Jehová Diosar munasirinaka:

1971 maranjja “Nombre divino” sat kimsa uru jachʼa tantachäwiw inglés arut apasïna. Ukar saririnakajj machaq qellqatanakwa wali kusisit katoqapjjäna. 1972 maran mistkäna uka Anuario librojj akham sänwa: “Walja qellqatanakaw mistüna, janiw ukhamäñapajj suyaskänti” sasa. Uka qellqatanakat parlkasajj mä jilatajj akham sänwa: “Kunatï jutïr urunakan paskani uka toqet wali sum qhanañchatapajj wali kusiskañawa. ¡Janipuniw kunapachas ukham mä libro katoqawayapkti!” sasa. ¿Kuna librotsa jilatajj parlaskänjja? Jupajj “Las naciones sabrán que yo soy Jehová”... ¿cómo?, sat librotwa parlaskäna. ¿Kunatsa uka librojj wali suma librönjja? Uka libronjja kunjamsa Ezequiel profetan profecianakapajj amuyasjjäna ukaw qhanañchasïna, uka profecianakajj kunjamsa jaqenakar yanaptʼani uka toqetwa parläna.

“Las naciones sabrán” sat libro mistkäna ukhajja, Jehová Diosan servirinakapajj niya mä millón chikatanikïnwa, ukampis jichhajj ocho millonats jiläjjewa (Is. 60:22). Diosan markapanjja 1.000 jila arunak parlasiri servirinakaw jichhajj utj-jje. Diosan amuytʼayatäsajj kuntï Ezequielajj qellqawayki uka profecianak qhanañchir librjja, jupanakat waljanejj janiw yatjjatawayapkiti (Zac. 8:23).

1971 marat jichhakamajj Diosan cheqa yatichäwinakapajj jukʼamp qhanäjjewa, wali sumaw amuyasjjaraki (Prov. 4:18). 1985 maranjja, ‘yaqha ovejanakjam’ uñtʼatäpki ukanakajj cheqap jaqenakjam uñjatäpjjewa, Diosan amigonakapäpjjarakiwa sasaw amuyasiwayjje (Juan 10:16; Rom. 5:18; Sant. 2:23). 1995 maransti, ‘jachʼa tʼaqesiñ tiemponwa’ ‘ovejanakampiru’ ‘cabranakampirojj’ jaljasini sasaw amuyasiwayjjaraki (Mat. 24:21; 25:31, 32). Taqe ukatwa Ezequiel libron mayamp uñakipasiñap wakisitapajj amuyasiwayi.

Aka qhepa maranakanjja Diosan cheqa yatichäwinakapajj jukʼamp sumaw qhanstawayi. Jesusan uñachtʼäwinakapat amuytʼañäni, kuntï jupajj yatichkäna ukanakajj jichhürun jukʼamp qhanaw amuyasjje, chuymaruw purtʼarakistu. Niya puriniñampïki uka jachʼa tʼaqesiñ tiempon kunanakatï paskani ukanwa uka uñachtʼäwinakat yaqhepajj phoqasini. Ezequielan yaqhep profecianakapajj jukʼamp sumaw jichhajj amuyasjje. Sañäni, Magog oraqenkiri Gog satäki ukatsa (capítulos 38, 39), secretarion tinta apnaqañ cajitapanïki uka chachatsa (capítulo 9), valle pampan qʼala wañsut chʼakhanakatsa, pä lawanakan mayachthapisitapatsa (capítulo 37) jukʼamp sumaw amuyasjje. Taqe ukanakan qhanañchasitapatjja, kunanakatï “Las naciones sabrán” sat libron walja maranak nayrajj qellqaskäna ukanak mayamp uñakipasiñap wakisitapwa amuytanjja.

Ukatwa Diosan walja servirinakapajj “¿Ezequielan profecianakapat machaq qhanañchäwinakani mä librojj kunapachas mistpachäni?” sasin jisktʼasipjjpachäna. Cheqas Jehová Diosarukiw oraqpachan adorasjjani sat libron mistuñapajj wakisipunïnwa. Ukhamasti 22 yatichäwinakani aka libro liytʼkasasa dibujonakata fotonakata lupʼisasa, aka libro lurañatakejj sum yatjjatasitapwa amuyäta. Ezequiel libro toqejj kuntï Jehová Diosajj yatichañ munkäna uk sum amuyañatakejja, wal orasiña ukhamarak wal lupʼiñaw wakisïna, aka jisktʼanakar qhanañchañas wakisirakïnwa: ¿kuntï Ezequielajj qellqkäna ukajj kunjamsa uka tiempon jakirinakar yanaptʼäna? ¿Kunsa ukajj jichhürunakan yaticharakistu? ¿Kawkïr profecianakas jutïrin phoqasiñampïski? ¿Ezequielajj  kunanakattï profecianakapan parlki taqe ukanakajj kunamp sasisa ukanak qhanañchañajj wakisipuniti? Uka jisktʼanakar qhanañchasitapajja, kunanakatï Ezequiel libron qellqatäki ukanak amuytʼañatakiw yanaptʼistu. Cheqas nayratpachaw uka librot wal yatjjatañ muntanjja.

Ezequiel librot yatjjatkasajja, Jehová Diosan organizacionapat mä partejj alajjpachankki ukat wal muspartanjja. Maysa toqetjja alajjpachansa aka oraqensa Jehová Diosar adorañatakejj jupan leyinakap phoqañ wakisitapwa amuytanjja, ukaw wal musparayarakistu. Diosarukiw adorasjjani sat librojja, kuntï Jehová Diosajj servirinakap layku lurawayki, akat mä jukʼarojj kuntï jupanak layku lurkarakini ukanak wali valoranit uñjañatakiw yanaptʼätam. Aka librot yatjjatkasajja pä toqenakat jukʼamp parlatapwa amuyäta. Maya, Jehová Diosamp katoqatäñatakejj juparuw sum uñtʼañasa, Taqe Kunjjar Munañani Jehová Diosarjamarakiw uñjañasa. Paya, Diosajj kunjam adoratäñtï munki ukarjamaw adorañasa, mayitanakaparjamas sarnaqañasarakiwa.

Aka librojj Jehová Diosar adorañat jan pächasiñamataki, jupan sagrado sutip jachʼañchapjjañamataki yanaptʼañapwa munapjjta. Markanakajj Jehová Diosätap yatipkani uka urun puriniñapkamajj kusisit suytʼasipkakiñamwa munapjjarakta, ukatakiw aka librojj chʼamañchapjjätam (Ezeq. 36:23; 38:23).

Kuntï Diosajj Ezequiel profetap toqejj yatichañ munkistu uk sum amuytʼapjjañamatakejja, wali munasiri Jehová Dios Awkisaw chʼamachasipjjatamat bendisipjjätam.