Tiempompejja, israelitanakajj Jehová Diosar apanukusajj wasitat falso diosanakar adorjjapjjäna. Madianitanakajj paqallqo maranakaw israelitanakar uywanakap lunthatapjjäna, yapunakapsa qʼal tukjapjjarakïna. Ukatwa israelitanakajj qollunakar imantasipjjäna. Jehová Diosaruw yanaptʼa mayisipjjarakïna. Diosasti mä angelaruw khitanïna, Gedeón waynar akham sañapataki: ‘Jehová Diosaw ajllistam, jumajj chʼamani soldadoyätawa’ sasa. Gedeonajj sarakïnwa: ‘Janiw nayajj khitïktsa, ¿kunjamarak Israel markar salvästi?’ sasa.

¿Kunjamatsa Gedeonajj Jehová Diosan ajllitätap yatïna? Oraqer tʼarwa uchasaw Diosar akham säna: ‘Qharür alwatï tʼarwajj sullantani, ukampis oraqejj wañakïskani ukhajja, israelitanakar salvañataki nayar ajllitamwa yatëjja’ sasa. Qhepürojj cheqapuniw tʼarwajj chʼarañäna, ukampis oraqejj wañakïskänwa. Gedeonajj mayampwa Diosar akham säna: ‘Qharüru alwajj oraqejj sullantatäpan, ukampis tʼarwajj wañakïskpan’ sasa. Uka mayitapajj wasitat phoqasïna. Ukhamatwa Diosajj jupar ajllitap yatjjäna. Ukatwa madianitanakampi nuwasiñatak soldadonak tantachthapïna.

Jehová Diosajj Gedeonar akham sänwa: ‘Atipapjjañapatakejj nayaw israelitanakar yanaptʼäjja. Ukampis walja soldadöpjjatap laykojja, kapasakiw chʼamapampis  atipapkaspa ukham amuyapjjaspa. Ajjsarir soldadonakarojj utanakapar khitjjam’ sasa. Ukatwa 22.000 soldadonakajj sarjjapjjäna, 10.000 soldadonakakiw jiltʼapjjäna. Diosajj Gedeonar saskakïnwa: ‘Soldadonakajj waljäsipkakiwa. Jawirar irpam, ukan um umtʼapjjpan. Kawkïr soldadonakatï enemigojj jutiti janicha uk uñchʼukis umtʼapki ukanakaruw ajllïta’ sasa. 300 soldadonakakiw ukham umtʼapjjäna. Diosajja ‘uka 300 soldadonakakiw 135.000 madianit soldadonakar atipapjjani’ sasaw säna.

Uka arumajja Jehová Diosajj Gedeonar akham sänwa: ‘Madianitanakampi nuwasir sarañatakejj horasäjjewa’ sasa. Gedeonajj pututunakampi, ñeqʼet lurata jachʼa jarranakampi soldadonakar churäna, uka jarranak manqhanjja antorchanakaw utjäna. Ukatsti sarakïnwa: ‘Nayaruw uñtanipjjetäta, kuntï nayajj lurkäjja ukwa lurapjjarakïta’ sasa. Gedeonajj pututup tuktʼasïna, jarrap pʼakjarakïna, antorchapsti maysat maysaruw aytäna, akham sasa: ‘¡Nuwasiñajj Jehová Diosankiwa, Gedeonankarakiwa!’ sasa. Gedeonan 300 soldadonakapajj ukham lurapjjarakïna. Madianitanakajj wal sustjasipjjäna, maysar maysaruw loqher uñtat tʼijnaqapjjäna. Ukatjja jupanakkamaw nuwarasipjjäna. Ukhamatwa Diosajj enemigonakapar atipjañjja israelitanakar yanaptʼäna.