44 YATICHÄWI
¿Taqe fiestanakat Diosatakejj walikïskpacha?
Jehová Diosajj kusisit jakassna, awisajj amigonakasampi familianakasamp tantachasisajj kusistʼsna ukwa muni. Ukampis ¿taqe fiestanakasa costumbrenakas Diosatakejj walikïskpachati? ¿Kunjamsa Diosar munasitassa jupar jan llakisiyañ munatassa uñachtʼaysna?
1. ¿Kunatsa jilaparte fiestanakajj Jehová Diosatak jan walïkpacha?
Inas jumajj ak jan yatkchiyätati, jilaparte fiestanakajja jaqenakan uñstayatakiwa, janirakiw Bibliajj yatichki ukarjamäkiti. Uka fiestanakajj falso religionanakan uñstayatakïspawa, maynejj jiwjjasin jakaskakiwa sasin yatichapki ukamp mayachatarakïspawa. Ukatjja kunayman creencianak utjipanwa yaqhep costumbrenakajj utjaraki (Isaías 65:11). Ukatwa Jehová Diosajj “jitheqtjjapjjam, jan jukʼampi uka qʼañunak llamktʼapjjamti” sasin servirinakaparojj ewjjtʼistu (2 Corintios 6:17). a
2. ¿Jaqenakar wal jachʼañchañatak amtaski uka fiestanakat kunsa Jehová Diosajj amuyi?
Waljanejja ‘aleq jaqenakarukiw confiyapjje’, ukampis Jehová Diosajj jan uka jaqenakjamäñasatakiw ewjjtʼistu. Jaqenakar confiyañajj mä trampar uñtasitawa (Jeremías 17:5 liytʼäta). Yaqhep fiestanakajja marka apnaqerinakaru, jan ukajj markapar arjjatas jiwirinakar amtañatakiw lurasi. Yaqhep fiestanakanjja banderanakaru jan ukajj yaqha ukhamanakaruw jachʼañchasi. Maysa toqetsti markanakan urup amtañatakiw yaqhep fiestanak lurapjjaraki (1 Juan 5:21). Ukatjja kuntï politiconakajj amuyapki uka toqet parlañataki, jan ukajj jaqenakan saytʼasipjjañapatakiw yaqhep fiestanak lurapjjaraki. Jiwasatï mä jaqeru, jan ukajj mä organizacionar wal jachʼañchsna ukhajja, ¿kunjamakis Jehová Diosajj jikjjatasispa?
3. ¿Kuna lurañanakas mä fiestarojj jan walir tukuyaspa?
Bibliarjamajja ‘jiljañamp machjasiñasa, jan wali loqhe fiestanakasa, machjasiñ fiestanakas’ janiw walïkiti (1 Pedro 4:3). Yaqhep fiestanakanjja, jaqenakajj janiw kuntï lurapki uk amuyasjjapjjeti, jan walinakwa lurapjjaraki. Jiwasatï Jehová Diosan amigopäskakiñ munstan ukhajja, janipuniw uka jan walinakampejj qʼañuchasiñasäkiti.
JUKʼAMP YATJJATAÑÄNI
Fiestanak toqet parlkasinjja, Jehová Diosar kusisiykir amtanakar puriñatakejj kunas yanaptʼiristam uka toqetwa jichhajj yatjjatañäni.
4. Jehová Diosajj uñiski uka fiestanak janipun amtapjjañäniti
Efesios 5:10 liytʼasajja aka toqetwa parltʼapjjäta:
-
Mä fiesta amtañäniti janicha uk janïr amtkasajja, ¿kuna toqetsa amuyasiñasa?
-
¿Jumajj jakaskta uka cheqan kuna fiestanaksa amtapjje?
-
¿Uka fiestanakajj Jehová Diosatak walikïskpachati?
Amuytʼañataki, ¿kunsa Jehová Diosajj cumpleañonakat amuyi uk jisktʼasirïtati? Diosan servirinakapajj cumpleañonak amtapjjänwa sasajja janiw Bibliajj qhanañchkiti, ukampis Jehová Diosar jan adoriri pä jaqenakan cumpleañopatwa parli. Génesis 40:20-22; Mateo 14:6-10 liytʼasajja aka toqetwa parltʼapjjäta:
-
¿Kunas uka pä cumpleañonakan pasäna?
-
Liytʼktan uka sarnaqäwinakarjamajja, ¿kunjamsa Jehová Diosajj cumpleañonakar uñji?
Ukampis inas jumajj akham sasin jisktʼasta: ‘¿Mä cumpleaño amtañasa mä fiestajj jan Bibliarjamäki ukar sarañas Diosatakejj jan walipuniti?’ sasa. Éxodo 32:1-8 liytʼapjjäta. Ukatjja VIDEO uñtasajj aka toqetwa parltʼapjjäta:
-
Jehová Diosatakejj kunas walikïski kunas jan walïkaraki uka toqet amuytʼasiñasajja, ¿kunatsa wali wakiskirejja?
-
¿Kunjamsa uk lursna?
¿Kunjamatsa mä fiestajj Jehová Diosatak walikïskatap yatsna?
-
¿Uka fiestajj janit Diosajj yatichki ukarjamäki? Uk yatiñatakejja kunjamsa uka fiestajj uñstawayi uka toqet yatjjatam.
-
¿Jaqenakaru, organizacionanakaru, banderanakaru jan ukajj yaqha ukhamanakarut jachʼañchi? Jiwasajja Jehová Diosaruw taqe kunat sipansa jachʼañchtanjja, jupakiw aka oraqen utjki uka jan walinak chhaqtayaspa sasaw confiyaraktanjja.
-
¿Uka fiestan kunanaktï Jehová Diosajj juchañchki ukanakti lurapjje? Sarnaqatasan qʼomäñasawa.
5. Kunarutï creykta ukar respetapjjañapatak mayninakar yanaptʼam
Diosatak jan walïki uka fiestar sarañasatak mayninakajj wal chʼamañchapjjestaspa ukhajja, “janiwa” sañajj chʼamakïspawa. Janiw sarkäti sasinjja wali pacienciampi respetompiw qhanañchañama. Ukhaman uñjasisajj kunsa mä kullakajj luräna uk yatiñatakejja, VIDEO uñtapjjäta.
Mateo 7:12 liytʼasajja aka toqetwa parltʼapjjäta:
-
Uka textorjamajja, ¿jan jiwasjam creencianakanïpki uka familiaranakasarojj janiw uka fiesta amtapjjañamäkiti sañajj walikïskaspati?
-
Fiestanak jan amtasajja, ¿kunjamatsa familiaranakamar munasitamsa valoranit uñjatamsa uñachtʼayasma?
6. Jehová Diosajj kusisitäsna ukwa muni
Jehová Diosajj familiaranakasampi amigonakasampi kusistʼañaswa muni. Eclesiastés 8:15 liytʼasajja aka toqetwa parltʼapjjäta:
-
Uka textorjamajja, ¿Jehová Diosajj kusisit jakasiñas munatap kunjamanakatsa uñachtʼayi?
Jehová Diosajja servirinakapajj mayninakampïsajj kusistʼapjjaspa ukwa muni. Kunjamsa jilat kullakanakasajj asambleas internacionales ukanakan kusistʼapjje uk yatiñatakejja, VIDEO uñtapjjäta.
Gálatas 6:10 liytʼasajja aka toqetwa parltʼapjjäta:
-
Jaqenak layku mä kun lurañatakejja, ¿jichhürunakan utjki uka fiestanak lurañapunit wakispacha?
-
Regalonak kunjam churañas jumarojj gusttam: ¿mä fechan obligat churaña, jan ukajj chuymatpach mistki uka regalo churañacha?
-
Walja Testigonakajja awisajj wawanakapan kusistʼapjjañapatakejj kuns organiztʼapjjapuniwa, regalonaksa churapjjarakiwa. Jumatï wawanakanïsta ukhajja, ¿kunanaksa jupanakatak lurasma?
YAQHEPANAKAJJ AKHAM SAPJJEWA: “Kunjamjjay uka fiestajj uñstaskchi, familiaranakampi amigonakampi kusistʼañaw jukʼamp wakiskirejja” sasa.
-
¿Jumajj uka toqet kunsa amuyta?
¿KUNSA YATEQAWAYTAN?
Jehová Diosajj familiaranakasampi amigonakasampi kusistʼañaswa muni. Ukampis uñiski uka fiestanakar sarañas janiw munkiti.
Amtañataki
-
Mä fiestajj walikïskatap yatiñatakejja, ¿kunanaksa jisktʼasiñasa?
-
¿Kunjamsa familiaranakasarusa amigonakasarus fiestanak jan amtatas qhanañchsna?
-
¿Kunjamatsa Jehová Diosajj kusisit jakasiñas munatapsa kusistʼañas munatapsa yattanjja?
JUKʼAMP YATJJATAÑAMATAKI
Cristianonakajj jan amtapki uka yaqhep fiestanakat yatjjatam.
“¿Por qué los testigos de Jehová no celebran ciertas fiestas?” (Artículo de jw.org)
Jehová Diosatakejj cumpleañonakajj janiw walïkiti sasin kunatsa sissna uk pusi toqet yatjjatam.
“¿Por qué los testigos de Jehová no celebran los cumpleaños?” (Artículo de jw.org)
Fiestanakajj amtaski ukhajja, kunjamsa wawanakajj Jehová Diosar munasipjjatap uñachtʼayapjjaspa uk videon uñtam.
Waranq waranqa cristianonakaw jan navidad amtapkiti. ¿Ukham lurasajj kunjamakis jikjjatasipjje?
“Encontraron algo mejor” (La Atalaya, 1 de diciembre de 2012)
Akanakajj inas gustarakiristam
KUNANAKSA JUKʼAMP JISKTʼASIPJJE
¿Kunjamsa Jehová Diosan Testigonakapajj Bibliat yatichapjje?
Jehová Diosan Testigonakapajj gratisakiw Bibliat yatichapjje, kawknïr Bibliampis yateqañ munta ukajj jumatäjjewa. Jumamp chika yateqapjjañapatakejja, taqpach familiamaruw invittʼasma, amistadanakamarus invittʼarakismawa.
