CAPÍTULO 13
‘Awkir munastwa’
1, 2. Apóstol Juanan arunakaparjamajja, ¿kunatsa Jesusajj jaqenak layku jiwañatakejj dispuestokïna?
JESUSAN apostolonakapat Juan sapakiw jakjjäna. Kunapachatï jupajj mä 100 maranëjjäna ukhajja, mä jan armkañ arumajj kunas pasäna ukwa amtasïna. Uka arumajj jupampi ukat mayni apostolonakampejj qhep qhepa kutinwa Jesusamp tantachasipjjäna, Jesusan jiwañap horasajj jakʼachasisinkarakïnwa. Kunanakapunis uka arumajj pasäna ukanak amtasin taqpach qellqañapatakejja, Diosan espíritu santopaw apóstol Juanarojj yanaptʼäna.
2 Uka arumajja, Jesusajj niyaw jiwayapjjetani sasaw jupanakar qhan säna. Jaqenak layku jiwañatakejj kuna razonatsa Diosan Yoqapajj dispuestokïna, kunatsa jan walinakan uñjasis jiwañ jan ajjsarayaskäna uk Juan sapakiw qellqawayi. Jesusajj akham sänwa: “Kunjamtejj alajjpachankir Awkejj nayar siskitu ukhampun nayajj luraskta, ukhamat aka mundojj Awkir munasitaj yatiñapataki. Sartapjjam, aka cheqat sarjjañäni” sasa (Juan 14:31).
3. ¿Kunjamsa Jesusajj Awkipar munasitap uñachtʼayäna?
3 ‘Awkir munastwa’. Jesusatakejj ‘Awkipar munasiñajj’ wali importantënwa, ukampis janiw jupajj ‘Awkir munastwa’ sasakejj sapa kut siskänti. Cheqansa, Juan 14:31 textonakwa kunjamsa Jesusajj Awkipar munasïna ukajj qhanañchasi, ukhamarus Jesusajj sarnaqatapampiw uka arunakan cheqätap uñachtʼayäna. Jehová Diosarojj qhawqsa munasïna ukajj sapüruw uñjasïna, ukatwa jupajj jan ajjsaras taqe kuns luräna, taqe kunanwa Awkiparojj istʼarakïna. Jan walinakan uñjaskäna ukhas Awkipat jan jitheqtasaw aguantarakïna.
4, 5. 1) ¿Bibliajj kuna kasta munasiñatsa jilapartejj parli? 2) ¿Kunjamsa Jesusajj Jehová Diosar munasïna?
4 Jichhürunakanjja, jaqenakajj munasiñ toqet parlir istʼapjje ukhajja, kunjamsa mä chachampi mä warmimpejj mä jukʼa tiempojj munasipjje ukakwa amuyapjje. Uka munasiñatwa jilpachajj poemanakansa cancionanakans parlasi. Kunjamsa mä chachampi mä warmimpejj munasipjje uka toqet Bibliajj parlarakiwa, ukampis janiw kunjamtï jaqenakajj munasiñat amuyapki ukham qhanañchkiti (Proverbios 5:15-21). Ukampis Bibliajj yaqha kasta munasiñatwa jilpachajj parli. Uka munasiñajj janiw pata chuyma munasiñakïkiti, ni aleq munasiñakïkisa, janirakiw obligatak munasiñakïkisa. Jan ukasti, uka munasiñajj chuymatpach cheqpach munasiñawa, ukhamarus uka munasiñajj kunatï Diosatakejj cheqapäki ukarjamawa, ukatjja maynejj kunanaktï lurki ukanwa qhan uñjasiraki. Ukham munasiñajj wiñayatakiwa, ukatwa Bibliajj akham sasin qhanañchi: “Munasiñajj janipuniw tukuskiti” sasa (1 Corintios 13:8).
5 Aka oraqen jakawayapki taqe uka jaqenakat sipansa, Jesús sapakiw Jehová Diosarojj jukʼamp munasïna. Ukatwa Jesusajj akham säna: “Jehová Diosamarojj taqe chuymamampi, taqe almamampi, taqe amuyumampi, taqe chʼamamampi munasiñamawa” sasa (Marcos 12:30). Uka mandamientojj taqe kunat sipans wali importantepuniwa, Jesusakiw uk wali sum phoqawayaraki. Ukampis ¿kunjamsa Jesusajj Awkipar munasiñ yateqäna? Jupajj aka oraqenkkäna ukhajja, ¿kunanaksa Jehová Diosar jukʼamp munasiñatakejj luräna? ¿Kunsa jiwasajj Jesusat yateqassna?
Jehová Diosampi Jesusampejj nayratpachaw wal munasipjjäna
6, 7. Proverbios 8:22-31 textojj ¿khititsa parlaski, ukat kunatsa janiw Diosan yatiñapat parlkiti sasin sistanjja?
6 Kunapachatï mä munat amigosamp mä trabajo lurktan ukhajja, juparojj wali sumwa uñtʼtanjja, ukhamarus jukʼampwa juparojj munasiraktanjja. Uka uñachtʼäwejja, kunjamsa Jehová Diosampi Yoqapampejj jukʼamp munasipjjäna ukwa amuytʼayistu. Aka libronjja walja kutiw Proverbios 8:30 textot parlawaytanjja, ukampis uka textojj kamsañpuns muni ukwa jichhajj amuytʼañäni, ukatakejj uka texto jakʼankir mayni versiculonakaw yanaptʼistani. Proverbios 8:22 al 31 textojja, cheqpach yatiñanïñajj kunasa ukwa qhanañchi. ¿Kunjamatsa uka textojj Diosan Yoqapat parlaskatap yattanjja?
7 Proverbios 8:22 textonjja yatiñajj akham siwa: “Jehová Diosaw nayarojj luritu, luräwipat nayaw qalltäwipätjja. Kunanaktï nayra tiempon lurkäna ukanakat nayrïrïtwa” sasa. Uka arunakajj janiw aleq yatiñatak parlkiti, kuna laykutejj Jehová Diosajj janiw qalltanïkisa ni tukuyanïkisa, ukatjja wiñayatpach wiñayatak yatiñaniwa. Ukhamasti, yatiñarojj janiw lurasiwaykiti, mä arunjja yatiñajj janiw qalltanïkiti (Salmo 90:2). Ukampis Jesusarojj Jehová Diosaw lurawayi, ukatwa “kunanaktï nayra tiempon lurkäna” ukanakatsa ‘taqpach luratanakapatsa Jesusaw nayrïrejja’ sasin sistanjja (Colosenses 1:15). Kunjamtï Proverbios libron qhanañchaskejja, alajjpachanakasa aka oraqes janïr luratäkäna ukhaw Diosan Yoqapajj utj-jjäna. Ukatjja jupajj Aru sasin uñtʼatarakïnwa, kuna laykutejj Diosan sutipjjaruw parläna, ukhamatwa Jehová Diosan yatiñaps qhanañchkaspa ukhamänjja (Juan 1:1).
8. Janïr aka oraqer jutkasajj ¿kunsa Jesusajj luräna, ukat kunsa Diosan luratanakap uñjasajj lurañasa?
8 Janïr aka oraqer jutkasajj walja tiempow Diosan Yoqapajj alajjpachan jakäna, ¿ukañkamajj kunsa jupajj lurpachäna? Proverbios 8:30 textorjamajja, jupajj “suma yatjjattʼat mä trabajirjamaw” Diosamp chik trabajïna. ¿Kamsañsa ukampejj munasktanjja? Colosenses 1:16 textojj uka toqet akham siwa: “Diosajj jupa taypiw taqe kunatï alajjpachansa oraqensa utjki ukanak luräna. [...] Taqe yaqha luratanakajj jupa taypiw lurasïna, jupatak luratarakiwa” sasa. Ukhamasti, Jehová Diosajj Yoqap toqew taqe kuns lurawayi, mä arunjja angelanaksa, alajjpachanaksa, oraqsa, animalanaksa, plantanaksa, jaqsa Diosajj Jesús taypiw lurawayi. Jehová Diosampi Yoqapampejja, kunjamtï mä arquitectompi mä albañilampejj trabajipki ukhamwa trabajiwayapjje. Cheqas albañilajj kuntï arquitectojj diseñki ukarjamaw luri. Ukhamajj kunapachatï aka oraqen mä kun uñjasajj musparañäni ukhajja, Jehová Diosar jachʼañchañatak chʼamachasipjjañäni (Salmo 19:1). Maysa toqetjja, Jehová Diosampi “suma yatjjattʼat” trabajiripampejj walja maranakaw wali kusisit trabajiwayapjje.
9, 10. 1) ¿Kunjamatsa Jehová Diosampi Jesusampejj wali sum apasipjjäna? 2) ¿Kunjamsa jiwasajj Jehová Diosamp sum apasiraksna?
9 Kunapachatï maynejj imperfecto masipamp walja tiempo trabaji ukhajja, awisajj janiw waltʼayasjjapjjeti. Ukampis Jehová Diosampi Yoqapampejj wali sumaw apasipjje. Jesusajj walja millón millón maranakaw Awkipamp trabajïna, ukham trabajisajj kunjamas jikjjatasïna uka toqet jupajj akham sänwa: “Jupa nayraqatanjja nayajj kusisitapunïyätwa” sasa (Proverbios 8:30). Uka textorjamajja, Jesusajj Awkip jakʼankkasajj wali kusisitaw jikjjatasïna, Awkipasti jupampïsajj wal kusisirakïna. Taqe uka maranakanjja, Jesusajj Awkipan suma chuymanïtapat (cualidadanakapat) waljanakwa yateqäna, qhepatjja Awkipjam suma chuymanëjjarakïnwa. Ukhamarus Awkimpi Yoqampejj sapürutjamaw jukʼamp munasipjjäna, ukatwa Jehová Diosampi Jesusampejj nayratpachaw wal munasipjjäna sasin sistanjja.
10 ¿Kunjamsa uk yatiñajj yanaptʼistu? Awisajja, Jehová Diosampejj janipuniw ukham sum apasksnati sasaw amuysna. Ukampis akwa amtañasa: Diosan taqe luratanakapat Jesusaw nayrïrejja, ukatwa jupajj Awkipamp wali sum apasïna. Ukhamarus Jesusajj Awkipamp chika trabajisaw jupar jukʼamp jakʼachasïna, jiwasampejj ukaw pasarakispa, kuna laykutejj Jehová Diosajj ‘jupamp chik trabajiñasatakiw’ munasiñamp invittʼistu (1 Corintios 3:9). Janipun ak armapjjañäniti: Jesusjam suma yatiyäwinak taqe chuym predicasajja, Jehová Diosaruw yanaptʼasktanjja. Ukatjja taqe chuyma predicatasajj jupar jukʼamp munasiñatakiw yanaptʼarakistu. Cheqas ¡Jehová Diosamp sum apasiñajj mä suma privilegiopuniwa!
Jehová Diosar jukʼamp munasiñatakejj ¿kunsa Jesusajj luräna?
11-13. 1) ¿Kunjamsa Jehová Diosarojj jukʼamp munassna? Uk mä uñachtʼäwimp qhanañchtʼam. 2) Jesusajj qʼajjo waynäkäna ukhajja, ¿kunsa Jehová Diosar jukʼamp munasiñatakejj luräna? 3) Jesusajj janïr aka oraqer jutkasasa aka oraqenkjjasasa, ¿kunjamsa Jehová Diosat jukʼamp yateqaskakiñ munatap uñachtʼayäna?
11 Jehová Diosarojj kunjamsa jukʼamp munassna uk amuytʼañatakejj aka toqet parltʼañäni. Mä suma panqaran jilañapatakejj wal cuidañaw wakisi, umampis wakisitarjamaw warjjattʼasiñapa. Diosar jukʼamp munasiñatakejj ukaw pasaraki, ukatwa Jesusjam Diosar munasiñatakejj kunanakatï yanaptʼkistaspa ukanak lurañasa. Jesusajj aka oraqenkkasajj kunanaksa Awkipar jukʼamp munasiñatakejj luräna ukwa jichhajj yatjjataskañäni.
12 Kunapachatï Jesusajj qʼajjo waynäkasajj Jerusalenan quedaskäna uk amtañäni, jupajj Pascua qhepat templonwa quedasïna. Uk pasatapatjja awk taykapajj wali llakitaw jupar thaqapjjäna, ukampis Jesusajj awk taykapamp jikisisajj akham sänwa: “¿Kunatsa thaqapjjesta? Nayajj Awkijan utapankañajawa, ¿janit uk yatipkta?” sasa (Lucas 2:49). Amuyatajja, kunjamsa alajjpachan jakäna uk janïraw Jesusajj jiskʼäkäna ukhajj amtkänti, ukampis Jehová Dios Awkiparojj wal munasïna. Jesusajj qhawqsa Awkiparojj munasïna uk luratanakapampiw uñachtʼayäna, ukatwa juparojj templonkañajj wal gustäna, kuna laykutejj uka cheqanwa Awkiparojj adorasïna. Jesusajj templonkañ wal munirïna, janirakiw uka cheqat sarjjañ munirïkänti. Ukhamarus jupajj janiw aleq uñchʼukirik templor sarirïkänti, jan ukasti Jehová Diosat jukʼamp yateqañatakiw sarirïna, kuntï yatkäna uka toqets jaqenakar parlarakirïnwa. Cheqansa, Jesusajj janiw 12 maranïkäna ukhakejj Awkipar munasiñ qalltkänti, janirakiw Awkipar munasitapas ukharuk tukuskänti.
13 Jesusajj alajjpachankkäna ukhajja, Awkipat yateqañatakejj wal chʼamachasïna. Isaías 50:4-6 textorjamajja, Mesiasjamajj kunanaksa lurañapäna ukwa Jehová Diosajj Yoqapar qhanañchäna. Ukampis Jesusajj Diosan ajllitapjamajj wali tʼaqesiyataw uñjasiñapäna, uk yatkasas Diosan Yoqapajj Awkipat yateqañ munaskakïnwa. Kunapachatï Jesusajj aka oraqer jutasin jilsjjäna ukhajja, Jerusalenankir templor sarasin wal Awkipar adorañ munäna, Jehová Diosan yatichäwinakap istʼañsa mayninakar yatichañsa wal munarakïna. Ukatwa Bibliajj templorusa sinagogarus jan faltasisaw Jesusajj sarirïna sasin qhanañchi (Lucas 4:16; 19:47). Jiwasatï Jehová Diosar wal munasiñ munstan ukhajja, tantachäwinakarojj jan faltasisaw sarañasaraki. Kuna laykutejj tantachäwinakanwa Jehová Diosar adortanjja, ukanwa juparojj sum uñtʼtanjja, jukʼampiw jupar munasiraktanjja.
“Sapakiw qollurojj oración lurir makatäna”.
14, 15. 1) ¿Kunatsa Jesusajj sapakïñ munirïna? 2) Jesusan oracionanakapanjja, ¿Awkipar kunjam uñjatapas qhan amuyasi?
14 Jesusajj sapa kutiw Jehová Diosarojj orasïna, ukhamatwa Awkiparojj jukʼamp munasïna. Jupajj wali suma jaqënwa, mayninakampïñs wal munirïna, ukampis sapakïñaw jupatakejj wali valoranïna. Lucas 5:16 textojj uka toqet akham siwa: “Jupasti oración lurañatakejj wasar chʼusa lugaranakarojj sarapunirïnwa” sasa. Ukat Mateo 14:23 textojj akham sarakiwa: “Jaqenakar khitanukusasti, sapakiw qollurojj oración lurir makatäna. Arumthapjjäna ukhajja, sapakiw ukankaskäna” sasa. Jesusajj janiw sapakïñ laykukejj ukanak lurirïkänti, jan ukasti Awkipamp sapakïñ munasaw ukanak lurirïna, ukhamat oración toqe Awkipamp parltʼasiñataki.
15 Jesusajj orasirïkäna ukhajja, awisajj “Abba, alajjpachankir Awki” sasaw sirïna (Marcos 14:36). Jesusan urunakapanjja, wawanakaw awkipar munasiñat abba sasin sapjjerïna, ukatjja jiskʼa wawanakajj parlañ yateqapkäna ukhaw uka aru nayrïr kut arsupjjerïna, ukhamarus uka arojj maynir respeto uñachtʼayañatakïnwa. Jesusajj abba sasin siskäna ukhajja, jupajj qhawqsa Awkipar confiyäna ukat munasirakïna ukwa uñachtʼayäna, ukatjja Awkipar wali respetomp uñjatapwa uka arumpejj uñachtʼayarakïna. Cheqas Bibliankir Jesusan oracionanakapanjja, Jesusajj Awkipar taqe chuyma confiyatapa, munasitapa ukat wal respetatapaw qhan amuyasi. Amuytʼañataki, Jesusajj janïr jiwayatäkäna uka arumajj wali jayaw Awkipar taqe chuyma orasïna, uka oracionapajj Juan 17 capitulon qellqatawa. Jesusan uka oracionap yatjjatañajj chuymar purtʼkiripuniwa, kuna laykutejj kunjamsa alajjpachankir Awkisar chuymatpach orassna ukwa yatichistu. Jiwasatï chuymatpach orasiñäni ukhajja, Jehová Diosarojj jukʼampwa munasiñäni.
16, 17. 1) ¿Kuna arunakampis Jesusajj Awkipar munasitap uñachtʼayäna? 2) ¿Kunjamsa Jesusajj Awkipan wali wajjtʼasirïtap qhanstayäna?
16 Kunjamtï yatjjataniwayktanjja, Jesusajj janiw ‘Awkirojj munastwa’ sasin aru mayak kutin kutin siskänti. Jan ukasti, Awkiparojj qhawqsa munasïna uk yaqha toqenakanwa uñachtʼayäna. Mä kutejja, jupajj akham sänwa: “Alajjpachankir Awki, jumaw alajjpachansa aka oraqensa Tatitütajja [...], ukatwa nayajj jaqenak nayraqatan jachʼañchsma” sasa (Mateo 11:25). Jesusarojj Awkipar yupaychañasa, Awkipar uñtʼapjjañapatak jaqenakar yanaptʼañas walpun gustäna, ukwa sección 2 ukan yatjjataniwaytanjja. Amuytʼañataki, Jehová Diosajj kunja munasirisa uk uñachtʼayañatakejja, Jesusajj herencia tukuntir waynan awkipatwa parläna. Uka awkejj wawapan utapar kuttʼanjjañapsa pantjasitanakap perdonañs wal munäna, ukatwa wawapan jutaskir uñjasajj jupan ukar tʼijukam saräna, wali munasiñampiw qhomantarakïna (Lucas 15:20). Jesusan arunakapajj chuymarupuniw purtʼistu, kuna laykutejj Jehová Diosajj kunja munasirisa kunja khuyaptʼayasirisa ukwa amuytanjja.
17 Jesusajj Awkipan wajjtʼasirïtap laykuw jupar wal jachʼañchirïna. ¿Alajjpachankir Awkejj qhawqha wajjtʼasirisa? Uk uñachtʼayañatakejj jucharar awkinakatwa Jesusajj parläna, ukjjarojj kunjamsa alajjpachankir Awkejj mayipki ukanakarojj espíritu santop churi ukwa qhanstayarakïna (Lucas 11:13). Kuna suytʼäwtï Jehová Diosajj wajjtʼasirïtap laykojj churkistu uka toqetsa parlarakïnwa. Jupa pachpas kuntï wal suykäna uka toqetwa wal parlirïna, uka suytʼäwirjamajja alajjpachar kuttʼasajj mayampiw Awkip jakʼankjjañapäna (Juan 14:28; 17:5). Ukatjja arkirinakaparojj akham sarakïnwa: “Jan ajjsarapjjamti jiskʼa tama. Alajjpachankir Awkimajj jumanakaruw Reino churañ munapjjtam” sasa. Uka arunakampejja, jumanakajj alajjpachanwa jakapjjäta, nayamp chikaw reyinakjam apnaqapjjarakïta sañwa Jesusajj munaskäna (Lucas 12:32; Juan 14:2). Ukatsti niya jiwirjam mä lunthatarojja, ‘mä urojj paraisonwa jakäta’ sasaw chuymachtʼäna (Lucas 23:43). Awkipajj kunja wajjtʼasirisa uka toqet parlañajja, Awkipar jukʼamp munasiñatakiw Jesusar yanaptʼäna. Jesusan arkirinakapat waljanejj ukhamätapwa amuyawayapjje, ukatwa ‘Diosata ukat kuna suytʼäwtï jupajj churkistu ukanakat parlañajj wal yanaptʼasi, jupar jukʼamp munasiñatakiw yanaptʼasiraki’ sasin arsuwayapjje.
Jesusjam Jehová Diosar munasiñatakiw chʼamachasiñasa
18. ¿Kunjamatsa Jesusar arkatas qhan uñachtʼaysna, ukat kunatsa?
18 Kunaymanitwa Jesusar arkatas uñachtʼaysna, ukampis Jehová Diosar taqe chuymasampi, taqe almasampi, taqe chʼamasamp munasisaw Jesusar arkatas qhan uñachtʼaysna (Lucas 10:27). Diosarojj qhawqsa munastan ukajj janiw pata chuymakïñapäkiti, jan ukasti luratanakasampiw jupar munasitas uñachtʼayañasa. Jesusajj janiw Awkiparojj chuyma manqhanak munaskänti, janirakiw nayajj ‘Awkir munastwa’ sasakis parlkänti. Antisas jupajj akham sänwa: “Kunjamtejj alajjpachankir Awkejj nayar siskitu ukhampun nayajj luraskta, ukhamat aka mundojj Awkir munasitaj yatiñapataki” sasa (Juan 14:31). Supayajja janiw khitis Jehová Diosarojj cheqpach munasiñat sirvkiti sasaw arsüna (Job 2:4, 5). Ukham parlatapajj janiw cheqäkänti, ukatwa Jesusajj qhawqsa Awkipar munasïna uk jan ajjsaras qhan uñachtʼayäna, jiwañkamaw Awkiparojj taqe kunan istʼarakïna. ¿Jiwasat kamsasirakispasa? ¿Jesusarojj taqe chuymat arkañäni? ¿Jehová Diosar cheqpachapun munasitassa uñachtʼayarakiñäniti?
19, 20. 1) ¿Kunatsa tantachäwinakar sarañajj wali importantejja? 2) Bibliat sapak yatjjatañsa, lupʼiñsa ukat orasiñsa, ¿kunatsa jiwasajj wali valoranit uñjañasa?
19 Jiwasajj Jehová Diosan jakʼapankañataki ukat jupar munasiñatak luratätanwa. Ukatwa Jehová Diosajj kunanakatï jupar jakʼachasiñatak yanaptʼkistaspa taqe ukanak churawayistu, ukhamat jiwasajj jupar jukʼamp munasiñasataki. Kunapachatï tantachäwinakar sarktan ukhajja, Jehová Diosar adorataswa uñachtʼayasktanjja. Uka tantachäwinakanjja, taqe chuymaw oración toqe Diosar jakʼachastanjja, jupar jachʼañchañatakis cancionanakwa cantaraktanjja, ukatjja mayninakan arstʼatap istʼasasa arstʼasasa chʼamañchtʼataw jikjjatasiraktanjja. Ukhamarusa, uka tantachäwinakan maynit maynikamaw chʼamañchtʼastanjja (Hebreos 10:24, 25). Jiwasatï Jehová Diosar tantachäwinakan taqe kun luras jachʼañchañäni ukhajja, juparojj jukʼampiw munasiñäni.
20 Ukatjja Bibliat sapak yatjjatañasa, lupʼiñasa ukat orasiñas Diosar jukʼamp munasiñatakiw yanaptʼarakistaspa. Taqe ukanak lurañ wali valoranitwa uñjañasa, kuna laykutejj Jehová Diosampïñatakiw ukanakajj yanaptʼistu. Kunapachatï Bibliat yatjjatktan ukhasa, kuntï liytʼktan uka toqet lupʼiraktan ukhasa, Jehová Diosaw jiwasar parlaskistu. Ukat kunapachatï jiwasajj orasktan ukhajja, jiwasaw Diosarojj parltanjja. Ukhamajj Diosar orasktan ukhajja, janiw kunanaksa necesittan ukanakak mayiñasäkiti, jan ukasti kuna bendicionanaktï katoqktan ukanakatwa yuspärañasa, ukatjja taqe kuntï lurawayki ukanakats jachʼañchañasarakiwa (Salmo 146:1). Maysa toqet Diosar munasitassa yuspärasir chuymanïtassa, kusisit chuymamp predicasaw uñachtʼayaraksna.
21. ¿Kunatsa Jehová Diosar munasiñajj wali importantejja, ukat kuna toqenakatsa jutïr capitulonakan yatjjataskañäni?
21 Jehová Diosar munasisakiw wiñay suma jakañ jikjjatsna. Adanampi Evampitï Diosar munasipjjaspäna ukhajja, wiñayatakiw kusisit jakasipjjaspäna, ukampis jupanakajj janiw Diosarojj munasipkänti. Jan jupanakjamäñatakejja, jiwasajj Jehová Diosar munasiñatakiw chʼamachasiñasa. Kuna laykutejj Diosar munasiñaw jan walinakamp jan apayasiñatakisa, yantʼanakar saykatañatakisa, tʼaqesiñanakan aguantaskakiñatakis yanaptʼistani. Ukhamajj jiwasatï cheqpachapun Diosar munasiñänejja, Jesusan cheqpach arkirinakapätaswa uñachtʼayañäni. Ukhamarus Diosar munasirejj jaqe masiparuw munasiñaparaki (1 Juan 4:20). Aka seccionankir mayni capitulonakanjja, kunjamsa Jesusajj jaqenakar munasitap uñachtʼayäna uka toqetwa yatjjataskañäni. Ukampis jutïr capitulonjja, kunatsa walja jaqenakajj Jesusar jan ajjsaras jakʼachasipjjäna uka toqetwa yatjjataskañäni.
