AKA qillqataxa chiqa sarnaqäwinakani librowa. Biblia satäkisa uka wali uñtʼat librot apstʼatawa. Diosax akapach lurañ qalltkäna ukhat aka urunakkamax kunanakas utjawayi ukanakatwa parli. Diosax kunsa jutïr urunakan lurani ukanakatsa parlarakiwa.

Kunanakxatsa Bibliax parli uka tuqitwa aka librox amuytʼayätamxa. Biblian qillqatäki uka jaqinakaxa kunjam jaqinakäpxänsa, kunanaksa lurapxirïna ukanakatwa yatiyätamxa. Kusipachaptayata suma Uraqinwa jaqinakaxa wiñay jakasxapxani siw Diosaxa uka tuqitsa parlarakiwa.

Aka libronxa 116 sarnaqäwinakaw utji. Ukatxa kimsaqallqur jaljtʼatawa. Sapa jaljäwi qalltanwa kunanakasa mä jaljäwin utji ukanakax mä qhawqha arunakampi qhanañchtʼasi. Kunanakasa nayraqat utjäna ukat kunanakarakisa ukxaru utjarakïna ukarjam qillqatawa. Kunapachasa mä sarnaqäwix utjatayna uk amuyañwa ukax yanaptʼätamxa.

Janiwa chʼama arunakampi qillqatäkiti. Walja wawanakaw jupanakpacha liytʼapxaspa. Wawanakaxa mayampsa mayampsa liytʼarapit sasipkakiniwa awkiparusa taykaparusa. Jilïrinakatakisa waynanakatakisa aka libroxa wali aski yatichäwinakaniwa.

Biblianxa kawkjansa uka tuqit parli ukaxa, sapa sarnaqäwi tukuyan qillqtʼatawa. Uka qillqtʼatanak liytʼasmaxa wali askipunïspawa. Mä sarnaqäwi liyiñ tukuyasaxa uñxattʼarakismawa sapa sarnaqäwin jisktʼäwinakapa, ukasti 116 sarnaqäwxaru qillqtʼatawa, ukat uka jisktʼäwinakarux kamsätasa ukxa amtapunïtawa.