 7:8). ¡Taqe kun Luriri Jehová Diosajj ukham mä awatiri waynitun lupʼïwinakap uñjatap yatisajj kunjamak Davitajj jikjjataskäna!
4 Jehová Diosajj qhawqsa jiwasat llakisi uk yatisajj Davitjamarakiw wal musphartanjja. Jichhürunakanjja Diosajj cheqa religión toqew ‘taqe markanakan suma munkañanakapjja’ markapar apani, ukat taqe chuyma yupaychasipkakiñapatakis yanaptʼaraki (Ageo 2:7, NM). Jupat jan jitheqtas taqe chuyma yupaychaskakiñatakejj kunjamsa yanaptʼistu uk sum amuytʼañatakejja, Diosajj kunjamsa jaqenakarojj tamapar apani uk nayraqat uñjañäni.
DIOSAW YOQAPAR ARKAÑASATAK APANISTU
5. ¿Jehová Diosajj kunjamsa suma chuyman jaqenakarojj tamapar irpani? Mä uñachtʼäwimpi qhanañchtʼma.
5 “Janiw khitis nayaru jutkaspati, janitejj khitankitu uka Awkejj apankaspa ukajja” sasaw Jesusajj säna (Juan 6:44). Uka arunakarjamajja, Jehová Diosan yanaptʼapampikiw Criston arkirip tukuwaytanjja. ¿Kunjamsa Diosajj suma chuyman jaqenakarojj tamapar irpani? Suma yatiyäwinak yatiyasitap toqe ukat qollan ajayupampi. Amuytʼañäni, kunapachatï apóstol Pablojj compañeronakapampi Filipos markan yatiyasipkäna ukhajja, Lidia sutini mä warmiruw suma yatiyäwinak yatiyapjjäna. Ukjjarojj kunas pasäna ukjja Bibliaw akham qhanañchi: “[Jehová] Tatitusti juparojj chuymap chʼalljjtayäna, kuntejj Pablojj siskäna ukar jaysañapataki” sasa. Kunjamtï amuyktanjja, Pablojj kuntï sañ munkäna uk amuyañapatakejj Jehová Diosaw qollan ajayupampi Lidiar yanaptʼäna (Hech. 16:13-15).
6. ¿Diosajj kunjamsa tamapar irpanistu?
6 ¿Diosajj Lidia saparukit ukham yanaptʼpachäna? Janiwa. Jiwasatï Diosar katuyat cristianöstanjja, Diosaw Lidiarjam tamapar irpasinistu. Lidiajj suma chuymani warmïtapjja Diosajj sum yatïna, ukhamarakiw jiwasan chuymasjja uñjarakpachäna. Diosan arunakap istʼañ qalltawaytan ukhajja, Jehová Diosaw qollan ajayupampi sum amuytʼañ yanaptʼawayistu (1 Cor. 2:11, 12). Ukat kunapachatï yateqatarjam sarnaqañatakisa ukat munañap lurañatakis chʼamachasiwayktan ukhajj Diosan bendicionapwa katoqawaytanjja. Ukat jakäwis Diosar katuyasiwayktan ukhajja, Jupajj wal kusisirakpachäna. Cheqas wiñay jakañar irpiri thakipan sarañ qalltawayktan ukhat jichhakamaw sapa mayni jiwasampïski, ukat sapürurakiw yanaptʼaskistu.
7. ¿Taqe chuyma yupaychaskakiñasatakejj Diosaw yanaptʼistani sasin kunatsa sistanjja?
7 Jehová Diosajj Jupampi sartañatakiw yanaptʼawayistu ukat janipuniw sapaki jaytkistuti. Kunattejj Diosan yanaptʼapampiw markapar mantaniwaytanjja ukat Jupan yanaptʼapampikirakiw tamapankaskaksna. Alajjpachar sarañataki ajllitanakar parlkasajja, apóstol Pedrojj akham sänwa: “Jumanakarusti Diosajj Jupar iyawsapjjatam laykojja, jachʼa chʼamapampiw taqe kunatsa imasipkaraktam, kuna qhespiyasiñatejj jumanakataki wakichatäki uka katoqapjjañamkama. Uka qhespiyasiñsti qhepa urunakaw [...] katoqasjjapjjäta” sasa (1 Ped. 1:5). Uka arunakajj ajllitanakatakïchïnsa, jiwasamppachatakiwa, ukatwa sapa maynejj uka arunakar istʼañasa. ¿Kunatsa? Kunattejj Diosar taqe chuyma jan jitheqtas serviskakiñatakejj taqeniw Diosampi yanaptʼatäñ muntanjja.
JUCHAR JAN PURTʼASIÑASATAKIW DIOSAJJ YANAPTʼISTASPA
8. ¿Kunatsa jan wali thakhir jan saranukuñatakejj chʼamachasiñasa?
8 Jakäwinjja jan waltʼäwinakajj utjakipuniwa ukat pantjasirirakïtanwa ukanakaw Diosar taqe chuyma serviñat jitheqtayistaspa. Ukhamäspa ukhajja, jan amuyasisaw jan wali thakhir saranuksna (Gálatas 6:1 liytʼasiñapawa). Ukwa Davitan sarnaqäwipat amuysna.
9, 10. ¿Kunjamsa Jehová Diosajj Davitan jan juchar purtʼasiñapatak yanaptʼäna, ukat kunjamsa jichhürunakan yanaptʼarakistu?
9 Kunapachatï Saúl reyejj Davitar jiwayañatak arknaqkäna ukhajja, Davitajj janiw chuymapampi apayasisajj vengaskänti (1 Sam. 24:2-7). Ukampis mä qhawqha tiempotjja, Davitajj chuymapampiw apayasïna. Kunapachatï jupatakisa ukat jupamp chika sarapkäna ukanakatakis manqʼajj pistʼjjäna ukhajja, Nabal sat mä israelitaruw wali respetompi yanapa mayïna. Ukampis Nabalajj jan wali arunakampiw jiskʼachäna, ukatwa Davitajj wal colerasisin taqe utapankirinakar jiwarayir sarañ amtäna. Ukham luraspänjja, jan juchani jaqenakar jiwarayatapatwa Jehová Diosajj juchañchaspäna, ukjja Davitajj janiw amuyaskänti. Abigail sat Nabal chachan warmipaw uka juchar jan purtʼasiñapatak jarktʼäna. Ukatwa Davitajj Diosapuniw jupar khitanpacha sasin amuyäna, ukat Abigailar akham sarakïnwa: “Israelan [Jehová] Diosapasti qollanäpan. Jupaw jumaru nayampi jikisiñataki khitantam. Ukhamaraki jumas qollanarakïman suma amuytʼani warmïtamata. Cheqpachansa jumaw nayarojj jaqe jiwayañata qhespiyarakista, ukhamaraki pachpa amparajjampi cheqa kankaña lurasiñajjätsa” sasa (1 Sam. 25:9-13, 21, 22, 32, 33).
10 ¿Kunsa uka sarnaqäwit yateqsna? Davitan jan juchar purtʼasiñapatakejj Jehová Diosaw Abigailar khitäna. Jichhürunakanjja ukhamarakiw Diosajj maynimpi yanaptʼayistu. Ukampisa, juchar purtʼasirjamäkañäni ukhajj janiw Jehová Diosaw ukar jan purtʼasiñajatakejj yanaptʼaskitani sasin sapa kuti suyañasäkiti. Ukat kuna jan waltʼäwinsa uñjaskañäni ukhasa, kunsa Diosajj lurani uk janiw yatktanti, janirakiw amtanakap phoqañatakejj kunanaktï lurkani jan ukajj jan lurkani ukanaksa yatktanti (Ecl. 11:5). Ukampisa ak amtasipuniñäni, Jehová Diosajj kunjamansa jikjjatastan ukjja sum yati ukat Juparu taqe chuyma serviskakiñatakis yanaptʼarakistaniwa. Dios pachpaw akham sistu: “Nayranakajjajj jumaruw uñchʼukisktam, nayaw yatichaskäma, nayaw amuytʼayaskäma, nayaw sarañamäki uka thak uñachayaskäma” sasa (Sal. 32:8). ¿Kunjamsa Jehová Diosajj amuytʼayistu? ¿Kunjamsa uka yanaptʼapat askinak apsna? ¿Jehová Diosaw markapar irpaski sasin kunatsa atinissna? Apocalipsis librojj kunjamsa uka jisktʼanakar qhanañchi uk jichhajj uñjañäni.
EWJJTʼANAKAPAMPIW JAN WALINAKAT JARKʼAQESTU
11. ¿Kunanakas tamapan pasaski ukjja qhawqsa Jehová Diosajj yati?
11 Apocalipsis 2 ukat 3 jaljanakan jikjjataski uka visionanjja, Asia Menor toqenkiri paqallqo tamanakanjja kunas pasaski ukwa Jesusajj uñakipi. Uka visionarjamajja, Jesucristojj janiw uka tamanakarojj jayatak uñtkiti, jan ukasti kunapunis sapa taman pasaski uk sum uñji. Awisajja, sutit kunwa jaqenakar ayti, ukat kunas pasaski ukarjamaw chuymachtʼi ukat ewjjtʼaraki. ¿Uka visionajj kamsañsa muni? Paqallqo tamanakajja, 1914 marat aksar alajjpachar sarañatak ajllitäpki ukanakampi sasiwa. Ukat kuna ewjjtʼanaktï katoqapkäna ukajja Oraqpachan utjki uka tamanakamppachatakiwa. Ukhamajja, jichhürus Jehová Diosaw Yoqap toqejj markapar irpaski. ¿Kunjamatsa Diosamp irpayassna?
12. ¿Kunjamsa Jehová Diosampejj irpayastanjja?
12 Bibliat sapaki yatjjatasaw Jehová Diosamp irpayassna. Amuyasiri Cheqapa Uywatajj Bibliat apstʼat walja qellqatanakwa apayanistu, uka toqew Diosajj ewjjtʼarakistu (Mat. 24:45, MT). Ukanakat askinak apsuñatakejja, liyiñataki tiempo apstʼasiñasawa ukat ukarjam sarnaqañasarakiwa. Bibliata sapaki yatjjatktan uka toqew Jehová Diosajj sum uñjaskistu, ukhamat “jan tinkupjjaña[sa]taki” (Jud. 24). ¿Bibliat apstʼat qellqatanak liytʼasajj nayatakjam qellqanitapuniwa sasin sirïtati? Ukhamächi ukhajja, Jehová Dios pachpas ewjjtʼkiristam ukhamwa katoqasiñama. Awisajja mä amigojj jan wal luraskatam amuyasiñamatakejj munasiñampiw amuytʼaytamjja. Ukhamarakiw Jehová Diosajj qollan ajayupampejj kuna jan walis chuymasan utji ukat kuna jan walsa lurasktan ukanak amuyasiñasatak yanaptʼistu. Suma chuymanïstanjja, Jehová Diosan qollan ajayupampiw irpayasiñäni (Salmo 139:23, 24 liytʼasiñapawa). Jumajja, ¿Bibliat yatjjatañatakejj qhawqha tiempsa apsusiskta ukat kunjamsa chʼamachasiskta?
13. ¿Bibliat kunjamsa yatjjatasktan ukjja kunatsa amuyasiñasa?
13 Jiwasatï kusistʼañanakaruki tiempo aptʼasiñänejja, Bibliat yatjjatañatakejj janiw tiempojj utj-jjestaniti. Mä jilatajj akham siwa: “Bibliat sapaki yatjjatañ jaytañajj facilakiwa, kunattejj jichhürunakanjja tiempo apaqanakajj kunaymani ukat taqe cheqanwa utji, televisionansa, computadoransa ukat telefononsa utjakiwa, ukanakampiw tiempo aptʼasna” sasa. Jiwasatï ukanakat jan amuyasksnajja, sapürutjamaw Bibliat yatjjatañatakejj jan tiemponïjjañäniti, ukat inas ni mä jukʼsa tiempo apsusjjsnati (Efe. 5:15-17). Ukatwa sapa maynejj akham jisktʼasiñasa: “¿Bibliat jukʼampi yatjjatañatakejj tiempo apsusipuntti? ¿Jan ukajj taman arstʼañ waktʼkitu ukhakich yatjjatjja?” sasa. Jiwasatï ukham lurstanjja, Bibliat jukʼamp yatjjatañatakisa ukat Diosan yatiñap qorirjam thaqhañatakisa, sapaki jan ukajj familiana Bibliat yatjjatañataki arumanwa jukʼamp chʼamachasiñasa, ukhamatwa Diosajj qhespiyañatak imistani (Pro. 2:1-5).
JEHOVÁ DIOSAJJ CHUYMACHTʼASAW YANAPTʼISTU
14. ¿Jehová Diosajj kunjamansa jikjjatastan uk uñjatap kunjamsa Bibliajj uñachtʼayistu?
14 Jakäwipanjja, Davitajj kunayman jan waltʼäwinakaruw saykatawayi (1 Sam. 30:3-6). Kunjamsa Davitajj jikjjatasïna ukjja Jehová Diosajj yatïnwa, ukwa Davitan arunakapajj uñachtʼayistu (Salmos 34:18; 56:8 liytʼasiñapawa). Ukhamasti, kunjamsa jiwasajj jikjjatastan uk sum yatiraki. Kunapachatï “llakimp aynachtʼa[täktan]”, jan ukajj chuymasan aynachtʼat jikjjatastan ukhajja, Jupajj chuymachtʼañatakiw jakʼachasistu. Ukhamarakiw Davitar chuymachtʼäna, ukatwa jupajj akham qʼochüna: “Khuyapayasiñam laykuw kusista, kʼuchirasirakta. Jumaw llakinakajj amuyistajja, jakañajjan chijinakap uñjaraktajja” sasa (Sal. 31:7). Ukampis Jehová Diosajj janiw kuna jan waltʼäwinsa jikjjatastan ukak yatkiti, jan ukasti kunayman toqetwa chuymachtʼistu ukat chʼamañchtʼarakistu. Ukanakat mayajj tantachäwinakawa.
15. ¿Kunsa Asaf chachat yateqsna?
15 Kunatï Asaf chachar paskäna ukaw tantachäwinakar sarañajj kunja wakiskiris uk amuytʼañ yanaptʼistu. Jupajj ina chʼusat tʼaqhesiñanak uñjasajja Diosar serviñajj inamayäkaspa ukham amuyäna ukat niyarakiw Diosat jitheqtjjäna. Kunjamsa jikjjatasïna uk akham sasaw qhanañchi: “Chuymajajj kʼallkʼuskän[wa], ajayujajj tʼaqhesi[yaskitänwa]” sasa. Ukatwa Jehová Diosat niyapun jitheqtäna. Ukampis ¿kunas amuytatasiñapatak yanaptʼäna? “Diosan qollan utapar mantasinak amuyta” sasin jupa pachpaw säna. Ukanwa Diosan servirinakap taypinkasajj sumpach amuytatasïna. Jan wali jaqenakan nayrar sartatapajj janiw wiñayatakïkiti ukat Jehová Diosaw taqe jan waltʼäwinak askichani sasin amuyäna (Sal. 73:2, 13-22). Jichhürunakanjja, niya ukhamanwa jikjjatasiraktanjja. Supayan apnaqat akapachan ina chʼusat tʼaqhesiñanak uñjasajj inas aynachtʼat jikjjatastan. Ukampis jilat kullakanakasampi tantachtʼasisajj chʼamañchtʼataw jikjjatastanjja, ukaw Jehová Diosaru kusisita serviskakiñatak yanaptʼistu.
16. ¿Kunjamsa Anan sarnaqäwipajj yanaptʼistu?
16 ¿Kuna jan walitï taman paski uk uñjasati jan sarañ munjjta? Inas taman mä privilegio jaytatamat phenqʼasta. Jan ukajj inas mä kullakampisa jan ukajj mä jilatampis jan waltʼayasksta, ukatwa tamar sarañ jan munjjasmati. Ukhamächejja, Anat amtañaw yanaptʼistaspa (1 Samuel 1:4-8 liytʼasiñapawa). Anajj chachapan Peniná sat mayni warmipampiw jan waltʼayaskänti, ukatwa wali llakit jikjjatasïna. Yamas Jehová Diosar sacrificionak loqtir sapa mara Siló cheqar sarapkäna ukhaw jukʼamp llakita jikjjatasirïna. Anajj “wal jachirïna ukat janiw manqʼañsa munirïkiti”. Ukhamansa jikjjataskchïnjja, Jehová Diosar yupaychirejj sarapunirïnwa, Diosajj wali askitwa uk uñjäna ukatwa bendicïna (1 Sam. 1:11, 20).
17, 18. 1) ¿Kunjamatsa tantachäwinakan chuymachtʼata ukat chʼamañchtʼata jikjjatastanjja? 2) ¿Jehová Diosajj qhespiyasiñasatak wali munasiñampi uñjkistu ukanak amuykiptʼasajj kunjamsa jumajj jikjjatasta?
17 Jichhürunakanjja, cristianonakajj Anat yateqasisaw tantachäwinakar sarañasapuni. Ukanwa chʼamañchtʼat jikjjatastanjja (Heb. 10:24, 25). Munasir jilat kullakanakampi chikachasisaw chuymachtʼata jikjjatastanjja. Taqenitaki arstʼäwi istʼasa jan ukajj mä jilat kullakan arstʼatap istʼasaw chuymachtʼat jikjjatasiraksna. Ukat inas tantachäwi janïr qalltkipana jan ukajj tukuyarusa jilat kullakanakampi parltʼasisajj chʼamañchtʼat jikjjatasiraksna (Pro. 15:23; 17:17). Ukatsti, Diosar taqeni qʼochtʼasaw kusisita ukat chʼamañchtʼat jikjjatasiraktanjja. Cheqas ‘llakinakasajj wal yapjjatki’ ukhaw kuna chʼamañchtʼäwinaktï tantachäwinakan jikjjatktan uk wal muntanjja. Ukanwa Jehová Diosajj ‘chuymachäwipampi’ yanaptʼistu, ukat Jupat jan jitheqtañasatakis chʼamañchtʼarakistu (Sal. 94:18, 19).
18 Diosajj wali munasirïtap yatisaw Asaf chachajj akham qʼochüna: “Jumaw kupi amparajjat wayjjarustajja, amtatamarjamaw irpistajja” sasa, jiwasajj ukhamwa saraktanjja (Sal. 73:23, 24). Jehová Diosaw jan walinakat jarkʼaqestu ukat tukuykam Jupar taqe chuyma jan jitheqtas serviskakiñatakis yanaptʼistu, ukatwa walpun yuspärtanjja.
[Jiskt’anaka]
[28 janan fotopa]
Jumarusa Jehová Diosaw markapar irpantamjja
[30 janan fotopa]
Jehová Diosan ewjjtʼanakapar istʼañaw jan walinakat jarkʼaqestu
[31 janan fotopa]
Chʼamañchtʼäwi katoqañaw aguantañatak yanaptʼistu
