1-3. Nazaret markankir jaqenakar yatichkäna ukhajja, ¿kun amuyapjjañapsa Jesusajj munäna, ukat ukham amuyapjjañapatakejj kunsa jupajj luräna?

 JESUSAJJ Nazaret markapar kuttʼasajja, ukanwa predicañ qalltäna. Jupajj ukankir jaqenakajj kunatï cheqäki uka yatichäwinak sum amuyapjjañapwa munäna, mä arunjja nayra maranakatpach parlaskäna uka Mesiasätap amuyapjjañapwa munäna. ¿Kunjamsa Jesusajj Mesiasätap uñachtʼaypachäna?

² Amuyatajja waljaniw Jesusan milagronak lurañap suyapjjäna, kuna laykutejj walja milagronak luratapwa istʼapjjäna. Ukampis Jesusajj janiw kuna milagrsa lurkänti, antisas kunjamtï lurirïkäna ukarjamajj sinagogaruw saräna. Uka cheqanjja jupajj liytʼañatakiw saytʼasïna, ukatwa juparojj Isaiasan rollop churapjjäna, uka rollojj wali jachʼänwa. Uka rollo katusajj kawkïr cheqtï liytʼañ munkäna uka cheqwa wali amuyump thaqtäna, jupajj thaqkäna uka arunakajj Isaías 61:1-3 textonwa jikjjatasi. Ukjjarusti uka texto katusajj wali jachʼatwa liytʼäna (Lucas 4:16-19).

³ Sinagogankapkäna uka jaqenakajja, uka textojj Mesiasat parlatap qhan amuyapjjpachäna. Ukatwa wali atencionamp Jesusarojj uñchʼukipjjäna, janirakiw khitis mä kuns arskänti. Ukjjarojja, Jesusajj wali sumwa uka profecía qhanañchäna, akham sarakïnwa: “Kuntï jumanakajj istʼapkta uka qellqatajj jichhüruw phoqasi” sasa. Chuymar purtʼkir uka suma arunakap istʼasajja, ukankir jaqenakajj wal  musparapjjäna, ukampis jilaparte jaqenakajj Jesusan milagronak lurañapwa suyasipkakïna. Jesusasti janiw kuna milagrsa lurkänti, antisas Diosar jan confiyapjjatap uñachtʼayañatakejj Bibliankir mä sarnaqäwitwa jan ajjsaras parläna. Uk istʼasajj Nazaret markankir jaqenakajj taqeniw wal colerasipjjäna, sartasasti jankʼakiw Jesusarojj markat anqäjjar jiwayañatak irpsuwayapjjäna (Lucas 4:20-30).

4. ¿Kunjamsa Jesusajj yatichirïna, ukat kuna toqetsa aka capitulon yatjjataskañäni?

⁴ Jesusajj uka urunwa kunjamsa predicañapäna uk qhanstayäna, jupajj mä kun qhanañchañatakejj Diosan Arupampipuniw yanaptʼayasirïna. Cheqas kuna milagronaktï lurkäna ukanakajja, espíritu santojj kunjamsa jupar yanaptʼäna ukwa uñachtʼayäna. Ukampis janiw ukajj Jesusatak jukʼamp importantëkänti, jan ukasti Diosan Arupat parlañaw jukʼamp importantënjja. Kunjamsa Jesusajj mä suma ejemplo jaytawayistu uka toqetwa jichhajj yatjjataskañäni, kunjamsa jupajj Diosan Arup aytirïna, arjjatirïna ukat qhanañchirïna uka toqets yatjjataskarakiñäniwa.

5. ¿Jaqenakan kun amuyapjjañapsa Jesusajj munäna, ukat kunjamsa kuntï yatichkäna ukajj Diosat jutatap uñachtʼayäna?

⁵ Kuntï yatichkäna ukajj kawkitsa jutäna uk istʼirinakapan amuyapjjañapwa Jesusajj munäna. Ukatwa jupajj akham säna: “Kuntï nayajj yatichkta ukajja, janiw nayankkiti, jan ukasti khititejj nayar khitankitu ukankiwa” sasa (Juan 7:16). Yaqha horasan akham sasaw qhanañcharakïna: “Janiw nayajj kunsa pachpa amtajat lurkti, jan ukasti kunanaktï alajjpachankir Awkejj yatichkitu ukanak parlta” sasa (Juan 8:28). Ukatjja akham sarakïnwa: “Kunanaktï jumanakar sapksma ukanak janiw amtajat parlkti, jan ukasti nayamp chikäski uka Awkiw naya taypejj lurañanakap luraski” sasa (Juan 14:10). Uka arunakapan cheqätap  uñachtʼayañatakejja, Jesusajj Diosan Arupat kutin kutiniw aytäna.

6, 7. 1) ¿Qhawqha kutis Jesusajj Hebreo Arut Qellqatanakat aytäna, ukat kunatsa uk yatiñajj jan armkañajja? 2) ¿Kunjamsa Jesusajj escribanakat sipans yatichirïna?

⁶ Jesusan arunakapajj Biblian uñstki uka toqet yatjjatasajja, jupajj Hebreo Arut Qellqatanakat mä chikatats jil aytatapwa amuytanjja. Qalltan uk yatiñajj janiw musparkañäkaspati, yamas yaqhepanakajj akham sasaw jisktʼasipjjaspa: “Jupajj kimsa mara chikataniw predicasa ukat yatichas sarnaqäna, ukampis ¿kunatsa Hebreo Arut Qellqatanakat jan taqpach aytkpachäna?” sasa. Cheqas Bibliankir taqpach libronak aytañajj janiw jupatakejj chʼamäkaspänti. Ak amtañäni: Jesusan arunakapasa luratanakapas janiw taqpachajj Biblian qellqatäkiti (Juan 21:25). Ukatjja Bibliankir Jesusan taqpach arunakap jachʼat liytʼañatakejj mä qhawqha horanakakiw munasi. Ukhamasti, Diosampita Reinopampit mä qhawqha horanak yatichatapasa, Hebreo Arut Qellqatanakat mä chikatat jil aytatapas wali musparkañawa. Ukhamarus Jesusajj janiw taqpach rollonakanïkänti. Ukampis Qollun Yatichkäna ukhajj Hebreo Arut Qellqatanakat walja kutiw aytäna. Ukanakat yaqhepjja kunjam qellqatäkäntï ukhampun aytäna, yaqhepsti pachpa arunakapampikiw qhanañcharakïna. Ukampis taqe ukanak jupajj pʼeqepatwa arsurïna.

⁷ Diosan Arupat aytasajja, qhawqsa uka Qellqatanakarojj respetäna ukwa Jesusajj uñachtʼayäna. Ukatwa “kunjamsa yatichäna uk istʼasajj jaqenakajj wal musparapjjäna. Jupajj janiw escribanakjam yatichkänti, jan ukasti autoridadan jaqjamaw yatichäna” (Marcos 1:22). Escribanakarojja, ley oral sasin uñtʼatäkäna uka toqet parlañaw wal gustäna, ukatwa jupanakajj uka tiempon utjkäna uka rabinonakat wal aytasipjjerïna. Ukampis Jesusajj janipuniw escribanakjam yatichirïkänti, ni rabinonakatsa parlirïkänti. Jan  ukasti Diosan Aruparojj wali respetompiw uñjäna, ukatwa jupajj kutin kutini “Qellqatawa” sasin arsurïna. Jupajj uka arsa ukat niya ukham yaqha arunaksa, discipulonakapar yatichañataki ukat pantjat amuyunak cheqañchañatakiw aytirïna.

8, 9. 1) ¿Kunjamsa Jesusajj Diosan Arupar wal respetatap uñachtʼayäna? 2) ¿Kunjamsa religión pʼeqtʼirinakajj Diosan Arupar jan respetapjjatap uñachtʼayapjjäna?

⁸ Jesusajj comerciantenakar Jerusalenankir templot alisnukkäna ukhajj akham sänwa: “Qellqatawa: ‘Utajajj oración lurañ uta satäniwa’ sasa. Ukampis jumanakajj lunthatanakan utaparuw tukuyapjjtajja” sasa (Mateo 21:12, 13; Isaías 56:7; Jeremías 7:11). Uka uru nayrajja, jupajj walja milagronakwa ukan luräna. Jiskʼa wawanakas uk uñjasajj wal musparapjjäna, ukatwa Jesusarojj wal jachʼañchapjjäna, ukampis jilïr sacerdotenakas escribanakas walpun colerasipjjäna. Sapjjarakïnwa: “¿Kuntï sapki ukanak istʼtati?” sasa. Uk satasti Jesusajj sarakïnwa: “Jïsa, istʼtwa. ‘Jiskʼa wawanakana ukhamarak ñuñuskir wawanakan lakapatwa jachʼañchir arunak mistuytajja’ siski uka arunak ¿janit mä kutis liytʼapkta?” sasa (Mateo 21:16; Salmo 8:2). Ukham sasajja, kuntï uka wawanakajj lurasipkäna ukan walikïskatapwa Jesusajj uñachtʼayañ munaskäna.

⁹ Uka qhepat religión pʼeqtʼirinakajj templonwa tantachasipjjäna, ukhamat Jesusamp jiskhisiñataki ukat “¿kuna autoridadampis jumajj ukanak lurta?” sasin jisktʼañataki (Mateo 21:23). Jesusasti khitis autoridad churäna uk qhanwa säna. Ukhamarus jupajj janiw machaq yatichäwinak uñstaykänti, jan ukasti kuntï Diosan Arupajj siskäna ukakwa qhanañchaskäna. Antisas jilïr sacerdotenakampi escribanakampiw Diosarusa Aruparus jan respetapkänti, ukatwa Jesusajj jupanakar cheqañchäna (Mateo 21:23-46).

10. ¿Kunjamsa Jesusat yateqasitas uñachtʼaysna, ukat kunanakas jichhürunakan utjistu?

 ¹⁰ Cheqpach cristianonakajja, Jesusjamarakiw predickasajj Diosan Arupat parltanjja. Aka oraqpachanjja, Jehová Diosan Testigonakaparojj Bibliat taqe chuyma yatiyapjjatapatwa uñtʼasi. Ukhamarusa, qellqatanakasan walja kutiw Bibliat apstʼat textonakajj uñsti, jiwasas jaqenakar parlkasajj Bibliat liytʼañatakiw chʼamachastanjja (2 Timoteo 3:16). Maynejj Bibliat liytʼarapiñasataki ukat qhanañchtʼañasatak tiempo apstʼasi ukhajja, walpun kusistanjja. Jiwasajj janiw Jesusjam perfecto memorianïktanti, ukampis Jesusan urunakapat sipans walja yanaptʼanakaw utjistu. Jichha tiemponjja walja arunakar traducit Bibliaw utjistu, thaqktan uka texto jikjjatañatakejj walja yanaptʼanakaw utjarakistu. Ukhamasti, wakiskani ukhajj jaqenakatak Biblia liytʼañatakisa, Bibliat parlañatakis chʼamachasipjjapuniñäni.

11. ¿Kunatsa Jesusajj Diosan Arup sapa kut arjjatäna?

¹¹ Mä kutejja, Jesusajj Awkipar oracionan mayiskasajj akham sänwa: “Arunakamajj cheqawa” sasa (Juan 17:17). Diosan Arunakap contra saytʼir enemigonakajj kunjamsa Bibliarojj sapa kut jan waltʼayapjjäna uk Jesusajj sum yatïna, ukampis uk yatisajj janiw jupajj aynachtʼkänti. Kuna laykutejj ‘aka mundo apnaqeri’ Supayan kʼarïtapsa, ‘kʼarin awkipätapsa’ sum yatïna (Juan 8:44; 14:30). Kunapachatï Jesusajj Supayan yantʼanakapar saykatäna ukhajja, kimsa kutiw Qellqatanak aytäna. Ukat Supayajj Salmo libron mä versiculop aytasis qʼewikipkäna ukhajja, Jesusajj Diosan Arunakap arjjatänwa, Supayajj kunjamsa Diosan Arup mayjtʼayäna uks qhanstayarakïnwa (Mateo 4:6, 7).

12-14. 1) Religión pʼeqtʼirinakajja, ¿kunjamsa Moisesan Leyipar jan respetapjjatap uñachtʼayapjjäna? 2) ¿Kunjamsa Jesusajj Diosan Arup arjjatäna?

¹² Niyakejjay jaqenakajj Diosan Arup jan wal  apnaqapjjchïnjja, sapa kutiw Jesusajj Diosan Arup arjjatäna. Uka tiempon jakir religión pʼeqtʼirinakajja, janiw Diosan Arup cheqaparjam apnaqapkänti. Jupanakajj Moisesan Leyipan utjkäna ukanakat yaqhepanakakwa wali importantet uñjapjjäna, ‘ukanak sum phoqañaw wakisi’ sasaw sapjjarakïna. Ukampis Biblian wiñay yatichäwinakarjam sarnaqañajj janis wakiskaspa ukhamwa amuyapjjäna. Uk lurasajj janiw Diosar cheqaparjam adorañatakejj jaqenakar yanaptʼapkänti. Kunatï wali importantëki ukjjat llakisiñat sipansa, antisakiw jupanak pachpat llakisipjjañapataki, yaqhanakamp sum uñjayasipjjañapatak jaqenakar chʼamañchapjjäna. Cheqaparjam taqe kun uñjañasa, khuyaptʼayasirïñasa jan jaytjasirïñas janiw jupanakatakejj wali importantëkänti (Mateo 23:23). Ukhamajj ¿kunjamsa Jesusajj Diosan Leyip arjjatpachäna?

¹³ Jesusajj Qollun Yatichkäna ukhajja, walja kutiw “jumanakajj istʼapjjaraktaw akham siri” sasin säna, ukhamat Moisesan Leyipan utjkäna uka mandatonakat parlañ qalltañataki. Ukjjarojja “nayajj sapjjsmawa” sasaw sarakïna, ukham sasajj Moisesan Leyipan utjkäna uka wiñay yatichäwinak sum qhanañchañatakiw arsüna. “Nayajj sapjjsmawa” sasajja, Jesusajj Moisesan Leyipar respetatapa ukat arjjatatapwa uñachtʼayaskäna. Amuytʼañataki, “janiw jaqe masimar jiwayañamäkiti” sasin qellqatäkäna uka mandamientjja israelitanakajj sum uñtʼapjjäna, ukampis khititï jaqe masipar uñiski ukajj uka mandamiento contraw saytʼaski sasaw Jesusajj säna. Ukat khititejj mä warmir jan wali amtampi uñchʼukki ukajja, Diosan leyinakap contraw saytʼaski sasaw sarakïna (Mateo 5:17, 18, 21, 22, 27-39).

¹⁴ Tukuyañatakejja Jesusajj akham sänwa: “Jumanakajj istʼapjjaraktaw akham siri: ‘Jaqe masimarojj munasiñamawa, enemigomarojj uñisiñamarakiwa’ sasa. Ukhamarus nayajj sapjjsmawa: enemigonakamar munasiñampi uñjasipkakim, arknaqapktam ukanakatakis oración lurasipkakim”  sasa (Mateo 5:43, 44). ¿“Enemigomarojj uñisiñamarakiwa” siski uka arunakajj Diosan Arupan qellqatänti? Janiwa, religión pʼeqtʼirinakakiw enemigomarojj uñisipjjañamawa sasin yatichapjjerïna. Ukham yatichasajja, jupanakajj Diosan perfecto Leyipwa chʼamaktʼayasipkäna. Ukatwa Jesusajj jan ajjsaras Diosan Arup arjjatäna (Marcos 7:9-13).

15. Religión pʼeqtʼirinakajj Diosan Leyip phoqañajj wali chʼamäkaspas ukham parlapjjäna ukhajja, ¿kunjamsa Jesusajj arjjatäna?

¹⁵ Diosan Leyip phoqañajj wali chʼamäkaspasa ukhamwa religión pʼeqtʼirinakajj jaqenakar yatichapjjerïna, ukhamatwa jan walit uñjayapjjäna. Sañäni, sábado urun Jesusan discipulonakapajj trigo yapunak taypi sarasipkäna ukhajja, sarkasajj trigo puyanakwa kʼichirapjjäna. Uk uñjasajja, sábado urun jan lurasiñapäki ukanakwa jupanakajj lurasipki sasaw fariseonakajj sapjjäna. Fariseonakan ukham parlapjjatapajj janiw walïkänti, ukatwa Jesusajj Diosan Arupar arjjatañatakejj Bibliat apstʼat mä sarnaqäwit parläna. Jupajj akham sänwa: ‘Davidajj jaqenakapamp chik manqʼa pistʼayasipjjäna, manqʼatsa wal awtjayasipjjäna ukhajja, Diosan utapar mantasaw Diosar loqtat tʼantʼanak manqʼantapjjäna’ sasa. Ukham sasajja, fariseonakajj Jehová Diosan khuyaptʼayasirïtapsa sinttʼasirïtapsa jan amuyapjjatapwa Jesusajj qhanstayäna (Marcos 2:23-27).

16. 1) Moisesan Leyipan kunatï divorciasiñ toqet qellqatäkäna ukjja, ¿kunjamsa religión pʼeqtʼirinakajj mayjtʼayapjjäna? 2) Uk uñjasajj ¿kunsa Jesusajj luräna?

¹⁶ Religión pʼeqtʼirinakajja, Diosan Leyip jan phoqañatakejj jupanak pachpaw yaqha leyinak apsusipjjäna, ukhamatwa Diosan Leyipajj janis walïkaspa ukham uñjayapjjäna. Diosan Leyipajj divorciasiñ toqet kamsänsa uka toqet amuytʼañäni. Leyirjamajja, mä chachajj warmipan “phenqʼaskañ luräwi” luratapat divorciasispänwa, kuna laykutejj ukham jan wali luratapajj familiaruw mä phenqʼa uñjayäna (Deuteronomio 24:1). Ukampis Jesús  tiemponjja, religión pʼeqtʼirinakajj janiw cheqaparjam uka ley phoqapkänti, jupanakajj akham sasaw yatichapjjäna: ‘Chachanakajj kuna razonats warmipat divorciasipjjakispawa, warmin manqʼa nakhantayatapats divorciasiñatakejj librëpjjewa’ sasa. a Ukatwa Jesusajj ‘Moisesan Leyip jumanakajj qʼal mayjtʼayapjjtajja’ sasin qhan säna, ukjjarojja qalltan kuna amtampitï Jehová Diosajj matrimonio uttʼaykäna ukwa qhanstayäna. Uka Leyirjamajja, mä chachasa mä warmis maynimpikiw casarasiñapäna, ukatjja qʼañu jucha lurañ utjatapatakwa maynejj divorciasiñ amtañapäna (Mateo 19:3-12).

17. Jesusat yateqasisajj ¿kunjamsa Diosan Arup arjjattanjja?

¹⁷ Jichha tiemponjja, Jesusan arkirinakapajj ukhamarakiw Diosan Arup jan walinakat arjjattanjja. Religión pʼeqtʼirinakajja, Diosan Arupajj janiw jichhürunakan yanaptʼasjjeti sasaw parlapjje, ukham parlasajj Bibliaruw jan walit uñjayapjje. Ukatjja Biblian yatichäwinakap qʼewinukusin jan cheqaparjam yatichasaw jan walit uñjayapjjaraki. Ukampis jiwasatakejj Diosan Arup arjjatañajj mä suma privilegiowa, ukatwa Diosan Arupajj qʼomawa yatichäwinakapas cheqaparakiwa sasin jan ajjsaras qhanañchtanjja. Ukatjja Awkimpi, Yoqampi, espíritu santompejj janiw mä sapa Diosäkiti sasaw qhanañcharaktanjja (Deuteronomio 4:39). Cheqas Diosan Arup arjjatktan ukhajj wali amuyumpi, llampʼu chuymampi, wali respetompiw parltanjja (1 Pedro 3:15).

18, 19. Jesusajj chuymar purtʼkiri ukat wali sumwa Diosan Arup qhanañchirïna sasajj ¿kunatsa sissna?

¹⁸ Hebreo Arut Qellqatanakajj qellqaskäna ukhajja, Jesusajj  alajjpachanwa jakaskäna. Ukatwa Jesusajj aka oraqer jutañap yatisasa, Diosan Arupat qhanañchañapätap yatisas wal kusispachäna. Jesusajj jiwatat jaktjjäna uka jan armkañ urut amuytʼañäni. Uka urunjja, Emaús sat jiskʼa markar sarkasajj pä discipulonakapampiw Jesusajj jikisïna, jupanakajj janiw Jesusätap amuyapkänti, ukatwa munat Yatichiripan jiwatapat kunja llakitas uñjasipjjäna uk jupar yatiyapjjäna. Uk istʼasajja, Jesusajj kunanaktï taqpach Qellqatanakajj “jupjjat parlki ukanakwa jupanakar qhanañchäna. Moisesana ukhamarak taqe Profetanakan Qellqatanakapat qalltasaw jupanakar qhanañchäna”. Uka arunak istʼasajj ¿kunjamas discipulonakajj jikjjatasipjjpachäna? Uka qhepatjja, akham sasaw jupanakkam parlasipjjäna: “Kunapachatï jupajj thak jutkasin parlkistäna, Qellqatanakatsa qhanañchkistäna ukhajja, ¿janit chuymasajj nakkistänjja?” sasa (Lucas 24:15-32).

¹⁹ Ukatjja uka urpachaw Jesusajj apostolonakapampi ukat yaqha jaqenakampejj tantachasïna. Ukjjarusti “kuntï Qellqatanakajj sañ munki ukanak sumpach amuytʼapjjañapatakiw jupanakar yanaptʼäna” (Lucas 24:45). Jesusajj kuntï uka urun lurkäna ukanak uñjasajja, apostolonakasa jupar istʼapkäna uka jaqenakas kunanaksa uka nayrajj taqe jupanak laykojj luräna, kunja kusisitas jikjjatasipjjäna ukanakwa amtasipjjäna. Uka urunakanjja, Jesusajj walja kutiw istʼirinakapajj uñtʼapkäna uka Qellqatanak wali sum qhanañchäna, uk istʼasasti jaqenakajj walpun musparapjjarakïna. Kuna laykutejj Diosan Arup jukʼamp sumwa jupanakajj amuyapjjäna, yaqha cheqap yatichäwinaksa yateqapjjarakïnwa.

20, 21. Kuntï Jehová Diosajj Moisesar siskäna ukjja, ¿kunjamsa Jesusajj qhanañchäna?

²⁰ Mä kutejja, judionakan sectapankir mä qhawqha saduceonakampiw Jesusajj parläna, jupanakajj janiw jiwatanakajj jaktanipkaniti sapkäna uka sacerdotenakamp  mayachasitäpjjarakïnwa. Ukatwa Jesusajj jupanakar akham säna: “Jumanakajj ¿janit jiwatanakan jaktaniñapjjat liytʼapkta? ¿Janit kuntï Diosajj jumanakar sapktam uk liytʼapkta? Diosajj akham sänwa: ‘Nayajj Abrahanana, Isaacana ukhamarak Jacobun Diosapätwa’ sasa. Cheqas jupajj janiw jiwatanakan Diosapäkiti, jan ukasti jakirinakan Diosapawa” sasa (Mateo 22:31, 32). Uka textojj Moisesan qellqatätap laykojj saduceonakan wali uñtʼatänwa, taqe chuymarakiw wal respetapjjäna. Ukampis kuntï Jesusajj qhanañchkäna ukajj chuymar purtʼkirïnwa, ¿kunatsa ukham sistanjja?

²¹ 1514 antes de Cristo mara jakʼanakanjja, Jehová Diosajj nina aqaskir mä chʼapi taypitwa Moisesar parläna (Éxodo 3:2, 6). Uka tiempotakejja, Abrahanajj 329 maranakaw jiwatäjjäna, Isaacasti 224 maranaka ukat Jacobojj 197 maranakaw jiwatäjjapjjarakïna. Ukampis Jehová Diosajj jupanakan “Diosapätwa” sasaw säna. Jesusamp parlapkäna uka saduceonakajj ak sum yatipjjäna: Jehová Diosajj janiw jiwatanakan Diosapäkiti, janirakiw jiwatanakan markaps apnaqkaspa ukhamäkiti. Jan ukasti, Jehová Diosajj “jakirinakan Diosapawa” sasaw Jesusajj qhanañchäna. Uka arunakampejj ¿kamsañs munaskäna? Jesús pachpaw akham sasin tuktʼayäna: “Jupatakejj taqe uka jaqenakajj jakasipkiwa” sasa (Lucas 20:38). Jehová Diosan munat servirinakapat khitinakatï jiwatäjjapjje ukanakajja, jupan perfecto memoriapankapjjewa. Jutïrinjja Diosajj taqe jupanakaruw jiwatat jaktayani, ukatwa jupatakejj taqe uka jaqenakajj jakasipkiwa sasin Bibliajj qhanañchi (Romanos 4:16, 17). Diosan Arupat ukham qhanañchasitapajj wali sumapuniwa, ukatwa Jesusar istʼapkäna uka jaqenakajj walpun “yatichäwinakapat musparapjjäna” (Mateo 22:33).

22, 23. 1) Diosan Arupat qhanañchkasajja, ¿kunjamsa Jesusat yateqasitas uñachtʼaysna? 2) ¿Kunsa jutïr capitulon yatjjataskañäni?

²² Cristianonakajj Jesusjamarakiw Diosan Arup qhanañchañatakejj  mä suma privilegionïtanjja. Cheqas jiwasajj janiw Jesusjam perfecto memorianïktanti, ukampis kuntï jaqenakajj yatipki ukanak jukʼamp sum amuyapjjañapatakiw jupanakar qhanañchsna, ukatjja jan sum amuyapki ukwa jupanakar qhanañcharaksna. Sañäni, inas Diosajj kamsatasa uk jan yatkasin “sutimajj jachʼañchatäpan” sasin wal mayisipjjchi, jan ukajj Diosan Reinopajj kunasa uk jan yatkasin “Reinomajj jutpan” sasin wal mayisipjjarakchi (Mateo 6:9, 10). Kunapachatï jupanakajj jiwasar taqe chuyma istʼapjjestu, Diosan sutipata ukat Reinot qhanañchir wali atencionamp istʼapjjarakistu ukhajja, walpun kusistanjja.

²³ Jiwasatï Jesusjam cheqa yatichäwinak yatichañ munstan ukhajja, Diosan Arup aytañasapuniwa, jan walinakatsa arjjatañasawa, ukatjja wakiskani ukhas qhanañchañasarakiwa. Biblian cheqa yatichäwinakapamp jaqenakan chuymapar purtʼañatakejja, kunjamsa Jesusajj yatichirïna uka toqetwa jutïr capitulon yatjjataskañäni.