Jehová Diosajja, israelitanakar yanaptʼañatakejj juezanakwa uttʼayarapïna, ukampis jupanakajj mä rey munapjjäna. Ukatwa Samuelur akham sapjjäna: ‘Taqe markanakaw reyinïpjje, nanakajj mä rey munapjjarakta’ sasa. Samuelutakejja ukham mayipjjatapajj janiw walïkänti. Ukatwa Jehová Diosar orasïna. Diosasti akham sarakïnwa: ‘Israelitanakajj janiw jumar jan munapktamti, jan ukasti nayaruw jan munapkituti. Ukhamajj akham sanim: “Mä reyinïpjjätawa, ukampis uka reyejj taqe kun mayipjjätam” sasa’. Ukhampachasa israelitanakajj akham sapjjänwa: ‘¡Janiw kunäkanisa! ¡Mä rey munapjjta!’ sasa.

‘Saúl sat mä jaqew nayrïr reyïni’ sasaw Jehová Diosajj Samuelur säna. Saulajj Samueluruw Ramá markan visittʼäna, ukhaw Saularojj aceitempi pʼeqepat warjjatasin reyïñapatak Samuelojj ajllïna.

Qhepatjja Samuelojj machaq reyir uñtʼayañatakiw israelitanakar tantachthapïna. Ukampis Saularojj inakiw taqe cheqan thaqapjjäna. ¿Kunatsa? Qʼepinak taypiruw jupajj imantasïna. Katjapjjäna ukhajja, irptanisaw marka nayraqatar saytʼayapjjäna. Taqenit sipansa jupajj jachʼa jaqënwa, suma uñnaqtʼani jaqerakïnwa. Samuelojj akham sänwa: ‘Jehová Diosan ajllitapar uñtanipjjam’ sasa. Israelitanakajj akham sasaw artʼapjjarakïna: ‘¡Saúl reyejj walja maranak jakpan!’ sasa.

Qalltanjja Saúl reyejj Samuelurusa Jehová Diosarusa istʼapunirïnwa. Qhepatjja janiw ukhamäjjänti. Mä kutejja, ‘sacrificionak loqtañatakejj suytʼitätawa’ sasaw Samuelojj Saular säna. Samuelojj janiw jankʼak purinkänti, ukatwa Saulajj sapaki sacrificio loqtäna. Ukampis Saulajj janiw sacrificio loqtañapäkänti. ¿Kunsa Samuelojj lurpachäna? Akham sänwa: ‘Jehová Diosarojj istʼañamänwa, kunatsa jan istʼkta’ sasa. ¿Saúl reyejj istʼasirïñ yateqpachänti?

Tiempompejja Saúl reyejj amalequitanakampi nuwasiriw saräna. Samuelojj jupar akham sänwa: ‘Taqeniruw jiwarayäta, janiw maynis jakañapäkiti’ sasa. Ukampis Saúl reyejj janiw Agag reyir jiwaykänti. Ukatwa Jehová Diosajj Samuelur akham säna: ‘Saulajj  nayat armasjjewa, janiw istʼjjetuti’ sasa. Samuelusti wal llakisïna, ukatwa Saular akham säna: ‘Jumajj janiw Jehová Diosar istʼjjtati, jupajj yaqha rey ajllisjjani’ sasa. Samuelojj sarjjañatak kutjtäna ukhajja, Saúl reyejj isipat katuntasisaw chʼiyaqäna. Samuelojj akham sarakïnwa: ‘Jehová Diosajj ukhamwa reyïñjja jumat apaqarakïtam’ sasa. Jehová Diosajj jupar munasiri jupar istʼiri yaqha reywa Saúl lantejj uttʼayañapäna.