Tamat jithiqtirinakaru yanaptʼañäni

“Kusisipxam nayampi, chhaqatäkäns uka ovejxa jikxatxtwa.” (LUC. 15:6.)

1. ¿Kun lurasas Jesusax uwijanakapar munasitapxa uñachtʼayäna?

 JESUCRISTOXA, Jehová Diosan jilïr Yuqapawa, ‘ovejanakan jachʼa awatiripa’ satarakiwa (Heb. 13:20). Diosan arunakaparjamaxa, aka Uraqiruw jutäna ukat wali suma Awatirjamaxa, Israel markan “chhaqatäkis uka ovejanakar” thaqhañatakiw chʼamachasïna (Mat. 2:1-6; 15:24). Ukat kunjamtï mä awatirix uwijanakapar jan walit jarkʼaqañ laykux jakäwip aptʼasirjamänxa, ukhamarakiw Jesusax luqtasïwiparu askirjam uñjir llampʼu chuyman jaqinakar qhispiyañatakix jakäwip aptʼasirakïna (Juan 10:11, 15; 1 Juan 2:1, 2).

2. ¿Kunatsa yaqhipanakax Diosan tamapat jithiqtxapxi?

² Ukampis yaqhipanakaxa, Jesusan jakäwip luqtasitaparux wali askirjamaw uñjapxäna, ukatwa jakäwipsa Diosar katuyasipxarakïna, ukampis jichhaxa, Jehová Diosan tamapatxa jithiqtxapxiwa, ukax wali llakkañawa. Ukat tamat jithiqtapxañapatakixa, inas llakinakasa usuntañanakasa jan ukax yaqha jan waltʼäwinakas jupanakarux aynachtʼayarakchi. Ukampis khitinakatï Diosan tamapankapki ukanakakiw sumankañsa ukat kusisiñsa jikxatapxaspa, ukxa janipuniw armañasäkiti. David chachax uka tuqitwa Salmo 23 jaljanxa parläna, ukanxa akham sasaw qʼuchtʼasïna: “[Jehová] Tatituw awatirixaxa, janiw kunats tʼaqhiskäti” sasa (Sal. 23:1). Ukax chiqapunïskiwa, khitinakatï Diosan tamapankapki ukanakaxa, Diosamp sum apasiñatakix walja yanaptʼanakanïpxiwa, ukampis tamapat jithiqtirinakaxa janiw kuna yanaptʼanïpkisa, ukaw wali llakkañaxa. Ukhamaxa, ¿khitis jupanakar yanaptʼaspa? ¿Kuna yanaptʼanakas jupanakatakix wakisispa? ukat Diosan tamapar kuttʼanipxañapatakixa, ¿kun lurañas wakisispa?

¿Khitis jupanakarux yanaptʼaspa?

3. Diosan tamapat jithiqtirinakar kuttʼayaniñatakixa, ¿kunas munasi, ukat kunjamsa Jesusax uk amuytʼayäna?

³ Diosan tamapat jithiqtirinakar kuttʼayaniñax chʼamakiwa (Sal. 100:3). Uka tuqit parlkasaxa Jesusax akham amuytʼayäna: “¿Kunjamas akax jumanakatakixa? Mayni jaqitix patak ovejanïspa, ukat mayax chhaqatäspa ukkhaxa, ¿janit jupax uka llätunk tunka llätunkan qullur jaytawayasin chhaqatäkis uka thaqirix sarki? Qhanakwa sapxsma, jikxatasinsti jupax uka ovejat jukʼamp kusisi jan chhaqkis uka ovejanakat sipansa. Ukhamarakiw, alaxpachankir Awkimax janiw khiti jiskʼan chhaqañapsa munkiti”  sasa (Mat. 18:12-14). Ukhamaxa, ¿khitis Diosan tamapat jithiqtirinakarux yanaptʼaspa?

4, 5. ¿Kunjamsa irpir chuymaninakax Diosan tamaparu uñjapxañapa?

⁴ Chiqpachansa, irpir chuymaninakaw tamat jithiqtirinakarux yanaptʼapxaspa. Ukampis Diosan tamapanxa, Jehová Diosar jakäwip katuyasirinakaw ukankapxi, jupanakax janiw uk armapxañapäkiti. Jïsa, Diosan wali munat uwijanakapäpxiwa, Jupaw awatiripaxa (Sal. 79:13). Uka munat uwijanakaxa, wali munasiñampi uñjatäpxañapawa, ukhamax awatirinakax wali munasiñampiw uñjapxañapa ukat jupanakat llakipxañaparakiwa. Kunapachatï irpir chuymaninakax jupanakaru wali munasiñampi tumptʼapxani ukhaxa, chʼamañchtʼaspawa, ukat Diosampi sum apasipxañapatakisa tamaru kuttʼanipxañapatakisa yanaptʼarakispawa (1 Cor. 8:1).

⁵ Diosan tamap awatirinakaxa, tamat jithiqtirinakarux yanaptʼañatakiw thaqhapxañapa. Kuntï nayra Éfeso markankir irpir chuymaninakax lurapxañapäna ukwa apóstol Pablox akham sas amtayäna: “Ukhamasti jumanak kikpa amuyasipxam, taqi iyawsirinakarus uñjapxarakim. Ukatakiw Qullan Ajayux Tatitun [tamap] uñjapxañamataki ajllipxtamxa. Tatitusti wilapampiw uka [tamap] alasiwayi” sasa (Hech. 20:28). Ukhamarakiw apóstol Pedrox ajllit irpir chuymaninakarux akham sas iwxäna: “Tatitun ovejanakapsti sum awatipxam, ukanakasti jumanakar katuyatawa. Taqi munasiñampi ukxa lurapxam, kunjämtix Diosax munki ukhamarjama, janiw phuqhayam sat laykukiti, ni qullqi munañ laykukisa, jan ukasti taqi chuyma ukxa lurapxam, jan jumanakas uka ovejanakxaru munañ[an]ïpkasmasa ukhamxa, jan ukasti ovejanakarux mä suma yatichäwi uñachtʼayasa” sasa (1 Ped. 5:1-3).

6. Jichhürunakanxa, ¿kunatsa irpir chuymaninakax Diosan tamaparux jukʼamp yanaptʼapxañapa?

⁶ Irpir chuymaninakaxa ‘suma awatiri’ Jesusatwa yatiqasipxañapa (Juan 10:11). Jupax Diosan tamapatxa wal llakisirïna. Ukat kunapachatï Simón Pedroru “ovejanakaxa awatim” siskäna ukhaxa, jupanakar sum uñjañatwa qhanañchaskäna (Juan 21:15-17 liytʼasiñapawa). Jichhürunakanxa, uka uwijitanakaxa jukʼamp sum uñjatäpxañapawa, kunattix Supayaw jupanakaru Diosat jithiqtayañatakix wal chʼamachasi. Supayax jaqinakan pantjasirïtap yatisaxa, aka ñanqhapachapampiw juchar puriyañatak wiyti (1 Juan 2:15-17; 5:19). Ukat khitinakatï Diosan tamapat jithiqtapki ukanakax jukʼamp aynachtʼataw uñjasipxarakispa; ukatwa jupanakar “ajayun” munañaparjam sarnaqapxañapataki yanaptʼañax wali askirakixa (Gál. 5:16-21, 25). Ukatxa, ¿kunsa irpir chuymaninakax jupanakar yanaptʼañatakix lurapxaspa? Diosan yanaptʼapa ukat qullan ajayup mayisipxañapa ukat Bibliampix sum iwxtʼañ yatipxañaparaki (Pro. 3:5, 6; Luc. 11:13; Heb. 4:12).

7. Diosan tamapax irpir chuymaninakar katuyatawa, ukhamaxa, ¿kunjamsa tamankir jilat kullakanakar uñjapxañapa?

⁷ Nayra tiempon uwij awatiri israelitanakaxa, mä thujrumpiw uwij anakipxirïna. Ukat uyut ansuñatakisa anantañatakisa, ‘thujrupampiw’ mayat maya jaktʼapxirïna phuqataskiti janich uk yatiñataki (Lev. 27:32, NM; Miq. 2:12; 7:14). Ukhamarakiw irpir chuymaninakax tamankir jilat kullakanakarux sum uñjapxañapa ukat kunjamas jikxatasipxi ukxa, sum yatipxañaparaki, kunattix jupanakar katuyatawa (Proverbios 27:23 uñxattʼarakismawa). Ukatwa tamankir irpir chuymaninakax tamankirinakaru tumptʼir sarañxa wali askirjam uñjapxi, ukhamatwa jithiqtirinakarusa yanaptʼapxaraki. Jehová Diosax akham sarakïnwa: ‘Naya pachpaw jichhax tamajarux thaqhiri saräxa ukat awatisxäxa’ sasa (Eze. 34:11). Ukat kunapachatï irpir chuymaninakax Jupat yatiqasisa tamat jithiqtapki ukanakar kuttʼanipxañapatak yanaptʼapki ukhaxa, Jehová Diosax wal kusisiraki.

8. ¿Kunanak lurasasa irpir chuymaninakax tamankirinakaru yanaptʼapxaspa?

⁸ Kunapachatï mä jilatas jan ukax mä kullakas usunti ukat mä irpir chuymanix tumptʼki ukhaxa, wali chʼamañchtʼata ukat wali kusisitaw jikxatasispa. Ukat maynitix Diosar yupaychañ tuqit aynachtʼatäsina tumptʼatächi ukhaxa, ukhamarakiw chʼamañtʼata ukat kusistʼata jikxatasispa. Ukat irpir chuymaninakaxa tamat jithiqtirinakaruxa, Bibliat apstʼat tʼaqanaka, Bibliat apstʼat qillqatanakwa liytʼarapipxaspa, kuna askinaktï tantachäwin yatichaskäna ukanaksa arxaytʼapxarakispawa ukat jupanakamp chika Diosar oración lurapxarakispawa. Ukat jumatï tantachäwir kuttʼanïtaxa, jilat kullakanakax wal kusisipxani sañax askirakïspawa  (2 Cor. 1:3-7; Sant. 5:13-15). Tumptʼir sarañasa telefonot jawstʼañasa jan ukax mä carta qillqañasa wali wakiskirïspaw uka jilat kullakatakixa. Ukampis irpir chuymaninakax jithiqtirinakar yanaptʼasaxa, wali kusisitaw jikxatasipxaraki.

Taqiniw yanaptʼaraksna

9, 10. Diosan tamapat jithiqtirinakatxa, ¿irpir chuymaninakakit llakisipxañapa?

⁹ Jichhürunakanxa jan wali tiemponakanwa jakastanxa ukat janiw tiempos utjkarakiti, ukatwa mä jilatasan jan ukax mä kullakasan tamat jithiqtatapxa jan sum amuyksnati (Heb. 2:1). Ukampisa, Jehová Diosax jilat kullakanakarux sum uñjaski, kunattix uwijanakaparux wal munasi. Kunjamatï amparanakasa kayunakasa cuerposatakix wali askixa, ukhamarakiw Jehová Diosatakix sapa maynix wali askïtanxa. Ukatwa jilat kullakanakasat taqi chuyma llakisiñasa ukat maynit maynikamas sum yanaptʼasirakiñasa (1 Cor. 12:25). ¿Ukhamti jumax jilat kullakanakar uñjaskarakta?

¹⁰ Tamat jithiqtirinakaruxa irpir chuymaninakaw nayraqatxa thaqhapxi ukat yanaptʼapxaraki, ukampis janiw irpir chuymaninakakix jupanakat llakipxañapäkiti. Jan ukasti, Diosamp sum apasipxañapatakisa tamaru kuttʼanipxañapatakisa taqiniw jupanakaru chʼamañchañasa. Ukhamaxa, ¿kunjamsa jupanakar yanaptʼsna?

11, 12. ¿Kunjamanakatsa Diosamp sum apasipxañapatakix tamat jithiqtat jilat kullakanakarux yanaptʼsna?

¹¹ Kunapachatï tamat jithiqtir jilatasa jan ukax kullakasa yanaptʼayasiñ munani ukhaxa, irpir chuymaninakaw jupanakar yanaptʼañatakix mä yatxattʼat jilatarusa jan ukax kullakarusa khitapxarakispa, Bibliat apstʼat mä qillqatat jupampi yatiqañataki. Ukampis uka yatichäwinakaxa ‘qalltan utjkäna uka munasiñap’ amtayañatakïñapawa (Apo. 2:1, 4). Ukat jan tantachäwinakar sarkäna ukhaxa kuna yatichäwinakasa utjäna ukanak yatxatañaw jupanakarux wal chʼamañchtʼarakispa.

¹² Irpir chuymaninakatï jithiqtat mä jilatarus jan ukax mä kullakarus yanaptʼañataki khitapxätam ukhaxa, Jehová Diosan yanaptʼapa ukat bendicionap katuqañatakisa mayisiñamawa. “Taqi luräwinakamxa Tatitun amparapar jaytam, ukatsti [juman] amtäwinakamax phuqhasiniwa.” (Pro. 16:3.) Bibliat apstʼat yanaptʼkir tʼaqanak thaqhañasawa ukhamat iyawsäwiparu chʼamañchtʼañataki. Ukat Apóstol Pablon aski luratanakapat amtasiñasawa (Romanos 1:11, 12 liytʼasiñapawa). Pablox Romankir cristianonakarux akham sänwa: “Jumanakarux uñjañwa munta ukhamat ajayu tuqin chʼamañchtʼañataki” sasa. Ukat maynit maynikamax wal chʼamañchtʼasipxäxa sasaw sarakïna. Ukhamax tamat jithiqtapki ukanakar yanaptʼir sartan ukhaxa, ¿janit ukham amuyunïñax wakiskaspa?

13. Diosan tamapat jithiqtir jilatampis jan ukax kullakamapisa, ¿kunanakat parlañas wakisispa?

¹³ Diosan arunakapat yatichkasaxa, ¿kunjamatsa jumax chiqpach Diosar uñtʼawayta? sasaw jisktʼaraksna. Kunjamsa nayrax Diosar wali kusistʼat luqtapxirïta ukat tantachäwinakarusa jachʼa tantachäwinakarusa ukat Diosan arunakapat yatiyir sarañasa kunja askïnsa, ukanakat amtayañasawa. Kunja kusisitas Diosamp sum apasisax jikxatastan uksa saraksnawa (Sant.  4:8). Kunapachatï jan waltʼäwinakan uñjasstan ukhaxa Jehová Diosaw mä aski suytʼäwi churistu ukat chuymachtʼarakistu, ukatwa Jehová Diosaru wal yuspärta sañax askirakïspa (Rom. 15:4; 2 Cor. 1:3, 4).

14, 15. Tamat jithiqtatanakaruxa, ¿Diosan kuna bendicionanakap amtayañas wakisispa?

¹⁴ Uka jilatax jan ukax kullakax tamankkäna ukhax kuna bendicionanaksa katuqirïna ukanak amtayañax wali askirakïspawa. Chiqansa, Diosan arunakapa ukat amtanakapa sapürutjam jukʼamp uñtʼañasa mä aski churäwirakïnwa (Pro. 4:18). Ukampisa, qullan ajayun luräwiparjam sarnaqasaxa janiw jan walinakarux jankʼak jaltʼapxirïkänti (Gál. 5:22-26). Ukat ukarjam sarnaqasaxa, Diosarux suma chuymampiw mayisipxirïna ukhamatwa Diosax jupanakaru ‘samarañap churirïna’ ukat ‘chuymanakapsa, amuyunakapsa’ imarakirïnwa (Fili. 4:6, 7). Jupanakampi parlasaxa uka iwxanak amtañasawa, taqi chuymapuniw yanaptʼañasa ukat sipansa Diosan tamaparu kuttʼaniñapatakiw wali munasiñampi chʼamañchtʼañasa (Filipenses 2:4 liytʼasiñapawa).

¹⁵ Jumax irpir chuymanïkasmas ukham jichhax amuytʼañäni, ukat jumax tamat jithiqtata mä chacha warmir visittʼasktaxa. Diosan chiqa arunakapa yatiqasaxa kunjamas jikxatasipxäna inas uk amtayañax jupanakar yanaptʼarakchispa. ¡Uka amuytʼkañ yatichäwinakax wali sumapunïnwa! ¡Jakäwipatakix wali askipunïnwa ukat kʼari yatichäwinakatsa qhispiyatäpxarakïnwa! (Juan 8:32.) Ukat Jehová Diosan munasiñapata ukat muspharkañ amtanakapata yatiqkasaxa, wali kusisitaw chuymanakapan jikxatasipxpachäna (Lucas 24:32 uñxattʼarakismawa). Diosar katuyat cristianjamax Diosamp sum apasiraksna ukat Jupat mayisiraksnawa ukaw wali askixa, ukwa amtayañasa. Ukhamaxa, ‘kusisir’ Jehová Diosar wasitat yupaychasipkakiñapatakixa jawstʼaskakiñasawa (1 Tim. 1:11, NM).

Jupanakarux munasiñampi uñjaskakiñasawa

16. Khitinakatï tamat jithiqtapki ukanakar yanaptʼañaxa wali wakiskiriwa, uka tuqit mä uñachtʼäwimpi qhanañchtʼma.

¹⁶ Chiqpachansa, ¿wali wakiskiripuniti uka iwxtʼanakaxa? Jïsa, ¡wali wakiskiripuniwa! Mä waynituxa, 12 maranïkasaw Diosan arunakap yatiyir sarirïna ukat 15 maranïxasaxa Diosan tamapat jithiqtxäna. Ukampisa, jupax tamar kuttʼanxasaxa, 30 marats jukʼampiw Diosatakix sapüru irnaqtʼxaraki. Diosan tamaparu kuttʼañapatakixa mä irpir chuymaniw yanaptʼatayna. Uka jilatax ukham yanaptʼataxa, ¡walpun yuspäraraki!

17, 18. ¿Kunjam jaqïñasasa tamat jithiqtirinakar yanaptʼañatakixa?

¹⁷ Munasiñaw Diosan tamapat jithiqtatäpki ukanakar kuttʼayaniñatakix yanaptʼistani. Jesusax akham arkirinakaparux satayna: “Aka machaq mandamientwa churapxsma: Maynit maynikama munasipxam. Kunjämtix nayax munasipxsma, ukhama jumanakax maynit maynikam munasipxañamarakiwa. Jumanakatix maynit maynikama munasipxätaxa, taqiniw amuyapxani nayan discipulonakaxäpxatama” sasa (Juan 13:34, 35). Ukax ukhamapunïskiwa, chiqpach cristianonakax munasiñapatwa uñtʼatäpxaraki. Ukhamaxa, tamat jithiqtata jilat kullakanakaruxa, ¿janit munasiñ uñachtʼaykaraksna? Jïsa, ¡munasiñ uñachtʼayaraksnawa! Ukampisa, janiw munasiñak uñachtʼayañasäkiti, jan ukasti yaqhanakax utjarakiwa.

¹⁸ ¿Kunanak uñachtʼayañas wakisispa? Munasiñatsa, khuyaptʼayasirïñasa suma jaqïñasa jiskʼar tukurïñasa ukat paciencianïñas munasirakiwa. Ukat awisax juchanak perdonirïñasarakiwa. Pablox akham qillqatayna: “Diosax jumanakarux munapxtamwa, jupankapxañamatakiw ajllisipxtam. Ukhamax khuyapayasiñampi, suma jaqïñampi, jiskʼar tukuñampi, llampʼu chuymanïñampi, paciencianïñampi isthapitay sarnaqapxam. Jumanak purax llampʼu  chuymampi sarnaqapxam, maynit maynirus perdonasipxarakim jan wali lurasipxsta ukapachaxa. Kunjämtï jumanakarux [Jehová Diosax, NM] perdonapxtamxa, ukhamarak jumanakax perdonapxam. Ukat sipansa wali munasiñanïpxam, munasiñasti mayaruw tukuyi, taqi kunsa phuqharakiwa” sasa (Col. 3:12-14).

19. ¿Kunatsa tamat jithiqtat uwijitanakar tamar kuttʼayaniñatak chʼamachasiñax wali wakiskirïpacha?

¹⁹ Kunatsa yaqhipanakax tamat jithiqtapxi ukat tamaru kuttʼanipxani ukhaxa, wali suma katuqtʼatäpxaniwa, uka tuqit janiw payachasipxañapäkiti ukwa jutïr yatichäwin yatxataskañäni. Wali askipuniw tamat jithiqtatanakar yanaptʼañatak chʼamanchasiñaxa, ukwa aka yatichäwin qhanañchasiwayi ukat jutïr yatichäwinsa qhanañchasiskarakini. Aka ñanqhapachanxa, walja jaqinakaw qamiriptañataki chʼamachasipxi, ukampis maynin jakäwipaxa, Uraqpachan utjki uka qurit sipansa jukʼamp valoraniwa. Ukwa Jesusax chhaqhat uwijanakat parlkasaxa qhanañcharakïna (Mat. 18:12-14). Ukhamax janipuniw ukxa armañasäkiti, ukampisa Jehová Diosan tamapat jithiqtat uwijitanakapar jankʼak yanaptʼañatakix chʼamachasiskakiñäni.

¿Kamsasmasa?

• Diosan tamapat jithiqtapki uka jilat kullakanakar yanaptʼañatakixa, ¿kun lurañas irpir chuymaninakarux waktʼi?

• ¿Kunjamatsa tamat jithiqtir jilat kullakanakarux taqin yanaptʼaraksna?

• ¿Kunjam jaqïñasa wakisispa tamat jithiqtir jilat kullakanakar yanaptʼañatakixa?

[Jisktʼanaka]

[10 janan fotopa]

Irpir chuymaninakaxa, wali munasiñampiwa Diosan tamapat jithiqtapki ukanakarux yanaptʼapxi