PÄ MARAW pasxäna, Joseyax carcelankaskakïnwa. Faraonan vino askatiripax janiw jupat amtaskänti. Ukat mä arumaxa, Faraonaw pä mayja samkanak samkasïna, ukat kamsañrak munpacha sasaw jisktʼasïna. ¿Faraonax aka manqhan ikiski uk uñjtati? Qhiparmanthisti yatirinakaparuw jawsayäna ukatsti samkasitapwa yatiyäna. Ukampis jupanakax janiw kamsañsa yatipkänti.

Ukhakiw vino askatiripax Joseyat amtasïna. Ukat Faraonarux akham sänwa: ‘Kunapachatï carcelankkayäta ukhaxa, ukan mä jaqiw samkanak tuqit yatïna’ sasa. Faraonax ukaratpachaw Joseyar carcelat irpsuyanïna.

Faraonax akham sasaw Joseyar samkanakap yatiyäna: ‘Paqallqu suma likʼi vacanakwa uñjta. Ukxaruxa paqallq qʼala taxa vacanakrak uñjta. Ukat taxa vacanakaxa likʼi vacanakaruw manqʼanti’ sasa.

‘Payïr samkajanxa, mä sapa trigo alit paqallqu suma trigo puyanak jilaskiri uñjta. Uka qhipatsti paqallqu jan wali chʼusu waña puyanak jilsurwa uñjarakta. Ukat chʼusu puyanakaxa suma puyanakaruw manqʼantapxi’ sasa.

Joseyax akham sänwa Faraonaruxa: ‘Paypach samkamasti mayak sañ muni. Paqallqu likʼi vacanakasa, paqallqu suma trigo puyanakasa, paqallqu mara sañ muni, ukat paqallqu taxa vacanakasa chʼusu puyanakasa paqallqu mara sañwa munaraki. Egiptonxa paqallqu maraw wal manqʼax achuni. Ukatxa paqallq mararakiw machʼax utjani’ sasa.

Ukatwa Joseyax Faraonar akham säna: ‘Mä suma amuytʼani chʼikhi jaqi uttʼayañamawa, aka paqallqu maran manqʼa apthapiñapataki. Ukhamatwa jaqinakax jani manqʼat jiwapkaniti uka paqallqu machʼa maranakanxa’ sasa.

Joseyan amuytʼatapasti Faraonatakixa wali askïnwa. Ukatsti Joseyaruw manqʼañ apthapiñapataki uttʼayäna. Joseyasti Egipto markan jachʼa jilïrit uttʼayatänwa, Faraonakiw jupatxa jilïrïnxa.

Kimsaqallqu maranak pasatatsti, machʼa maranxa, mä 10 chachanak jutirwa uñjäna. ¿Khitinakäpachas uk yattati? ¡Joseyan jilanakapawa! Jacob awkipawa Egiptor manqʼa layku khitanïna, kunattix Canaán uraqinxa manqʼax pistʼxänwa. Joseyasti jilanakaparux uñtʼasïnwa, ukampisa jilanakapax janiw Joseyar uñtʼapkänti. ¿Kunatsa? Kunattix Joseyax walja maranïxänwa, ukat mayja isitänwa.

Jilanakapax jupa nayraqatan altʼasipxañapäna uka samkapwa Joseyax amtasïna. Ukxa jiskʼäkasin samkasïna, ¿uka tuqit aka libron liytʼatam amttati? Ukatwa Joseyax amuytʼasïna Diosapuniw Egipto markarux mä amtampi khitaniskitu sasa. ¿Ukat Joseyax kamachpachänsa? Uk yatxataskakiñäni.