8 YATICHÄWI
Josiasajj suma amigonakanïnwa
¿Diosan munañap lurañajj chʼamäpachati?... “Chʼamakiwa” sasaw waljanejj sapjje. Ukampis Bibliajj janiw ukham yatichkiti. Josías sat mä waynat parltʼañäni, jupajj Diosan munañaparjamaw taqe kuns luräna siw Bibliajja. Juparojj suma amigonakanïñaw wal yanaptʼäna. Jupanakat jichhajj yatjjatañäni.
Josiasan tatapajj Amón satänwa, Judá markankir reyïnwa. Jupajj jan wali jaqepunïnwa ukat idolanakaruw yupaychäna. Jupajj jiwjjäna ukhaw Josiasar reyit uttʼayapjjäna. Jupasti, kimsaqallq maranikïnwa, ukhaw Judá marka apnaqañ qalltäna. ¿Tatapjamat jan walinak lurpachäna?...
Kʼari diosanakar yupaychañajj janiw walïkiti sasaw Sofoniasajj jaqenakar säna
Jiskʼatpach Josiasajj Jehová Diosar serviñ munäna. Ukatwa Diosar munasiri amigonak ajllïna. Jupanakaw kunatï askïki uk lurañapatak yanaptʼapjjäna. ¿Khitinakäpjjänsa amigonakapajja?
Maynejj Sofonías satänwa, jupajj Diosan profetapänwa. Ukat akham sasaw Judá markankirinakar yatiyäna: “Kʼari diosanakar yupaychasipkakïta ukhajja, jan walinwa uñjasipjjäta” sasa. Josiasajj uka profetar istʼasaw idolonakar yupaychañat sipansa, Jehová Diosar yupaychäna.
Mayni amigopajj Jeremías satarakïnwa. Jupajj Josiasan mitapänwa ukat waynitutpach jakʼapuran jakapjjäna. Purapatwa Jehová Diosar istʼañataki ukat kunatï askïki uk lurañatak yanaptʼasipjjäna. Jeremiasajj Josiasan suma amigopänwa. Ukatwa, Josiasan jiwatapat kunja llakitas jikjjatasïna uk mä qʼochun qellqäna.
Jeremiasampi Josiasampejj purapatwa Jehová Diosar serviñatak yanaptʼasipjjäna
¿Kunsa Josiasan sarnaqäwipajj yatichistu?... Jupajj jiskʼatpach Diosan munañap luräna. Ukatwa Diosar munasiri amigonak ajllïna. ¿Jumajj Diosar kusisiyañ munaraktati? Ukhamajj Jupar munasiri amigonakwa ajlliñama. Jupanakaw kunatï askïki uk lurañatak yanaptʼapjjätam.
BIBLIAT LIYTʼAÑÄNI
Akanakajj inas gustarakiristam
Bibliat apstʼata sarnaqäwinaka
Qhip qhipa suma apnaqiri
Josías reyix waynatpachaw jan axsaras idolonak tʼunthapiyäna.
