JUKʼAMP YATJJATAÑATAKI RECUADRO 14A
Ezequielajj visionan templo uñjkäna ukajj kunsa yatichistu
Jehová Diosar adorañajj jachʼar aptatawa, jan walinakat jarkʼaqatarakiwa
Ezequielajj visionan uñjkäna uka templojj ‘wali alto mä qollu’ (1) patjjankiwa. ¿Jiwasatakejj Diosar adorañajj jakäwisan nayrankarakiti?
Anqäjj perqajja (2) templon wali jachʼa oraqepwa (3) muytäna; uka oraqe chikjansti taqpach templow ukankarakïna. ¿Kunsa ukajj yatichistu? Jehová Diosar adorasajj janipuniw jan walinak lurañasäkiti. Niyakejjay kunatï Diosar adorañ qʼañuchkaspa ukanak apanukuñasächejja, jukʼampwa jan wali sarnaqañanaksa qʼañu jucha lurañanaksa wali jayar apanukuñasa, Jehová Diosar adoririnakajj janipuniw ukanak lurañasäkiti (Ezeq. 42:20).
Jan tukusir bendicionanaka
Templon santuariopatjja mä jiskʼa jawiraw mistu, ukatjja wali jachʼa jawirar tukusajj oraqenak suma laqʼaruw tukuyi, jakañ vida churaraki (4). 19 yatichäwinwa uka bendicionanakat jukʼamp yatjjataskañäni.
Taqenitakejj mä pachpa leyinakakiw utji
Anqäjjankir jachʼa punkunakasa (5) manqhäjjankir jachʼa punkunakasa (9), Jehová Dios saparuki adorañ munapki taqe ukanakatakejj mä pachpa leyinakak utjatapwa amtayistu, uka leyinakajj Diosan uchatawa. Anqäjjankir jachʼa punkunakasa manqhäjjankir jachʼa punkunakasa igualakïpjjewa. ¿Kunsa ukajj uñachtʼayistu? Diosan taqe servirinakapajj congregacionan kuna privilegionïpjjpasa, taqenitakiw mä pachpa leyinakakejj utji.
Jehová Diosan mesapankir manqʼa
Nayrajj templon utjkäna uka comedoranakanjja (8), loqtapkäna uka sacrificionakat mä partjja jaqenakajj manqʼapjjaspänwa, ukham lurasajj Jehová Diosampis manqʼapkaspa ukhamänwa. Ukampis jichhürunakanjja janiw ukham lurasjjeti. Cristianonakajj Diosan jachʼa templopanwa adortanjja, ukanjja wiñayatakiw ‘mä sacrificiojj’ loqtasiwayjje (Heb. 10:12). Ukhamarus jachʼañchir sacrificionakwa loqtasktanjja (Heb. 13:15).
Diosajj mä garantía churistu
Templon medidanakapat liytʼasasa kunanaktï Ezequielajj visionan uñjäna ukanakat yatjjatasasa inas jiwasajj qarsna. Ukampis taqe ukanakajj akwa yatichistu: kunjamtï templon medidanakapajj wali exactökänjja, Diosan promesanakapajj ukhamarakiwa, mä arunjja jupa saparuk adorañ toqet Diosajj arsuwayki ukajj sumwa phoqasini. Ezequielajj visionapan yaqha jaqenakan utjatap janiw qhanañchkiti, ukampis kunjamsa Jehová Diosajj sacerdotenakarusa, marka pʼeqtʼirinakarusa, markankirinakarus cheqañchäna ukwa qhanañchi. Ukhamajja taqe servirinakapaw Diosan leyinakaparjam sarnaqañasa.
