Chuymachasir Diosar atinisipxañäni

“Yupaychañäni Jesucristo Tatitusan Dios Awkiparu. Jupaw jiwasar khuyapayasir Awkisaxa, ukhamarak chuymachirisasa.” (2 COR. 1:3.)

1. ¿Kunsa jaqinakax wawatpach muntanxa?

 ASU wawäktan ukhatpachwa chuymachatäñ muntanxa. Mä wawax ichtayasiñ munasas jan ukax manqʼat awtjatas istʼayasiñkamaw jachi. Ukat jachʼäxtan ukhasa mayninakan chuymachtʼatäñxa munaskaktanwa. Yamas jan walinakan uñjasisax khitikis chuymachtʼitaspa sasaw sistanxa.

2. ¿Jehová Diosar atinisipki ukanakarux khitis chuymachi?

² Kunapachatï jachañax utji ukhaxa, familiaranakas amigonakas wal chuymachtʼasipxi. Ukampis sinti jan walinakan uñjastan ukhax janiw jaqi masis chuymachasirjäkiti. Jehová Dios mayakiw chuymachtʼistaspa. Arupax akham siwa: “Tatitux artʼasirinakapan jakʼapankaskiwa, [...] arnaqasitanakap istʼi” sasa (Sal. 145:18, 19). Jïsa, Jehová Diosax aski jaqinakar wali sum “imaski, arnaqasitanakaparusti istʼarakiwa” (Sal. 34:15). Ukat Diosampi yanaptʼayasiñatakix Jupar atinisiñasawa. Salmonak qillqir Davitax akham siwa: “Tatituw tʼaqhisiyat jaqinakarux arxataski, jupaw llakisiñ pachanakan imaski. Tatay, sutim yatirinakax jumaruw iyawsapxtam, jumar thaqirinakarux janipuniw apanukktati” sasa (Sal. 9:9, 10).

3. ¿Jehová Diosan luqtirinakapar munasitapxa kunjamsa Jesusax uñachtʼayäna?

³ Khitinakatix Diosar yupaychapki ukanakax Jupan wali munatäpxiwa. Jesusax akham sasaw amuytʼayistu: “¿Janit phisqa jamachʼinakax pä moneda qullqir aljaskixa? Diosasti ukanakatxa janiw maynits armtʼaskiti. Ñikʼutanakamasa mayat maya jakhutawa. Janiy axsarapxamtixa; jumanakax walja jiskʼa jamachʼinakat sipansa jukʼampi alanïpxtawa” sasa (Luc. 12:6, 7). Ukatxa, akham sasaw Jeremías tuqix nayra Israel markar säna: “Wiñay munasiñampiw nayax munsma, ukatarakwa khuyapayasiñampi jichhakam uñjasksma” sasa (Jer. 31:3).

4. ¿Kunatsa Diosarus arunakaparus atinisiñasa?

⁴ Diosax yanaptʼaskitaniwa ukat arunakapsa phuqarakiniwa sasin suyktan ukhaxa, llakinakansa wali chuymachataw jikxatastanxa. Ukhamax Jupar taqi chuym atinisiñasawa, kunjamtï Josué chachax atiniskäna ukhama. Jupax akham sänwa: “Diosasti taqi suma arunakapwa jumanakampi phuqhi, kunjämtï jupax arsüna ukhama. Janiw kuna arunakapas jan phuqhasisax pasawaykiti” sasa (Jos. 23:14). Ukat sinti jan walinakansa, Jehová Diosax janipuniw jaytkistaniti (1 Corintios 10:13 liytʼasiñapawa).

5. ¿Kunas mayninakar chuymachañ yanaptʼistu?

⁵ Alaxpachankir Awkisax khuyapayasiñampi ‘chuymachasir’ Diosaw sasaw apóstol Pablox säna. ‘Chuymachasiri’ sasinxa, kunjamsa maynix llakitanakar arunakampi yanaptʼaspa ukat chʼam waytaspa ukwa sañ munaskäna. Chiqas ukhamwa Jehová Diosax llakisktan ukhax waytistaspa (2 Corintios 1:3, 4 liytʼasiñapawa). Ukat taqi chuym luqtirinakapar kunjamat yanaptʼañsa Jupax sum yati, janiw kunas ni khitis jarkʼkaspati. Ukampis ¿kun lurañas jiwasar waktʼistu? ¿janit jilat kullakanakar chuymachañax wakiskarakispa? Jïsa, “tʼaqhisirinakar chuymachaña[sawa], kunjämtï Diosax jiwasar chuymachkistu ukhama”.

Kunanakas aynachtʼayañ munistaspa

6. ¿Kunanakas llakisiyistaspa?

⁶ Kunayman llakinakaw awisax pasi. Sañäni,  mä familiaras jan ukax mä amigos jiwxi ukhax wal llakistanxa. Ukatxa, chacha warmit maynix jiwxi, jan ukax mä wawas jiwxi ukhax jukʼampwa chuym usuyastanxa. Ukat janiw ukakïkiti, yaqhipax jaqi masin jiskʼachata uñisita ukhamaw sarnaqtanxa. Maysa tuqitxa, usuntasasa, chuymankipstasasa, qullqit pistʼasasa, chacha warmi jan waltʼayasisasa ukat akapachan jan walinak uñjasas wal llakistanxa. Ukatwa sapa maynis chʼam waytkir suma arunak istʼañ muntanxa.

7. 1) ¿Llakinakan jikxatastan ukhax kuns muntanxa? 2) ¿Kunjamsa Jehová Diosax ‘aynachtʼat chuymasarux’ yanaptʼaspa?

⁷ Jan walinakan uñjasisax jukʼamp aynachtʼañaruw sarsna. Chuymasasa, amuyusasa mayjtʼayataw uñjasispa ukat janis kunatak askïksna ukhamwa amuyassna. Ukatxa, usuntañar kunaw pursna, Jehová Diosar luqtañ tuqitsa aynachtʼaraksnawa. Nayraqatxa, chuymasat parltʼañäni. Kunjamtï Biblian siskixa, ‘chuymasax aynachtʼataw’ llakinak utjipanxa jikxatasispa (Sal. 34:18). Ukampis Jehová Diosaw yanaptʼistaspa, Arupanxa akham siwa: “Jupaw chuyma usuchjatanakarux waliptayi, chhuxrinakap kʼumaracharaki” sasa (Sal. 147:3). Jïsa, qʼala aynachtʼatäktan ukhasa, Jehová Diosax wali sumwa chuym wayttʼistaspa, ukatakix jupar taqi chuym mayisiñasawa ukat kamachinakaparjam sarnaqañasarakiwa (1 Juan 3:19-22; 5:14, 15 liytʼasiñapawa).

8. ¿Amuyusan llakinakax utjani ukax kunjamsa Jehová Diosax yanaptʼistani?

⁸ Jichhax amuyusat parltʼarakiñäni. Kunayman yantʼanaka ukat llakinak utjipanxa amuyunsa awisax aynachtʼaraksnawa. Ukat jan khitis chʼam waytkistaspa ukhax jukʼampiw aynachtʼsna. Ukampis salmonak qillqirix akham sänwa: “Llakinakaxax walipun yapxataskän ukapachaw chuymachäwimampix kusisiyista” sasa (Sal. 94:19). Ukat Pablox akham sarakiwa: “Jan jumanakax kunats llakisipxamti, taqi kunsa Diosar sapxam oracionana, mayipxam yuspagarapxarakim. Diosax jumanakarux churapxarakïtamwa samarañapa, ukasti taqi kuntix jaqix amuytʼkaspas ukat jukʼamp jachʼawa. Uka samarañasti jumanakan chuymanakamsa, amuyunakamsa imaniwa Cristomp mayakïpxatam layku” sasa (Fili. 4:6, 7). Ukxarusti, amuyusan jan aynachtʼañatakix Biblia sapüru liyiñasarakiwa ukat kunsa yatiqtan ukanakat lupʼiñasarakiwa. Ukanakaw jan sinti llakisiñatakix yanaptʼistani (2 Tim. 3:15-17).

9. ¿Janis kunatakis askïksna ukham amuyasstan ukhax kunas yanaptʼistaspa?

⁹ Ukat kunapachatï wali aynachtʼat jikxatasktan ukhaxa, jan wali amuyunakaw sarxatistaspa, janis kunatakis askïksna ukhamwa amuyassna. Amuytʼañäni, Biblian mä kamachip jan phuqirjamäsas jan ukax taman utjki uka luräwinak jan sum phuqirjamäsasa, janiw kunatakis askïkit sasaw yaqhipax amuyastanxa. Ukampis Jehová Diosaw jan ukham aynachtʼañatakix chuymachtʼistaspa ukat yanaptʼistaspa. Josué chachat amtañäni. Jupan pʼiqtʼataw israelitanakax wali chʼamani jachʼa markanakar atipapxañapäna. Ukatwa Moisesax israelitanakar akham säna: “Chʼamañchtʼasipxam, saytʼasipxarakim, jan axsarapxamti ni sustjasipxamsa jupanakampi nuwasiñatakixa, Tatitu Diosamaw jumanakampïski uka layku, janirakiwa jaytapkätamti ni apanukupkätamsa” sasa (Deu. 31:6). Ukhamax ¿khitin yanaptʼatas Josué chachax israelitanakarux Suma Uraqir puriyäna ukat jachʼa markanakarus atipayänxa? Khititix Wila Lamar Quta pasañ Moisesar yanaptʼkänxa uka pachpa Jehová Diosaw Josué chacharux yanaptʼäna (Éxo. 14:13, 14, 29-31).

10. ¿Llakinakampi usuntasax kun amtañasasa?

¹⁰ Maysa tuqitxa, llakinakan uñjasisax usuntañaruw puriraksna. Chiqansa, sum manqʼtʼasiñasa, samartʼañasa, ejercicionak lurañasa ukat qʼum jakasiñasa cuerposatakix wali askiwa. Ukampis kuntï Bibliax yatichki ukanakat amuytʼañaw wal yanaptʼarakistaspa. Sañäni, llakisiñax utjani ukaxa, Pablon arunakapat amtasiñasawa, tʼaqhisiyatax akham sasaw jupax säna: “Jan waltʼañanakax taqi tuqit muyuntapkchitu  ukkhasa, janipuniw atipjayasipkti, llakisiñanakas wal utjkchixa, janipuniw qʼala aynachtʼatäpkti. Uñisiñampis arknaqapkchitu ukasa, janipuniw sapa irpanukutäpkti, uraqirus takisipkchitu ukasa, janipuniw tukjatäpktsa” sasa (2 Cor. 4:8, 9). ¿Janit uka arunakax wal chʼamañchkistu?

11. ¿Ajay tuqit jan aynachtʼañatakix kun lurañasasa?

¹¹ Ukat jan walinakan uñjasisax Diosar yupaychañ tuqitsa aynachtʼaraksnawa. Ukampis Jehová Diosakiw yanaptʼistaspa. Arupanxa akham siwa: “Tatituw tinkurinakarux katxäsiski, tʼukhasirinakarusti chʼamañchaskaraki” sasa (Sal. 145:14). Ukat ajay tuqit jan aynachtʼañatakix irpir chuymaninakar jakʼachasiñasarakiwa, jupanakan yanaptʼataw Diosampix sum apasiñäni (Sant. 5:14, 15). Ukxarusti, kuntï Bibliax wiñay jakañ tuqit yatichki ukanak chuymar katxäsiñasawa, ukanak amtasaw jan walinakarux saykatarakiñäni (Juan 17:3).

Khitinakarus Diosax chuymachäna

12. ¿Kunjamsa Jehová Diosax Abrahamar chuymachäna?

¹² Salmonak qillqirit maynix akham sasaw Jehová Diosar säna: “Uywatamar arsutamat amtasikimaya, arunakamaruw chuymax uchayista. Llakisiñaxan chuymachasiñaxax akawa: arunakamaw jakañ churitu” sasa (Sal. 119:49, 50). Kunjamsa Diosax nayra luqtirinakapar chuymachäna ukxa wali sumwa Bibliax parli. Maynix Abraham satänwa. Kunapachatï Sodoma ukat Gomorra markanakax tʼunjasiñapäkäna ukhaxa, wal llaktʼasïna, ukat akham sasaw Diosar jisktʼäna: “¿Jan juchani jaqinakarux juchaninakampi chikti tʼunjarakïta?” sasa. ¿Uk satax kunjamsa Diosax chuymachtʼäna? Phisqa tunka aski jaqikis utjani ukhax janiw tʼunjkäti sasaw säna. Ukampis Abrahamax Diosar jisktʼaskakïnwa. ¿Pusi tunka phisqanikisa, pusi tunkakisa, kimsa tunkakisa, pä tunkakisa ukat tunka aski jaqikis utjaspa ukhax tʼunjaskakismati?, sasaw phisqa kuti jisktʼäna. Ukham tunkar puriñkam jisktʼataxa, janiw tʼunjkäti sasaw Jehová Diosax Abrahamar wali llampʼu chuymampi säna. Ukampis aski jaqinakax janiw tunkarus purkänti. Ukhamäkipansa, janiw Diosax Lot chachar ukat pä phuchanakapar qhispiyañxa armaskänti (Gén. 18:22-32; 19:15, 16, 26).

13. ¿Anax kunjamsa Jehová Diosar atinisitap uñachtʼayäna?

¹³ Jichhax Anat parltʼarakiñäni, Elcana sat chachan warmipänwa. Anax jan wawan warmïnwa. Ukatwa chuymapan wal llakisïna. Mä uruxa, wawanïñ munta sasaw Diosar taqi chuym achiktʼasïna. Uk uñjasaxa akham sasaw  Elí sacerdotex jupar säna: “Israelan Diosaparakiy jumarux kuntix maykta ukxa churpan” sasa. Uk sataxa, chuymachtʼataw sarawayxäna, ukat “janirakiw mayamps llakiskxänti” (1 Sam. 1:8, 17, 18). Jïsa, Anax Jehová Diosan amparaparuw llakipxa jaytäna. Ukat kunjamsa Diosax yanaptʼaspäna uk janis yatkchïnxa, chuymapan sumakiw jikxatasxäna. Ukat tiempompix mayisitaparjamaw Diosax mä wawampi bendicïna. Uka wawarux Samuel sasaw sutiyasïna (1 Sam. 1:20).

14. ¿Kuna jan walinsa Davitax uñjasïna ukat khitirus yanapa mayïna?

¹⁴ Israel marka apnaqir Davitarus Jehová Diosax wal chuymacharakïna. Niyakixay Jupax jaqin chuymap sum yatchixa, Davitax kunjam jaqïnsa ukat qhawqsa jupar yupaychañ munäna ukanak sum yatisaw Israel marka apnaqañapatakix Davitar ajllïna (1 Sam. 16:7; 2 Sam. 5:10). Ukampis qhipatxa, Betsabé sat warmimpiw Davitax wachuq juchar purïna. Ukat juch jan katjayasiñatakix uka warmin chachapar kunaw jiwañar aptʼäna. Ukatsti, tiempompi amuytatasisax walpun Jehová Diosar akham sasin achiktʼasïna: “Diosaxay, munasiñam laykuy khuyaptʼayasita, khuyapayasirïtam laykuy juchanakaxat pampachita. Ñanqha luratanakaxat jariqtʼita, jucha luratanakaxat qʼumachtʼita. Jucha luratax uñtʼastwa, jucha lurataxax janiw amuyuxat chhaqtkiti” sasa (Sal. 51:1-3). Davitax taqi chuymaw arrepentisïna, ukatawa Jehová Diosax juch perdonäna. Ukampis juchapat kuna jan walinakas utjäna ukanakatxa janiw qhispkänti (2 Sam. 12:9-12). Ukhamäkipansa, Diosan khuyaptʼayatäsax samarañwa chuymapan jikxatäna.

15. ¿Kunjamsa Jehová Diosax Yuqapar yanaptʼäna?

¹⁵ Aka Uraqinkkasaxa kunayman yantʼanakanwa Jesusax uñjasirakïna. Jupax chiqapunit Diosar taqi chuym luqti ukat kunjam chuymampis arunakapsa phuqaraki ukaw qhan uñachtʼayasiñapäna, ukatwa Jehová Diosax yantʼanakat jan qhispiykänti. Jiwayañataki janïr katuntapkäna ukhaxa, akham sasaw Awkipar säna: “Jan munañaxa luratäpati, jan ukasti juman munañamak luraspan” sasa. Ukxarusti, mä angelaw juparu chʼamañchtʼäna (Luc. 22:42, 43). Jïsa, Jesusax Awkipan yanaptʼataw uka jan walin aguantäna.

16. ¿Diosar servitas layku jiwayañ munatas kunatsa jan axsarañasäki?

¹⁶ Jiwasax ukhamarakiw awisax Diosar taqi chuym yupaychatas laykux jan walin uñjastanxa, ukat jiwayañ munapxistani ukhasa, Jehová Diosaw jupat jan jithiqtañasatakix yanaptʼistani. Ukatxa, jiwayapxistani ukhasa, Diosax jaktayanistaniwa. Arupanxa akham sasaw chuymachistu: “Qhipïri uñisiristi jiwañawa, ukas qʼala tʼunjatarakïniwa” sasa (1 Cor. 15:26). Jïsa, Jehová Diosax jiwxapxi uka chiqa chuyman luqtirinakapatxa wali sumwa amtasi, ukat janirakiw mayni jiwatanakatsa armaskiti, ukatwa mä urux jiwatanakar jaktayani (Juan 5:28, 29, NM; Hech. 24:15). ¿Janit ukanak yatiñax wal chuymachkistu? Diosar yupaychatas layku jiwayañ munapxistani ukhaxa, janiw axsarañasäkiti.

17. ¿Mä familiaras jan ukax amigos jiwxi ukhax kunjamsa Jehová Diosax chuymachistu?

¹⁷ Ukhamax jiwxapxi uka familiaranakas amigonakas jaktanipxaniwa. Ukat mä suma Uraqinwa jaktapxani, janiw tʼaqhisiñasa ni llakisiñas uka tiempon utjxaniti. Ukanak yatisax chuyms qhanarayastanwa. Ukatxa, janiw ukakïkaniti, khitinakatix Diosan colerasiñ jachʼa urupa pasapkani uka ‘walja jaqinakaw’ jiwatanakarux aka Uraqin katuqapxani ukat Diosan arunakapatsa yatichapxarakini (Apo. 7:9, 10).

 “Wiñayataki chʼamapaw wayxäsiskaraktam”

18, 19. ¿Uñisirinakan arknaqatax kawkitsa Jehová Diosan servirinakapax chʼam katxatapxi?

¹⁸ Chuymar purtʼkir mä qʼuchunxa akham sasaw Moisesax israelitanakar säna: “Wiñaya jakir Diosaw imantasiñamaxa, wiñayataki chʼamapaw wayxäsiskaraktam” sasa (Deu. 33:27). Qhipatxa akham sasaw Samuel profetax sarakïna: “Jichhax jan Tatitutxa saraqapxamti, jan ukasti taqi chuymampi jupar yupaychapxam. [...] Tatitusti sutipar munatap laykuxa janiw apanukupkätamti” sasa (1 Sam. 12:20-22). Ukhamasti, jiwasatix alaxpachankir Awkisar taqi chuym serviñäni ukhaxa, janiw Jupax apanukkistaniti, jan ukasti yanaptʼistaniwa.

¹⁹ Aka qhipa jan wali urunakansa Jehová Diosax janiw markapat armaskiti. Llakinakansa wal chuymachistu. Amtañäni, aka qhipa patak maranakanxa, walja jilat kullakanakaw cristianüpxatap laykux carcelan jistʼantat uñjasiwayapxi. Ukampis Jehová Diosaw jupanakarux yanaptʼaski ukat chuymacharaki. Unión Soviética markanxa 23 maranaka carcelar jistʼantañatakiw mä jilatarux juchañchapxatayna. Ukat carcelankkasas Bibliat apstʼat qillqatanak katuqasaw jupax chʼamañchasïna, ukat akham siwa: “Taqi uka tiemponxa Jehová Diosar atinisiñwa yatiqawayta, ukat juparakiw wal chʼamañchawayitu” sasa (1 Pedro 5:6, 7 liytʼasiñapawa).

20. ¿Kunatsa Jehová Diosax janiw jaytkistaniti sasax sistanxa?

²⁰ Akat qhiparux kunjamas uñjasiñäni ukxa janiw yatktanti. Ukampis Jehová Diosax “janiw markaparux apanukkaniti” sasaw salmonak qillqirix säna, ¡janipun uka arunak armañäniti! (Sal. 94:14.) Ukatxa, llakinakan uñjaskasasa jiwasax yaqhanakar chuymacharaksnawa. Jïsa, khitinakatix aka jan wali urunakan tʼaqhisipki ukanakar chʼam waytañaw waktʼarakistu. Jutïr yatichäwin uka tuqit jukʼamp yatxataskañäni.

¿Kunsa yatiqawaytanxa?

• ¿Kunanakas chuym usuyistaspa?

• ¿Kunjamsa Jehová Diosax servirinakapar chuymachi?

• Diosar luqtatas layku jiwayañ munapxistaspa ukhaxa, ¿kunsa amtañasa?

[Jiskt’anaka]

[25 janan recuadropa/fotonakapa]

KUNJAMSA LLAKINAKAX AYNACHTʼAYISTASPA . . .

▪ chuymasaru Sal. 147:3; 1 Juan 3:19-22; 5:14, 15

▪ amuyusaru Sal. 94:19; Fili. 4:6, 7

▪ janis kunatakis askïksna ukham amuyasiñasataki Éxo. 14:13, 14; Deu. 31:6

▪ kʼumar jakasiñ tuqitxa 2 Cor. 4:8, 9

▪ Diosar yupaychañ tuqitxa Sal. 145:14; Sant. 5:14, 15