¿Jumax amttati?

¿Aka qhipa phaxsinakan mistkäna Yatiyañataki sat revista liytʼtati? Ukhamächi ukhax aka jisktʼanakar qhanañchtʼma:

• ¿Kunatsa nayrïr Corintios qillqatax templonakan luqtat aychat parli?

Grecia ukat Roma markankir templonakanxa, idolonakar luqtat aycha jiltʼki ukanakxa, qhathuruw apapxirïna. Cristianonakax janipunis idolonakar yupaychapkchïnxa, alasisipkaspänwa, kunattix uka aychax janiw qʼañuchatäkänti (1 Cor. 10:25) (1/1, 15 jana).

• ¿Kunjamsa Supayat jarkʼaqassna?

Jesusax arkirinakapatakiw Awkipat akham mayisïna: “Maysmawa Supayat imañamataki. Kunjämtï nayax jan akapachankirïktxa, ukhamarakiw jupanakax jan akapachankirïpkiti. Chiqa kankañampi qʼumacham [...], arunakamasti chiqawa” sasa (Juan 17:15-17). Ukhamasti Supayan apnaqat akapachat jarkʼaqasiñatakix Diosan Arupat yatxatañasawa (1/1, 17 jana).

• ¿Chiqpach cristianonakax jarkʼaqasiñatakikit “Jehová, Jehová” sapxi?

Yaqhipaxa, Diosan sutip qillqxatat yänak apnaqañax jan walinakat jarkʼaqistu sapxiwa. Ukampis chiqa cristianonakax janiw ukham amuyktanti. Jan ukasti munañap phuqañataki ukat iyawsäwinïñatakiw chʼamachastanxa, chiqas ukaw Diosan sutipar imantasiñaxa (Sof. 3:12, 13) (1/15, 5, 6 jananaka).

• ¿Kunatsa Diosax Saúl reyir apanukxäna?

Saulax ofrenda luqtañatakix profetan puriniñap suyañapänwa, ukampis jan istʼasisaw jupa pachpax Diosar ofrenda luqtäna. Ukat may kutix jan wali markar qʼal tukjam satax janirakiw ukarjam phuqkänti (2/15, 22, 23 jananaka).

• ¿Kunjamsa jan walinakar uñisitas uñachtʼaysna?

Alcohol umañanakat amuyasiñasawa, layqasiñanakarux janiw mitisiñasäkiti ukat Jesusan iwxanakapar istʼasin wachuq juchanakat jithiqtañasawa. Sañäni, janipuniw pornografía uñchʼukiñasäkiti, ukat kuna jan walirutï ukax apkistaspa ukanaksa apanukuñasawa (Mat. 5:27, 28). Tamat jaqsutanakampis janirakiw mitisiñasäkiti (2/15, 29 janat 32 janakama).

• ¿Kunjamsa Jeremiasax “jawir thiyaru ayruntata quqjamä[tapa], saphinakapasti uka uma tuqiru saphinta[tätapa]” uñachtʼayänxa? (Jer. 17:7, 8.)

Jeremiasax suma achunak churaskakïnwa. Uñisirinakapax jan wali arunakampis chuym ustʼayapkchïnxa, jakañ uma churiri Jehová Diosaruw wal katuntasïna, ukat arunakapsa taqi chuymaw istʼäna (3/15, 14 jana).

• ¿Kunatsa Edén jardinax chiqapuniw utjaskäna sistanxa?

Uka jardinax kunjamänsa ukxa Bibliaw sum qhanañchi ukat kawkhankänsa uksa ukhamarakiw qhanañchi. Pä jawirat parlki ukax chiqapuniw jichhas utjaski. Aliq yaqha cuentonakanxa, janiw ukham sum qhanañchapkiti. Ukampis Jesús pachpaw Adanampit Evampit parläna (4/1, 5, 6, ukat 9 jananaka).

• ¿Kunjamaraki mä quqasti yatiñ churaspa ukat yaqha quqax jakañ churaspasti?

Diosakiw kunatï walïki jan walïki uk saspa, ukwa askimpi ukhamarak ñanqhampi churir quqax sañ muni (Jeremías 10:23). Ukatwa Jehová Diosax uka quqat manqʼañarux wali jachʼa juchat uñjänxa. Jakañ churiri quqax wiñay jakaña sañ muni, uka wiñay jakañx Diosakiw churaspa (Romanos 6:23). (4/1, 7, 8 jananaka).

• ¿Adanampin Evampin juchachasiñap Diosax yatïnti?

Janiwa. Jupanakarux amuytʼasiri ukat amtaparjam sarnaqiri Diosax luratayna. Ukhamatwa sapa maynis Diosar istʼaniti janicha uk amtapxañapäna. Jutïrin kunas pasani uk sumsa yatkchixa, kunapachas lurani uk Jupaw amti (4/1, 13 janat 15 janakama).