1 Corintios 6:1-8 uka jiskʼa tʼaqanakanxa jiwaskam qullqi tuqit jan waltʼayasiñanakatwa Pablox parli. Nayraqatxa chuyma ustʼataw parli, kunattix Corinto markankir yaqhip jilat kullakanakaw jan waltʼayasisax “jan iyawsirïpkis uka juesanakaru [sarapxatayna]” (1 jiskʼa tʼaqa). Ukatxa kuna jan waltʼäwis tama taypin askichasiñapaw sasaw säna, janiw taripañ utanakar sarapxañapäkänti. Kuna amtampis ukanak sispachäna uk jichhax sum amuytʼañäni, ukatxa kunanakansa Pablon arunakaparjam jan lurañax wakiskaspa uk amuytʼarakiñäni.

Jilat kullakanakax qullqi tuqit jan waltʼayasipki ukhaxa Jupan munañaparjam askichapxaspa ukwa Jehová Diosax muni, janiw amtasarjamax askichañasäkiti (Proverbios 14:12). Kunjamtï Jesusax siskänxa, jankʼakiw askichañasa, janiw jayarstʼayañasäkiti (Mateo 5:23-26). Ukampis yaqhip jilat kullakanakax chʼaxwañs munapkaspa ukhamaw taripañ utanakar apayasipxi, ukax janiw walïkiti. “Jumanak taypin chʼaxwañanak utjatapampix qʼala [aynachtʼapxtaxa]” sasaw Pablox sarakïna. ¿Kunatsa? Ukham chʼaxwasax Jehová Diosan sutip jan walir uñjayapxaspäna, ukat tamarus jan walirak uñjayapxaspäna. Ukham jan luraskañatakix Pablon aka arunakaparjam sarnaqañasawa, jupax akham sänwa: “¿Kunatsa jan tʼaqhisipkta jan chʼaxwasakixa?” sasa (7 jiskʼa tʼaqa).

Jan chʼaxwaskañatakiw Diosax walja tuqinakat yatichapxtam sasarakiw Pablox qhanañchäna. Tama taypinxa Bibliat yatxattʼat amuytʼan jaqinakaw utji sasaw säna. Chiqpachansa, irpir chuymaninakaw ‘jilatanak taypina quejanak uñjañatakix’ yatxattʼatäpxi ukat “jukʼamp sumwa jiwasan quejanakasxa uñja[pxaspa]” (3 jiskʼa tʼaqat 5 jiskʼa tʼaqakama). Ukatxa, inas kʼarintasiñanakas jan ukax sallqjasiñanakas utjchispa, ukampis ukanak askichañatakix kimsa yatichäwinak phuqapxasma sasaw Jesusax sarakïna. Nayraqatxa, sapa purakiw uka jan walinak askichañatakix parltʼapxaspa; ukampis jan askichaskani ukhaxa, yaqhanakan istʼañapatakiw irpañ wakisispa, mayni jan ukax panin istʼkataw askichapxaspa; ukampis janipun askichaskani ukhaxa, khitinakatix tama uñjapki ukanakar yatiyañaw  wakisispa, mä arunxa irpir chuymaninakar yatiyañasawa (Mateo 18:15-17).

Ukampis irpir chuymaninakax janiw kamachinak tuqit yatxattʼasin maynin arxatiripäkiti, janirakiw ukar uñtasita kunsa lurapxañapäkiti. Ukat jilat kullakanakan jan waltʼäwip askichañatakix janirakiw kamachinak apsupkaniti. Jan ukasti, kunjamatsa jan waltʼayasir jilat kullakanakax purapat Diosan arunakaparjam mä suma amtar mantapxaspa ukatakiw purapar yanaptʼapxi. Ukampis jan askichañjamäkani ukhaxa, inas tamanak tumptʼir jilatar jan ukax sucursalan irnaqir jilatanakar jisktʼasipxchispa. Ukampis Pablon uka arunakaparjam phuqañax awisax janiw wakiskarakispati. Kunatsa jan wakiskaspa, uk jichhax uñjañäni.

Chiqpachansa, janiw jiwasan askisaki thaqhatas laykukipunix yaqhanakar quejantksnati. Inas wakisirïtap laykuki ukham luraña wakischispa, jan ukax maynimpi sumthapiñataki wakischispa. Sañäni, divorciasiñatakisa, khitis wawampi qhiparani uk amtañatakisa, jan ukax wawampi qhiparirix qhawqsa qullq sapa phaxsi katuqani uka tuqit mä amtar puriñatakisa uka taripirinakar yatiyañax wakisipunispawa, ukat qullqi tuqit pʼakintañax utji ukhaxa kunampis qhiparañäni ukatakisa, seguronakat qullqi katuqañatakisa, testamento lurayañatakisa ukanakar sarañax wakisirakispawa. Maysa tuqitxa, mä cristianox quejantataxa, inas jan aynachtʼañatakix yaqha queja aptʼayarakispa. a

Ukhamanakan uñjasisax mä cristianox yaqhar apayaspa ukhaxa janiw Pablon arunakap pʼakintkiti, janiw chʼaxwañ laykukix uk lurañapäkiti. b Ukampis kunsa nayraqat phuqañasa uk janipun armasiñäniti: Nayraqatxa Jehová Diosan sutip jachʼañchañasawa ukat tama taypinsa sumaraki mayninakampix apasiñasa. Criston arkirinakapjamax taqi kunansa munasiñ uñachtʼayañasawa, munasiñan jaqix janiw “kunsa jupatakiki munirïkiti” (1 Corintios 13:4, 5; Juan 13:34, 35).