¿ABRAHAMAX kamachaskisa? Cuchillompiw wawapar jiwayañatak sarxataski. ¿Kunatsa? Nayraqatxa kunjamatsa Abrahamampi Sarampix wawanïpxäna uk yatxatañäni.

Amtañäni, Diosax mä wawanipxätaw sänwa. Janiw uka arux phuqaskaniti sañjamänwa, kunattix Abrahamas Saras chuymanïxapxänwa. Ukampis jan phuqasirjamanakax Diosatakix janiw chʼamäkiti, ukaruw Abrahamax atinisïna. ¿Ukax phuqasïnti?

Wawanipxätaw sas Diosax siskäna uka urutxa mä maraw pasxäna. Abrahamax 100 maranïxänwa Sarasti 90 maranïxarakïnwa, ukhaw Isaac sat wawanïxapxäna. ¡Diosan arsutapax phuqasïnwa!

Isaacax jachʼäxan ukhaxa Jehová Diosax Abrahaman iyawsäwip yantʼäna. ‘¡Abraham!’ sasaw jawsäna. Ukat Abrahamax ‘¡Akankasktwa!’ sasaw sarakïna. Ukat Diosax akham sänwa: ‘Isaac sapa yuqall wawamar irpxarusiwayma, ukat kawkïr qulltix nayax uñachtʼaykäma uka chiqan wawam luqtanita’ sasa.

¡Wawapax wali munatänwa, Abrahamax wal llakispachänxa! Amtañäni, Canaananwa wawanakamax jakasipxani sarakïns Diosaxä. ¿Isaacatï jiwaspänxa khitirak Canaán uraqin jakaspänsti? Abrahamax janiw sum amuykänti, ukhampachas Diosar iyawsaskakïnwa.

Qullur purisaxa, Abrahamax Isaacaruw chinunti ukat qala tawqat patxaruw wayxati. Ukatxa wawapar jiwayañatakiw cuchillo apsusi. Ukat ukaratpachaw Diosan angelapax artʼanïna: ‘¡Abraham, Abraham!’ sasa. ‘¡Jay!’ sarakïnwa Abrahamaxa.

Ukat Diosax akham sänwa: ‘Wawarux jan kuna jan walsa luramti, jichhasti yattwa nayar iyawsatamxa, sapa wawama nayar luqtanit sataxa janirakiw “janiw” sisktati’ sasa.

¡Abrahamax Diosatakix wali iyawsäwinïnwa! Jehová Diosatakixa janiw kunas chʼamäkiti sänwa chuymapanxa, Isaacarux jiwatanak taypitsa Jehová Diosax jaktayaspawa sänwa. Diosax janiw Isaacaru jiwayañap munkänti; ukatwa Diosax Abrahamataki mä uwija quqa quq taypir waxrat achuntayänxa. Ukatxa, uka uwij Isaac lanti luqtit sänwa.