AKAX wali jachʼa familiarakisä. Jacobun 12 yuqanakapawa. Ukat Jacobuxa phuchanakanirakïnwa. ¿Sutinakap yattati? Mä qhawqxa akanwa yatiqañäni.

Lean wawanakapaxa: Rubén, Simeón, Leví ukat Judá satäpxänwa. Raquelax jan wawanïsaxa, wal llakisïna. Ukatwa Bilha uywatapa Jacoburux warmit churäna, Bilha uywatasti Dan ukat Neftalí sat wawanakanïnwa. Ukatxa Lea warmix Zilpa uywataparuw Jacoburux warmit churarakïna, ukat Zilpaxa Gad ukat Aser sat wawanakanïnwa. Ukatxa Leax pä wawampwa ususïna, Isacar ukat Zabulón satäpxänwa.

Tiempompixa Raquelax wawanïxarakïnwa. José sasaw nayrïr wawaparux sutiyäna. Jutïrinwa José tuqit jukʼampi parlaskañäni, kunattix jupax wali uñtʼat jaqïnwa. Jacobux Labanampi jakaskän ukhaxa 11 wawanakanïnwa.

Jacobux phuchanakanirakïnwa, ukampisa mä phuchapan sutipakiw Biblian qillqataxa. Dina satänwa.

Mä uruxa, Jacobux Labanan utapat Canaán uraqir kuttʼañwa amtxäna. Ukatwa jachʼa familiaparusa, uywanakaparusa tantachthapisin uka markat kuttʼanxapxäna.

Jacobux familiapampi Canaanar kuttʼanxäna uka qhipatwa Raquelax yaqha wawanïxäna. Mä saräwinwa ususïna. Raquelax janiw waltʼxänti, ususiskän ukhaw jiwxäna. Ukampis asu wawax walikïskänwa. Benjamín sasaw Jacobux sutiyäna.

Jacobun 12 wawanakapan sutinakap amtañasawa, uka wawanakampiw Israel jachʼa markax qalltäna. Israelan 12 tribunakapax Jacobun 10 wawanakapan sutinakap api, ukat Joseyan pä wawapan sutinakapamp aparaki. Uka wawanak utjkäna ukhatxa walja tiempompiw Isaacax jakaskäna, allchhinakapar uñjasax wal kusispachäna. Dina allchhipax kunarus purtʼasitayna uk jichhax uñjarakiñäni.