Jesusajj walja tiempow Galilean Diosan arunakap yatiyäna. Judeat sipansa Galileanwa jukʼamp istʼapjjerïna. Ukampis Jerusalenar nayrajj sarkäna ukhajja, mä usut jaqer sábado urun qollatap laykojja, ‘judionakajj jiwayañatakiw Jesusar thaqapjjäna’ (Juan 5:18; 7:1).

Tabernáculo Fiestaw 32 maran jakʼachasinjjäna, septiembre jan ukajj octubre phajjsinakäjjpachänwa. Uka fiestajj paqallqo urunakaw apasïna, kimsaqallqöri urojj sagrado urut uñjatänwa. Uka fiestampiw uka marajj yapu lurañ tukuyjjapjjäna, ukhamajj wali kusiskaña Diosar yuspärañ fiestänwa.

Santiago, Simón, José, Judas jilanakapajj akham sasaw Jesusar sapjjäna: “Akat mistusin Judear saram” sasa. Jerusalenanwa markpachajj Diosar adorapjjerïna. Ukhamajj maran kimsa fiestanak utjkäna ukhajja, uka markajj wali phoqerïnwa. Ukatwa jilanakapajj Jesusar akham sapjjäna: “Khititejj jaqenakan uñtʼatäñ munki ukajja, janiw kunsa jamasan lurkiti. Jumatejj akanak lursta ukhajja, taqe jaqenakan uñjkatay ukanak luranimjja” sasa (Juan 7:3, 4).

Uka pusi jilanakapajj Jesusajj Mesiasätap janiw creyipkänti. Ukampis Jesusajj fiestar saraspa, ukan jaqenakajj milagronakap uñjapjjaspa ukwa munapjjäna. Jesusajj kuna jan waltʼäwinakansa uñjasispa uk amuyasajj akham sänwa: “Akapachajj janiw jumanakarojj kunatsa uñisipkiristamti. Nayajj akapachan jan wali luratanakap qhanañchta, ukatwa akapachajj nayar uñisitu. Ukhamasti jumanakajj fiestar makatapjjam, nayajj janïraw uka fiestar makatkäti, tiempojajj janïraw purinkiti” sasa (Juan 7:5-8).

Mä qhawqha urunakatjja Jesusan jilanakapajj Jerusalenar viajapkäna uka jaqenakamp chikaw sarapjjäna. Jesusasti discipulonakapampejj jamasatakwa sarapjjäna, janiw khitimpis uñjayasiñ munapkänti. Jaqenakajj Jordán Jawir jakʼnamwa Jerusalenar sarapjjerïna, ukampis Jesusampi discipulonakampejj cheqakiw sarapjjäna. Ukhamajj Samarian quedasipjjañapaw wakisïna, ukatwa mä qhawqha arkirinakapar nayraqat khitäna, ukhamat ukan wakichanipjjañapataki. Samariankir mä markar puripjjäna ukhajja, judionakan fiestapar saratap laykojja janiw kunjamtï katoqapjjerïkäna ukham katoqañ munapkänti. Santiagompi Juanampejj colertʼasisaw Jesusar akham sapjjäna: “Tata, munsta ukhajja, alajjpachat nina saraqaniñapatakiw mayipjjerista, ukhamat uka jaqenakar qʼal jiwarayañapataki” sasa (Lucas 9:54). Ukham sapjjatapatjja Jesusajj toqenoqänwa. Thaknam sarasipkakïnwa.

Sarasipkäna ukhajja, mä escribaw Jesusar akham säna: “Yatichiri, kawkirutï sarkäta ukaruw nayajj arkäma” sasa. Jesusasti jupar sänwa:  “Qamaqenakas putuniwa, jamachʼinakas tapanirakiwa, ukampis jaqen Yoqapatakejj janiw kawkin iktʼañas utjkiti” sasa (Mateo 8:19, 20). Ukham sasinjja, jupar arkasajj kuna jan walinakansa uñjasispa ukwa Jesusajj qhanañchaskäna. Uka escribajj jachʼa jachʼa tukurïtap laykojj janiw ukham jakañ munkänti. Jiwasajj jisktʼasiñasarakiwa: “Jan walinak utjkipansa ¿Jesusar arkaskakiristti?” sasa.

Yaqha jaqerojja “nayar arkita” sasaw Jesusajj sarakïna. Uka jaqesti sänwa: “Tata, awkijar imantiriw nayraqat sarañ munta” sasa. Jesusajj kunatsa uka jaqejj ukham säna uk yatisajj akham sänwa: “Jiwatanakajj jiwatanakapar imasipjjpan, jumajj Diosan Reinopat taqe cheqanakar yatiyir saram” sasa (Lucas 9:59, 60). Uka jaqen awkipajj janïraw jiwatäkänti, ukhamäspäna ukhajja janiw Jesusamp parlir jutkaspänti. Jupajj Diosan Reinop nayraqatar uchañatakejj janiw wakichatäkänti.

Jerusalenar sarasipkakïna ukhajja, yaqha jaqew Jesusar akham säna: “Tata, nayajj jumar arkämawa, ukampis nayraqatajj utajankirinakaruw ‘sarjjäwa’ saniñ munta” sasa. Jesusasti sänwa: “Khititï qholliñ arma katjjarki, ukatjja qhepar jaytanki ukanak uñtaraki ukajja, janiw Diosan Reinopatakjamäkiti” sasa (Lucas 9:61, 62).

Jesusan cheqpach arkiripäñ munapki ukanakajja Diosan Reinoparuw nayraqat servipjjañapa. Mä qholliritï nayraqatar jan sum uñtkaspa ukhajja, sukajj wejjruw mistuspa. Mä yapuchiritï qhep uñtañ layku qholliñ armap jaytaspa ukhajja, yap lurañanjja qheptʼaspawa. Niya ukhamarakiwa, khitinakatï akapacharu uñtapjjaspa ukanakajja, wiñay jakañ apir thakit saranukupjjaspawa.