Jesusajj herencia tukuntir waynat parlkäna uka uñachtʼäwi istʼasajja, impuesto cobririnakasa, escribanakasa, fariseonakasa Diosajj arrepentisir jaqer perdonañatak jankʼakïtap amuyapjjpachänwa (Lucas 15:1-7, 11). Jesusajj yaqha uñachtʼäwitwa discipulonakapar parläna. Wali qollqeni mä jaqetwa parläna uka jaqen mayordomopajj janiw luräwinakap sum phoqkänti.

Uka mayordomojja uywiripan utjirinakap jan sum apnaqatapatwa juchañchatäna sasaw Jesusajj säna. Ukatwa uywiripajj mayordomot apaqäna. Uka mayordomojj akham jisktʼasïna: “Uywirijajj janiw mayordomot jukʼamp trabaj-jjätati sarakitusä, ¿jichhajj kamachakïsa? Yapu lurañatakis janirakiw chʼamajj utjkituti, mayjasiñsa phenqʼasiraktwa” sasa. Kunsa luraspa uk amuytʼasajj akham sänwa: “Ukhamajj ak luräjja, mayordomot apaqjjetani ukhajja, jaqenakaw utanakapar katoqapjjetani” sasa. Ukatsti uywiripar manüpkäna ukanakaruw jawsayäna. Nayrïrirojj akham sänwa: “¿Uywirijan qhawqha manupätasa?” sasa (Lucas 16:3-5).

Jupajj akham sänwa: “Olivot lurat aceite manupätwa, pä waranqa pä patakani litronaka” sasa. Manükäna uka jaqejj olivo jachʼa yapunïpachänwa, jan ukajj olivot lurat aceite aljirïpachänwa. Mayordomojj jupar sarakïnwa: “Manut qellqaskäna uka contratojj akawa, qontʼasisasti chikatakis manükasma ukham jankʼak qellqantam” sasa. Jichhajj 1.100 litronakakiw manöjjäna (Lucas 16:6).

Maynirojj akham sarakïnwa: “¿Jumajj qhawqha manütasa?” sasa. Jupasti sänwa: “Nayajj patak costal trigot manupätwa” sasa. Mayordomojj sarakïnwa: “Manut qellqaskäna uka contratojj akawa, kimsaqallq tunka costalanak manükasmas ukham qellqantam” sasa. Ukhamajj patakatjja 20 iraqäna (Lucas 16:7).

Niyakejjay uka mayordomojj uywiripan utjirinakap apnaqaskakchïnjja, uywiripar manüpkäna uka jaqenakan manunakapwa menostʼayäna. Ukham lurasajja, uka jaqenakan amigoparuw tukuskäna, ukhamatwa jan trabajonïspäna ukhajj jupar yanaptʼapjjaspäna.

Manunaka menostʼayasajja, uywiripan qollqepwa aynachtʼayaskäna. Ukampis kuntï mayordomojj luraskäna uk yatisajja, qamir jaqejj musparänwa. “Uka mayordomojj jan cheqapar lurir jaqëkchïnsa”, uywiripajj jachʼaruw aptäna, “yatiñampi ukanak luratap layku”. Jesusajj saskakïnwa: “Akapachan wawanakapajj qhanan wawanakapat sipansa jukʼamp yatiñampiw kuns lurapjje, ukatjja ukarjamaw pachpa tiempopan jakir jaqenakarojj uñjapjjaraki” sasa (Lucas 16:8).

Kuntï uka mayordomojj lurkäna ukjja, janiw Jesusajj walikïkaspas ukham sañ munkänti ni ukham lurapjjañapatakis chʼamañchkänti. ¿Kunsa yatichañ munäna? Discipulonakaparojj sänwa: “Nayajj sapjjaraksmawa: akapachan  kunatï valoranïki ukanakamp amigonak jikjjatapjjam. Ukanakajj tukusjjani ukhajja, kawkjantï wiñay qamasiñajj utjki uka cheqanakaruw jupanakajj katoqapjjätam” sasa (Lucas 16:9). Uka uñachtʼäwejj jutïr urunakan kunas pasaspa ukarjam sum amuytʼasis lurañwa yanaptʼistu. Diosan servirinakapajj ‘qhanan wawanakapjamajj’ utjirinakapsa qollqepsa sum amuytʼasisaw apnaqapjjañapa, wiñay jakaña suytʼasa.

Jehová Diosampi ukhamarak Yoqapampikiw alajjpachankir Reinopan apnaqapjjañapataki jan ukajj Reinopampi apnaqata Paraison jakasipjjañapatak jaqenakar katoqapjjaspa. Ukatwa sum amuytʼasisajj qollqessa kunatï utjistu ukanaksa Diosan Reinopar yanaptʼañatak apnaqañasa, ukhamatwa jupanakampejj sum apasiñäni. Ukhamatarakwa qorisa qollqesa kunatï utjkistu ukanakasa jan valoranëjjapjjani ukhasa, wiñay jakañ suyaskakiñäni.

Khitinakatï utjirinakapsa jan ukajj qollqepsa sum apnaqapjjani ukanakajja, jachʼa luräwinakan sum phoqapjjarakini sasaw Jesusajj säna. Ukatjja saskakïnwa: “Ukhamasti jumanakatejj jan wali utjirinakam jan sum apnaqapksta ukhajja, ¿khitirak kunatï cheqäki uk jumanakar churapjjätamsti [jan ukajj Diosan Reinopar yanaptʼañatak lurañanaka churapjjätamsti]?” sasa (Lucas 16:11).

Jesusajja, ‘kawkjantï wiñay qamasiñajj utjki’ ukan jakasiñatakejj wal chʼamachasipjjañamaw wakisini sasaw discipulonakaparojj amuytʼayaskäna. Janiw khitisa Diosan serviripäsin qollqen esclavopäkaspati. Jesusajj akham sasaw parlañ tukuyäna: “Janiw khiti serviris pä patronan esclavopäkaspati. Maynirojj uñisiniwa, maynirusti munasirakiniwa. Maynirojj jakʼachasiniwa, maynirusti yaqhacharakiniwa. Janiw jumanakajj Diosampir Qollqempir esclavot servipkasmati” sasa (Lucas 16:9, 13).