Yanaptʼatasa yanaptʼkasasa, ¿kunjamäpxañasasa?

KUNJAMTIX Bibliax siskixa, alaxpachankir munasir Awkisax sapa mayni luqitirinakapatwa llakisi (1 Ped. 5:7). Ukat jupat jan jithiqtas luqtañasatakix yanaptʼistuwa, ukhamatwa jiwasat llakisitap uñachtʼayistu (Isa. 48:17). Kunapachatï jan waltʼäwinakan llakimp aynachtʼat uñjastan ukhaxa, yanaptʼapampi uka jan waltʼäwinakar saykatsna ukwa Jupax muni. Moisesax katuqkän uka Leyiw uk qhan uñachtʼayi, jichhax uk uñjañäni.

Jehová Diosax luqtirinakapar munasitap laykuw Moisesar churkäna uka Leyinxa, wajchanakaru, ijma warminakaru ukat yaqha markankirinakax Israel markan qamasipkäna ukanakar yanaptʼañapatak kamachinak churäna (Lev. 19:9, 10; Deu. 14:29). Jichhürunakan ukhamarakiw yaqhip luqtirinakapax jilat kullakanakapan yanaptʼap munapxi, uk Jupax yatiwa (Sant. 1:27). Ukatwa jilat kullakanakasax yanaptʼañ munapxistani ukhax suma chuymampi yuspärtʼasaw katuqtʼasiñasa, kunattix Jehová Diosaw jiwasar yanaptʼapxañapatakix jupanakar wiyti.

Maysa tuqitxa, Diosan markapax kunaymanitwa mayninakar taqi chuym yanaptʼapxaspa, sasaw Bibliax qhanañchi. Jesusax Jerusalén templon uñjkäna uka pobre ijma warmit amtañäni (Luc. 21:1-4). Chiqansa, ijma warminakataki Leyin qillqatäkäna uka kamachinakarjamax jupax yanaptʼa katuqarakpachänwa. Ukampis jupax pisin jakasirikchïnsa, janiw mayninakat yanaptʼa katuqir warmit amtatäkiti, jan ukasti taqi chuyma churir warmit amtatawa. Chiqpachansa, taqi chuyma churatapatxa kusispachänwa, kunjamtix Jesusax siskänxa, “katuqirit sipansa jukʼamp kusisiñaniw khititï churki ukaxa” (Hech. 20:35). Uka arunakat amuytʼasaxa, ¿kunjamatsa ‘yaqhanakar churasax’ kusisit jikxatasiraksna? (Luc. 6:38.)

¿Kunampis Jehová Diosar phuqañäni?

Salmonak qillqirix akham sasaw jisktʼasïna: “¿Kunampirak [Jehová] Tatitur phuqhirista, nayatak askinak luratapatsti?” sasa (Sal. 116:12). ¿Kuna askinaksa jupax katuqatayna? Jehová Diosax ‘llakisiña ayquña’ pachanakanwa yanaptʼäna. Chiqansa, ‘jiwañatwa wayuqatayna’. Uka yanaptʼanakapatwa jupax phuqañ munäna, ¿kunjamatsa uk phuqasapäna? Jupa pachpaw akham säna: “[Jehová] Tatiturux jaqinakan nayraqatapan arsutanakax phuqhä” sasa (Sal. 116:3, 4, 8, 10-14). Ukhamawa, salmonak qillqirix Jehová Diosar kuntï luräw sas arskäna ukat Diosax maykäna ukanakwa taqi chuym phuqañatak amtäna.

Jiwasax ukham luraraksnawa. ¿Kunjamsa? Diosan kamachinakapa ukat iwxtʼanakap istʼasa. Ukatwa, Jehová Diosar yupaychañax jakäwisan nayrankañapa ukat sarnaqäwisansa qullan ajayumpi irpayasiñasaraki (Ecl. 12:13; Gál. 5:16-18). Chiqansa, janipuniw  kunampisa taqi kuntix jiwas layku lurki uk Jehová Diosar phuqksnati. Ukampisa taqi chuyma luqtañataki chʼamachasiñäni ukhaxa, kusisiysnawa (Pro. 27:11). ¡Kunja askisa Jehová Diosar ukham kusisiyañaxa!

Taman sumankañ utjañapatak yanaptʼañäni

Tamax kunaymanitwa yanaptʼistu, uk taqiniw sum yattanxa. Jehová Diosax tama tuqnamwa chiqa yatichäwinak yatichistu, ukhamatwa kʼari yatichäwinakatsa qhispiyistu, ukatarakwa Juparus uñtʼtanxa ukat amtanakapsa yatiraktanxa (Juan 8:32). ‘Amuyasiri Chipapa Uywatan’ wakichtʼat jachʼa tantachäwinakansa taman tantachäwinakapansa, jutïrin kunjamsa jan tʼaqhisis wiñayatak jakasxañäni uk yatiqtanxa (Mat. 24:45-47, MT). Chiqpachansa tama tuqnamwa walja bendicionanak katuqawaytanxa ukat jutïrinsa katuqaskakiñäniwa. ¿Ukat kunsa jiwasax tamar yanaptʼañatak lursna?

Apóstol Pablox akham sasaw qillqtʼäna: “Taqpach cuerpox suma yäparu uchata, jupanakpura mayaru tukutaraki. Kunapachatix taqpach cuerpox sum saraski ukaxa, taqpachaw munasiñanx jiltaraki” sasa (Efe. 4:15, 16). Aka qillqatax ajllit cristianonakatsa parlkchixa, uka arunakax taqi cristianonakatakix askirakiwa. Niyas ukhamawa, taqi jilat kullakanakaw tamax sumäñapatakisa jiltañapatakisa yanaptʼapxaspa. ¿Kunjamanakatsa?

Mayax akäspawa, jilat kullakanakasar chuymachtʼañatakisa Diosar luqtäwipan chʼamañchtʼañatakis sapüruw chʼamachasiñasa (Rom. 14:19). Ukatxa jilat kullakanakasarux qullan ajayun luräwiparjam uñjañasawa, ukhamat tamax ‘munasiñan jiltarakispa’ (Gál. 5:22, 23). Ukatsti “taqiniruw aski luraña[sa] jukʼampis [tamankir] jilat [kullaka]nakasaru”, ukat kunanakan yanaptʼañsa amuyañasarakiwa (Gál. 6:10; Heb. 13:16). Kunjamtï Pablox siskänxa, sapa mayniw —wayn tawaqunakasa chuymankipstatanakasa— taman jiltañapatak munasiñapamp yanaptʼapxaspa.

Kuntï sum lurañ yatktan ukampi chʼamasampi ukat qullqisampis Diosan Arupat yatiyasiñapatakiw yanaptʼaraksna. Jesusax akham sänwa: ‘Ukhamakiw katuqapxta’ sasa. Jichhasti, ¿jiwasax kuns lurañasa? Jupapachpaw akham säna: ‘Ukhamakirakiw churapxäta’ sasa (Mat. 10:8, NM). Ukatwa, taqi chuyma Diosan Apnaqäwipat yatiyir sarañama ukat Jesusan arkirinakaps tukuyañama (Mat. 24:14; 28:19, 20). Ukat chʼamamarjamatï jan jukʼamppach yatiyirjamäkäta ukhasti, ¿kuns lurasma? Jesusax pobre ijma warmit parlkäna uk amtañamawa. Jupax janisay walja qullq churkchïnxa, mayninakat sipansa jukʼamp churäna sasaw Jesusax säna, kunattix utjiriparjamakiw churäna (2 Cor. 8:1-5, 12).

Yanaptʼatax yuspärasirïpxañäni

Awisax jiwasaw jilat kullakanakan yanaptʼap munsna. Ukhamäni ukhaxa, jilat kullakanakan yanaptʼapxa katuqasiñamawa, ukaw akapachan jan waltʼäwinakar saykatañamatak yanaptʼätamxa. Jehová Diosaw tamar munasiñampi ‘uñjapxañapatak’ suma wakichtʼat jilatanakaruw uttʼayi. Jan waltʼäwinakan jikxatasïta ukhaxa, jupanakaw yanaptʼapxätam, janiw uka tuqit pächasiñamäkiti (Hech. 20:28). Irpir chuymaninakasa mayni jilat kullakanakasa jumaruw chuymachtʼaña, jan walinakatsa jarkʼaqaña ukat yanaptʼañ munapxtamxa (Gál. 6:2; 1 Tes. 5:14).

Ukhamasti, jilat kullakanakamp yanaptʼataxa suma chuymampiw qatuqasiñama, janipuniw yuspärasiñ armasiñamäkiti. Jehová Diosan khuyaptʼayasiñapatwa yanaptʼasipktamxa, uk amtañamapuniwa (1 Ped. 4:10). ¿Kunatsa ukax wali wakiskirixa? Kunattix janiw akapachankir jaqinakjam jan yuspärasirïñ munktanti.

Janiw askisak thaqhañasäkiti

Filipos markankir jilat kullakanakar qillqkasaxa, Pablox akham sasaw Timoteotx  säna: “Janiw khitis jupjam amtanix utjkiti, ukhamarak jumanakatsa wal llakisiraki, jumanakax sumankapxañamataki” sasa. Ukxarux akham saskakïnwa: “Taqinisa jupanakankirikwa thaqapxi, Cristo Jesusatakisti janiw kunsa thaqapkiti” sasa (Fili. 2:20, 21). Pablon uka arunakapat amuytʼasaxa, akham sas jisktʼasiñasawa: “Askijak jan thaqhañatakixa, ¿kuns luriristxa?” sasa.

Janipuniw jilat kullakanakasarux tiempo apstʼasisin jiwasar yanaptʼapxañapataki waytʼañasäkiti. ¿Kunatsa? Akham amuytʼañäni: ¿Jan waltʼäwin jikxatasisax qullqimpipuni yanaptʼita sasax waytʼsnati? ¿Janixayä? Kunamp yanaptʼapxistani ukhax wal yuspärsnaxa, ukampis janipuniw jiwasar yanaptʼapxañapatakix waytʼksnati. Uka kikparakispaw tiempo apstʼasisin yanaptʼapxistu ukhaxa, jilat kullakanakasax yanaptʼañsay munapkchistuxa, qhawqha tiempoy utjchi ukarjamaw yanaptʼapxistani janiw jukʼamp munañasäkiti. Chiqansa, jilat kullakanakasax taqi chuyma yanaptʼapxistaspa ukwa muntanxa.

Jilat kullakanakasax wal yanaptʼañ munapxchistanisa, awisax janiw puedepkaspati. Ukhamäni ukhaxa, Jehová Diosaw yanaptʼaskätam kunjamtix salmonak qillqirirux yanaptʼkatayna ukhama (Sal. 116:1, 2; Fili. 4:10-13).

Ukhamax jan waltʼäwinakan jikxataskasin Jehová Diosax yanaptʼistani ukhaxa, yanaptʼapxa katuqtʼasipxañäni (Sal. 55:22). Ukat yanaptʼapxa yuspärapxarakiñäni, ukwa Jupax jiwasat muni. Maysa tuqitxa, taqi chuyma kusisit churañaswa jan ukax yanaptʼañaswa munaraki. Ukatwa, jakäwisan kunjamtï jakastan ukarjam Jehová Diosar yupaychañataki taqi chuyma amtañamaxa (2 Cor. 9:6, 7). Ukhamatwa, yanaptʼapxätam ukhax yuspärtʼasis katuqtʼasïta ukat yanaptʼkäta ukhax taqi chuymaw yanaptʼarakïta.

[31 janan recuadropa/fotonakapa]

“¿Kunampirak [Jehová] Tatitur phuqhirista, nayatak askinak luratapatsti?” (Sal. 116:12)

▪ Taqinir ‘askinak lurañatak’ chʼamachasiñäni

▪ Mayninakar chuymachtʼañatakisa chʼamañchtʼañatakisa chʼamachasiñäni

▪ Jakäwisan kunjamtï jikxatasktan ukarjam taqi chuyma Jesusan arkirinakap tukuyañatak chʼamachasiñäni