Jesusajj janiw usutanakarukejj qollkänti, ni jiwatanakarukis jaktaykänti, jan ukasti thaysa jallsa tʼakuyänwa. Mä qollun orasiskäna uka qhepatjja, Jesusajj Galilea qotaruw uñtäna, ukanjja thayaw wal sartäna. Apostolonakapajj thayampi jan apayasiñatakejj taqe chʼamampiw bote apañatak chʼamachasisipkäna. Ukatwa Jesusajj qollut saraqasajj boten ukar uma patjjnam saräna. Apostolonakapajj mä jaqer uma patjjan jutaskir uñjasajj wal sustjasipjjäna. Ukampis Jesusajj akham sänwa: “Nayäsktwa, jan ajjsarapjjamti” sasa.

Pedrosti sänwa: “Tata, jumästa ukhajja, uma patjjnam jutam sita” sasa. Jesusajj ‘jutam’ sasaw säna. Ukatwa Pedrojj botet saraqasajj wal thaytʼaniskäna ukhajj Jesusan ukar uma patjjnam saräna. Jesusar jakʼachasjjäna ukhajja, Pedrojj thayar uñtasajj wal ajjsarayasïna. Ukatwa umar jalantasajj ‘¡tata waysuta!’ sasin säna. Jesusajj amparat katthapisaw akham säna: ‘¿Kunatsa pächasta? ¿Janit Diosar confiykta?ʼ sasa.

Jesusampi Pedrompejj boteruw makatjjapjjäna, thayas ukaratpachaw tʼakurjjarakïna. ¿Apostolonakapajj kamsapjjpachänsa uk amuytati? “Jumajj Diosan Yoqapäskapuntawa” sasaw sapjjäna.

Jesusajj janiw uka mä kutikejj thayjjaru chʼamanïtap uñachtʼaykänti. Jan ukasti yaqha urojj apostolonakapampiw Jesusajj qota khurkatar botet sarasipkäna, Jesusajj bote qhepäjjanwa iktʼaskäna. Ukapachaw thayajj wal sartanïna. Oladanakajj boter wal jawqʼsüna, umas phoqantarakïnwa. Apostolonakajj jachʼat arnaqasisaw Jesusar sartayapjjäna: ‘¡Yatichiri, jiwarañäniwa! ¡Yanaptʼapjjeta!’ sasa. Jesusajja sartasajj akham sasaw qotar säna: “¡Amuktʼam! ¡Tʼakuram!” sasa. Ukaratpachaw thayasa qotasa tʼakurjjäna. Jesusajj apostolonakaparojj akham sasaw jisktʼäna: “¿Kawkiraki Diosar confiyatanakamasti?” sasa. Jupanakajj maynit maynikamajj akham sasipjjänwa: “Thayas qotas arunakap istʼakirakisä” sasa. Jupanakatï Jehová Diosaru Jesusaru confiyapjjaspänjja, janiw ajjsarayasipkaspänti ukwa apostolonakajj yateqapjjäna.